Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Manuriaigö—Edisi Wamaha’ö  |  Baŵa si Siwa 2016

”Böi Adada Dangami”

”Böi Adada Dangami”

”Böi adada dangami.”ZEFANIA 3:16.

SINUNÖ: 54, 32

1, 2. (a) Hadia manö ngawalö gabula dödö nirasoida iada’a, ba hadia lua-luania? (b) Hadia wanötöna nibe’e Yesaya 41:10, 13?

IMANE samösa talifusöda ira alawe perintis biasa zangowalu khö samösa satua sokubaloi, ”Hewa’ae ufaha’ö ndra’odo ero ma’ökhö ba Daromali, moguna nasa uforege ba wolawa fa’aombö-aombö dödögu ba zi hauga fakhe. Lua-luania, lö ahono dödögu ba wemörö, itaria mofökhödo, ba da’ö mbörö wa ambö sökhi gamuatagu ba niha bö’ö. Itaria iwa’ö tödögu lö sagu khögu sa’ae.”

2 Hadia aboto ba dödöu nirasoi dalifusöda andre? Börö me ba gulidanö nifatörö Satana so ita, lö tola lö’ö tataögö wangabu dödö sabölö-bölö. Hulö simane sao göfa sanaha ena’ö lö ahani ia, fa’aombö dödö zame’e khöda fa’abua gölö mazui fa’aetu dötönafö. (Gamd. 12:25) Hadia mbörö wa aombö dödömö? Tola manö, börö me no mate niha ni’omasi’öu, örasoi wökhö sabölö-bölö, ötaögö wanandraigö mazui börö me marase ndra’ugö ba wanga’asogö mbalazo börö me abua wangalui kefe. Itugu ara, tola alö wa’abölöda ba tola taya wa’owua-wua dödöda börö gabula dödö andrö. Hewa’ae simanö, tola faduhu dödöu wa omasi itolo ndra’ugö Lowalangi.Baso Yesaya 41:10, 13.

3, 4. (a) Hewisa wanutunö Zura Ni’amoni’ö sanandrösa ba ”danga”? (b) Hadia manö mbörö wa tola adada dangada?

 3 Asese i’oguna’ö ndroto-ndroto mboto Zura Ni’amoni’ö ba wo’amaedolagö mbua-bua mazui nifalua zi samösa niha. Duma-dumania, ngaotu kali latutunö sanandrösa ba danga. Ba ginötö iwa’ö Zura Ni’amoni’ö la’abe’e’ö danga zi samösa niha, eluahania ifuli tefarou, te’abe’e’ö, ba tola ifalua. (I Zam. 23:16; Gese. 1:6) Tola göi eluahania, so khönia wangera-ngera si sökhi ba i’okhögö wanötöna ba zi so föna.

4 Itaria, itutunö Sura Ni’amoni’ö samösa niha zadada tanga ba wo’amaedolagö niha side-ide tödö mazui si lö fanötöna. (II Nga. 15:7; Heb. 12:12) Ba ginötö abu dödöu, marase’ö, mazui örasoi wa lö aro wahuwusamö khö Yehowa, tola manö ömane tödöu lö sagu khögu sa’ae. Hezo tola ösöndra wondrara dödö? Hewisa tola ifuli tefarou ba te’abe’e’ö ndra’ugö ena’ö tola lö aetu owua-wua dödömö?

’TENGA SAMBÖ DANGA YEHOWA BA WANGORIFI’

5. (a) Hadia manö zi tola tarasoi na so gabula dödö, ba hadia zinangea tatörö tödöda? (b) Hadia nitutunöda ba duho da’a?

5 Baso Zefania 3:16, 17. Ba ginötö so gabula dödö böi adada dangada, eluahania böi ata’u ita mazui ide-ide dödöda. I’andrö Amada safönu fa’omasi Yehowa, ena’ö tatou’ö khönia fefu gabula dödöda. (I Fet. 5:7) I’ame’egö tödö ita Yehowa simane nifaluania khö ndraono Gizara’eli. Imane khöra wa, ’Tenga sambö dangania ba wangorifi.’ Lö iböhöli wolumö’ö ono mbanuania si lö faröi. (Yes. 59:1) Ba duho da’a, tatutunö tölu ngawalö duma-duma moroi ba Zura Ni’amoni’ö, zangoroma’ö fa’omasi Yehowa hegöi fa’abölönia ba wanga’aro’ö ono mbanuania ba wamalua ohitö dödönia hewa’ae so gabula dödö. Datafaigi hewisa duma-duma da’a tola manga’aro’ö ndra’ugö.

6, 7. Hadia wamaha’ö khöda moroi ba waö-waö wa’amöna ndraono Gizara’eli ba wolawa ndraono Gamaleki?

6 Me no te’efa’ö ndraono Gizara’eli moroi ba wangosawuyu Miserai, lasuwö ira iraono Gamaleki. Iwa’ö Moze khö Yosua, samösa ira matua si lö fa’ata’u, ena’ö idönisi ndraono Gizara’eli ba wasuwöta. Aefa da’ö, möi Moze ba hili sahatö ba da’ö ba i’ohe awönia A’aroni hegöi Huri. Ba da’ö, tola la’ila wasuwöta andrö. Hadia ata’u ndra matua si datölu andre irege moloi ira? Tatumanö lö’ö!

7 Ifalua Moze lala ena’ö tola möna ndraono Gizara’eli ba wolawa ndraono Gamaleki. Igogohe zi’o Lowalangi sindruhu ba ifazawa. Me ifalua da’ö Moze, ibe’e wa’abölö ba ndraono Gizara’eli Yehowa ba wolawa ndraono Gamaleki. Hiza’i, me atage danga Moze ba ibörögö adada dangania, ibörögö möna ndraono Gamaleki. I’anemai’ö latolo ia ira A’aroni hegöi Huri. ”Ba lahalö gara ba labe’e dadaomania. Ba latuwu da’ionia A’aroni ba Huri, samösa dambai, ba abe’e da’ionia, irege aekhu luo.” Börö wa’abölö danga Lowalangi, möna ndraono Gizara’eli ba wasuwöta.—II Moz. 17:8-13.

8. (a) Hadia nifalua Asa me lafeta’u niha Yuda ira Ndrawa Gaitiofia? (b) Hewisa wolo’öda duma-duma Asa?

 8 I’oguna’ö göi Yehowa dangania sabölö ba wanolo ono mbanuania ba götö Razo Asa. Oya zaradadu nitutunö ba Zura Ni’amoni’ö. Hiza’i, abölö oya zaradadu Zera, Ndrawa Gaitiofia. So 1.000.000 zaradadu si no to’ölö ba wasuwöta. Saradadu Ndrawa Gaitiofia dua kali abölö oya moroi ba zaradadu Asa. Hadia aombö dödö, ata’u mazui ide-ide dödö Asa? Hadia adada dangania? Lö’ö! I’anemai i’andrö Asa wanolo moroi khö Yehowa. Moroi ba wamaigi niha, lö tola möna Asa ba wolawa Ndrawa Gaitiofia. Hiza’i, ”Ba ba Lowalangi, ba molala fefu hadia ia.” (Mat. 19:26) I’oguna’ö Lowalangi wa’abölönia sebua ba ”ibözi Ndrawa Gaitiofia Yehowa, föna Asa” börö me ”noa sa adölö manö khö Yehowa, sagötö ya’ia”.—II Nga. 14:8-13; I Raz. 15:14.

9. (a) Hadia zi lö iböhöli ifalua Nehemia ba wangehaogö göli Yeruzalema? (b) Hewisa wanema li Lowalangi wangandrö Nehemia?

9 Ba ginötö möi Nehemia ba Yeruzalema, hadia ni’ilania? I’ila wa lafeta’u niha Yehuda ira nudu moroi ba soi bö’ö irege tebato wangehaogö göli Yeruzalema. Lö folumö’ö ba mbanua andrö, ba ide-ide dödö niha Yehuda. Hewisa dödö Nehemia? Hadia ide-ide dödönia ba adada dangania? Lö’ö! Hulö simane Moze, Asa, hegöi ono mbanua Yehowa si lö faröi tanö bö’önia, lö iböhöli Nehemia ba wangodaligö Yehowa. Ba ginötö da’ö, i’andrö wanolo Nehemia moroi khö Yehowa ba itema Yehowa wangandrönia. I’oguna’ö Lowalangi ’wa’abölönia’ hegöi ’tangania sabe’e’ ba wanga’aro’ö niha Yehuda. (Baso Nehemia 1:10; 2:17-20; 6:9.) Hadia faduhu dödöu wa i’oguna’ö göi Yehowa ’wa’abölönia’ hegöi ’tangania sabe’e’ ba wanga’aro’ö ono mbanuania iada’a?

I’ARO’Ö DANGAMÖ YEHOWA

10, 11. (a) Hadia nifalua Zatana ena’ö adada dangada? (b) Hadia ni’oguna’ö Yehowa ba wanga’aro’ö ya’ita hegöi ba wame’e fa’abölö khöda? (c) Hadia wamaha’ö si tola öhalö moroi ba lala wamaha’ö Yehowa?

10 Faduhu dödöda wa lö irai adada danga Gafökha. Lö iböhöli wo’udusi ya’ita ena’ö tabato wamalua halöwö niha Keriso. I’oguna’ö walimosa ba fameta’u moroi ba zamatörö, sondrönia’ö ba agama hegöi niha si no mondröi organisasi. Hadia gohitönia? Omasi ia na tabato wanuriaigö turia somuso dödö sanandrösa ba Mbanua Lowalangi. Hiza’i, tola ba omasi Yehowa wanolo ya’ita, ba ibe’e gehehania ba wanga’aro’ö ya’ita. (I Nga. 29:12) Moguna ta’andrö geheha Lowalangi ba wolawa Satana hegöi ulidanönia si lö sökhi. (Zin. 18:40; I Kor. 10:13) Ta’andrö göi saohagölö ba wanolo moroi ba Daromali Lowalangi. Khalaigö göi  hawa’oya wamaha’ö khöda ero waŵa moroi ba mbuku-bukuda. Ngawua wehede ba Zakharia 8:9, 13 (baso) Lafa’ema ia ba ginötö ifuli lahaogö omo Lowalangi ba Yeruzalema. Hiza’i, fehede da’ö möi fanoloda iada’a.

Moguna ta’andrö geheha Lowalangi ba wolawa Satana hegöi ulidanönia si lö sökhi

11 I’aro’ö göi ita Yehowa na tatema wamaha’ö ba gangowuloa niha Keriso, kebaktian wilayah, kebaktian regional, hegöi ba sekolah famomaha ba wanuriaigö. Famaha’ö da’ö zanolo ya’ita ba wamosumange Lowalangi soroi ba dödö, ba wotatugöi gohitö dödö, hegöi ba wamalua halöwö niha Keriso. (Zin. 119:32) Hadia omasi ötema wa’abölö moroi ba wamaha’ö Yehowa?

12. Hadia zinangea tafalua ena’ö lö awuwu ita?

12 Itolo nono mbanuania Yehowa ba wolawa ndraono Gamaleki hegöi Ndrawa Gaitiofia. Ibe’e göi wa’abölö khö Nehemia hegöi ba niha Yehuda ba wangasiwaisi göli Yeruzalema. Simanö göi iada’a, i’aro’ö ita Lowalangi ena’ö böi taböhöli wanuriaigö hewa’ae so wa’aombö dödö, fanandraigö hegöi ato zi lö omasi mamondro-ndrongo duria nifa’emada. (I Fet. 5:10) Lö iheta Yehowa gabula dödöda si fao fa’ahöli-höli dödö. Hiza’i, moguna tafalua halöwöda. Hadia da’ö? Moguna tabaso Daromali Lowalangi ero ma’ökhö, tafa’anö ita hegöi möi ba gangowuloa ero migu, owölö-ölö ba wamaha’ö samösa hegöi ba wamaha’ö yomo ba nomo, ba lö taböhöli ba wangodaligö Yehowa ba wangandrö. Böi tatehegö hadia manö tobali fangoloi’ö wangera-ngerada ba zi no ihenaigö Yehowa ba wanga’aro’ö hegöi ba wango’ou ya’ita. Na ibörötaigö adada dangamö, andrö wanolo moroi khö Lowalangi. Aefa da’ö, rasoi hewisa geheha Lowalangi ’wanga’asogö ba dödömö, he fa’edöna, he famalua’. (Fil. 2:13) Hadia zi tola öfalua ba wanga’aro’ö danga niha bö’ö?

ARO’Ö ZADADA TANGA

13, 14. (a) Hewisa tola te’aro’ö samösa dalifusöda ira matua me no mate wo’omonia? (b) Hewisa wangaro’öda niha bö’ö?

13 Ibe’e khöda Yehowa dalifusö si sökhi si tola mamarou ya’ita ba zi sagörö ulidanö. Imane Faulo, ”Mifuli mi’abe’e’ö danga, si no adada, ba balöduhi, si no atage andrö, ba mifaigi zadölö lala gahemi.” (Heb. 12:12, 13) Ato niha Keriso ba götö si föföna sanema fanolo hegöi fa’abölö moroi khö ndra talifusöra. Simanö göi zalua iada’a. Fatimbaisi duma-duma andre. Samösa dalifusöda ira matua zabu tödö börö me no mate wo’omonia ba itaögö nasa ngawalö gabula dödö tanö bö’ö. Imane, ”Aboto ba dödögu wa tebai tafili samösa hadia manö wanandraigö zinangea alua khöda, hawara hegöi hawa’asese alua da’ö. Hiza’i, fangandrö hegöi famaha’ö samösa, no amaedola baru wolangi fa lö ahöndrö zame’e lö alömö högögu ba nidanö. Famarou dödö moroi khö ndra dalifusö ba wamati si möi fondrara dödögu. Ba gafuriata, aboto ba dödögu, wa moguna sibai tadou’ö wahuwusa si sökhi khö Yehowa fatua lö tohare wanandraigö sabölö-bölö.”

Fefu niha ba mbanua niha Keriso tola lafarou dödö niha bö’ö (Faigi ngenoli si-14)

14 La’aro’ö danga Moze ira A’aroni hegöi Huri ba ginötö fasuwö ndraono  Gizara’eli ba ndraono Gamaleki. Iada’a, tola ta’angeraigö hadia zinangea tafalua ba wanolo hegöi ba wamarou todö niha bö’ö. So ösa dalifusöda side-ide tödö börö me no alawa ndröfira, mofökhö, lataögö wanandraigö moroi ba nösi nomora, tödö si hasamö-samösa mazui fa’amate niha ni’omasi’ö. Tola göi tafarou dödö ndraono si bohou ebua sasese lasaisi ba wamalua si lö sökhi hegöi ena’ö mofozu ba gulidanö andre. (I Tes. 3:1-3; 5:11, 14) Angeraigö hewisa wangoroma’ömö wa ö’ame’egö tödö niha bö’ö ba ginötö so ndra’ugö ba Balai Mbanua Lowalangi, manuriagö, fao ba wemanga mazui na ötelefo ira.

15. Hadia lua-lua wehededa si sökhi khö ndra talifusöda ba wamati?

15 Me no möna Asa ba wolawa zaradadu Ndrawa Gaitiofia sato, sama’ele’ö sotöi Gasaria ifarou dödö razo hegöi ono mbanuania imane, ”Ba ya’ami, ba mi’abe’e’ö dödömi, böi adada dangami, tefoluo sa dania wolaumi!” (II Nga. 15:7) Tefarou Asa ba wo’atulö’ö lala wamosumange sindruhu. Simanö göi wehededa si sökhi, tola möi famarou dödö niha bö’ö ba sanolo ya’ira ena’ö lö faröi ba wamosumange Yehowa. (Gamd. 15:23) Ba böi olifu ndra’ugö wa tola tefarou dödö niha bö’ö moroi ba wanema li nifa’emamö si möi famarou dödö ba gangowuloa.

Ba ginötö mohalöwö danö bö’ö, lö modadao manö Nehemia. Fao göi ia ba wangehaogö mangawuli göli Yeruzalema

16. (a) Hewisa wolo’ö zatua sokubaloi simane nifalua Nehemia? (b) Be’e duma-duma hewisa dalifusö ba wamati wanolora ya’ugö samösa?

 16 Te’aro’ö danga Nehemia hegöi niha Yehuda börö wanolo moroi khö Yehowa. La’asiwai göli Yeruzalema ha ba zi 52 hari! (Neh. 2:18; 6:15, 16) Ba ginötö mohalöwö danö bö’ö, lö modadao manö Nehemia. Fao göi ia ba wangehaogö mangawuli göli Yeruzalema. (Neh. 5:16) Iada’a, ato satua sokubaloi zolo’ö simane nifalua Nehemia, duma-dumania fao ira ba wamasindro, wama’anö, hegöi ba wangehaogö Balai Mbanua Lowalangi. Ira matua safönu fa’omasi andre, lafalukhaisi ba fao ira möi manuriaigö khö ndra dalifusö ’saombö-aombö tödö’ ena’ö ifuli te’aro’ö ira.Baso Yesaya 35:3, 4.

”BÖI ADADA DANGAMI”

17, 18. Ba ginötö so gabula dödö mazui fa’aombö-aombö dödö, hadia zinangea tafaduhusi tödö?

17 Na falulu fohalöwö ita khö ndra talifusöda ba wamati, itugu te’osambua’ö wahuwusada khöra. Da’a zi möi fanolo ena’ö ta’okhögö fahuwusa saro ba itugu faduhu dödöda wa hasambalö alua howu-howu Mbanua Lowalangi. Na ta’aro’ö danga niha bö’ö, tatolo ira ena’ö anau gölöra ba gabula dödö salua khöra, hegöi ba wangokhögö fangera-ngera si sökhi ba wanötöna si so föna. Baero da’ö, ba ginötö tatolo niha bö’ö, te’aro’ö göi dangada ba tola möi fanolo khöda ba wangosambua’ö fangera-ngerada ba zi so föna.

18 Na ta’angeraigö hewisa wanolo Yehowa hegöi wolumö’önia ono mbanuania si lö faröi ba zilalö, tola itugu mamati ba faduhu dödöda wa i’aro’ö ita. Andrö, ba ginötö so gabula dödö mazui fa’aombö-aombö dödöu, ’böi adada dangamö’! Tola faduhu dödöu wa na ö’andrö wanolo moroi khö Yehowa, i’aro’ö ndra’ugö dangania safönu fa’abölö irege tola omuso dödöu ba howu-howu Mbanua Lowalangi ba zi lö aratö alua.—Zin. 73:23, 24.