Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Manuriaigö—Edisi Wamaha’ö  |  Baŵa si Walu 2016

Lala Ena’ö Mofozu Wongambatö

Lala Ena’ö Mofozu Wongambatö

”Ba yamu’omasi’ö ngambatönia zamösana, simane fa’omasinia ia, ba ira alawe ba ena’ö na i’ata’ufi ndra matua.”EFESO 5:33.

SINUNÖ: 36, 3

1. Hewa’ae ohahau dödö na no mongambatö, hiza’i hadia zi lö tola lö’ö lataögö ba wongambatö? (Faigi gambara ba wamobörö wamaha’ö.)

BA GINÖTÖ i’ila marafule hawa’abaga-baga ni’owalunia ba walöwara, owua-wua sibai dödöra. Ba ginötö fakawa ira, tedou wa’omasira zamösana irege edöna ira mongambatö ba fabu’u li ira wa lö faröi ira khö nawöra. Me no aefa mangowalu ira, labörögö fao ba wa’auri, ba moguna so nibulö’öra ena’ö te’osambua’ö ira. Yehowa, Zamobörö fongambatö, omasi ia na ohahau dödö ba mofozu wongambatö niha, andrö wa ibe’e mene-mene si sökhi ba Daromalinia, Sura Ni’amoni’ö. (Gamaedola 18:22) Hewa’ae simanö, itutunö khöda Sura Ni’amoni’ö wa tola manö so gabula dödö ba wongambatö, mazui ”famakao bakha ba mboto” börö me lö mo’ahonoa ita. (I Korindro 7:28, NW) Hewisa wa tola la’alösi gabula dödö andrö? Ba hadia zinangea lafalua niha Keriso ena’ö mofozu wongambatöra?

2. Hadia manö ngawalö fa’omasi zinangea laforoma’ö ba wongambatö?

 2 Ifaha’ö ita Sura Ni’amoni’ö wa moguna sibai wa’omasi andrö. Hiza’i, oya ngawalö wa’omasi zinangea laforoma’ö ba wongambatö. Duma-dumania, moguna laforoma’ö fa’omasi si fao fa’ahakhö dödö hegöi fa’omasi ba gotalua zi faronga. Na so khöra ndraono, itugu moguna laforoma’ö wa’omasi ba nösi nomora. Hiza’i, fa’omasi si te’odane-dane ba goi-goi wa’aniha Keriso, zame’e mofozu wongambatö. Itutunö Waulo ngawalö wa’omasi andre me iwa’ö, ”Ba yamu’omasi’ö ngambatönia zamösana, simane fa’omasinia ia, ba ira alawe, ba ena’ö na i’ata’ufi ndra matua.”Efeso 5:33.

ITUGU ABOTO BA DÖDÖDA HALÖWÖ BA WONGAMBATÖ

3. Hewisa wa’ebua fa’omasi ba wongambatö?

3 Isura Waulo, ”Ya’ami, ira matua mi’omasi’ö ndra alawemi, simane Keriso me no i’omasi’ö mbanua, ba me no ibe’e salahira ia.” (Efeso 5:25) Iada’a, niha Keriso la’o’ö duma-duma Yesu ba wangomasi’ö niha bö’ö simane fangomasi’ö Yesu ndra nifaha’önia. (Baso Yohane 13:34, 35; 15:12, 13.) Fo’omo ira matua hegöi fo’omo ira alawe niha Keriso, moguna la’omasi’ö wo’omora irege latehegö nosora salahi wo’omora. Hiza’i, na so gabula dödö sabölö-bölö ba wongambatö, so ösa zanguma’ö wa lö larasoi wa’omasi sa’ae. Hadia zi tola manolo ya’ira? Fa’omasi si te’odane-dane ba goi-goi, ya’ia da’ö ”fefu hadia ia zi falukha ia, ba itaha dödönia, fefu hadia ia, ba faduhu dödönia, fefu hadia ia, ba idöna-döna, fefu hadia ia, ba itaögö”. Ba fa’omasi andrö ”lö mamalö-malö”. (I Korindro 13:7, 8) Niha Keriso si no mongambatö, moguna latörö tödöra wa no fabu’u li ira wa la’omasi’ö wo’omora ba lö faröi ira. Na latörö tödöra da’a, tola tefarou dödöra ba wangalui fanolo moroi khö Yehowa ba faoma falulu fohalöwö ira ba wangasiwaisi ngawalö gabula dödö andrö.

4, 5. (a) Hadia halöwö fo’omo ira matua si tobali högö yomo ba nomo? (b) Hewisa zinangeania wamaigi fo’omo ira alawe ba wondrönia’ö? (c) Hadia zinangea lafaudugö ba wa’aurira niha si no mongambatö?

4 Itutunö Faulo sanandrösa ba halöwö wo’omo ira matua hegöi fo’omo ira alawe ba ginötö no mongambatö ira imane, ”Ira alawe, ba ndramu’o’ö li ndra matuara, hulö na li Zo’aya, me no högö ndra alawe ndra matua, simane Keriso göi, me no högö mbanua ia.” (Efeso 5:22, 23) Tenga da’ö geluahania wa abölö sökhi wo’omo ira matua moroi ba wo’omo ira alawe. Itutunö Yehowa sanandrösa ba halöwö si sökhi nifalua wo’omo ira alawe me imane, ”Lö sökhi ba niha, na ha ya’i-ya’ia, da’ufazökhi khönia nawö, si faböbö khönia.” (I Moze 2:18) Fo’omo ira alawe itolo wo’omonia ena’ö tobali högö si sökhi yomo ba nomo. Ba fo’omo ira matua moguna i’o’ö duma-duma fa’omasi nibe’e Yesu, me no tobali ”högö mbanua ia”. Ba ginötö ifalua da’a, tatu manö ahono dödö wo’omonia ira alawe ba abölö aoha khönia ba wamosumange hegöi falulu fohalöwö khö wo’omonia.

”Na mafalua lala nibe’e Yehowa, itugu fahuwu ndra’aga ba zi sambua ngambatö”

5 Cathy, si no mangowalu khö Fred, imane, ”Börö me ha ya’o samösa ono namagu, tola ufalua hadia manö ba tola urorogö wa’aurigu samösa. Iada’a, moguna u’odaligö wo’omogu börö me no möi nihalö ndra’o. Lö aoha khögu wamalua da’a, hiza’i na mafalua lala nibe’e  Yehowa, itugu fahuwu ndra’aga ba zi sambua ngambatö.” [1] (Faigi gonönöta.) Imane Fred, ”Lö irai aoha khögu wangai gangetula moroi ba zi dombua fangera-ngera si fabö’ö, sambua fanandraigö da’a khögu. Hiza’i, na u’alui wanuturu lala moroi khö Yehowa ba wangandrö hegöi sindruhu-ndruhu ufondro-ndrongo hadia niwa’ö wo’omogu, itugu aoha wamalua da’ö ero ma’ökhö. Urasoi wa sindruhu-ndruhu si falulu fohalöwö ndra’aga!”

6. Hewisa tola laforoma’ö wa fa’omasi no ”wamaböbö fa’amo’ahonoa” ba ginötö so gabula dödö?

6 Tola itugu aro wongambatö na ”faoma mibologö dödömi khö nawömi, ba faoma mi’efa’ö zala nawömi khömi.” Börö me lö mo’ahonoa ira, tola manö lafalua zala. Ba ginötö alua da’ö, tola lafaha’ö ira ba zala si no lafalua, lala wangefa’ö hegöi ba wangoroma’ö fa’omasi si te’odane-dane ba goi-goi Zura Ni’amoni’ö. Fa’omasi andre ”wamaböbö fa’amo’ahonoa”. (Kolose 3:13, 14) Tola laforoma’ö ngawalö fa’omasi si fao fa’ebolo dödö hegöi ”lö itanö ba dödönia zi lö sökhi”. (I Korindro 13:4, 5) Ba ginötö so watitisa, moguna alio lafahuhuosi fatua lö aekhu luo. (Efeso 4:26, 27) Moguna so wangide-ngide’ö hegöi fa lö fa’ata’u ba wanguma’ö, ”Bologö dödöu khögu me no u’afökhöi’ö dödömö.” Na lafalua da’a, tola tetolo ira ba wangasiwai gabula dödö ba itugu fahuwu ira ba wongambatö.

MOGUNA SIBAI WA’AHAKHÖ DÖDÖ

7, 8. (a) Hadia mene-mene nibe’e Zura Ni’amoni’ö sanandrösa ba wa’orudu ba wongambatö? (b) Hana wa moguna laforoma’ö wa’ahakhö dödö ba wongambatö?

7 Ibe’e mene-mene si sökhi Zura Ni’amoni’ö ba wanolo fongambatö ena’ö la’okhögö fangera-ngera satulö sanandrösa ba wa’orudu. (Baso I Korindro 7:3-5.) Fo’omo ira matua hegöi fo’omo ira alawe, moguna lafatimbaisi nösi dödö zamösana hegöi zoguna khö ngambatöra. Na lö fa’ahakhö dödö khö wo’omo ira matua, tola manö lö owua-wua dödö wo’omonia ira alawe ba wa’orudu. Sinangeania, fo’omo ira matua ”böi sambö era-era” ia khö wo’omonia ira alawe. (I Fetero 3:7) Teba’i lafaso mazui laforege wamalua fa’orudu. Hiza’i, mufalua ia börö wa’omasi. Sasesenia, abölö alio edöna ndra matua ba wa’orudu moroi ba ndra alawe. Hiza’i, moguna so wahasara dödö ba wamalua ya’ia ba ginötö omasi ndra matua hegöi ira alawe.

8 Lö izara-zara itutunö Zura Ni’amoni’ö hadia zi tola mazui si tebai na laforoma’ö wa’omasi mazui na orudu zi sambua ngambatö. Hiza’i, so ösa wa’omasi si no lasura. (Sinunö Sebua 1:2; 2:6) Moguna laforoma’ö wa’omasi si fao fa’ahakhö dödö ira niha Keriso si no mongambatö.

9. Hadia mbörö wa tebai so wangisö ba wa’orudu khö niha si tenga wo’omoda?

9 Ba ginötö aro wa’omasi zi sambua ngambatö khö Lowalangi hegöi khö wo’omora, lö latehegö gofu haniha manö mazui hadia ia zi tola mamakiko wongambatöra. So ösa wongambatö si  tekiko mazui sambö aro, börö me omasi ira ba wamaigi pornografi. Moguna tatimbagö hadia manö si tola wondrönisi tödöda ba wamaigi pornografi, mazui ngawalö danö bö’ö fangisö ba wa’orudu si tenga sinangea lafalua, ba moguna tatimbagö gamuata ba wogadu niha bö’ö si tenga wo’omoda börö me tenga fa’omasi da’ö. Moguna tatörö tödöda wa i’ila Lowalangi fefu ni’angeraigöda mazui nifaluada. Da’a zanolo ya’ita ba wanga’aro’ö wa’omasida ba wamalua somasi ia hegöi ena’ö lö faröi ita khö ngambatöda.Baso Matai’o 5:27, 28; Yeremia 16:17.

BA GINÖTÖ SO GABULA DÖDÖ BA WONGAMBATÖ

10, 11. (a) Hawa’oya zi fabali auri zi no alua? (b) Hadia nitutunö Zura Ni’amoni’ö sanandrösa ba wa’afasambua? (c) Hadia zi tola möi fanolo ba zi sambua ngambatö ena’ö lö fasambua?

10 Ba ginötö so gabula dödö sebua si lö mu’asiwaisi, so zangai gangetula ena’ö fasambua mazui fabali auri ira. Ba mbanua tanö bö’ö, töra 50 persen wongambatö zi fabali auri. Tatu manö, lö to’ölö alua da’a ba mbanua niha Keriso. Hiza’i, ato niha Keriso zanaögö gabula dödö ba wongambatöra.

11 Ibe’e wanuturu lala Zura Ni’amoni’ö, ”Böi fabali ndra alawe ba ndra matua. Ba na so zi no fabali, ba böi yamöi nihalö sa’ae, atö na ifuli i’atulö’ö ia ba ndra matua, ba ira matua göi, ba böi yamutibo’ö ndra alawe.” (I Korindro 7:10, 11) So ösa wongambatö zanguma’ö wa no abölö-bölö sibai gabula dödöra, irege fasambua ira. Hiza’i, iforoma’ö Yesu wa tebai mu’aohasi ba dödö nifotöi wabalisa me ifuli iwa’ö wehede Yehowa si oföna sanandrösa ba wongambatö imane, ”Ba böi yamufabali niha nifaböbö Lowalangi.” (Matai’o 19:3-6; I Moze 2:24) Andrö, omasi Yehowa na lö fabali fo’omo ira matua ba fo’omo ira alawe. (I Korindro 7:39) Moguna tatörö tödöda wa tabu’a fefu föna Yehowa hadia manö nifaluada. Da’a zanolo ya’ita ba wangasiwai gabula dödö fatua lö abölö-bölö ia.

Ato wongambatö niha Keriso si tola mangasiwaisi gabula dödö börö me la’o’ö wanuturu lala moroi khö Lowalangi

12. Hadia manö mbörö wa omasi fasambua zi sambua gambatö?

12 Hadia mbörö wa lataögö gabula dödö sebua ba wongambatö? So zanguma’ö, wa fongambatöra tenga simane nitötönara meföna irege abao dödöra mazui mofönu ira. Sasesenia, alua gabula dödö andre börö me fabö’ö-bö’ö lala wangebua’ö ya’ira hegöi lala nifaluara na so gabula dödö. Itaria so watitisa khö nama ba ina matua, lala ba wombagi kefe, mazui lala wangebua’ö iraono. Hewa’ae simanö, ato wongambatö niha Keriso si tola mangasiwaisi gabula dödö börö me la’o’ö wanuturu lala moroi khö Lowalangi.

13. Hadia manö dane-dane si tefaudu wa tola fasambua?

13 Tola fasambua zi sambua ngambatö na so dane-dane si tefaudu. Duma-dumania, na lö te’asogö zoguna, fabözi mazui na isaisi ngambatönia niha Keriso ba wamosumange Lowalangi. Ba ginötö so  gabula dödö sebua ba wongambatö, moguna la’andrö wanolo moroi khö ndra satua sokubaloi. No oya waö-waö wa’auri si no latörö ba tola latolo zi sambua ngambatö ba wamalua mene-mene Lowalangi ba wa’auri. Na la’andrö geheha moroi khö Yehowa, tola tetolo ira ba wamalua goi-goi Zura Ni’amoni’ö hegöi ba wangoroma’ö mbua-mbua niha Keriso. (Galatia 5:22, 23) [2]—Faigi gonönöta.

14. Hadia niwa’ö Zura Ni’amoni’ö ba ngambatö niha Keriso si tenga samosumange Yehowa wo’omora?

14 Iforoma’ö Zura Ni’amoni’ö wa so dane-dane saro ena’ö lö fabali zi sambua ngambatö hewa’ae fo’omonia tenga samosumange Yehowa. (Baso I Korindro 7:12-14.) Fo’omo si lö mamati andre ”te’amoni’ö” börö me mangowalu ia khö zamosumange Lowalangi. ”Te’amoni’ö” göi ndraonora side-ide irege tola latema wolumö’ö moroi khö Lowalangi. Ifarou Faulo niha Keriso imane, ”Fo’omo ira alawe, hewisa wa ö’ila wa tebai ö’orifi wo’omou ira matua? Ba yaugö fo’omo ira matua, hewisa wa ö’ila wa tebai ö’orifi wo’omou ira alawe?” (I Korindro 7:16, NW) Ato wo’omo ira matua hegöi ira alawe niha Keriso si tobali duma-duma, si no manolo wo’omora tobali samosumange Yehowa.

15, 16. (a) Hadia mene-mene nibe’e Zura Ni’amoni’ö khö wo’omo ira alawe niha Keriso si tenga samosumange Lowalangi wo’omonia ira matua? (b) Hewisa dalifusöda niha Keriso ’na edöna fabali zi tenga samati’ andrö?

15 Ibe’e mene-mene Fetero khö wo’omo ira alawe niha Keriso ena’ö ifosumange wo’omonia imane, ”ena’ö tedönisi da’ö, ba mbua-bua ndra alawe andrö, he lö hede-hede, na so ösa, zi lö mamati ba daromali andrö, na lanehegö mbua-buami, wa mi’ata’ufi zi lö sökhi, awö wa no ohau-hau ami”. Moroi na ha nifaha’önia manö nitutunönia ero ma’ökhö, wo’omo  ira alawe tola itolo wo’omonia wanema’ö sindruhu ba ginötö iforoma’ö ”wa’ebolo dödö ba fa’ahono-hono, si no omasiö Lowalangi”.I Fetero 3:1-4.

16 Hewisa na i’andrö fasambua fo’omo si tenga sara lala wamati? Imane Zura Ni’amoni’ö, ’Ba na edöna fabali zi tenga samati, ba yafabali ia, lö muböbö dangara ba zi manö, he talifusö matua, ba he talifusö alawe. Ba wa’atulö sa ikaoni ita Lowalangi.’ (I Korindro 7:15) Hewa’ae tola ohahau dödö na no fabali, hiza’i tebai lafuli mangowalu ba zomasi dödöra molo’ö Zura Ni’amoi’ö. Ba lö moguna ifaso wo’omonia ena’ö lö mofanö ia. Ba ginötönia, tola manö mangawuli fo’omo si lö mamati andre, ba wangehaogö wongambatönia. Ba götö si so föna, tola manö tobali ia samosumange Yehowa.

HADIA ZINANGEA TA’OFÖNAI’Ö BA WONGAMBATÖDA?

Na ta’osambua’ö wangera-ngerada ba wamosumange Yehowa, tola itugu ohahau dödöda ba wongambatö (Faigi ngenoli si 17)

17. Hadia zinangea la’ofönai’ö ira ngambatö niha Keriso?

17 Börö me auri ita ba ”götö safuria”, so ita ba ”mbaŵa si lö sökhi”. (II Timoteo 3:1-5) Da’a mbörö wa moguna khöda wolumö’ö moroi ba wahuwusa saro khö Yehowa. Isura Waulo, ”Hatö ma’ifutö ginötö,” isura Faulo. ”Iada’a, ena’ö hulö zi lö donga zi so donga, . . . ba sangoguna’ö gulidanö andre, ena’ö hulö zi lo mangoguna’ö ya’ia.” (I Korindro 7:29-31, NW) Tenga da’ö geluaha wehede Waulo wa tola la’osiwawöi wo’omora. Hiza’i, börö me ba götö safuria auri ita, moguna ta’ofönai’ö wahuwusada khö Yehowa.Matai’o 6:33.

18. Hadia tola ohahau dödö ba mofozu wongambatö niha Keriso?

18 Ba ginötö si lö sökhi andre, oya wongambatö si lö mofozu. Hadia tola mofozu ba ohahau dödöda ba wongambatö? Tola, na lö taböhöli wahuwusa khö Yehowa hegöi ba nono mbanuania, tafalua goi-goi Zura Ni’amoni’ö hegöi ta’o’ö wanuturu lala moroi ba geheha Yehowa. Na tafalua da’a, eluahania tafosumange ”ni’orodugö Lowalangi”.Mareko 10:9.

^ [1] (ngenoli si 5) So zi no lafabö’öni töi.

^ [2] (ngenoli si 13) Faigi mbuku ”Tetaplah Berada dalam Kasih Allah”, apendiks ”Pandangan Alkitab tentang Perceraian dan Perpisahan”, nga’örö 219-221.