Faigi nösi

Faigi ba gangolifa

Samaduhu’ö Yehowa

Fili li Nias

Hadia Möi Famolakhömi Lowalangi Lala Wonukhamö?

Hadia Möi Famolakhömi Lowalangi Lala Wonukhamö?

”Ba wamosumange Lowalangi milau ia fefu.”I KORINDRO 10:31.

SINUNÖ: 34, 29

1, 2. Hadia mbörö wa la’okhögö goi-goi lala wonukha si sökhi ira Samaduhu’ö Yehowa? (Faigi gambara ba wamobörö wamaha’ö.)

SAMBUA koran ba Belanda itutunö lala wonukha ira sondrönia’ö ba gereja ba gangowuloara. Imane, ”Ato zamake nukha si lö ta’io, gu’i sadogo-dogo, mendrua manö na aukhu zino.” Hiza’i, isura göi koran da’ö wa tenga simanö lala wonukha ndra Samaduhu’ö Yehowa na so ira ba kebaktian. Itutunö wa iraono matua hegöi ira matua la’oguna’ö jas hegöi dalilehe. Iraono alawe hegöi ira alawe la’oguna’ö gu’i saganau ma’ifu hiza’i si bohou modenia. Asese lasuno ndra Samaduhu’ö Yehowa börö lala wonukhara. Iwa’ö Waulo wa lala wonukha niha Keriso ”yafao wa’aila ba fa’amoadu” si tefaudu khö nono mbanua Lowalangi. (I Tim. 2:9, 10) Hewa’ae khö ndra alawe iwa’ö da’a Waulo, moguna göi da’ö ba ndra matua niha Keriso.

2 Moguna goi-goi lala wonukha si sökhi khöda, ono mbanua Yehowa. Ba moguna göi da’ö khö Lowalangi nifosumangeda.  (I Moz. 3:21) Itutunö Sura Ni’amoni’ö wa Yehowa, Samatörö banua si yawa awö danö, i’okhögö goi-goi sanandrösa ba lala wonukha nono mbanuania. Andrö, ba ginötö tafili nukha, moguna böi ha ba zomasi ita, hiza’i sabölö moguna khö Yehowa, Lowalangida Fondrege Zalawa.

3. Hadia wamaha’ö si tola tahalö sanandrösa ba lala wonukha moroi ba Goroisa Lowalangi khö ndraono Gizara’eli?

3 Ba Goroisa Moze so goi-goi zolumö’ö ndraono Gizara’eli moroi ba lala wa’auri soi bö’ö si fahatö khöra samalua gamuata fohorö. Iforoma’ö Goroisa andrö wa lö omasi Yehowa lala wonukha si lö mangoroma’ö hezoso ndra matua ba ira alawe. Iada’a, lala wonukha simane da’ö lafotöi ia lala wonukha unisex. (Baso V Moze 22:5.) Moroi ba Goroisa andrö, ta’ila wa lö omasi Yehowa lala wonukha ndra matua hulö simane ndra alawe hegöi lala wonukha ndra alawe simane ira matua, mazui lala wonukha zame’e abua wamabö’öni hezoso ndra matua ba ira alawe.

4. Hadia zanolo niha Keriso ba wangai angetula si sökhi sanandrösa ba lala wonukha?

4 Tola itolo ita goi-goi Zura Ni’amoni’ö ba wangai angetula si sökhi sanandrösa ba lala wonukha. Goi-goi andre moguna ia gofu hezoso manö toröi ita, he baŵa deu hegöi baŵa lökhö, mazui si to’ölö la’oguna’ö niha. Lö moguna khöda waö-waö hadia manö si tola la’oguna’ö ba hadia zi tebai. Goi-goi Daromali ni’o’öda, zanehegö ya’ita ba wamili samösa hadia zomasi ita. Datatutunö goi-goi Zura Ni’amoni’ö sanolo ya’ita wotatugöi ”hadia zi sökhi, hadia wa’omasinia [Lowalangi] ba hadia zo’ahonoa” ba ginötö tafili nukha ni’oguna’öda.—Rom. 12:1, 2.

”AMUATA GENONI LOWALANGI GAMUATAMA”

5, 6. Hadia lua-lua lala wonukhada ba niha bö’ö?

5 Tebe’e khö Waulo wanuturu lala ba wanura goi-goi zoguna si so ba II Korindro 6:4. (Baso.) Ato niha zotatugöi haniha ita sindruhunia molo’ö lala wonukhada hegöi wangehao mbotoda. (I Zam. 16:7) Börö me samosumange Lowalangi ita, lö ta’oguna’ö nukha ha ba zomasi dödöda. Na ta o’ö goi-goi Zura Ni’amoni’ö, tatimbagö wangoguna’ö nukha si no fadroli-droli, sanifi-nifi mazui sadogo-dogo. Eluahania, lö ta’oguna’ö nukha zangoroma’ö ösi mbotoda. Böi abu dödö niha mazui lahole’ö höröra ba wamaigi nukhada.

Na sökhi lala wonukhada, lö ta’unö, hegöi moadu, abölö la’angenanöi ita niha bö’ö tobali ono mbanua Yehowa, Lowalangi Fondrege Zalawa

6 Na sökhi lala wonukhada, lö ta’unö, hegöi moadu, abölö la’angenanöi ita niha bö’ö tobali ono mbanua Yehowa,  Lowalangi Fondrege Zalawa. Ba tola manö, omasi la’ila haniha Lowalangi nifosumangeda, abölö la’angenanöi organisasida, hegöi omasi ira ba wamondro-ndrongo turia nifa’emada, sangefa’ö wa’auri.

7, 8. Hawara si tohudenia abölö moguna ta’oguna’ö nukha soadu?

7 Moguna ta’oguna’ö nukha si möi famolakhömi Yehowa hegöi turia nifa’emada, ena’ö tola tafosumange Lowalangi ni’amoni’ö, ira dalifusöda ba wamati hegöi niha zi fasui ya’ita. (Rom. 13:8-10) Abölö ta’angenanöi lala wonukhada na möi ita ba gangowuloa niha Keriso mazui ba wanuriaigö. Moguna ta’oguna’ö lala wonukha soadu si tefaudu ba niha samosumange Lowalangi (I Tim. 2:10) Tatu manö, lala wonukha si tola la’oguna’ö ba zi sambua mbanua tola manö tebai la’oguna’ö da’ö ba mbanua bö’ö. Hewa’a simanö, gofu hezoso manö toröi ita, böi irege tetutu dödö niha bö’ö ba lala wonukhada börö me ya’ita Samaduhu’ö Yehowa.

Hadia lafolakhömi Lowalangi niha bö’ö ba lala wonukhamö? (Faigi ngenoli si-7, 8)

8 Baso I Korindro 10:31. Ba ginötö möi ita ba kebaktian, moguna ta’oguna’ö  nukha soadu hegöi si öna-öna. Böi tago’ö lala wonukha si lö sökhi moroi ba gulidanö andre. Ta’oguna’ö lala wonukha si sökhi fatua lö mubörögö hegöi na no awai kebaktian, na so ita ba hotel hegöi ba ginötö kalua ita moroi ba da’ö. Na tafalua da’ö, lö aila ita ba wanguma’ö wa ya’ita andre Samaduhu’ö Yehowa, ba tola manuriaigö ita ero inötö.

9, 10. Hadia mbörö wa molua-lua Filifi 2:4 ba lala wonukhada?

9 Baso Filifi 2:4. Hadia mbörö wa moguna ta’angeraigö lua-lua lala wonukhada khö ndra talifusöda niha Keriso? Fanema linia, börö me laforege ono mbanua Lowalangi ba wolo’ö mene-mene andre, ”Ba mibunu sa’ae ndroto-ndroto andrö, si so ba gulidanö, fohorö, ba fa’ara’ira’iö, ba hokha.” (Kol. 3:2, 5) So dalifusöda si no mondröi gamuata fohorö, hiza’i moguna laforege nasa ba wotimbagö gisö-isö si fasala. Na lö mangelama ita, lala wonukhada tola tobali daha-taha khöra ba wolo’ö mene-mene Zura Ni’amoni’ö hegöi ba wolawa gisö-isö si fasala andrö. (I Kor. 6:9, 10) Tatu lö omasi ita ba wanaisi famorege si no lafalua. Hadia faduhu dödöu ba da’ö?

10 Ba ginötö so ita ba gotalua ndra talifusöda ba wamati, telumö’ö ita moroi ba niha somasi mamalua gamuata fohorö. Lala wonukhada tola möi fotuhini nahia si lö ta’unö andre, he na möi ita ba gangowuloa mazui ba nahia bö’ö. Hewa’ae tola tafili samösa nukha ni’oguna’öda, hiza’i lala wonukhada sinangeania manolo niha ba wororogö fangera-ngera, fehede hegöi amuata si sökhi föna Lowalangi. (I Fet. 1:15, 16) Fa’omasi sindruhu andrö ”lö ilau zi lö moadu, lö i’alui dana khönia”.I Kor. 13:4, 5.

NUKHA SI SÖKHI BA GINÖTÖ HEGÖI BA NAHIA SI TEFAUDU

11, 12. Hewisa Zangombakha 3:1, 17 möi fanolo khöda ena’ö itugu atua-tua?

11 Ba ginötö lahalö gangetula ira ono mbanua Lowalangi ba ngawalö ni’onukhara, la’ila wa ”fefu hadia ia nitörö ba hadia ia nilau, ba noa sa ifakhoi ginötö”. (Zango. 3:1, 17) He baŵa lökhö, baŵa deu, salua ba zi fasui ya’ita mazui salua khöda samösa, tola molua-lua ba ni’onukhada. Hiza’i, lö tebulö goi-goi Yehowa.Mal. 3:6.

Lö tebulö goi-goi Yehowa

12 Ba mbanua saukhu zino, lö aoha ba wofili nukha si tefaudu hegöi soadu. La’angenanöi ita ira talifusöda ba wamati na ta’oguna’ö nukha si lö fadroli-droli mazui talafo ebua irege oroma nösi mbotoda. (Yob. 31:1) Simanö göi, moguna moadu nukhada ba ginötö so ita ba nahia wolangi mazui ba nasi. (Gamd. 11:2, 20) Hewa’ae ato zangoguna’ö baru wolangi si lö moadu, moguna ta’angeraigö wa hadia ni’onukhada möi famolakhömi Lowalangida ni’amoni’ö, Yehowa.

13. Hadia mbörö wa molua-lua mene-mene si so ba I Korindro 10:32, 33 ba gangetula nihalöda sanandrösa ba wonukha?

 13 So goi-goi tanö bö’ö sinangea tafatimbaisi si tola molua-lua ba lala wonukhada. Moguna mangelama ita ena’ö böi tatandrawaisi tödö side-ide niha bö’ö. (Baso I Korindro 10:32, 33.) Böi ta’oguna’ö nukha same’e tetutu dödö ndra talifusöda ba wamati hegöi niha si tenga samosumange Yehowa. Isura Faulo, ”Dozi ita, ta’o’ö khö nawöda, ena’ö moguna khönia, ena’ö tedou-dou ba zi sökhi nawöda.” Imane nasa, ”Simanö sa göi Keriso, lö i’omasi’ö ia.” (Rom. 15:2, 3) Simane nifalua Yesu, abölö moguna ba wamalua gohitö dödö Lowalangi hegöi ba wanolo niha bö’ö moroi ba zomasi ita samösa. Andrö, böi ta’oguna’ö nukha same’e lö omasi niha ba wanema turia nifa’emada hewa’ae omasi ita lala wonukha simane da’ö.

14. Hewisa zatua wamaha’ö iraonora ba wamolakhömi Lowalangi moroi ba lala wonukhara?

14 Satua si no tobali niha Keriso la’okhögö halöwö ba wamaha’ö iraonora wolo’ö goi-goi Zura Ni’amoni’ö. Duma-dumania, la’ame’egö tödö lala wonukha hegöi fangehao mbotora samösa hegöi iraonora, irege möi fangomusoi’ö dödö Lowalangi. (Gamd. 22:6; 27:11) Hewisa zatua wamaha’ö iraonora ba wamosumange Lowalangi ni’amoni’ö hegöi goi-goinia? Moguna labe’e duma-duma khö ndraonora. Moguna lafaha’ö ndraonora si fao fa’omasi hezoso la’öli nukha soadu hegöi lala ba wamili ya’ia. Sinangeania, böi lafili iraono nukha ha ba zomasi dödöra. Hiza’i, sabölö moguna ya’ia da’ö lafili nukha si möi famolakhömi Lowalangi nisalahinira, Yehowa.

YA’ATUA-TUA NDRA’UGÖ BA WANGOGUNA’Ö SI NO TETEHEGÖ KHÖMÖ

15. Hadia wanolo khöda ba wangai angetula si fao fa’atua-tua?

15 Sura Ni’amoni’ö tobali fanuturu lala soguna khöda ba wangai gangetula si fao fa’atua-tua si möi famolakhömi Lowalangi. Hewa’ae simanö, so zomasi dödöda göi. Mode somasi ita mazui nukha zi sagu khöda wowöli tola manö fabö’ö ba niha bö’ö. Hiza’i, sinangeania sökhi nukha ni’oguna’öda, lö ta’unö, moadu, si öna-öna, tefaudu ba zifasui ya’ita mazui fatema ba niha si so ba mbanua andrö.

16. Hadia mbörö wa tenga zaya-zaya gölö na sökhi lala wonukhada?

16 Lö aoha wangalui nukha si tefaudu hegöi soadu. Oya toko zamawa ha mode nukha somasi niha sato. Andrö, moguna oya ginötö ni’oguna’öda hegöi taforege ba wangalui gu’i, nukha, baru, mazui ba wamili jas, hegöi sarewa soadu. Hiza’i, lafaigi ba la’angenanöi ita ira talifusöda ba wamati na taforege ba wangoguna’ö nukha soadu ba si sökhi wamaigi. Owua-wua dödöda börö me no tafolakhömi Namada ba zorugo safönu fa’omasi. Da’a no sambua sumange sebua nibe’eda ena’ö lala wonukhada möi famolakhöminia.

17. Hadia manö zinangea lafatimbaisi ira talifusöda ndra matua ba wangai gangetula ba wangokhögö gambi mazui rambe?

17 Hadia tefaudu na la’oguna’ö gambi mazui rambe ira dalifusöda ira matua?  Ba Goroisa Moze, fefu ndra matua lö tola lö’ö la’okhögö gambi mazui rambe. Hiza’i, tenga barö Goroisa Moze so niha Keriso iada’a, ba lö moguna la’o’ö da’ö. (III Moz. 19:27; 21:5; Gal. 3:24, 25) So ösa mbanua, lafosumange niha sangokhögö gambi mazui rambe, ba tola lö mangoloi’ö fangera-ngera niha ba duria nifa’emada. Sindruhunia, so ösa dalifusöda sangai halöwö zangokhögö gambi mazui rambe. Hewa’ae simanö, so göi zi lö omasi mangokhögö da’ö. (I Kor. 8:9, 13; 10:32) Ba mbanua bö’ö, lö ato niha zangokhögö gambi mazui rambe, ba tola manö lö moadu khö sanuriaigö niha Keriso si toröi ba da’ö. Tola manö, na so niha zangokhögö da’ö eluahania lö ifolakhömi Lowalangi hegöi ”mosinegu” ia.I Tim. 3:2, 7; Rom. 15:1-3.

18, 19. Hewisa Mikha 6:8 möi fanolo khöda?

18 Ta’andrö sibai saohagölö börö me lö ibe’e khöda Yehowa waö-waö sanau sanandrösa hadia manö zi tola mazui si tebai ba wonukha hegöi ba wangehao mboto. Hiza’i, itehegö khöda ba wangai angetula samösa, si te’odane-dane moroi ba goi-goi Zura Ni’amoni’ö. Andrö, ba ginötö tahalö gangetula sanandrösa ba lala wonukhada mazui ba wangehao mboto, moguna taforoma’ö wa ya’ita andre samosumange Lowalangi.Mi. 6:8.

19 Si fao fangide-ngide’ö tawa’ö wa Yehowa no ni’amoni’ö, sohau-hau, ba goi-goinia no tobali fanuturu lala sabölö sökhi khöda. Na omasi ita öna-öna wa’aurida ba ta’okhögö wangide-ngide’ö, tatu tafalua goi-goinia andrö ba wa’aurida. Na tafalua simanö da’ö, da’ö zanolo ya’ita ba wo’ame’egö tödö hadia niwa’ö niha bö’ö hegöi hewisa dödöra.

20. Hadia lua-lua lala wonukha hegöi fangehao mbotoda ba niha bö’ö?

20 Sinangeania, lala wonukhada mangoroma’ö wa ya’ita ono mbanua Yehowa. I’okhögö Yehowa goi-goi salawa, ba ta’o’ö da’ö si fao fa’omuso dödö. Ato dalifusöda ba wamati sinangea lasuno börö lala wonukhara hegöi amuatara si sökhi irege tola adöni dödö niha satulö tödö ba wamondro-ndrongo turia fangefa’ö moroi ba Zura Ni’amoni’ö, ba lafosumange hegöi la’omusoi’ö dödö Yehowa. Ba ginötö tahalö gangetula si fao fa’atua-tua sanandrösa ba wonukhada, lö aetu tafolakhömi Samösa ’salawa ba lakhömi nukhania’.—Zin. 104:1, 2.