IBE’E gehehania Yehowa khö zinenge sotöi Faulo ba wanura siwa ngawua mbua-bua moroi ba geheha ni’amoni’ö. (Galatia 5:22, 23) Fefu mbua-bua da’a lafotöi ia ”bua-bua geheha”. * (Faigi nisura ba gahe zura.) Mo’amakhaita göi ia ba ’gamuata si bohou’ sinangea la’okhögö niha Keriso. (Kolose 3:10) Simane eu si tola mowua na sökhi wombuwui ya’ia, tola i’okhögö mbua-bua da’a si samösa niha na itehegö mohalöwö geheha ni’amoni’ö ba wa’aurinia.​—Zinunö 1:1-3.

Bua-bua si oföna nisura Waulo ya’ia da’ö fa’omasi. Hewisa wa’atohude mbua-bua da’a? Iwa’ö Faulo wa na lö fa’omasi, ba no ”faya” ia. (I Korindro 13:2) Hiza’i, hadia wa’omasi andrö, ba hewisa wangokhögöda hegöi wangoroma’öda ya’ia ero ma’ökhö?

HADIA WA’OMASI?

Hewa’ae abua wanutunö hadia wa’omasi, hiza’i itutunö Sura Ni’amoni’ö hewisa lala wangera-ngera hegöi nifalua niha si so fa’omasi. Duma-dumania, niha si so fa’omasi no ”sebolo tödö, no sebua tödö” ba ”omuso dödönia awö zi duhu”. Na so wa’omasi ba zi samösa niha, tola ”itaha dödönia; fefu hadia ia, ba faduhu dödönia; fefu hadia ia, ba idöna-döna, fefu hadia ia ba itaögö”. So khönia wa’omasi, i’ame’egö tödö niha ba ya’ia andre si fahuwu si lö faröi. Hiza’i, na lö fa’omasi ba zi samösa niha, so khönia wa’afökhö dödö, fa’asiliawa, lö sökhi gamuata, ha tana khönia i’alui, ba lö i’efa’ö zala niha bö’ö. Lö omasi ita taforoma’ö mbua-bua da’a, hiza’i moguna taforoma’ö wa’omasi sindruhu ba niha bö’ö, fa’omasi si ’lö mangalui tana khönia’.​—I Korindro 13:4-8.

YEHOWA HEGÖI YESU LABE’E DUMA-DUMA SO’AHONOA BA WA’OMASI

”No fa’omasi Lowalangi.” (I Yohane 4:8) Oroma da’a ba halöwö hegöi nifaluania. Fa’omasinia sabölö ebua ba niha gulidanö ya’ia da’ö ifatenge Yesu ba gulidanö ena’ö tefakao ba mate salahida. Imane sinenge sotöi Yohane, ”Ba da’ö no oroma wa’omasi Lowalangi andrö ba khöda, me no ifatenge ba gulidanö Nononia Lowalangi, ononia si ha sambua andrö, ena’ö auri ita balazi ia. Ba da’ö so wa’omasi andrö, tenga wa no ta’omasi’ö Lowalangi, no wa no i’omasi’ö ita, awö wa no ifatenge Nononia, höli, ba horöda.” (I Yohane 4:9, 10) Börö wa’omasi Lowalangi, te’efa’ö horöda ba ta’okhögö dötönafö hegöi fa’auri.

Iforoma’ö wa’omasinia Yesu ba niha me ilulu wa’aurinia ba wamalua somasi Lowalangi. Imane khöda Faulo, ”Ba ’zomasi’ ia andrö, ba da’ö te’amoni’ö ita, ba wame’e sumange boto Yesu Keriso andrö, ni’osamuzaigö.” (Heberai’o 10:9, 10) Lö niha sangokhögö fa’omasi sebua simane da’a. Imane Yesu, ”Fondrege wa’ebua wangomasi’ö awö, na ibelegö nosonia niha föna zi fahuwu  khönia.” (Yohane 15:13) Hadia tola la’o’ö wa’omasi niforoma’ö Yesu hegöi Yehowa ira niha si lö mo’ahonoa? Tola! Datatutunö lalania.

”MITÖRÖ LALA WA’OMASI”

Ifarou ita Faulo, ”Mi’o’ö khö Lowalangi, simane iraono omasiö. Ba mitörö lala wa’omasi andrö, simane fangomasi’ö Keriso ya’ita, awö wa no ibe’e ia salahida.” (Efeso 5:1, 2) Hadia geluaha ”mitörö lala wa’omasi”? Eluahania, taforoma’ö wa’omasi ero inötö. Tenga ha ba mbewe, hiza’i tafalua ia. Imane Yohane, ”He ya’ami iraono, böi ba li ta’omasi’ö nawöda, ba böi ba lela, ba nilauda khönia ta’omasi’ö ia, ba sindruhu-ndruhu.” (I Yohane 3:18) Duma-dumania, taturiaigö ’duria somuso dödö moroi ba Mbanua Lowalangi’ börö me ta’omasi’ö Yehowa hegöi niha bö’ö. (Matai’o 24:14; Luka 10:27) ’Tatörö göi lala wa’omasi’ na so khöda wa’ebolo dödö, fa’ebua dödö hegöi fangefa’ö sala. Ta’o’ö mene-mene Zura Ni’amoni’ö, ’Simane fangefa’ö Yehowa khömi, simanö göi ami.’​—Kolose 3:13.

Na tabe’e mene-mene mazui degu-degu ba niha bö’ö, tenga da’ö geluahania wa lö khöda fa’omasi. Duma-dumania, ena’ö tebato wege-ege ndraono, so ösa zatua samalua hadia manö zomasi ndraonora. Hiza’i sindruhunia na i’omasi’ö nononia satua moguna ibe’e degu-degu. Simanö göi, hewa’ae Lowalangi andrö no fa’omasi, hiza’i ”somasi Zo’aya sa, ba i’otu’ö”. (Heberai’o 12:6) No fa’omasi na tabe’e degu-degu. (Gamaedola 3:11, 12) Hiza’i, törö tödömö wa fefu ita no fasala ba asese lö mofozu wamaluada fa’omasi. Andrö, moguna tadou’ö wangoroma’öda fa’omasi. Hewisa wamalua da’ö? Datatutunö tölu ngawua lala.

HEWISA LALA WANGOKHÖGÖDA FA’OMASI?

Si oföna, andrö khö Lowalangi ena’ö ibe’e khömö gehehania ni’amoni’ö börö me ba da’ö moroi wa’omasi. Imane Yesu wa ibe’e Yehowa ”geheha ni’amoni’ö ba zangandrö khönia”. (Luka 11:13) Andrö, na ta’andrö geheha ni’amoni’ö ba tatehegö itolo ita, tola ta’okhögö wa’omasi. (Galatia 5:16) Duma-dumania, na satua sokubaloi ndra’ugö, andrö geheha ni’amoni’ö ena’ö ö’okhögö wa’omasi na öbe’e mene-mene Zura Ni’amoni’ö ba niha bö’ö. Mazui na satua ndra’ugö, andrö geheha Yehowa ba wanolo ya’ugö ba wame’e degu-degu khö ndraonomö si fao fa’omasi.

Si dua, angeraigö hewisa wangoroma’ö Yesu fa’omasi hewa’ae laböbözi ia. (I Fetero 2:21, 23) Na so niha zame’e tetutu dödömö mazui na ötaögö walö’atulö, sofu khöu samösa, ’Hadia nifalua Yesu?’ Samösa dalifusöda ira alawe sotöi Leigh, ilau manofu khönia samösa fatua lö ifalua hadia ia. Imane, ”So nawögu wohalöwö zo kirim e-mail khö nawögu tanö bö’ö. Ifatou-tou ndra’o hegöi halöwö nifaluagu. Afökhö dödögu. Hiza’i, usofu khögu samösa, ’Hewisa wolo’ögu Yesu ba zalua andre?’ Me no u’angeraigö hadia nifalua Yesu, uhalö gangetula ba wangolifugö zalua andrö ba lö ubali’ö tandrawa. Aefa da’ö, u’ila wa no göna fökhö sabölö-bölö nawögu andrö, ba oya gabula dödönia. U’ila wa tenga soroi ba dödönia wanguma’ö da’ö. Börö me u’angeraigö duma-duma Yesu ba wangoroma’ö fa’omasi hewa’ae na so zangandrö fönu, tetolo ndra’o ba wangomasi’ö nawögu wohalöwö andrö.” Na ta’o’ö Yesu, lö mamalö taforoma’ö wa’omasi ba niha bö’ö.

Si tölu, tafaha’ö ita ba wangoroma’ö fa’omasi soroi ba dödö. Da’a wa’omasi si tobali tandra niha solo’ö khö Yesu. (Yohane 13:34, 35) I’okhögö wa’omasi simane da’a Yesu ba ibe’e khöda duma-duma so’ahonoa. Lalania, iröi zorugo ”iheta khönia da’ö” salahi zoguna khöda ’irege mate’ ia. (Filifi 2:5-8) Na ta’o’ö wa’omasi niforoma’ö Yesu, itugu fagölö lala wangera-ngera hegöi nirasoida simane ni’okhögönia, ba tola ta’ofönai’ö zoguna ba niha bö’ö.

 BUA NA TAFOROMA’Ö WA’OMASI

Oya mbua na taforoma’ö wa’omasi. Datatutunö dombua duma-dumania:

Hewisa wa tatema mbua na taforoma’ö wa’omasi?

  • FA’AFATALIFUSÖTADA BA ZI SAGÖRÖ ULIDANÖ: Börö me faoma so wa’omasi ba gotaluada, ta’ila wa na möi ita ba mbanua niha Keriso si so ba zi sagörö ulidanö, latema’ö ita si fao fa’owua-wua dödö. No howu-howu sebua da’a börö me ö’ila wa ’fefu ndra talifusömö ba zi sagörö ulidanö’ la’omasi’ö ndra’ugö! (I Fetero 5:9) Ha ba gotalua nono mbanua Lowalangi so wa’omasi da’a.

  • FA’ATULÖ: ”Mibologö dödömi khö nawömi, mi’omasi’ö ia” irege tola tarasoi ’wamaböbö fa’atulö andrö’. (Efeso 4:2, 3) Tarasoi wa’atulö da’a ba gangowuloa, kebaktian wilayah hegöi ba kebaktian regional. Sindruhu-ndruhu tohude wa’atulö da’a ba gulidanö si no fawuka andre. (Zinunö 119:165; Yesaya 54:13) Na tagohi wa’atulö, taforoma’ö wa ta’omasi’ö niha bö’ö, ba möi fangomusoi’ö dödö Namada si so ba zorugo.​—Zinunö 133:1-3; Matai’o 5:9.

”FA’OMASI ANDRÖ, BAFANGA’AZÖKHI”

Isura Faulo, ”Fa’omasi andrö, ba fanga’azökhi.” (I Korindro 8:1) Hadia geluahania? Ba I Korindro faza 13 nifotöi ”Sinunö Fa’omasi”, itutunö hewisa wa fa’omasi andrö möi famazökhi. Niha si so fa’omasi i’ofönai’ö ba i’ame’egö tödö zoguna ba niha bö’ö. (I Korindro 10:24; 13:5) Börö wa’atua-tua, fo’ame’egö tödö, fa’ebolo dödö hegöi fa’ebua dödö, tola te’asogö wa’omasi ba nösi nomo hegöi fahasara dödö ba mbanua niha Keriso.​—Kolose 3:14.

Oya lala si tola tafalua ba wangoroma’ö fa’omasi ba niha bö’ö. Hiza’i, fa’omasida khö Lowalangi zabölö moguna ba tohude. Hana? Börö me fa’omasida khönia zame’e fahasara dödö! Niha moroi ba ngawalö soi, li hegöi lala wa’auri ba zilalö faoma lafosumange Yehowa ba ”te’anö manö ira we’amöi enoninia”. (Zefania 3:9) Datahalö gangetula ba wangoroma’ö mbua geheha andre moroi khö Lowalangi ero ma’ökhö.

^ par. 2 Da’a artikel si oföna moroi ba zi siwa artikel tanö bö’ö zanutunö ero sambua mbua-bua geheha.