Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Manuriaigö—Edisi Wamaha’ö  |  Baŵa si Siwa 2016

Böi Böhöli Wasöndrata ba Wanema Howu-Howu moroi khö Yehowa

Böi Böhöli Wasöndrata ba Wanema Howu-Howu moroi khö Yehowa

”Me no fasöndra’ö khö Lowalangi ba ba niha, ba me no ya’ugö zabölö.”I MOZE 32:29.

SINUNÖ: 23, 38

1, 2. Hadia zinangea laforege lafalua ira ono mbanua Yehowa?

FEFU nono mbanua Lowalangi si lö faröi, i’otarai Habeli niha satulö tödö irugi niha si lö faröi iada’a, lö laböhöli ba wotimbagö zi lö sökhi. Itutunö Faulo ba niha Keriso ba Heberai’o, ”mitaögö fasöndrata famakao andrö” ena’ö omuso dödö Yehowa ba tefahowu’ö ira. (Heb. 10:32-34) Ifagölösi Waulo famorege nifalua niha Keriso simane nifalua niha si fatandri ba Yunani somasi möna ba olahraga fagohi, fatako, hegöi fatezu. (Heb. 12:1, 4) Iada’a, so ita ba watandrisa ba wogamö fa’auri. Hiza’i, so nudu somasi mangoloi’ö fangera-ngerada ba ena’ö taya wa’owua-wua dödöda ba lö tatema howu-howu ba zi so föna.

2 Famorege, mazui ”fasöndrata” sabua sibai khöda ya’ia da’ö ba wolawa Satana hegöi ulidanönia. (Ef. 6:12) Andrö, moguna tatimbagö fondrönisi moroi ba wamaha’ö gulidanö andre, fangera-ngera niha, mazui gamuata si lö  sökhi simane famalua horö, foroko, fa’amabu-mabu, mazui fangoguna’ö narkoba. Moguna göi taforege ba wotimbagö fa’ide-ide dödö mazui zo’amböta moroi khöda samösa.II Kor. 10:3-6; Kol. 3:5-9.

3. Hewisa wamaha’ö Lowalangi ita ba wolawa nududa?

3 Hadia tola möna ita ba wolawa nudu sagabölö andrö? Tola, hiza’i moguna taforege! Ifagölösi ia Faulo simane niha si fatezu me imane, ”Si fasöndra ndra’o, ba tenga ba dalu mbanua manö.” (I Kor. 9:26) Simane samösa si fatezu solawa si fatezu tanö bö’ö, moguna göi talawa nududa. Itolo ba ifaha’ö ita Yehowa ba wamalua da’ö. Ifaha’ö ita moroi ba Zura Ni’amoni’ö, publikasi si te’odane-dane ba Zura Ni’amoni’ö, gangowuloa niha Keriso, kebaktian wilayah mazui ba kebaktian regional. Hadia ö’oguna’ö wanuturu lala si no ötema? Na lö mufaluamö da’ö, lö muforegemö wolawa nudu, ba hulö simane si fasöndra ba dalu mbanua ndra’ugö.

4. Hewisa wotimbagöda ena’ö lö ifatörö ita si lö sökhi?

4 Moguna tafa’anö ita ero inötö. Hadia mbörö? Tola manö ibözi ita nududa ba ginötö si lö tadöna-döna mazui ba ginötö ambö fa’abölöda. Ifamangelama ba ifarou ita Zura Ni’amoni’ö imane, ”Böi ilaŵa ndra’ugö si lö sökhi, be’e folaŵa zi lö sökhi zi sökhi.” (Rom. 12:21) Na lö taböhöli wolawa si lö sökhi, tola möna ita! Hiza’i, Na lö mangelama ita ba tabato fasöndrata, tola ikalaisi ita Satana, ulidanönia hegöi zo’amböta moroi khöda samösa. Andrö, böi irai awuwu ndra’ugö. Böi ide-ide dödöu mazui ötehegö adada dangamö!—I Fet. 5:9.

5. (a) Hadia zinangea tatörö tödöda ena’ö omuso dödö Lowalangi khöda ba ifahowu’ö ita? (b) Duma-duma haniha ba Zura Ni’amoni’ö nitutunöda?

5 Ena’ö tola möna ita, moguna tatörö tödöda hadia mbörö wa taforege. Börö me omasi ita na omuso dödö Lowalangi khöda ba ifahowu’ö ita. Imane ba Heberai’o 11:6, ’sangondrasi Lowalangi ena’ö ba lö’ö sa tola lö mamati ia, so Lowalangi, ba ifoluo zamorege zangalui ya’ia andrö’. Ngawua wehede zamorege zangalui Yehowa eluahania taforoma’ö famorege soroi ba dödö ena’ö omuso dödönia khöda. (Hal. 15:17) Ato ndra matua hegöi ira alawe si tobali duma-duma si sökhi samalua da’ö ba Zura Ni’amoni’ö. Yakobo, Rakhela, Yosefo, hegöi Faulo no lataögö ngawalö zame’e afatö dödö hegöi sangohorigö fa’abölöra. Hiza’i, tola lataögö da’ö. Duma-dumara andre zangoroma’ö wa na taforege, tola tatema howu-howu moroi khö Yehowa. Datatutunö hewisa lalania.

ÖTEMA HOWU-HOWU NA LÖ AWUWU NDRA’UGÖ

6. Hadia zanolo Yakobo ena’ö anau gölönia, ba hadia luonia? (Faigi gambara ba wamobörö wamaha’ö.)

6 No iforege Yakobo, niha samati ena’ö lö awuwu ia börö me i’omasi’ö Yehowa ba i’ame’egö tödö wahuwusara. Mamati sibai ia ba nifabu’u Yehowa wa ifahowu’ö nga’ötönia. (I Moz. 28:3, 4) Omasi sibai ia na ifahowu’ö ia Lowalangi irege fasöndra ia khö mala’ika hewa’ae no 100 fakhe ndröfinia. (Baso I Moze 32:25-29.) Hadia sindruhu-ndruhu abölö Yakobo me fasöndra ia khö mala’ika sabölö? Tatu manö lö’ö! Hiza’i, so khö Yakobo  wa’afaduhu dödö saro ba iforege ba wanema howu-howu! Ifahowu’ö nga’ötö Yakobo Yehowa ba ibe’e döinia Gizara’eli, eluahania ”Niha si Fasöndra khö Lowalangi.” Itema Yakobo luonia, ya’ia da’ö omuso dödö Yehowa khönia ba tefahowu’ö ia. Omasi ita göi simane da’ö.

7. (a) Hadia zame’e ide-ide dödö Rakhela? (b) Hadia nifalua Rakhela, ba hadia howu-howu nitemania?

7 Rakhela, fo’omo ni’omasiö Yakobo, omasi sibai i’ila hewisa wa’alua nifabu’u Yehowa khö wo’omonia. Hiza’i, so sambua gabula dödö. Tebai mo’ono Rakhela. Da’a gabula dödö sabua ba ndra’alawe me götö Zura Ni’amoni’ö. Hadia nifalua Rakhela ba wolawa fa’ide-ide dödönia? Lö irai awuwu wanötönania. Hiza’i, iforege ba i’asese’ö mangandrö khö Yehowa. Ba Ifondro-ndrongo wangandrö Rakhela soroi ba dödö, tefahowu’ö ia irege ba gafuriata tola mo’ono ia. Andrö wa imane, ”No fasöndra ndra’o . . . ba no abölö ndra’o!”—I Moz. 30:8, 20-24.

8. Hadia gabula dödö nitaögö Yosefo, ba hewisa tola tobali ia duma-duma si sökhi khöda?

8 Molua-lua wamati Yakobo hegöi Rakhela khö nonora Yosefo ba da’ö zanolo ya’ia ba ginötö itaögö wanandraigö ba wa’aurinia. Me 17 fakhe ndröfi Yosefo, sindruhu-ndruhu tebulö wa’aurinia. Afökhö dödö ndra talifusönia khönia ba lafamawa ia tobali sawuyu. Ba gafuriata, labe’e ia ba gurunga ba zi hauga fakhe ba Miserai hewa’ae lö hadöi zalania. (I Moz. 37:23-28; 39:7-9, 20, 21) Hiza’i, lö ide-ide dödö Yosefo mazui abao dödönia, ba lö irai tumbu ba dödönia wosulöni zi lö sökhi. Hadia mbörö? Börö me i’ame’egö tödö ba lö iböhöli wo’angeraigö wahuwusania khö Yehowa soroi ba dödö. (III Moz. 19:18; Rom. 12:17-21) Duma-duma Yosefo andre tobali fanolo  khöda iada’a. Hewa’ae afönu gabula dödö me ide-ide ita, mazui hulö zi lö fanötöna wa’aurida iada’a, moguna böi aetu tatimbagö ba böi faroi ita. Na tafalua da’ö, tola faduhu dödöda wa ifahowu’ö ita Yehowa.Baso I Moze 39:21-23.

9. Hewisa wolo’öda nifalua Yakobo, Rakhela hegöi Yosefo?

9 Iada’a, tola manö tataögö gabula dödö sabua. Duma-dumania, laböbögö khömö zi lö duhu, manufa dödöra, la’o’aya, mazui te so zafökhö tödö khömö. Moroi na ide-ide dödömö, törö tödöu hadia zanolo Yakobo, Rakhela, hegöi Yosefo ba wamosumange Yehowa si fao fa’omuso dödö. I’aro’ö ba ifahowu’ö ira Lowalangi börö me la’ame’egö tödö sibai wahuwusa khönia. Lö laböhöli wamorege mazui wasöndrata ba wamalua simane si no la’ohe ba wangandrö. Börö me auri ita ba götö safuria, moguna tarorogö dötö naföda ba zi so föna! Hadia omasi ndra’ugö fasöndra mazui öforege ena’ö omuso dödö Yehowa khömö?

FASÖNDRA BA WANEMA HOWU-HOWU

10, 11. (a) Hana wa moguna fasöndra ita ba wanema howu-howu Lowalangi? (b) Hadia zanolo ya’ita ba wangai angetula satulö?

10 Hadia mbörö wa fasöndra ita ba wanema howu-howu Lowalangi? Sambua mbörönia ya’ia da’ö me lö mo’ahonoa ita, moguna taforege ba wolawa gisö-isö zi fasala. So ösa zamorege ba wangokhögö fangera-ngera satulö ba wanuriaigö, so göi danö bö’ö zamorege ba wanaögö fökhö mazui tödö si hasamö-samösa. Tanö bö’önia, abua khöra ba wangefa’ö zala niha zangafökhöi’ö dödöra. Tenga dali hauga fakhe no tafosumange Yehowa, fefu ita moguna taforege ba wolawa ngawalö zame’e abua khöda ba wamosumange Lowalangi, sanga’asogö howu-howu ba niha si lö faröi.

Hadia fasöndra ndra’ugö ba wanema howu-howu Lowalangi? (Faigi ngenoli si-10, 11)

11 Sindruhunia, abua ba wangai angetula si sökhi hegöi ena’ö tobali niha Keriso, mendrua manö ba ginötö taforege ba wolawa gisö-isö zi fasala. (Yer. 17:9) Na simane da’ö nirasoimö, angandrö khö Yehowa, andrö geheha ni’amoni’ö moroi khönia. Fangandrö hegöi eheha ni’amoni’ö zanolo ya’ugö ba wamalua satulö, ba tola ifahowu’ö ndra’ugö Lowalangi. Osambua’ö dödömö ba wamalua simane si no ö’ohe ba wangandrö. Baso Zura Ni’amoni’ö ero ma’ökhö ba be’e ginötömö ba wamaha’ö samösa hegöi ba wamaha’ö yomo ba nomo.Baso Zinunö 119:32.

12, 13. Hewisa wa tola tetolo zi darua niha Keriso ba wotimbagö gisö-isö zi fasala?

12 Oya duma-duma hewisa Daromali Lowalangi, eheha ni’amoni’ö, hegöi publikasida möi fanolo ndra talifusöda ba wamati ba wotimbagö gisö-isö zi fasala. Samösa si bohou ebua ibaso duho ”Bagaimana Anda Dapat Melawan Hasrat yang Salah?” ba Sedarlah! 8 mbaŵa si Felendrua 2003. Hadia nifaluania? Imane, ”Uforege ba wotimbagö fangera-ngera si lö sökhi. Ba duho da’ö so wehede ’ba wamaigi niha sato, abua sibai wolawa gisö-isö zi fasala’. Me ubaso da’a, urasoi wa no fao ndra’o ba wa’atalifusö ba zi sagörö ulidanö. Urasoi wa tenga ha samösa-mösa ndra’o.” Isöndra göi wamaha’ö moroi ba duho ”Gaya Hidup Alternatif—Apakah Diperkenan Allah?” ba Sedarlah! 8 mbaŵa si Fulu 2003. Ba duho da’ö, i’ila wa so niha si lö aetu mamorege,  hulö ”zuzumö ba nösi”. (II Kor. 12:7) Hiza’i, na lö labato ba wamorege wamalua gamuata si sökhi, tola la’okhögö wanötöna si sökhi ba zi so föna. Imane, ”Börö da’ö, imane tödögu wa tola göi lö faröi ndra’o ero ma’ökhö. U’andrö sibai saohagölö khö Yehowa börö me i’oguna’ö organisasinia ba wanolo ya’ita ena’ö tola tataögö wa’auri ba gulidanö si lö sökhi andre.”

13 Datafaigi waö-waö dalifusöda ira alawe si so ba Amerika Serikat. Isura, ”U’andrö sibai saohagölö khömi börö me lö miböhöli wame’e gö ba wamati soguna khöma hegöi ba ginötö si tefaudu. Asese urasoi wa hulö ha khögu samösa lafazökhi duho andrö. Ba zi hauga fakhe, no uforege ba wotimbagö gisö-isö dödö si fatuwu khö Yehowa. Itaria, umane tödögu abölö sökhi na awuwudo ba uböhöli ba wamorege. U’ila wa sahakhö tödö Yehowa ba sangefa’ö zala. Hiza’i, börö me lö u’odödögö ba wamatuwusi gisö-isö zi fasala, hulö tenga sinangea utema wanolo andrö. Famorege nifaluagu andre molua-lua ba wa’aurigu. . . . Me no aefa ubaso ’Apakah Saudara Memiliki ”Hati untuk Mengenal” Yehuwa?’ ba Menara Pengawal 15 mbaŵa si Tölu 2013. Sinduruhu-ndruhu urasoi wa omasi Yehowa ba wanolo ya’o.”

14. (a) Hewisa nirasoi Waulo sanandrösa ba wamoregenia? (b) Hewisa tola möna ita ba wolawa zo’amböta moroi khöda?

14 Baso Roma 7:21-25. Irasoi samösa Faulo wa abua sibai ba wotimbagö zo’amböta hegöi gisö-isö zi fasala. Hiza’i, faduhu dödönia wa tola möna ia na mangandrö ia khö Yehowa, mangodaligö ya’ia ba wangandrö fanolo, hegöi mamati ia ba höli Yesu. Hewisa göi ita? Hadia tola möna ita ba wolawa zo’amböta moroi khöda? Tola, na ta’o’ö simane nifalua Waulo, ba wangodaligö Yehowa soroi ba dödö tenga fa’abölöda samösa hegöi mamati ita ba höli.

15. Hewisa wanolo Yehowa ena’ö lö faröi ita ba lö awuwu ba ginötö so gabula dödö?

15 Itaria, omasi Lowalangi na taforoma’ö hadia nifaluada na so gabula dödö. Duma-dumania, na laböbögö khöda zi lö sökhi mazui na mofökhö ita hegöi ösi nomoda, hadia zinangea tafalua? Na sindruhu-ndruhu faduhu dödöda khö Yehowa, ta’andrö khönia ena’ö ibe’e khöda wa’abölö irege lö faröi ita, lö aetu owua-wua dödöda ba aro wahuwusada khönia. (Fil. 4:13) Duma-duma moroi ba niha Keriso si föföna hegöi iada’a, zangoroma’ö wa fangandrö tola manga’aro’ö ya’ita hegöi ibe’e khöda wa’abarani irege lö faröi ita.

BÖI BÖHÖLI FASÖNDRATA BA WANEMA HOWU-HOWU YEHOWA

16, 17. Hadia zinangea öfalua?

16 Tatu omasi Gafökha na ide-ide dödöda, awuwu ba tabato wamorege. Andrö, osambua’ö dödöu ’ba wangai si sökhi.’ (I Tes. 5:21) Tola möna ndra’ugö ba wolawa Satana, ulidanönia si lö sökhi hegöi gisö-isö si fasala! Tola möna ndra’ugö na sindruhu-ndruhu faduhu dödömö wa i’aro’ö ba itolo ndra’ugö Lowalangi.II Kor. 4:7-9; Gal. 6:9.

17 Andrö, böi aetu öforege. Böi bato wasöndrata. Böi awuwu ndra’ugö. Böi aetu anau gölömö. Tola sindruhu-ndruhu faduhu dödöu wa Yehowa ’zamaduwa howu-howu khömi, irege zi no fahöna.’Mal. 3:10.