Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Manuriaigö—Edisi Wamaha’ö  |  Baŵa si Walu 2017

 MOROI BA ARSIPDA

”Hawa’ara So Khöda Zui Kebaktian?”

”Hawa’ara So Khöda Zui Kebaktian?”

SAMIGU fatua lö ahori mbaŵa si Felezara 1932, lafasa wandru lalu lintas ba Mexico City, sambua mbanua sato niha. Töra sazuta niha si so ba da’ö. Hiza’i, aefa da’ö, so danö bö’ö zame’e mohi’a dödö niha. Ato ndra wartawan ba stasiun kereta api no lahenaigö kamera ba labalo-baloi dome si tohude si lö aratö tohare. Haniha ia? Ya’ia Joseph F. Rutherford, presiden Lembaga Menara Pengawal. Ira Samaduhu’ö Yehowa si so ba mbanua da’ö, labalo-baloi göi wa’atohare dalifusöda Rutherford, si tohare ba wangondrasi kebaktian si tölu hari.

Imane The Golden Age, ”Hasambalö wa tobali sejarah si lö irai mu’olifugö kebaktian da’a” ba wamazaewe sindruhu ba Meksiko. Hiza’i, ha kebaktian side-ide da’a, ha 150 niha zangondrasi. Hadia mbörö wa tohude sibai kebaktian andre?

Fatua lö nifalua kebaktian da’a, ha ma’ifu tefazaewe zindruhu ba Meksiko. I’otarai 1919, so kebaktian side-ide nifalua ba da’ö, hiza’i ba ndröfi aefa da’ö itugu alö wa’oya mbanua niha Keriso. Me labokai gödo ndraha ba Mexico City me döfi 1929, hulö itugu sökhi zalua, hiza’i so nasa daha-taha sinangea mu’asiwaisi. Ibe’e wanuturu lala organisasi khö ndra kolportir, lafotöi ia iada’a perintis, ena’ö lö fabisnis ira ba wanuriaigö. So samösa kolportir zofönu irege iröi zindruhu ba ifazökhi ngawawa wamaha’ö Zura Ni’amoni’ö samösa. Ba ginötö da’ö göi, so pengawas cabang zamalua si lö tefaudu ba goi-goi Zura Ni’amoni’ö irege moguna mufalalini ia. Andrö wa moguna wamarou dödö khö ndra Samaduhu’ö si lö faröi ba Meksiko.

Sagötö we’aso dalifusöda Rutherford, ifa’ema dombua huhuo famarou dödö ba kebaktian ba ifa’ema lima ngawua huhuo sebua ba radio ba wamarou dödö ndra talifusöda si lö faröi. Da’a zi oföna sibai mu’oguna’ö radio ba wamazaewe turia somuso dödö ba Meksiko. Me no aefa kebaktian, lafili samösa pengawas cabang si bohou ba wame’e fanuturu lala ba halöwö Mbanua Lowalangi. Owölö-ölö sibai ndra Samaduhu’ö si so ba da’ö, ba börö me ifahowu’ö ira Yehowa, tola latohugö wanuriaigö.

Kebaktian ba Mexico City me döfi 1941

Ba ndröfi aefa da’ö, 1933, so dombua kebaktian nifalua ba soi da’ö, sambua ba Veracruz ba sambua ba Mexico City. Laforege ira talifusöda ba wohalöwö ba mbanua da’a, ba latema mbua si sökhi. Duma-dumania, me 1931 so 82 zanuriaigö ba da’ö. Me 1941, monönö fulu kali winaeta! So mato 1.000 niha si möi ba Kebaktian Teokratis ba Mexico City me döfi 1941.

 ”NGAHÖNÖ NIHA BA LALA”

Me 1943, ira Samaduhu’ö si so ba da’ö ibörögö la’ombakha’ö Kebaktian Teokratis ”Soi si No Te’efa’ö”, nifalua ba zi 12 mbanua ba Meksiko. * (Faigi nisura ba gahe zura.) Ba wamalua da’ö, la’oguna’ö papan sandwich. Tefazökhi ia moroi ba zi dombua papan iklan ba latawi ba galisi, sambua zangotahögö föna ba sambua zangotahögö furi. La’oguna’ö lala simane da’ö ira Samaduhu’ö ba wangombakha kebaktian nifaluara i’otarai ndröfi 1936.

Nga’örö majalah ba ndröfi 1944 sangoroma’ö ndra talifusöda ira matua sangoguna’ö papan sandwich ba Mexico City

Fangoguna’ö papan sandwich ba wanuriaigö sindruhu-ndruhu mofozu ba Mexico City irege isura majalah La Nación sanandrösa khö ndra Samaduhu’ö sangondrasi kebaktian, ”Ba ngaluo siföföna, la’andrö khöra ena’ö itugu ato lakaoni niha. Ba ngaluo aefa da’ö, ambö nahara nahia si no muhenaigö.” Lö omasi Gereja Katolik ba zalua andrö, irege lasaisi ndra Samaduhu’ö. Hiza’i, lö ata’u ndra talifusöda. Lö mamalö la’ombakha’ö sanandrösa ba kebaktian. Ifatunö nasa artikel tanö bö’ö ba La Nación, ”La’ila ira sambua banua.” Ira talifusöda ”tobali ira simane papan ’sandwich’ sowaö-waö”. Ba artikel da’ö, iforoma’ö koda ndra talifusöda si so ba lala ba Mexico City. No musura ba gahe gambara, ”Ngahönö niha ba lala”.

KASO ”SABÖLÖ SÖKHI BA SOMBUYUMOROI BA DALU ZALO”

Ba dröfi da’ö, ato ndra Samaduhu’ö Yehowa zamalua famorege ena’ö tola la’ondrasi zi hauga kebaktian nifalua ba Meksiko. Ato zi tohare moroi ba mbanua saröu sibai, si lö hadöi kereta api mazui lala sebua. Isura sambua mbanua niha Keriso, ”Hasambua jalur komunikasi ni’oguna’ö ya’ia da’ö mesin telegraf.” Andrö wa moguna latörö galide mazui latörö tanö ba zi hauga hari fatua lö latörö kereta api ba we’amöi ba mbanua si so kebaktian.

Ato ndra Samaduhu’ö si tosasa ba arakhagö lö sagu khöra wame’e biaya ena’ö ofeta ira ba nahia si so kebaktian. Me no larugi ba da’ö, ato ba gotaluara nikaoni wemörö ba nomo ndra talifusöda si so ba da’ö. Tanö bö’önia mörö ira ba Balai Mbanua Lowalangi. Te mato 90 ndra talifusöda si mörö ba gödo ndraha. Mörö ira ba dete karton mbuku si no mufa’oli. Isura Yearbook wa la’andrö sibai saohagölö ira talifusöda börö me mörö ira ba karton ”sabölö sökhi ba sombuyu moroi ba dalu zalo”.

Oya wamorege nifalua ndra Samaduhu’ö andre ena’ö tola ifuli owulo ira khö ndra talifusöda. Iada’a, töra 850.000 ndra Samaduhu’ö ba Meksiko, ba lö mamalö aetu wangandröra saohagölö. * (Faigi nisura ba gahe zura.) Imane sambua laporan ba 1949 Yearbook wa hewa’ae so wamorege nifalua ndra talifusöda, lö alö wa’amohi’a dödöra ba wamosumange Yehowa. Ero awai kebaktian, lö mamalö lafahuo-huosi manö kebaktian andrö. Fanofu si lö mamalö lasofu ira talifusöda ya’ia da’ö ”Hawa’ara so khöda zui kebaktian?”​—Moroi ba arsipda ba Amerika Tengah.

^ par. 9 Molo’ö mbuku 1944 Yearbook, kebaktian da’a zame’e itugu tehöngö ndra Samaduhu’ö Yehowa ba Meksiko.

^ par. 14 Ba Meksiko, so 2.262.646 niha sangondrasi Fanörö Tödö me döfi 2016.