Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Manuriaigö—Edisi Wamaha’ö  |  Baŵa si Önö 2016

Böi Tobali Fangala Khöu Zala Nifalua Niha Bö’ö

Böi Tobali Fangala Khöu Zala Nifalua Niha Bö’ö

”Faoma mi’efa’ö zala nawömi khömi.”KOLOSE 3:13.

SINUNÖ: 53, 28

1, 2. Hadia nifa’ele’ö Zura Ni’amoni’ö sanandrösa ba wa’atedou nono mbanua Yehowa?

BA GULIDANÖ andre, so organisasi sangomasi’ö Yehowa ba somasi mamosumange ya’ia. Ya’ira andrö Samaduhu’ö Yehowa. Hewa’ae lö mo’ahonoa ira ba lafalua zala, i’oguna’ö gehehania Yehowa ba wame’e fanuturu lala ba nono mbanuania. Datafaigi hadia manö lala wame’enia howu-howu khöra.

2 Lö ato zamosumange Yehowa me döfi 1914. Hiza’i, ifahowu’ö Yehowa halöwö fanuriaigö nifaluara. Buania, so ha’uga zuta niha si no mamaha’ö ya’ira ba zindruhu sanandrösa ba Zura Ni’amoni’ö ba tobali ira Samaduhu’ö Yehowa. Sanandrösa ba wa’atedou andre, imane Yehowa, ”Fondrege zide-ide, ba tobali hönö, ba fondrege tou, ba tobali soi sabölö: Ya’odo, Yehowa zamangaösö dania, na baŵania!” (Yesaya 60:22) No alua zi no tefa’ele’ö andrö ba ginötö da’a. Hulö soi sebua nono mbanua  Yehowa. Abölö ato nono mbanua Yehowa moroi ba nono mbanua si so ba zi ha’uga soi.

3. Hewisa wangoroma’ö nono mbanua Lowalangi wa so khöra wa’omasi?

3 Sagötö ngaluo safuria andre, itolo nono mbanuania Yehowa ena’ö la’a’aro’ö wa’omasira khö nawöra zamösana. ”Lowalangi andrö ba no fa’omasi”, ba la’o’ö ia. (I Yohane 4:8, NW) I’o’ou niha solo’ö khönia Yesu ena’ö ’la’omasi’ö nawöra’. Imane nasa khöra, ”Ba da’ö aboto ba dödö niha fefu, wa no nifaha’ögu ami, na so khömi wa’omasimi nawömi.” (Yohane 13:34, 35) No la’oroma’ö ono mbanua Yehowa ba ginötö andre wa’omasi ba nawöra, hewa’ae alua wasuwöta ba ngawalö soi. Duma-dumania, me alua Wasuwöta Gulidanö II, so mato 55 zuta niha si no mate. Hiza’i, lö labunu niha ono mbanua Yehowa sagötö alua wasuwöta andrö. (Baso Mikha 4:1, 3.) Da’a zanolo ya’ira ena’ö ’lö horöra ba ndro niha fefu’.Halöwö Zinenge 20:26.

4. Hana wa ahöli-höli dödöda wa’atedou nono mbanua Yehowa?

4 Itugu monönö wa’ato nono mbanua Lowalangi hewa’ae so nudura sabölö ya’ia da’ö Satana. Ya’ia ”lowalangi zi sagötö tanö andre”. (II Korindro 4:4) Satana zamatörö organisasi politik hegöi media berita. Da’a ni’oguna’önia ena’ö tebato halöwö fanuriaigö turia somuso dödö. Hiza’i, lö a’ozu. I’ila Satana wa lö aratö ginötö nitehe khönia. Börö da’ö, iforege ena’ö tabato wamosumange Yehowa.Fama’ele’ö 12:12.

HADIA LÖ FARÖI NDRA’UGÖ NA SO ZALA NIFALUA NIHA BÖ’Ö?

5. Hana wa itaria la’afökhöi’ö dödöda niha bö’ö? (Faigi gambara ba wamobörö wamaha’ö.)

5 Aboto ba dödö nono mbanua Lowalangi wa moguna wangomasi’ö Lowalangi hegöi niha bö’ö. Imane Yesu, ”’Omasi’ö Zo’aya ya’ugö, Lowalangiu andrö, moroi si’aikö ba dödöu, nosou ma’asambua zangomasi’ö ya’ia, ba öhorigö gera-erau, wangomasi’ö ya’ia.’ Da’ö zebua goroisa, da’ö zi föföna. Ba sambua tö, si fakhili-khili khönia: ’Omasi’ö zahatö khöu, simane fa’omasiu ndra’ugö.’” (Matai’o 22:35-39) Hiza’i, ifatunö khöda Sura Ni’amoni’ö wa fefu niha oi lö mo’ahonoa börö me no ifalua horö Adamo. (Baso Roma 5:12, 19.) Itaria so zanguma’ö mazui samalua hadia ia zi tola mangafökhöi’ö tödöda ba mbanua niha Keriso. Na alua da’ö, hadia nifaluada? Hadia alö wa’omasida khö Yehowa? Hadia lö faröi ita khönia hegöi ba nono mbanuania? So ösa nono mbanua Lowalangi nitutunö ba Zura Ni’amoni’ö sanguma’ö mazui samalua si möi fangafökhö dödö niha bö’ö. Datafaigi hadia wamaha’önia khöda ba zalua andrö.

Na so ndra’ugö ba gotalua ndraono Gizara’eli me götö Eli hegöi iraononia, hadia nifaluau? (Faigi ngenoli si 6)

6. Hana wa tola tawa’ö wa lö mofozu wame’e Eli wotu ba ndraononia?

6 Duma-dumania Eli, ya’ia andre ere sebua ba ndraono Gizara’eli. Hiza’i, lalawa goroisa Yehowa ononia ono matua si darua. Imane Sura Ni’amoni’ö, ”Ba no si lö ngaroro ndraono Eli andrö, lö ba dödöra Yehowa.” (I Zamueli 2:12) I’ila Eli wa lö sökhi gamuata  ndraononia. Hiza’i, ha asala noa manö wame’enia fotu. Ba gafuriatania, ihuku Eli hegöi ononia si darua Yehowa. Aefa da’ö, tebai tobali ere sebua nga’ötö Eli sa’ae. (I Zamueli 3:10-14) Na so ndra’ugö me götö Eli andrö, ba ö’ila me lö itegu ndraononia me lafalua zi lö sökhi, hadia tobali fangala khöu da’ö? Hadia itugu awuwu wamatimö khö Yehowa irege öbato wamosumange ya’ia?

7. Hadia horö sebua nifalua Dawido, ba hadia nifalua Lowalangi?

7 Oya gamuata si sökhi khö Dawido. Andrö wa i’omasi’ö sibai ia Yehowa. (I Zamueli 13:13, 14; Halöwö Zinenge 13:22) Hiza’i, no irai ifalua horö sebua Dawido. Me möi fasuwö Guria, ihoröni ndronga Guria Dawido sotöi Mbaseba. Lua-luania, manabina Mbaseba. Lö omasi Dawido na so zangila nifaluania. Börö da’ö, i’o’ou Guria wamalukhaisi ya’ia ba i’alui lala ena’ö mangawuli Guria ba nomo. Itötöna Dawido ena’ö orudu Guria khö wo’omonia sotöi Mbaseba ba lamane niha ono si tumbu andrö nga’ötö Guria. Hiza’i, lö mangawuli Guria ba nomo. Andrö i’odödögö Dawido ena’ö mate Guria ba wasuwöta. Me no ifalua horö sebua, göna Dawido wangabu dödö sabölö-bölö hegöi ösi nomonia. (II Zamueli 12:9-12) Ihakhösi tödö ia Yehowa ba i’efa’ö zalania. I’ila wa omasi Dawido wamalua satulö. (I Razo 9:4) Na so ndra’ugö me luo da’ö, hewisa dödöu ba zi no ifalua Dawido andre? Hadia öbato wamosumange Yehowa?

8. (a) Hadia zala nifalua Wetero? (b) Hewa’ae no ifalua zala Fetero, hana wa lö iböhöli Yehowa wangoguna’ö ya’ia?

 8 Duma-duma Zura Ni’amoni’ö tanö bö’ö ya’ia da’ö Fetero. Yesu zofili ya’ia tobali sinenge. Hewa’ae simanö, itaria iwa’ö mazui ifalua zala Fetero. Duma-dumania, iwa’ö Fetero lö iröi Yesu hewa’ae laröi ia niha bö’ö. (Mareko 14:27-31, 50) Hiza’i, me lara’u Yesu, laröi ia fefu ira sinengenia, simanö göi Wetero. Aefa da’ö, tölu kali i’osilö’ögö Yesu. (Mareko 14:53, 54, 66-72) Maniasa sibai Wetero ba nifaluania andrö. Andrö wa i’efa’ö zalania Yehowa ba lö iböhöli wangoguna’ö ya’ia. Na samösa nifaha’ö Yesu ndra’ugö me luo da’ö ba ö’ila zi no ifalua Fetero, hadia öbato wa’afaduhu dödö khö Yehowa?

Tola faduhu dödöu wa hasambalö ifalua zatulö Yehowa

9. Hana wa faduhu dödöu wa hasambalö ifalua zatulö Lowalangi?

9 Moroi ba duma-duma andre ta’ila wa no irai lafalua zala ono mbanua Yehowa ba la’afökhöi’ö dödönia. Na alua da’ö iada’a, hadia nifaluau? Hadia öbato we’amöi ba gangowuloa ma öröi Yehowa hegöi ono mbanuania? Mazui, hadia ö’ila wa so wa’ahakhö dödö khö Yehowa, ba ibaloi ginötö na ifalalini gera-erania niha samalua sala? Itaria, so niha zamalua sala si lö mamalalini era-erara. Hadia faduhu dödöu wa i’ila Yehowa zalua andrö ba tola ifalua hadia ia ba ginötö si tefaudu? Na moguna, tola manö iheta niha andrö ba gangowuloa. Hadia faduhu dödöu wa hasambalö ifalua zatulö Yehowa?

BÖI FARÖI

10. Hewisa wamaigi Yesu zala nifalua Yuda banua Kariota hegöi Fetero?

10 Ba Zura Ni’amoni’ö, ato niha si lö faröi khö Yehowa hegöi ba nono mbanuania, hewa’ae no lafalua zala sebua niha ba zi fasui ya’ira. No ibe’e khöda duma-duma si sökhi Yesu. Me no aefa sara wongi i’andrö wanolo khö Namania, ifili 12 zinengenia. Hiza’i, so samösa moroi ba gotaluara zimanga mbölinia ya’ia da’ö Yuda banua Kariota. Baero da’ö, i’osilö’ögö ia göi Fetero. (Luka 6:12-16; 22:2-6, 31, 32) Lö itahigö Yehowa Yesu hegöi ira nifaha’önia hewa’ae no labe’e afatö dödönia. Aro wahuwusania khö Namania ba lö ibato wangai halöwönia. Börö da’ö, ibe’e khönia mbuala Yehowa, isusugi ia, aefa da’ö tobali ia Razo ba Mbanua zorugo.Matai’o 28:7, 18-20.

11. Hadia nifa’ele’ö Zura Ni’amoni’ö sanandrösa ba nono mbanua Yehowa ba ginötö andre?

11 Duma-duma Yesu andre zamaha’ö ya’ita ena’ö lö faröi khö Yehowa hegöi ba nono mbanuania. So mbörö wa tafalua da’ö. Tola ta’ila wa ibe’e Yehowa wanuturu lala ba nono mbanuania ba ngaluo safuria. Itolo ira ba wanuriaigö ba zi sagörö ulidanö. Ba ha ya’ira zamalua halöwö da’a. Sindruhu-ndruhu  wa so khöra wahasara dödö hegöi fa’omuso dödö börö me Yehowa zamaha’ö ya’ira. Imane Yehowa, ”Hiza, sa’iki-iki genonigu, ba wa’owua-wua dödö andrö.”Yesaya 65:14.

Lö khöda fa’atua-tua hegöi fa’atulö na taröi Yehowa hegöi ono mbanuania ha börö me so zamalua sala

12. Hewisa dödöda ba zala nifalua niha bö’ö?

12 Omuso sibai dödöda börö me ibe’e khöda wanuturu lala Yehowa hegöi fanolo ba wamalua ngawalö zatulö. Fabö’ö niha ba gulidanö nifatörö Zatana andre, lö khöra fa’ohahau dödö hegöi tötönafö ba zi so föna. Sindruhu-ndruhu lö khöda fa’atua-tua hegöi fa’atulö na taröi Yehowa hegöi ono mbanuania ha börö me so zamalua sala mazui sanguma’ö si lö atulö ba mbanua niha Keriso! Böi faröi ita khö Yehowa ba ta’o’ö wanuturu lala nibe’enia. Moguna göi tafaha’ö ita hewisa dödöda ba zala nifalua niha bö’ö ba hadia nifaluada.

HADIA ZINANGEA ÖFALUA?

13, 14. (a) Hana wa moguna ebolo dödöda ba niha bö’ö? (b) Hadia mbu’usa li si tebai ta’olifugö?

13 Hadia nifaluau na so ndra talifusöda sanguma’ö mazui samalua hadia ia zi möi fangafökhö dödöu? Ibe’e khöda mene-mene Sura Ni’amoni’ö, ”Böi alio-lio abao dödöu, me no barö doto zambö era-era so wa’abao dödö.” (Zangombakha 7:9) Fefu ita oi lö mo’ahonoa ba tafalua zala. Börö da’ö, böi tatötöna wa satulö manö niwa’ö ndra talifusöda hegöi nifaluara. Böi göi ta’era-era manö zala nifaluara. Na tafalua da’ö, tola manö lö khöda fa’omuso dödö ba wangai halöwö khö Yehowa. Töra-töra nasa awuwu wamatida ba taröi organisasi Yehowa. Lua-luania, lö ta’ila tafosumange Yehowa mazui lö khöda fanötöna fa’auri ba gulidanö si bohou.

14 Tobali, hewisa ena’ö lö faröi ndra’ugö ba wamosumange Yehowa hewa’ae so zangafökhöi’ö tödöu? Böi olifu’ö mbu’usa linia si möi fondrara dödö, ”Hiza sa, uwöwöi mbanua si yawa si bohou ba tanö si bohou, ba lö’ö sa’ae itörö tödö zi föföna andrö, lö’ö sa’ae i’angeragö niha!” (Yesaya 65:17; II Fetero 3:13) Na lö faröi ndra’ugö khö Yehowa, ibe’e khöu howu-howu ba zi no ifabu’u andrö.

15. Molo’ö Yesu, hadia zinangea tafalua na so zangafökhöi’ö tödöda?

15 Lö nirugida nasa ulidanö si bohou. Börö da’ö, na so zangafökhöi’ö tödöda, ta’angerönusi hadia zomasi Yehowa tafalua. Duma-dumania, imane Yesu, ”Na mi’efa’ö sa’ae zala niha, ba i’efa’ö göi khömi Amami andrö, si so ba zorugo. Ba na lö mi’efa’ö zala niha, ba lö’ö göi i’efa’ö khömi horömi Amami andrö.” Me isofu Fetero khö Yesu hadia ha ”irugi mewitu”  ta’efa’ö zala niha, imane Yesu, ”Uwa’ö khöu: tenga ha irugi zi mewitu, irugi zi mewitu ngafulu wa fitu.” Ifaha’ö ita Yesu ena’ö omasi ita ta’efa’ö zala niha bö’ö.Matai’o 6:14, 15; 18:21, 22.

16. Hadia duma-duma si sökhi nifalua Yosefo?

16 Tola göi tafaha’ö ita moroi ba duma-duma Yosefo na afatö dödöda ba nifalua niha bö’ö. Ha Yosefo faoma akhinia ono matua nono Yakobo moroi khö Rakhela. So dafulu nono Yakobo ono matua, hiza’i Yosefo zabölö i’omasi’ö. Da’a mbörö wa afökhö dödöra khö Yosefo. Fatuwu sibai ira khönia, andrö la’amawa ia tobali sawuyu ba ndrawa Miserai. Ha’uga fakhe aefa da’ö, ifataro ia razo ndrawa Miserai tobali niha numero dua sebua kuaso ba mbanua da’ö börö me toröi-röi ba dödönia halöwö si sökhi nifalua Yosefo. Aefa da’ö, möi ndra talifusönia ba danö Miserai wowöli gö börö me baŵa lofo. Me falukha ira khö Yosefo, lö la’ila haniha ia hiza’i, i’ila haniha ira. Hewa’ae lö sökhi gamuatara khö Yosefo ba zi lalö, lö ihuku ira Yosefo. Tobali, itandraigö ira ena’ö i’ila hadia sindruhu-ndruhu no labulö’ö gamuatara. Me i’ila Yosefo wa no lafalalini gera-erara, ifatunö khöra wa ya’ia andrö talifusöra ba ibe’e wondrara dödö. Imane, ”Andrö böi mibusi dödömi; urorogö ami ba iraonomi.”I Moze 50:21.

17. Hadia zomasi’ö öfalua na so zamalua sala khöu?

17 Böi olifu ndra’ugö sagötö lö so’ahonoa ita, tola manö ta’afökhöi’ö dödö niha. Na so zangafökhöi’ö tödöu, o’ö mene-mene Zura Ni’amoni’ö. Andrö khönia ena’ö i’efa’ö zalamö, ba mi’atulö’ö ami. (Baso Matai’o 5:23, 24.) Omasi ita na la’efa’ö zalada niha bö’ö. Andrö moguna tafalua zimane da’ö. Imane khöda Kolose 3:13 wa moguna tabologö dödöda khö nawöda ba faoma ta’efa’ö zala nawöda simane fangefa’ö Yehowa khöda. Na ta’omasi’ö ndra talifusöda, lö itörö-törö tödöda zala si no lafalua ba zilalö. (I Korindro 13:5) Na ta’efa’ö zalara, i’efa’ö göi zalada Yehowa. Börö da’ö, na so zamalua sala, ya so khöda wa’ahakhö dödö khöra simane Amada Yehowa, sahakhö tödö khöda.Baso Zinunö 103:12-14.