Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Manuriaigö—Edisi Wamaha’ö  |  Baŵa si Walu 2016

Hadia Aboto ba Dödöu Wa Moguna Tedou ba Wamati?

Hadia Aboto ba Dödöu Wa Moguna Tedou ba Wamati?

”Böi bato wombaso sura, ba böi bato wamarou tödö ba famaha’ö.”I TIMOTEO 4:13.

SINUNÖ: 45, 42

1, 2. (a) Hewisa Yesaya 60:22 alua ba götö safuria andre? (b) Hadia manö zoguna ba organisasi Yehowa ba gulidanö?

”FONDREGE zide-ide, ba tobali hönö, ba fondrege tou, ba tobali soi sabölö.” (Yesaya 60:22) Alua wehede da’a ba götö safuria. Me döfi 2015, so 8.220.105 nono mbanua Yehowa sanuriaigö turia somuso dödö sanandrösa ba Mbanua Lowalangi ba zi sagörö ulidanö! Sanandrösa ba wa’atedou andre, imane Lowalangi, ”Ya’odo Yehowa zamangaösö dania, na baŵania!” Itugu ara, itugu oya halöwö sinangea tafalua. Hadia no taforege ba wamalua halöwö wanuriaigö hegöi wamaha’ö niha ba duria somuso dödö? Ato ndra talifusöda si no tobali perintis biasa mazui perintis ekstra. So göi zi findra ba mbanua bö’ö ba wolului halöwö fanuriaigö. Tanö bö’önia, laforege ba wangehaogö Balai Mbanua Lowalangi.

2 Ero röfi, so 2.000 mbanua niha Keriso si bohou. Börö da’ö moguna so satua sokubaloi hegöi enoni. Ero röfi so ngahönö genoni si tobali satua sokubaloi, ba ngahönö ndra matua tanö bö’ö sinangea tobali enoni.  Andrö, ”ya’a’oi so khömi wangai halöwö Zo’aya andrö”, tenga ha khö dalifusöda ira matua manö da’a, hiza’i ba ndra’alawe göi.I Korindro 15:58.

HADIA ZINANGEA TAFALUA ENA’Ö TEDOU BA WAMATI?

3, 4. Molo’ö ya’ugö, hadia zinangea lafalua ena’ö tedou ba wamati?

3 Baso I Timoteo 3:1. Isuno Faulo dalifusö ira matua ”zangalui halöwö” tobali satua. Na so nihalöda si lö ikhamö dangada, moguna taforege ba wangoro’ö dangada. Khalaigö samösa dalifusöda somasi tobali enoni. Aboto ba dödönia wa moguna iforege wondrou’ö wamalua mbua-bua niha Keriso. Ba me no lafataro ia tobali enoni, iforege göi ena’ö tola tobali ia satua.

4 So dalifusöda zobulö’ö lala wa’aurira ena’ö itugu oya zi tola lafalua ba halöwö khö Yehowa. Duma-dumania, so zomasi merintis, mohalöwö ba Mbetieli mazui fao ba wangehaogö Balai Mbanua Lowalangi. Datatutunö hewisa Zura Ni’amoni’ö ba wanolo ya’ita ena’ö tedou ba wamati.

BÖI BÖHÖLI BA WONDROU’Ö FAMATI

5. Hewisa la’oguna’ö wa’abölöra si bohou ebua ba wohalöwö khö Yehowa?

5 Ira si bohou ebua, abölö oya zi tola lafalua ba halöwö khö Yehowa, börö me abölö ba lö mofökhö ira. (Baso Gamaedola 20:29.) So ösa zi bohou ebua sohalöwö ba Mbetieli ba wamazökhi hegöi menjilid mbuku mazui Zura Ni’amoni’ö. Ato dalifusöda si bohou ebua samazökhi hegöi sangehaogö Balai Mbanua Lowalangi. So göi zomasi wolului ba ginötö so gabula dödö simane nduru danö ba tanö bö’önia. Ba ato perintis si bohou ebua samaha’ö ya’ira ba li tanö bö’ö, mazui si findra ba mbanua bö’ö ba wanuriaigö turia somuso dödö.

6-8. (a) Hadia zobulö’ö fangera-ngera samösa ndra matua si bohou ebua sanandrösa ba halöwö khö Lowalangi, ba hadia lua-luania? (b) Hewisa tola ’tatandra ba tafaigi, wa no sebua tödö Yehowa’?

6 Börö me ta’omasi’ö Yehowa, omasi ita tabe’e zabölö sökhi khönia. Hewa’ae simanö, tola manö fagölö nirasoida simane nirasoi Aaron. Omasi ia wamosumange Lowalangi, hiza’i lö owua-wua dödönia. Hewa’ae i’otarai me ide-ide no fao Aaron we’amöi ba gangowuloa hegöi manuriaigö, hiza’i imane, ”Afölido wamalua da’ö fefu.” Hadia nifaluania?

7 Iforege Aaron ba wombaso Zura Ni’amoni’ö ero ma’ökhö, ihenaigö göi ia fatua lö möi ba gangowuloa, ba ibe’e mbua gera-erania. I’asese’ö mangandrö. Fefu nifaluania andre zanolo ya’ia ena’ö tedou ba wamati. Itugu aboto ba dödönia ba i’omasi’ö Yehowa. Lua-luania, owua-wua dödö Aaron. Merintis ia, itolo niha si göna abula dödö simane nduru danö ba manuriaigö ia ba mbanua bö’ö. Iada’a, no tobali ia satua sokubaloi ba mohalöwö ia ba Mbetieli. Hewisa dödönia? Imane Aaron, ”No ’utandra ba ufaigi, wa no sebua tödö Yehowa’. Börö howu-howunia khögu, hulö mo’ömö ndra’o khönia ba omasido na itugu oya nifaluagu ba halöwö fanuriaigö. Ba gafuriata, abölö oya utema howu-howu.”

 8 Imane sanura sinunö, ”Mitandra ba mifaigi, wa no sebua tödö Yehowa.” Imane nasa, ”Ba zangalui Yehowa, ba lö ambö, fefu gofu hadia.” (Baso Zinunö 34:9-11.) Na tabe’e zabölö sökhi khö Yehowa, sindruhu-ndruhu wa owua-wua dödöda börö me ta’ila wa no ta’omusoi’ö dödönia. Ba irorogö ita simane si no ifabu’u.

BÖI AWUWU

9, 10. Hana wa moguna khömö ’wombaloi’?

9 Te omasi ita na oya tafalua halöwö khö Yehowa. Hiza’i, hewisa na no ara tabalo-baloi ena’ö labe’e khöda halöwö sebua ba mbanua niha Keriso mazui hewisa na lö nasa tebulö wa’aurida? Moguna so khöda wombaloi. (Mikha 7:7) Tola manö itehegö alua da’a Yehowa, hiza’i faduhu dödöda wa lö ibato ba wanolo ya’ita. Tola tafaha’ö ita moroi khö Gaberahamo. Fabu’u li Yehowa wa tumbu khönia ndraono. Hiza’i, ara ibalo-baloi da’ö Gaberahamo fatua lö tumbu khönia Giza’aki. Ba ginötö da’ö, lö aetu-aetu manötöna Gaberahamo ba mamati ia khö Yehowa.I Moze 15:3, 4; 21:5; Heberai’o 6:12-15.

10 Tatu manö, lö aoha wombaloi. (Gamaedola 13:12) Hiza’i, na ta’angera-ngeraigö manö zalua khöda mazui fa’afatö dödöda, tola manö ide-ide dödöda. Abölö sökhi na ta’oguna’ö ginötö da’ö ba wangehaogö mbua-buada ba wangai halöwö ba mbanua niha Keriso.

Na ta’angerönusi zi no tabaso ba Zura Ni’amoni’ö, tola tafaha’ö ita ena’ö atua-tua ba wangai gangetula si sökhi

11. Hadia mbua-bua zinangea tadou’ö, ba hana wa moguna da’ö?

11 Dou’ö mbua-bua ba fa’atua-tua zoguna khömö. Na öbaso ba ö’angerönusi Zura Ni’amoni’ö, tola atua-tua ndra’ugö ba tola ö’okhögö fangera-ngera satulö hegöi ba wangai gangetula si sökhi. Sindruhunia, moguna khö ndra matua mbua-bua hegöi fa’atua-tua da’a ba wangai halöwö ba mbanua niha Keriso. (Gamaedola 1:1-4; Tito 1:7-9) Na tafaha’ö ita ba Zura Ni’amoni’ö, tola aboto ba dödöda hewisa dödö Yehowa ba ngawalö zalua. Aefa da’ö, tola ta’oguna’ö zi no tafaha’ö ita ba wangai gangetula sangomusoi’ö dödö Yehowa ero ma’ökhö. Duma-dumania, ta’ila hewisa lala wamaluada niha bö’ö, wangoguna’ö kefe, hegöi ba wamili hiburan mazui ni’onukhada.

12. Hewisa lalania ena’ö tobali ita niha nifaduhusi tödö ba mbanua niha Keriso?

12 Odödögö wamalua fefu ngawalö halöwö nibe’e khöu. Ba ginötö lahaogö nomo Lowalangi ira ono mbanuania, moguna khö Nehemia ndra matua si tola mamalua ngawalö halöwö. Ifili niha sangokhögö töi si sökhi. Aboto ba dödönia wa la’omasi’ö Yehowa ba laforege wamalua hadia manö halöwö nibe’e khöra. (Nehemia 7:2; 13:12, 13) Iada’a, niha si lö faröi ba sowölö-ölö,  la’okhögö döi si sökhi ba itugu oya halöwö nibe’e khöra. (I Korindro 4:2) Andrö, he talifusöda ira matua ba ira alawe, moguna tahaogö wamalua fefu halöwö nibe’e khöda.Baso I Timoteo 5:25.

13. Hewisa duma-duma Yosefo tola manolo ndra’ugö na laböbögö khöu zi lö duhu?

13 Odaligö Yehowa. Hewisa na laböbögö khöu zi lö duhu? Tola öfatunö khöra wa’afatö dödömö. Hiza’i, na ö’osatulö manö ndra’ugö, tola itugu abölö-bölö gabula dödö andrö. Moguna tahalö wamaha’ö moroi khö Yosefo. Lafalua khönia zi lö sökhi ira talifusönia. Ba laböbögö khönia zi lö duhu, irege labe’e ia ba gurunga hewa’ae lö ifalua zala. Hiza’i, i’odaligö Yehowa Yosefo. I’angeraigö fefu zi no ifabu’u Yehowa ba lö faröi ia. (Zinunö 105:19) Ba ginötö si tosasa andrö, idou’ö mbua-bua si sökhi si tola i’oguna’ö ba gafuriata ba wamalua halöwö si tohude. (I Moze 41:37-44; 45:4-8) Na laböbögö khöu zi lö duhu, andrö wa’atua-tua khö Yehowa. Itolo ndra’ugö ena’ö ahono dödöu ba tola tefaudu ba ginötö öfatunö khöra wa’afatö dödömö.Baso I Fetero 5:10.

DOU’Ö WA’ATUA-TUA BA WANURIAIGÖ

14, 15. (a) Hadia mbörö wa moguna ’tafaigi’ lala na möi ita manuriaigö? (b) Hewisa tola öfaudugö ndra’ugö na fabö’ö zalua ba zokhö omo? (Faigi gambara ba wamobörö wamaha’ö hegöi kotak ” Hadia Omasi Öfalua Lala Tanö Bö’ö?”)

14 Ifarou Timoteo Faulo ena’ö itugu idou’ö wa’atua-tuania ba wangoguna’ö  Daromali. Imane Faulo, ”Faigi-faigi hewisa ndra’ugö, ba hewisa wamahaö andrö.” (I Timoteo 4:13, 16) No ara manuriaigö Timoteo. Hiza’i, hana wa moguna nasa idou’ö wa’atua-tuania? Aboto ba dödö Timoteo wa tola manö tebulö dödö niha mazui zalua khöra. Omasi ia na lafondro-ndrongo niwa’önia, andrö wa moguna ifaudugö lala wamaha’önia ba zoguna khöra. Moguna göi tafalua zimane da’ö ba wanuriaigö.

15 Ba ginötö manuriaigö ita ba nomo misa, so ösa nomo zi lö hadöi niha yomo. Ba nahia bö’ö, tola manö so ira ba nomo, hiza’i tebai tafalukhaisi ira börö me so zanaro ba zi fasui nomora. Na so zimane da’ö ba mbanua si so ya’ugö, hadia tola öfalua lala tanö bö’ö ba wamalukhaisi ya’ira?

16. Hewisa ena’ö tola mofozu na manuriagö ba nahia sato niha?

16 Ato dalifusöda somasi manuriaigö ba nahia sato niha. Duma-dumania, tola lafalukhaisi niha sato simane ba stasiun kereta api, terminal, ba fasa mazui ba zinga nasi. Samösa Samaduhu’ö tola fahuhuo ia ba niha sanandrösa ba duria zawena alua. Mazui tola isuno nono niha nifalukhasinia mazui isofu sanandrösa ba halöwönia. Na itema li ba wanofu andrö, tola itutunö khönia sanuriaigö sambua duho moroi ba Zura Ni’amoni’ö. Sasesenia, omasi niha na oya la’ila sanandrösa ba Zura Ni’amoni’ö.

17, 18. (a) Hewisa ena’ö lö ata’u ndra’ugö na manuriagö ba nahia sato niha? (b) Hadia zi tola tahalö wamaha’ö moroi ba wangandrö Dawido khö Yehowa ba ginötö manuriaigö ita?

17 Te abua khöu wamörögö fahuhuosa ba niha si lö ö’ila föna niha sato. Simane nirasoi Eddie, samösa perintis ba New York City. Hiza’i, isöndra lala ena’ö lö ata’u ia. Imane, ”Ba ginötö bongi wamaha’ö yomo ba nomo, ya’o faoma wo’omogu ira alawe, ma’alui hewisa lala ba wame’e fanema li na so zi lö omasi mamondro-ndrongo mazui ba ginötö labe’e wanema li. Ma’andrö tolo göi khö ndra Samaduhu’ö tanö bö’ö.” Iada’a omasi sibai Eddie manuriaigö ba nahia sato niha.

18 Na itugu owua-wua dödöda ba wanuriaigö hegöi na itugu onekhe ita fahuhuo ba niha sanandrösa ba turia somuso dödö tola oroma wamatida. (Baso I Timoteo 4:15.) Tola göi tatolo niha tobali samosumange Yehowa. Imane Dawido, ”Usuno Yehowa, si lö mamalö-malö, böi yatebulö ba mbewegu wanuno ya’ia. Yamusuno ia tödögu, ba khö Yehowa, ya larongo si numana, ba ya’omuso dödöra.”Zinunö 34:2, 3.

NA TEDOU BA WAMATI TOLA LÖ ÖBÖHÖLI WAMOSUMANGE YEHOWA

19. Hana wa tola owua-wua dödö ono mbanua Yehowa si lö faröi hewa’ae mo’amböta wa’aurira?

19 Imane Dawido, ”Lasuno ndra’ugö Yehowa, fefu niwöwöimö andrö, ba satulö tödö andrö khöu, ba manunö khöu. Lafatunö lakhömi wa’asalawamö andrö, ba itörö lira wa’abölöu. Ba wame’e ba dödö niha folaumö andrö, folau zabölö, awö wa’ebua lakhömi wa’asalawamö andrö.” (Zinunö 145:10-12) Fefu niha zangomasi’ö Yehowa ba si lö  faröi khönia, omasi sibai ira latutunö ba niha sanandrösa khönia. Hiza’i, hewisa na tebai oya ö’oguna’ö ginötömö ba wanuriaigö ba nomo misa börö me mofökhö mazui me no alawa ndröfiu? Törö tödöu wa tola ösuno Yehowa ero ötutunö ba niha sanandrösa khönia ba niha si so ba zi fasui ndra’ugö, simane khö ndra sondrorogö mazui doto. Na labe’e ndra’ugö ba gurunga börö wamatimö, tola göi ötutunö ba niha bö’ö sanandrösa khö Yehowa ba tola möi fangomusoi’ö dödönia da’ö. (Gamaedola 27:11) Omasi göi Yehowa na lö öböhöli wamosumange ya’ia hewa’ae lö fao khöu nösi nomou. (I Fetero 3:1-4) Hewa’ae abua zalua khöu, tola öfosumange Yehowa, itugu fahuwu ndra’ugö khönia ba tedou ba wamati.

20, 21. Na labe’e khöu halöwö ba organisasi Yehowa, hewisa tola tobali ndra’ugö howu-howu ba niha bö’ö?

20 Ifahowu’ö ndra’ugö Yehowa na itugu aro wahuwusamö khönia ba na ö’be’e zabölö sökhi ba wamosumange ya’ia. Na ö’bulö’ö lala halöwö mazui lala wa’aurimö, tola ötolo niha bö’ö ba wamaha’ö ya’ira sanandrösa ba gamabu’ula li Lowalangi sahöli-höli dödö. Tola itugu oya zi tola öfalua ba wanolo dalifusö ba wamati. Ba abölö la’omasi’ö ndra’ugö börö me la’ila wa öforege wohalöwö ba mbanua niha Keriso!

21 Tenga dali hawa’ara no tafosumange Yehowa, fefu ita tola itugu ahatö khönia hegöi tedou ba wamati. Ba wamaha’ö ba migu fönada, tatutunö hewisa lala ba wanolo niha bö’ö ena’ö tedou ira göi.