Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Manuriaigö—Edisi Wamaha’ö  |  Baŵa si Önö 2017

Osambua’ö Dödömö ba Girö-Girö ba Wamati Ni’okhögömö

Osambua’ö Dödömö ba Girö-Girö ba Wamati Ni’okhögömö

”Ba zi so girö-girömi sa, ba da’ö göi so dödömi dania.”​—LUKA 12:34.

SINUNÖ: 153, 9

1, 2. (a) So tölu girö-girö ba wamati moroi khö Yehowa, hadia da’ö? (b) Hadia nitutunöda ba wamaha’ö da’a?

HA YEHOWA zabölö kayo ba mbanua si yawa awö danö. Lö khönia fa’ambö. (I Nga’ötö 29:11, 12) Hiza’i, oböwö sibai Yehowa. Ta’andrö sibai saohagölö börö me oya girö-girö ba wamati nibe’enia khöda! Simane (1) Banua Lowalangi, (2) halöwö fanuriaigö, hegöi (3) sindruhu sebua böli si so ba Daromalinia. Hiza’i, na lö tahaogö ta’angelamaisi, tola manö olifu ita hewisa wa’amoguna girö-girö andre. Moguna böi mamalö-malö tatörö tödöda wa moguna sibai girö-girö andrö ba moguna itugu ta’omasi’ö ia börö me imane Yesu, ”Ba zi so girö-girömi sa, ba da’ö göi so dödömi dania.”​—Luka 12:34.

2 Iada’a, datatutunö hewisa wondrorogöda ena’ö lö mamalö aro wa’omasi hegöi fangandröda saohagölö ba Mbanua Lowalangi, halöwö fanuriaigö hegöi ba zindruhu. Ba angerönusi hadia zi tola öfalua ena’ö tola itugu ö’omasi’ö girö-girö ba wamati.

 BANUA LOWALANGI NO AMAEDOLA MUTIARA

3. Hadia nifalua ndra matua si so ba gamaedola Yesu ba wowöli mutiara andrö? (Faigi gambara ba wamobörö wamaha’ö.)

3 Baso Matai’o 13:45, 46. Itutunö Yesu gamaedola sanandrösa ba niha saniaga, sowöli ba samawa mutiara. Samuza inötö, isöndra mutiara sabölö tohude moroi ba mutiara tanö bö’ö si no irai i’ila. Omasi sibai ia mutiara andrö irege ifamawa fefu zi so khönia ba wowöli da’ö. Hadia tola ökhalaigö hewisa wa’omasinia ba mutiara andrö?

Na ta’omasi’ö Mbanua Lowalangi simane fa’omasi niha saniaga andrö ba mutiara nisöndrania, taröi gofu hadia ia

4. Hadia nifaluada ba wangoroma’ö wa ta’omasi’ö Mbanua Lowalangi?

4 Hadia wamaha’ö si tola tahalö moroi ba gamaedola Yesu? Sindruhu sanandrösa ba Mbanua Lowalangi no amaedola mutiara. Na ta’omasi’ö Mbanua Lowalangi simane fa’omasi niha saniaga andrö ba mutiara nisöndrania, taröi gofu hadia ia ena’ö tola ta’osa-mbua’ö dödöda ba Mbanua Lowalangi. (Baso Mareko 10:28-30.) Datatutunö darua niha si no mamalua da’a.

5. Hadia nifalua Zakai’o ba wangoroma’ö wa i’omasi’ö Mbanua Lowalangi?

5 Sakai’o andre samösa sanema beo. Kayo ia börö me ilimo gefe niha bö’ö. (Luka 19:1-9, Terjemahan Dunia Baru) Samuza inötö, irongo hewisa wodunö-dunö Yesu sanandrösa ba Mbanua Lowalangi. Omasi sibai ia hadia nirongonia andrö ba sindruhu-ndruhu ibulö’ö wa’aurinia. Imane, ”Hiza! No ube’e ba zi numana zi matonga zi so khögu, Tua, ba fefu gofu hadia ia zi no ulimo niha, ufuli khöra öfa kali winaeta.” Ifangawuli gefe si no ihalö ba niha ba lö mangisö dödönia sa’ae ba gana’a.

6. Hadia nibulö’ö zi samösa ira alawe ba wa’aurinia, ba hadia mbörö wa ifalua da’ö?

6 Ba zi hauga fakhe silalö so samösa ndra alawe samondro-ndrongo turia sanandrösa ba Mbanua Lowalangi. Ya’ia andre lesbian, hegöi kafalo ba organisasi sotuhini homoseksual. Hiza’i, me no ifaha’ö ia ba Zura Ni’amoni’ö ba me no aboto ba dödönia wa moguna sibai Mbanua Lowalangi, i’ila wa oya zinangea ibulö’ö ba wa’aurinia. (I Korindro 6:9, 10) Börö me i’omasi’ö Yehowa, iröi organisasi da’ö ba lö sa’ae ilau wa’orudu ba ndra alawe. Tebayagö ia idanö me döfi 2009, ba ndröfi aefa da’ö tobali ia perintis biasa. Oya zi no ibulö’ö ba wa’aurinia börö me i’omasi’ö sibai Yehowa moroi ba gamuata si lö tefaudu si no ifalua.​—Mareko 12:29, 30.

7. Hadia nifaluada ena’ö lö mamalö aro wa’omasida ba Mbanua Lowalangi?

7 Ena’ö tola tobali ono Mbanua Lowalangi, ato ba gotaluada zi no mo-mbulö’ö lala wa’auri. (Roma 12:2) Lö mamalö taforege ba wamalua da’ö. Böi tatehegö awuwu wa’omasida ba Mbanua Lowalangi gofu hadia zalua, simane fa’omasi ba gana’a mazui ngawalö hadia ia so’amakhaita ba gamuata fohorö. (Gamaedola 4:23; Matai’o 5:27-29) Ibe’e khöda girö-girö tanö bö’ö sebua böli Yehowa ena’ö lö mamalö aro wa’omasida ba Mbanua Lowalangi.

 TE’ORIFI NIHA BÖRÖ WANURIAIGÖ NIFALUADA

8. (a) Hana wa i’amaedolagö Faulo halöwö fanuriaigö nifaluada simane ’girö-girö si so ba nahia ni’ehaogö moroi ba danö’? (b) Hewisa wangoroma’ö Waulo fa’omasinia ba wanuriaigö?

8 No ibe’e khöda halöwö Yesu ba wanuriaigö hegöi ba wamaha’ö turia somuso dödö sanandrösa ba Mbanua Lowalangi. (Matai’o 28:19, 20) Itutunö sinenge sotöi Faulo wa halöwö fanuriaigö no amaedola girö-girö si so ba nahia ni’ehaogö moroi danö mazui si so ba mbowoa tanö. (II Korindro 4:7; I Timoteo 1:12) Börö me lö mo’ahonoa, hulö simane mbowoa tanö ita. Hiza’i, turia nifa’emada no amaedola girö-girö sebua böli börö me da’ö zanga’asogö fa’auri si lö aetu ba niha samondro-ndrongo nifa’emada hegöi khöda samösa. Andrö wa imane Faulo, ”Börö duria somuso dödö andrö, wa ulau da’ö fefu, ena’ö mo’urakha göi ndra’o ba da’ö.” (I Korindro 9:23) Iforege sibai Faulo ba wamaha’ö niha bö’ö sanandrösa ba Mbanua Lowalangi. (Baso Roma 1:14, 15; II Timoteo 4:2.) Börö me i’omasi’ö sibai duria somuso dödö, da’ö zanolo ya’ia irege lö iböhöli we’amöi manuriaigö hewa’ae göna ia folohi sabölö-bölö. (I Tesalonika 2:2) Hewisa wolo’öda fa’omasi Waulo ba wanuriaigö?

Turia nifa’emada no amaedola girö-girö sebua böli börö me da’ö zanga’asogö fa’auri si lö aetu ba niha samondro-ndrongo nifa’emada hegöi khöda samösa

9. Hadia manö lala si tola tafalua ba wangoroma’ö wa ta’omasi’ö halöwö fanuriaigö?

9 Sambua lala nifalua Waulo ba wangoroma’ö wa i’omasi’ö halöwö fanuriaigö ya’ia da’ö fahuhuo ia ba niha bö’ö ero so ginötö. Simane Faulo hegöi niha Keriso ba götö siföföna, omasi ita tafa’ema duria somuso dödö ba niha, he ba nomo-omo misa, ba nahia sato niha, ba gofu hezoso falukha ita khöra. (Halöwö Zinenge 5:42; 20:20) Tafalua gofu hadia ia zi tola tafalua ba wanuriaigö ba niha sato. Duma-dumania, tola tobali ita perintis ekstra mazui perintis biasa. Tola tafaha’ö ita ba li tanö bö’ö, findra ba mbanua bö’ö si so ba soida, mazui findra ba soi bö’ö.​—Halöwö Zinenge 16:9, 10.

10. Hadia mbua nitema Irene börö me iforege wanuriaigö turia somuso dödö?

10 Irene, samösa talifusöda ira alawe si lö sangowalu si so ba Amerika Serikat, omasi ia ituriaigö duria somuso dödö ba niha sangoguna’ö li Rusia. Andrö, me döfi 1993, fao ia ba ngawawa zangoguna’ö li Rusia ba New York City. Me luo da’ö, ha 20 zanuriaigö si so ba da’ö. Me no aefa 20 fakhe imane Irene, ”Lö nasa sonekhe sibai ndra’o fahuhuo ba li Rusia.” Hiza’i, itolo ira Yehowa ba wanuriaigö ba niha sangoguna’ö li Rusia. Buania, iada’a so önö ngawua mbanua niha Keriso sangoguna’ö li Rusia ba New York City. Ato niha nifaha’ö Irene ba Zura Ni’amoni’ö, ba 15 niha zi no tebayagö idanö. So ösa ba gotaluara zi no mohalöwö ba Mbetieli, tobali perintis, hegöi satua sokubaloi. Imane nasa Irene, ”Moroi ba ngawalö gohitö dödö  si tola ugohi, ha da’a zame’e khögu fa’owua-wua dödö.” Sindruhu-ndruhu i’omasi’ö halöwö fanuriaigö nifaluania andre Irene!

Hadia ö’omasi’ö halöwö fanuriaigö ba ötatugöi ginötömö ba wamalua da’ö ero migu? (Faigi ngenoli si-11, 12)

11. Hadia manö mbua nitemada na lö tabato we’amöi manuriaigö hewa’ae göna ita folohi?

11 Na ta’omasi’ö halöwö fanuriaigö, omasi ita ta’o’ö Waulo ba lö tabato wanuriaigö hewa’ae göna ita folohi. (Halöwö Zinenge 14:19-22) Duma-dumania, ba gotalua ndröfi 1930 ba 1944, göna folohi sabölö-bölö ndra talifusöda si so ba Amerika Serikat. Hiza’i, lö labato we’amöi manuriaigö. Me lö latehegö khöra ira samatörö ba wamalua halöwö fanuriaigö, la’ohe da’a föna zanguhuku ba sasesenia ya’ira zi möna. Me döfi 1943, itutunö talifusöda Knorr sambua wa’amöna nitemada ba Mahkamah Agung AS. Iwa’ö wa lö ofeta ba Gödo Zanguhuku zalua andre na no labato ira talifusöda ba wamalua halöwö fanuriaigö. Iwa’ö göi wa börö zalua andre, ato ndra talifusöda ba zi sagörö ulidanö zi lö mamalö manuriaigö ba lafaduhu’ö wa lö tobali daha-tahara wolohi andre. Möna göi ndra talifusöda si göna folohi ba soi bö’ö simane salua andre. Börö me ta’omasi’ö halöwö fanuriaigö, lö tabato ba we’amöi manuriaigö hewa’ae göna ita folohi.

12. Hadia zi lö mamalö öfalua?

12 Na ta’omasi’ö halöwö fanuriaigö, tenga ha hauga za ni’ombakha’öda ni’angeraigöda. Hiza’i, tafalua gofu hadia manö zi tola tafalua ba ’wamaduhu’ö turia somuso dödö’. (Halöwö Zinenge 20:24; II Timoteo 4:5) Hiza’i, hadia nifaha’öda ba niha bö’ö? Datatutunö girö-girö tanö bö’ö moroi khö Lowalangi.

SINDRUHU SEBUA BÖLI SI NO TAFAHA’Ö ITA

13, 14. Hadia geluaha wehede Yesu ba Matai’o 13:52 sanandrösa ba ’nahia girö-girö’, ba hewisa wamo’ösida da’ö?

13 Girö-girö si tölu nibe’e Yehowa  khöda ya’ia da’ö fefu zindruhu si no tafaha’ö ita. Yehowa andrö no Umbu zi- ndruhu. (II Zamueli 7:28; Yohane 17:17) Börö me Amada soböwö ia, omasi ia ibe’e khöda zindruhu. Tola tafaha’ö ita ba da’ö na tabaso Daromalinia, publikasida, na möi ita ba kebaktian regional, kebaktian wilayah hegöi ba gangowuloa ero migu. Imane Yesu, na lö taböhöli wamaha’ö ya’ita ba zindruhu, tola ta’okhögö ’nahia girö-girö’, ösinia ya’ia da’ö sindruhu ”si bohou, awö zi no ara”. (Baso Matai’o 13:52.) Itolo ita Yehowa ba wamo’ösi ’nahia girö-giröda’ na ta’alui zindruhu simane fangalui girö-girö si tobini. (Baso Gamaedola 2:4-7.) Hewisa wamaluada da’ö?

14 Moguna asese tafaha’ö ita ba Zura Ni’amoni’ö, ba publikasida hegöi ba wamalua riset. Da’a zanolo ya’ita ba wanöndra sindruhu ”si bohou” si lö ni’okhögöda ba zilalö. (Yosua 1:8, 9; Zinunö 1:2, 3) Ba Watch Tower si oföna nifazökhi me baŵa si Fitu 1879, i’amaedolagö zindruhu andre hulö simane bunga si tobini ba gotalua go’o. Ena’ö tola isöndra mbunga andrö zi samösa niha, moguna iforege ba wangalui ya’ia. Me no isöndra, lö i’anemai’ö omuso dödönia na ha sambua nisöndrania. Moguna nasa iforege ba wangalui ena’ö oya isöndra. Simanö göi, böi tawa’ö wa no ibönö khöda na so sambua zindruhu si no tasöndra. Moguna taforege nasa ba wangalui sindruhu tanö bö’ö.

15. Hana wa tola lawa’ö wa so ösa zindruhu ’si no ara’, ba hadia zabölö ö’omasi’ö?

15 Me awena tafaha’ö ita ba Zura Ni’amoni’ö, so ösa zindruhu sadöni dödöda. Tola tafotöi ia sindruhu ’si no ara’ börö me no oföna tafaha’ö ita ba da’ö. Hadia duma-dumania? Ba wamobörö, tafaha’ö ita wa Yehowa andrö Somböi ya’ita ba so gohitö dödönia ba niha gulidanö. No tafaha’ö ita göi wa ifatenge Nononia Lowalangi ba gulida-nö tobali höli ena’ö tola te’efa’ö ita moroi ba horö hegöi fa’amate. No tafaha’ö ita göi wa Banua Lowalangi zangohori fefu gabula dödö si so iada’a, ba tola ta’okhögö wa’auri si lö aetu ba gulidanö safönu fa’atulö hegöi fa’owua-wua dödö.​—Yohane 3:16; Fama’ele’ö 4:11; 21:3, 4.

16. Hadia zinangea tafalua na so wamohouni sanandrösa ba wa’aboto ba dödö ni’okhögöda ba zindruhu ba Zura Ni’amoni’ö?

16 Itaria, tebohouni wa’aboto ba dödöda sanandrösa ba wama’ele’ö hegöi ba ayati Zura Ni’amoni’ö. Na alua da’ö, moguna tabe’e ginötöda ba wamaha’ö ya’ita sanandrösa ba wamohouni andrö hegöi ba wo’angerönusi ya’ia. (Halöwö Zinenge 17:11; I Timoteo 4:15) Moguna aboto ba dödöda hadia gamaehuta moroi ba wa’aboto ba dödö ni’okhögöda ba zilalö hegöi fa’aboto ba dödö si bohou tatema, ba moguna göi ta’ila waö-waö moroi ba wa’aboto ba dödö si bohou andrö. Na tafalua da’ö, tola tobali ia sindruhu si bohou ni’okhögöda moroi ba zindruhu ba Zura Ni’amoni’ö. Hadia mbuania khöda na taforege ba wamalua da’a?

17, 18. Hewisa wanolo geheha ni’amoni’ö ya’ita?

17 Ifaha’ö ita Yesu wa tola itolo ita eheha ni’amoni’ö ena’ö tatörö tödöda hadia zi no tafaha’ö ita ba zilalö. (Yohane 14:25, 26) Hadia mbuania da’a na möi ita manuriaigö? Angeraigö hadia zalua khö dalifusöda sotöi Peter.  Me döfi 1970 mohalöwö ia ba Mbetieli Inggris me 19 fakhe ndröfinia. Me möi ia manuriaigö ba nomo-omo misa, falukha ia khö zi samösa ira matua si so gambi salawa dröfi moroi khönia. Isofu khö ndra matua andrö hadia omasi ifaha’ö ia ba Zura Ni’amoni’ö. Ira matua andrö samösa rabi Yahudi, ba tokea ia börö me so nono matua sawuyu-wuyu somasi mamaha’ö ya’ia ba Zura Ni’amoni’ö. Itandraigö Peter ba isofu, ”Lau nogu, na simanö hadia li ni’oguna’ö ba wanura mbuku Danieli?” Imane Peter, ”’So ösa nisura ba li ndrawa Garamo.’ Tokea Rabi andrö, ba abölö tokea ndra’odo börö me u’ila hadia wanema linia! Hana wa u’ila wanema linia? Me mangawulido ba nomo, ufuli ufaigi majalah Manuriaigö hegöi Sedarlah! ba zi hauga waŵa silalö. Ba u’ila wamaha’ö zanutunö wa tesura mbuku Danieli ba li ndrawa Garamo.” (Danieli 2:4) Sindruhusa wa tola itolo ita eheha ni’amoni’ö ena’ö tatörö tödöda hadia zi no irai tabaso ba ta’irö’ö da’ö ba nahia girö-giröda.​—Luka 12:11, 12; 21:13-15.

18 Na ta’omasi’ö hegöi na ta’andrö saohagölö ba zindruhu si no tafaha’ö ita moroi khö Yehowa, tola terou dödöda ba wonönö girö-girö ba nahia wangirö’öda. Na asese tafalua da’a, tola itugu atua-tua ita ba wamaha’ö niha bö’ö.

ROROGÖ GIRÖ-GIRÖMÖ

19. Hana wa moguna tarorogö girö-girö ba wamati ni’okhögöda?

19 Ba wamaha’ö da’a, no tafaha’ö ita wa moguna sibai ta’omasi’ö girö-girö ba wamati. Hiza’i, moguna ta’angenanöi ena’ö böi awuwu wa’omasida ba girö-girö ni’okhögöda ibe’e Satana hegöi ulidanönia. Na lö mangelama ita, tola manö adöni dödöda ba mbu’usa li sanandrösa ba halöwö sebua gazi, fangera-ngera ena’ö itugu sökhi wa’aurida mazui fa’omasi ba wangoroma’ö gokhötada. Ifasugi ba dödöda sinenge sotöi Yohane wa lö aratö tehori fefu hadia ia zi so ba gulidanö andre. (I Yohane 2:15-17) Da’a mbörö wa moguna sibai ta’andrö saohagölö ba tarorogö girö-girö ba wamati ni’okhögöda.

20. Hadia zi lö mamalö öfalua ba wondrorogö girö-girö ba wamati ni’okhögömö?

20 Moguna öröi fefu ngawalö hadia ia zi tola mowuwu fa’omasimö ba Mbanua Lowalangi. Böi mamalö owölö-ölö ndra’ugö ba wanuriaigö ba böi tehegö taya wa’omasimö ba wanuriaigö. Böi bato wangalui sindruhu ba Zura Ni’amoni’ö. Na öfalua da’a, tola ö’okhögö ’girö-girö ba zorugo, si tebai irugi sanagö ba si lö ifakiko hama. Ba zi so girö-girömi sa, ba da’ö göi so dödömi dania’.​—Luka 12:33, 34.