Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Manuriaigö—Edisi Wamaha’ö  |  Baŵa si Öfa 2016

Hadia Simane Namo Mbanua Halöwö Fanuriaigö Nifaluamö?

Hadia Simane Namo Mbanua Halöwö Fanuriaigö Nifaluamö?

MOGUNA sibai halöwö fanuriaigö nifaluada ba tenga zaya-zaya gölö. Hiza’i, lö fefu aboto ba dödö niha halöwö fanuriaigöda andre. Hewa’ae so niha sadöni dödö ba niwa’ö Zura Ni’amoni’ö, lamane tödöra wa lö moguna lafaha’ö ira khöda ba Daromali Lowalangi.

Duma-dumania Gavin. Asese möi ia ba gangowuloa ba Balai Kerajaan. Hiza’i, lö omasi ia na lafaha’ö ba Zura Ni’amoni’ö. Itutunö Gavin wa ha ma’ifu ni’ilania sanandrösa ba Zura Ni’amoni’ö ba lö omasi ia na so zangila wa ha simane da’ö wa’aboto ba dödönia. Ata’u ia na la’andrö ena’ö faböbö ia ba zi sambua agama, ba lö omasi ia lafaelungu. Hewisa molo’ö ya’ugö? Hadia tola tetolo Gavin andrö? Angeraigö hadia lua-lua Zura Ni’amoni’ö ba wa’auri niha. Imane Yehowa ba ndraono Gizara’eli, ”Yamowöi hulö namo wehedegu, ya simane teu ba ndru’u danö.” (V Moze 31:19, 30; 32:2) Datafaha’ö ita sanandrösa ba namo mbanua ba hadia gamakhaitania ba halöwö fanuriaigö nifaluada ena’ö te’orifi ’fefu niha’.I Timoteo 2:3, 4.

 HEWISA WA HULÖ NAMO MBANUA HALÖWÖ FANURIAIGÖ NIFALUADA?

No ohau-hau namo andrö. Namo andrö ngawua nidanö satoru moroi ba dalu mbanua börö zau si no tefarahu ba nangi. Hewisa wehede Yehowa ’mowöi hulö namo’? Sökhi wahuhuosania ba nono mbanuania ba ihaogö wanguma’ö si fao fa’omasi. No ta’o’ö ia na ta’osinangegö hadia nifaduhusi tödö niha bö’ö. Tafarou ira ena’ö la’angeraigö ba lahalö samösa gangetula. Na ta’ame’egö tödö ira, alio latema duria nifa’emada ba mofozu halöwö fanuriaigö nifaluada.

Möi fangokafu dödö namo mbanua. Fanuriaigöda tola möi fangokafu dödö niha na ta’angeraigö ngawalö lala si tola tafalua ba wanolo niha bö’ö ena’ö la’ila zindruhu. Chris, si oföna manguma’ö khö Gavin ena’ö ifaha’ö ia ba Zura Ni’amoni’ö, lö ifaso Gavin ena’ö itema wamaha’ö andrö. Itandraigö i’alui lala ena’ö ohahau dödö Gavin fahuhuo sanandrösa ba Zura Ni’amoni’ö. Ifatunö Chris khö Gavin wa so duria si sökhi sinangea la’ila ba Zura Ni’amoni’ö. Da’a zi möi fanolo khönia ena’ö i’ila wa moguna sibai gangowuloa andrö. Itutunö Chris wa fama’ele’ö moroi ba Zura Ni’amoni’ö zame’e fa’afaduhu dödö khö Gavin wa Sura Ni’amoni’ö andrö no sindruhu. Börö da’ö, lafadunö-dunö hewisa wa’alua wama’ele’ö andrö. So wa’ohahau dödö khö Gavin ba zi no lafatunö. Ba gafuriatania, omasi ia lafaha’ö ba Zura Ni’amoni’ö.

Moguna sibai namo mbanua ba wa’auri. Tola manö lö moteu mato ha’uga waŵa na alua mbaŵa lökhö ba mbanua Gizara’eli. Na lö namo mbanua, aleu ba mate zinanö. No ifa’ele’ö Yehowa wa ba ginötöda andre göi tola alua mbaŵa lökhö. Owökhi dödö niha ”ba wamondrongo li Yehowa”. (Gamosi 8:11) Ifabu’u wa niha nibayoini ’tobali timba namo mbanua moroi khö Yehowa’ na laturiaigö duria somuso dödö sanandrösa ba Mbanua Lowalangi nituhini ”mbiri-biri bö’ö”. (Mikha 5:6; Yohane 10:16) Turia nifa’emada no buala moroi khö Yehowa nibe’enia ba niha sowökhi tödö ba zindruhu. Hadia ta’ame’egö tödö duria andrö?

No howu-howu namo andrö moroi khö Yehowa. (V Moze 33:13) Tola tobali howu-howu halöwö fanuriaigö nifaluada mazui buala ba niha somasi mamondrongo. No sambua buala khö Gavin me no itema wamaha’ö moroi ba Zura Ni’amoni’ö börö me da’ö zanolo ya’ia ba wanöndra fanema li moroi ba zinofu-nofunia. Alio tedou ia ba wamati ba tebayagö ia idanö. Iada’a fao ia khö wo’omonia Joyce ba wanuriaigö Mbanua Lowalangi.

Laturiaigö Mbanua Lowalangi ira Samaduhu’ö Yehowa ba zi sagörö ulidanö

EBUA MBÖLI HALÖWÖ FANURIAIGÖU

Na tafagölösi halöwö fanuriaigö nifaluada simane namo mbanua, tola aboto ba dödöda wa moguna sibai falulu fohalöwö ita ba wanuriaigö. Hewisa wa tola? Na mangozara namo mbanua satoru ba danö, tola manö ha ma’ifu zi tola ibasöi. Hiza’i, na so mato ha’uga zuta namo mbanua, tola abasö fefu zi so ba danö. Simanö göi, na ha ya’ita zi möi manuriaigö, tola manö ambö mo’eluaha. Hiza’i, börö me falulu fohalöwö nono mbanua Yehowa si ha’uga zuta fa’ato, tola teturiaigö duria somuso dödö ”ba niha fefu”. (Matai’o 24:14) Hadia tola tobali howu-howu ba niha bö’ö halöwö fanuriaigö nifaluada moroi khö Yehowa? Tola. Turia nifa’emada hulö simane namo mbanua, no ohau-hau, möi fangokafu dödö, ba moguna sibai ba wa’auri!