Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Manuriaigö—Edisi Wamaha’ö  |  Baŵa si Sara 2016

 TUHO SI’OFÖNA | HANA WA MOGUNA TATÖRÖ ZINDRUHU?

Falömanörö Sindruhu—Lua-Luania Khöu

Falömanörö Sindruhu—Lua-Luania Khöu

”Itaria lö tatörö zindruhu ena’ö te’efa’ö ita moroi ba gabula dödö.”—Samantha, Afrika Selatan.

Hadia fao dödöu ba wehedenia andrö? Fefu ita oi tatörö gabula dödö simane salua khö Samantha. Na adöni dödöda ba wamalua falömanörö sindruhu, da’ö zangoroma’ö haniha ita zindruhunia. Duma-dumania, ha börö me lö omasi ita aila, tola manö lö tatörö zindruhu. Hiza’i, na no oroma zindruhu, tola manö so lua-luania. Datafaigi atö.

IFAKIKO WA’AFADUHU DÖDÖ FALÖMANÖRÖ SINDRUHU

So wahuwusa na so wa’afaduhu dödö. Na faoma faduhu dödö zi samösa niha khö nawönia, lö khöra fanahö-nahö dödö. Hiza’i, lö i’anemai so wa’afaduhu dödö. Tola itugu aro wa’afaduhu dödö na oya labe’e ginötöra fariawö, latörö zindruhu na fahuhuo ira, ba lö khöra fakhögusa. Hewa’ae ha sakali lö latörö zindruhu, tola manö tekiko wa’afaduhu dödö. Na no aetu wa’afaduhu dödö abua wanga’azökhi sa’ae.

Hadia no irai ilimo ndra’ugö si fahuwu khöu? Hewisa dödöu? Aboto ba dödöma, te afatö dödöu, mazui ömane dödöu wa no faröi ia khöu. Faduhu dödöda wa tola ifakiko dane-dane wahuwusa si sökhi amuata falömanörö sindruhu.

ITUGU MONÖNÖ WALOMANÖRÖ SINDRUHU

Molo’ö samösa profesor ekonomi ba University of California sotöi Robert Innes, no i’ila wa ”falömanörö sindruhu hulö fökhö salio göna ba niha”. Mu’amaedolagö gamuata falömanörö sindruhu andrö hulö dungö—itugu asese fariawö ndra’ugö ba niha si lö manörö sindruhu, itugu ”adöni dödöu” wamalua amuata simane da’ö.

Hewisa ena’ö lö öfalua gamuata falömanörö sindruhu? Tola itolo ndra’ugö Sura Ni’amoni’ö. Datafaigi goi-goi moroi ba Zura Ni’amoni’ö.