Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Manuriaigö—Edisi Wamaha’ö  |  Baŵa si Öfa 2016

 WAÖ-WAÖ WA’AURI

Me Mböröta Biarawati, Iada’a Samosumange Lowalangi

Me Mböröta Biarawati, Iada’a Samosumange Lowalangi

HA’UGA fakhe silalö, mofönu nakhigu Araceli ba mu’ao ia, ”Böi fahuo-huo khögu sa’ae. Lö omasido ufondro-ndrongo fefu zanandrösa ba agamamö. Alangu dödögu wamondrongo. Fatuwudo khöu!” Afökhö sibai dödögu ba wehedenia andrö. Iada’a no 91 fakhe ndröfigu, ba lö olifudo wehedenia. Hiza’i, simane niwa’ö ba zura Zangombakha 7:8, ”Sökhi lua-lua hadia ia, moroi ba mbörötania.”Felisa.

Felisa: Ba Spanyol tumbu ndra’o ba ya’aga niha si to’ölö manö. Faböbö ndra’aga ba agama Katolik ba mamati sibai ndra’aga ba da’ö. So 13 ndra talifusöma si no tobali pastor mazui sohalöwö ba gereja. Pastor zibayagu ba guru ia ba zekola Katolik. Me mate ia, ifotöi ia Paus John Paul II tobali niha ni’amoni’ö. Halöwö bapagu mamözi si’öli, ba mamagu sohalöwö ba danö. Dawalu ndra’aga ndraono, ba ya’o zia’a.

Kabera: Asrama Zaragoza ba Spanyol; kambölö: Sura Ni’amoni’ö Nácar-Colunga

Me 12 fakhe ndröfigu, alua wasuwöta ba gotalua mbanua si so ba Spanyol. Me no aefa fasuwö, labe’e ba gurunga bapagu börö me lö tefaudu khö ndra samatörö mbua gera-erania sanandrösa ba politik. Lua-luania, abua khö mamagu ba wanga’asogö soguna khöma ba nomo. Börö da’ö, ifatenge ndra akhigu si datölu, Araceli, Lauri, hegöi Ramoni, toröi ba asrama biarawati si so ba mbanua Bilbao. Ba da’ö tola tebönökhi zoguna khöra.

Araceli: Me luo da’ö, 14 fakhe ndröfigu, Lauri 12, ba Ramoni 10 fakhe. Omasiga falukha ba nösi nomoma. Halöwöma ba asrama mangehaogö nahia si no ta’unö. Dua fakhe aefa da’ö, lafatengega ira biarawati ba asrama sabölö ebua si so ba Zaragoza ba wondrorogö niha si no agatua. Marase sibai ndra’aga ba wangehaogö naha nawu ena’ö böi ta’unö.

Felisa: Me findra ndra akhigu ba Zaragoza, lafatenge göi ndra’o ba da’ö ira mamagu faoma sibayagu si no tobali pastor. Omasi ira na aröu ndra’o ba ndra matua somasi khögu. Omasido göi toröi ba asrama börö me u’omasi’ö Lowalangi. Ero ma’ökhö möido ba gereja ba omasido tobali  misionaris Katolik simane gasiwagu si toröi ba Afrika.

Ba asrama, lö u’ila ufalua zomasi dödögu. Lö lafarou ndra’o ira biarawati ba wangai halöwö Lowalangi ba soi bö’ö, simane ni’era-eragu. Döfi aefa da’ö, mangawulido ba mbanuama ba urorogö zibayagu. Ubabaya halöwö ba nomo, ba mafalua wangandrö Rosario ero bongi. Omasido göi uhaogö mbunga si so ba gereja, baru nadu Maria hegöi mbaru ”niha ni’amoni’ö”.

Araceli: Fawu’usaligu si oföna ba wa’atobali biarawati ufa’ema me so ndra’o ba Zaragoza. Aefa da’ö, lahalö gangetula ira biarawati ena’ö lafabali ndra’o khö ndra talifusögu. Lafatenge ndra’o ba asrama si so ba Madrid, Lauri ba mbanua Valencia, ba toröi Ramoni ba Zaragoza. Fawu’usaligu si mendrua ufa’ema me so ndra’o ba Madrid. Ato niha zi toröi ba asrama andrö, simane iraono sekola hegöi niha sagatua. Oya halöwö nifalua ba da’ö, ba ruma saki asrama mohalöwödo.

Omasido sibai tobali biarawati. Uwalinga mabe’e ginötöma ba wombaso hegöi ba wamaha’ö ya’aga ba Zura Ni’amoni’ö. Hiza’i, afatö dödögu. Samösa lö sangoguna’ö Sura Ni’amoni’ö mazui fahuhuo sanandrösa khö Lowalangi hegöi Yesu. Ufaha’ödo ba li Latin, hegöi fa’auri ”niha ni’amoni’ö” ba Katolik ba mafosumange nadu Maria. Abölö oya ginötö ni’oguna’öma ba wohalöwö.

Ibörötaigö so khögu wa’aombö dödö ba fa’abu dödö. Moroi na mohalöwödo ena’ö kayo niha bö’ö, abölö sökhi na u’alui gefe ba wanolo ösi nomogu. Fahuhuodo khö zokhö asrama, ufatunö khönia wa omasido mofanö. Hiza’i, ikusido ba mbate’e. Iwalingagö me no ifalua da’ö lö sa’ae edöna ndra’o wofanö.

Latehegö khögu ira biarawati we’amöi baero ba mbate’e. Hiza’i, me la’ila wa omasido uröi asrama, lakusido zui ba mbate’e. No tölu kali lafalua da’a, ba lamane khögu na omasi’ö mofanö moroi ba da’a, sura zura andre, ”Ulau mofanö börö me abölö omasido wamosumange Satana moroi na Lowalangi.” Tokea ndra’o, omasido sibai mofanö hiza’i lö omasido usura zura simane da’ö. Ba gafuriatania ufatunö khö pastor hadia zalua. I’andrö khö uskup ena’ö lafangawulido ba asrama si so ba Zaragoza. Ha’uga waŵa aefa da’ö, awena latehegö khögu wofanö. Lö ara aefa da’ö, laröi asrama ira Lauri faoma Ramoni.

BUKU SAMAWUKAISI YA’AGA

Felisa

Felisa: Lö ara aefa da’ö, mangowalu ndra’o ba toröiga ba Cantabria, sambua provinsi si so ba Spanyol. Lö uböhöli we’amöi ba gereja. Samuza  inötö me hari Migu me möido ba gereja, mu’ao pastor si fao fönu imane, ”Faigi mbuku da’a!” Iforoma’ö khöma mbuku Kebenaran yang Membimbing kepada Hidup yang Kekal. Imane, ”Na so zame’e khöu mbuku da’a, be’e khögu ia mazui tibo’ö manö!”

Lö hadöi khögu mbuku da’ö, hiza’i omasido na so khögu. Ha’uga hari aefa da’ö, möi ba nomogu darua ndra alawe, ya’ira andrö Samaduhu’ö Yehowa ba labe’e khögu mbuku da’ö, ba ero bongi ubaso ia. Me ifuli möi ira ba nomo, lasofu khögu hadia omasido ufaha’ö ndra’o ba Zura Ni’amoni’ö ba umane omasido.

Buku Kebenaran

Omasido u’omusoi’ö dödö Lowalangi. Ufaha’ödo ba zindruhu sanandrösa khö Yehowa ba itugu u’omasi’ö ia. Omasido ututunö ba niha sanandrösa khönia. Tebayagö ndra’o idanö me döfi 1973. Ero so ginötö fahuhuodo ba nösi nomogu sanandrösa ba zindruhu. Hiza’i, lö fao dödöra mendrua manö nakhigu Araceli. Lamane wa fasala zi no ufaduhusi tödö andrö.

Araceli: Lö sökhi gamuata niha khögu me so ndra’o ba asrama. Börö da’ö, asese mofönudo ba lö ohahau dödögu ba agamagu. Hiza’i, lö uböhöli we’amöi ba gereja ero Migu ba ufalua wangandrö Rosario ero ma’ökhö. Omasido aboto ba dödögu Zura Ni’amoni’ö ba u’andrö wanolo moroi khö Lowalangi. Ifatunö khögu Felisa hadia zi no ifaha’ö ya’ia. Omuso sibai dödönia ba zi no ifaduhusi tödö andrö. Hiza’i molo’ö ya’o, ya’ia andrö mane zowöhö mowa. Lö manö fao dödögu ba niwa’önia.

Araceli

Ufulido ba Madrid, ulau mohalöwö ba mangowaludo. No ha’uga fakhe unehesi niha sowölö-ölö we’amöi ba gereja. Hiza’i, lö lafalua ba wa’aurira wamaha’ö Yesu. Börö da’ö ubato we’amöi ba gereja. Lö sa’ae ufaduhusi tödö ”niha ni’amoni’ö” mazui alitö narako ba lö fao dödögu wa tola la’efasi horöda ira pastor. Utibo’ö fefu nadu so’amakhaita ba agamagu. Lö u’ila na atulö nifaluagu andre. Afatö sibai dödögu ba mangandrödo khö Lowalangi, ”Omasido u’ila haniha ndra’ugö. Tolodo!” Itörö tödögu no ha’uga kali latoko-toko mbawandruhö nomogu ira Samaduhu’ö Yehowa ba lö irai ubokai börö me lö faduhu dödögu ba agama.

 Akhigu Lauri toröi ba Prancis ba Ramoni ba Spanyol. Me döfi 1980, labörögö lafaha’ö ira ba Zura Ni’amoni’ö khö ndra Samaduhu’ö Yehowa. Faduhu dödögu, hulö simane Felisa lö la’ila wa faya zi no lafaha’ö ya’ira. Aefa da’ö, falukhado khö Angelines si faola omo khögu ba fahuwu ndra’aga. Ya’ia göi Samaduhu’ö Yehowa. No ha’uga kali lasofu-sofu khögu darua ira fo’omonia hadia omasido na lafaha’ö ndra’o ba Zura Ni’amoni’ö. La’ila wa omasido sibai aboto ba dödögu Zura Ni’amoni’ö hewa’ae lö ba dödögu agama. Ba gafuriata umane khöra, ”Lau, omasido. Hiza’i, awena ufaha’ödo na Sura Ni’amoni’ögu ni’oguna’öda.” So khögu Zura Ni’amoni’ö Nácar-Colunga.

SURA NI’AMONI’Ö ZANGOSAMBUA’Ö YA’AGA

Felisa: Me tebayagö ndra’o idanö me döfi 1973, so mato 70 ndra Samaduhu’ö Yehowa ba Santander, ibu kota Cantabria. Matörö moto sewa ba wanuriaigö ba zi ha’uga ngaotu mbanua si so ba provinsi andrö. Aefa da’ö, matörö moto side-ide we’amöi ba mbanua misa.

Ba zi ha’uga fakhe, ato niha nifaha’ögu ba Zura Ni’amoni’ö ba 11 moroi ba gotaluara zi no tebayagö idanö. Sabölö ato nifaha’ögu ya’ia da’ö Katolik. Moguna so khögu wa’ebolo dödö ba wamaha’ö ya’ira. Hulö simane ya’o meföna, moguna göi ginötö ena’ö aboto ba dödöra wa sala zi no lafaduhusi tödö. Faduhu dödögu wa ha Sura Ni’amoni’ö ba eheha Yehowa zi tola mombulö’ö fangera-ngera niha hegöi fa’aboto ba dödönia sanandrösa ba zindruhu. (Heberai’o 4:12) Me mböröta folisi wo’omogu Bienvenido, hiza’i tebayagö ia idanö me döfi 1979. Ibörögö tefaha’ö mamagu ba Zura Ni’amoni’ö lö ara fatua lö mate ia.

Araceli: Me ubörögö ufaha’ödo ba Zura Ni’amoni’ö khö ndra Samaduhu’ö Yehowa, sindruhunia lö faduhu dödögu khöra. Hiza’i, me itugu numalö ginötö ibörögö faduhu dödögu. Tenga ha asala lafaha’ö niha ba Zura Ni’amoni’ö, tobali lafalua göi ba wa’aurira. Ibörögö mamati ndra’ö khö Yehowa hegöi ba Zura Ni’amoni’ö ba itugu ohahau dödögu. Niha si faola omo khögu la’ila wa no fabö’ö gamuatagu ba lamane khögu, ”He Araceli, böi heta ndra’ugö ba lala si no öfili andrö!”

Itörö tödögu me mangandrödo, ”Saohagölö Yehowa me lö öröi ndra’o ba me öbe’e ginötö khögu ba wangalui fa’aboto ba dödö ba Zura Ni’amoni’ö.” U’andrö göi wa’ebolo dödö khö ga’agu Felisa börö me no irai ube’e wehede safökhö khönia. Iada’a moroi na fabu’a-bu’a ndra’aga, abölö omasiga fahuhuo sanandrösa ba Zura Ni’amoni’ö. Tebayagö ndra’o idanö me döfi 1989, me luo da’ö 61 fakhe ndröfigu.

Felisa: Iada’a 91 fakhe ndröfigu. No mate wo’omogu ba lö oya halöwö si tola ufalua sa’ae. Hiza’i, lö ubato ba wombaso Sura Ni’amoni’ö ero ma’ökhö, möido ba gangowuloa hegöi ba wanuriaigö gofu hawa’ara zi tola ndra’o.

Araceli: Te börö me biarawati ndra’o meföna, andrö wa omasido fahuhuo khö ndra pastor hegöi khö ndra biarawati sanandrösa khö Yehowa. Ato zomasi fahuhuo khögu ba lahalö mbuku hegöi majalah. Lö olifudo so samösa pastor si fahuhuo khögu. Ba zi ha’uga menit, fao dödönia ba niwa’ögu. Imane khögu, ”Hadia nifaluagu ba wa’alawa ndröfigu andre? Hadia niwa’ö nösi gereja hegöi ösi nomogu dania?” Umane khönia, ”Ba hadia göi niwa’ö Lowalangi?” I’ila wa atulö niwa’ögu ba u’ila wa abu dödönia. Hiza’i, ata’u ia ba wangai angetula.

Lö irai olifudo me iwa’ö fo’omogu wa omasi ia fao khögu we’amöi ba gangowuloa. Me awena möi ia ba gangowuloa 80 fakhe ndröfinia. I’otarai da’ö, lö irai ibato we’amöi ba gangowuloa. Ifaha’ö ia ba Zura Ni’amoni’ö ba ibörögö möi ia manuriaigö. Oya zi tebai u’olifuagö me möiga manuriaigö. Mate ia dua waŵa fatua lö tebayagö ia idanö.

Felisa: Me ubörögö ufosumange Yehowa, fatuwu ndra akhigu si datölu khögu. Hiza’i, ba gafuriatania omasi ira tefaha’ö ba zindruhu. No sambua fa’omuso dödö da’a ba wa’aurigu. Aefa da’ö, asese owuloga ba fahuhuo sanandrösa khö Lowalangi ni’omasi’öma sotöi Yehowa hegöi ba Daromalinia! Ba gafuriatania, mafosumange Yehowa. *

^ par. 29 Döfi Araceli 87, Felisa 91, ba Ramoni 83. Lö faröi ira ba wamosumange Yehowa. Mate Lauri me 1990 ba lö göi si faröi ia khö Yehowa.