Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Manuriaigö—Edisi Wamaha’ö  |  Baŵa si Fulu 2017

”Ta’omasi’ö Nawöda . . . ba Nilauda Khönia Ta’omasi’ö Ia, ba Sindruhu-ndruhu”

”Ta’omasi’ö Nawöda . . . ba Nilauda Khönia Ta’omasi’ö Ia, ba Sindruhu-ndruhu”

”Böi ba li ta’omasi’ö nawöda, ba böi ba lela, ba nilauda khönia ta’omasi’ö ia, ba sindruhu-ndruhu.”​—I YOHANE 3:18.

SINUNÖ: 3, 50

1. Hadia wa’omasi sabölö alawa? Tutunö. (Faigi gambara ba wamobörö wamaha’ö.)

YEHOWA no Umbu wa’omasi. (I Yohane 4:7) Fa’omasi sabölö alawa ya’ia da’ö fa’omasi si te’odane-dane ba goi-goi satulö. Ba Zura Ni’amoni’ö, ngawua wehede Yunani ni’oguna’ö ba wanutunö fa’omasi da’a ya’ia da’ö a·gaʹpe. Mo’amakhaita ia ba wa’omasi soroi ba dödö hegöi fahuwusa ba niha bö’ö. Fa’omasi da’a tenga ha ba dödö so ia. Hiza’i, muforoma’ö ia ba mbua-bua ba wanolo niha bö’ö. Fa’omasi da’a zamarou ya’ita ba wamalua si sökhi ba niha bö’ö. Da’a göi zame’e khöda fa’owua-wua dödö ba itugu mo’eluaha wa’aurida.

2, 3. Hewisa wangoroma’ö Yehowa fa’omasi soroi ba dödö ba niha gulidanö?

2 Fatua lö iwöwöi Gadamo ba Khawa, no iforoma’ö wa’omasinia Yehowa ba niha gulidanö. Ifazökhi gulidanö si tola manga’asogö fefu zoguna khöda. Ifazökhi göi da’ö ena’ö tobali nahiada ba tarasoi wa’owua-wua dödö. Tenga soguna khönia samösa wa ifazökhi da’ö Yehowa, hiza’i soguna  khöda. Me no awai tefazökhi gulidanö, ifazökhi niha ba ibe’e khöra ginötö ba wangokhögö fa’auri si lö aetu ba gulidanö faradaiso.

3 Aefa da’ö, iforoma’ö Yehowa wa’omasinia soroi ba dödö ba niha gulidanö ba lala sabölö tohude. Hewa’ae no mamadaö Gadamo ba Khawa, faduhu dödö Yehowa wa so nga’ötöra sangomasi’ö ya’ia irege ibe’e Nononia tobali höli ba wangorifi ya’ira. (I Moze 3:15; I Yohane 4:10) Sindruhunia, i’otarai me ibe’e mbu’usa li da’ö Yehowa, hulö zi no ibe’e höli andrö. Ba zi 4.000 fakhe aefa da’ö, ibe’e Nononia si hasambua Yehowa ba niha gulidanö. (Yohane 3:16) Ta’andrö sibai saohagölö ba wa’omasi Yehowa andre!

Taforoma’ö wa’omasi hewa’ae abua wangoroma’ö ya’ia

4. Hewisa tola ta’ila wa niha si lö mo’ahonoa tola laforoma’ö wa’omasi soroi ba dödö?

4 Hadia tola taforoma’ö wa’omasi soroi ba dödö hewa’ae lö mo’ahonoa ita? Tola. Ifazökhi ita Yehowa si fakhili-khili khönia ba ibe’e khöda wa’abölö ba wolo’ö ya’ia. Lö aoha khöda ba wangoroma’ö fa’omasi soroi ba dödö, hiza’i tola tafalua ia. Iforoma’ö wa’omasinia Habeli khö Lowalangi me ibe’e zumange sabölö sökhi ni’okhögönia. (I Moze 4:3, 4) Iforoma’ö Noakhi wa’omasinia soroi ba dödö me lö mamalö ituriaigö duria moroi khö Lowalangi ba zi töra hauga fakhe hewa’ae lö la’ame’egö tödö nifa’emania andrö. (II Fetero 2:5) Iforoma’ö göi Aberahamo wa abölö aro wa’omasinia khö Lowalangi moroi ba ngawalö hadia ia me ibe’e nononia omasi’ö sotöi Iza’aki tobali sumange. (Yakobo 2:21) Simane ira matua si lö faröi andre, omasi ita taforoma’ö wa’omasi hewa’ae abua wangoroma’ö ya’ia.

HADIA WA’OMASI SOROI BA DÖDÖ?

5. Hewisa wangoroma’öda fa’omasi soroi ba dödö?

5 Imane khöda Sura Ni’amoni’ö, ”Böi ba li ta’omasi’ö nawöda, ba böi ba lela, ba nilauda khönia ta’omasi’ö ia, ba sindruhu-ndruhu.” (I Yohane 3:18) Hadia da’ö geluahania wa tebai taforoma’ö wa’omasi ba wehededa? Tenga. (I Tesalonika 4:18) Eluahania, tenga ha asala tawa’ö ”U’omasi’ö ndra’ugö”. Moguna taforoma’ö ia ba nifaluada. Duma-dumania, na so ndra talifusöda sambö balazo mazui nukha, tenga ha fehede zoguna khöra. (Yakobo 2:15, 16) Simane da’ö göi, börö me ta’omasi’ö Yehowa hegöi niha bö’ö, tenga ha asala talau mangandrö ena’ö ato zanuriaigö, hiza’i taforege göi ba wanuriaigö.​—Matai’o 9:38.

6, 7. (a) Hadia geluaha ’wa’omasi si lö famini tödö’? (b) Hadia manö duma-duma wa’omasi si tenga soroi ba dödö?

6 Imane sinenge sotöi Yohane wa moguna ta’omasi’ö nawöda ”ba nilauda khönia ta’omasi’ö ia, ba sindruhu-ndruhu”. Andrö, fa’omasida ”böi faruka wamini tödö” mazui ”si lö famini tödö”. (Roma 12:9; II Korindro 6:6) Itaria, so niha sangoroma’ö fa’omasi si tenga soroi ba dödö. Hadia fa’omasi sindruhu da’ö? Hadia zamarou tödönia? Lö hadöi eluahania wa’omasi si fao famini  tödö ba lö hadöi guna wa’omasi si tenga soroi ba dödö.

7 Datatutunö duma-duma wa’omasi si tenga soroi ba dödö. Me fahuhuo Zatana khö Khawa ba kabu Edena, ba wehedenia hulö iforoma’ö wa i’ame’egö tödö Khawa. Hiza’i, moroi ba nifaluania oroma wa falimosa da’ö. (I Moze 3:4, 5) Me mamatörö Dawido tobali razo, so zi fahuwu khönia sotöi Ahitofeli. Hiza’i, faröi Ahitofeli khö Dawido börö me i’alui dana khönia samösa. Ba nifaluania oroma wa ya’ia tenga si fahuwu si sökhi. (II Zamueli 15:31) Iada’a, niha si no faröi hegöi niha somasi mamawukaisi mbanua niha Keriso, ’sökhi sibai lira, ba no lahaogö-haogö’. (Roma 16:17, 18) Te lawa’ö wa la’omasi’ö niha bö’ö, hiza’i sindruhunia ha tana khöra la’alui.

8. Hadia wanofu si tola tasofu khöda samösa?

8 No sambua fangaila sebua na laforoma’ö wa’omasi si tenga soroi ba dödö, börö me lafalua ia ba wolimo niha bö’ö. Hewa’ae tola talimo niha, hiza’i tebai talimo Yehowa. Iwa’ö Yesu wa sindruhu-ndruhu lahuku niha si so famini tödö. (Matai’o 24:51) Ya’ita samosumange Yehowa, lö irai omasi ita tobali niha samini tödö. Andrö, datasofu khöda samösa, ’Hadia soroi ba dödö wa’omasigu, mazui ha tana khögu samösa u’alui ba lö utörö zindruhu?’ Datatutunö siwa ngawua lala si tola tafalua ba wangoroma’ö fa’omasi ”si lö famini tödö”.

LALA WANGOROMA’ÖDA FA’OMASI ’BA NIFALUA HEGÖI BA ZINDRUHU’

9. Hadia nifaluada na so khöda wa’omasi soroi ba dödö?

9 Owua-wua dödö ba wohalöwö hewa’ae lö niha sangila. Omasi ita tafalua wa’omasi ba fa’ahakhö dödö ba niha bö’ö hewa’ae lö niha sangila nifaluada andrö. (Baso Matai’o 6:1-4.) Anania ba Safira, lö la’okhögö mbua-bua da’a. Me labe’e dolo-tolo, omasi ira na la’ila niha nifaluara. Falimo ira sanandrösa ba wa’ebua dolo-tolo nibe’era, ba lua-luania lahuku ira börö me so khöra wamini tödö. (Halöwö Zinenge 5:1-10) Hiza’i, na sindruhu-ndruhu ta’omasi’ö ndra talifusöda, omasi ita tafalua khöra zi sökhi ba lö tatötöna ena’ö la’ila niha nifaluada andrö. Tola tafaha’ö ita moroi khö ndra talifusöda sanolo Boto Solohe ba wama’anö gö ba wamati. Lö la’alui lala ena’ö lasuno ira, ba lö latutunö ba niha bö’ö halöwö si no lafalua.

Owua-wua dödö ba wohalöwö hewa’ae lö niha sangila

10. Hewisa wangoroma’öda wa tafosumange niha bö’ö?

10 Fosumange niha bö’ö. (Baso Roma 12:10.) Iforoma’ö wa ifosumange ndra sinengenia Yesu me isasai gahera. (Yohane 13:3-5, 12-15) Moguna taforege ena’ö so khöda wangide-ngide’ö simane Yesu ba tafosumange niha bö’ö. Lö aboto ba dödö ndra sinenge hadia geluaha nifalua Yesu irugi me latema geheha ni’amoni’ö. (Yohane 13:7) Taforoma’ö wa tafosumange niha bö’ö na lö hadöi ba wangera-ngerada wa abölö tohude ita moroi khöra börö zekola, gokhöta, mazui halöwö si tohude ni’okhögöda.  (Roma 12:3) Lö afökhö dödöda ba ginötö lasuno niha bö’ö, hiza’i fao ita khöra ba wa’owua-wua dödö hewa’ae na molo’ö ya’ita tola göi tatema wanuno simane da’ö.

11. Hana wa moguna tasuno niha bö’ö soroi ba dödö?

11 Be’e wanuno soroi ba dödö. Moguna ta’alui ginötö ba wanuno niha bö’ö. Fefu ita ta’ila wa fanuno moguna ia khöda ”ba wanga’azökhi”. (Efeso 4:29) Hiza’i, moguna ta’angenanöi ena’ö soroi ba dödö na tasuno niha bö’ö, tenga ha ena’ö omuso dödöra. Lö tawa’ö hadia zi lö hadöi ba dödöda mazui ena’ö aheta noro dödöda ba wame’e mene-mene. (Gamaedola 29:5) Na tasuno niha bö’ö, hiza’i ba gafuriatania tafatou-tou ia furinia, eluahania so khöda wamini tödö. I’okhögö wa’omasi soroi ba dödö sinenge sotöi Faulo. Me isura zura ba niha Keriso si so ba Korindro, isuno zi sökhi nifaluara. (I Korindro 11:2) Hiza’i, ibe’e göi khöra mene-mene si sökhi ba ginötö moguna, ba itutunö si fao fa’asökhi dödö hadia mbörö wa ibe’e mene-mene andrö.​—I Korindro 11:20-22.

Taforoma’ö wa’omasi hegöi fa’oböwö na tatolo ndra talifusöda ba ginötö moguna khöra wanolo (Faigi ngenoli si-12)

12. Hewisa wa tola taforoma’ö wa’omasi soroi ba dödö na so khöda wa’oböwö?

12 Oböwö. I’o’ou ita Yehowa ena’ö sökhi laguda khö ndra talifusöda. (Baso I Yohane 3:17.) Hiza’i, moguna ta’okhögö lala wangera-ngera satulö ba wamalua da’ö. Tola tasofu khöda samösa, ’Hadia ha niha sahatö khögu mazui niha si tohude ba mbanua niha Keriso nikaonigu ba nomo? Hadia ha niha si tola manulöni zi no ufalua nikaonigu? Mazui, hadia oböwö ndra’o khö ndra talifusö si lö u’ila sibai haniha ira mazui ba niha si tebai manulöni si no ufalua?’ (Luka 14:12-14) Angeraigö zalua andre: Hewisa na so samösa dalifusöda ira matua sinangea mutolo börö gangetula si lö tefaudu nihalönia? Mazui, hewisa na so niha nikaonida ba nomo si lö irai mangandrö saohagölö khöda? Imane khöda Yehowa, ”Faoma mibe’e gö khö nawömi, na möi tomemi, böi mikökö-kökö.” (I Fetero 4:9) Tasöndra wa’omuso dödö na mamuala ita si fao fangera-ngera satulö.​—Halöwö Zinenge 20:35.

13. (a) Hawa’ara manö moguna abölö ta’okhögö wa’ebolo dödö? (b) Hadia zi tola tafalua ba wanolo niha sambö fa’abölö?

13 Tolo niha sambö fa’abölö. Imane Sura Ni’amoni’ö, ”Mitolo zambö fa’abölö, mibologö dödömi khöra fefu.” Da’a zangoroma’ö hadia ta’okhögö wa’omasi soroi ba dödö. (I Tesalonika 5:14) Ato ndra talifusöda si lö aro ba wamati ba zilalö, hiza’i iada’a no la’okhögö wamati  saro. Tanö bö’önia, moguna nasa khöra wa’ebolo dödö hegöi fanolo si fao fa’omasi moroi khöda. Hewisa wanoloda ya’ira? Tola ta’oguna’ö Zura Ni’amoni’ö ba wamarou tödöra, fao ita khöra manuriaigö mazui tola tafondro-ndrongo nösi dödöra. Böi so ba wangera-ngerada wanguma’ö wa da’a dalifusöda ”saro” ba da’a ”zambö fa’abölö”. Hiza’i, moguna ta’ila wa fefu ita so zi tola hegöi si tebai tafalua. Ifaduhu’ö Faulo wa so zo’amböta ba wa’aurinia. (II Korindro 12:9, 10) Moguna faoma tatolo ba tafarou dödö nawöda zamösana.

14. Hadia zinangea tafalua ba wondrorogö fa’atulö khö ndra talifusöda?

14 Asogö wa’atulö. Moguna sibai tarorogö wa’atulö ba gotalua ndra talifusöda. Hewa’ae na lafalua khöda zi lö atulö mazui na fasala lala wangera-ngerara sanandrösa khöda, moguna tafalua fefu zi tola tafalua ba wondrorogö fa’atulö. (Baso Roma 12:17, 18.) Na no ta’afökhöi’ö dödö zi samösa niha, si sökhinia ta’andrö wa’ebolo dödönia, hiza’i moguna soroi ba dödöda. Duma-dumania, moroi na tawa’ö, ”Bologö dödömö he, fasala wangera-ngeramö”, abölö sökhi na tafaduhu’ö zala nifaluada ba tamane, ”Bologö dödömö, no u’afökhöi’ö dödömö ba wehedegu.” Moguna sibai so göi wa’atulö ba wongambatö. Fo’omo ira matua ba ira alawe, böi ha föna niha laforoma’ö wa’omasira khö nawöra, ba na lö hadöi niha lö omasi ira fahuhuo khö nawöra, faoma lawa’ö wehede safökhö mazui lalau fa’udu.

15. Hewisa wangoroma’öda wa ta’efa’ö zala niha bö’ö soroi ba dödö?

15 Okhögö wa’edöna ba wangefa’ö sala. Na so zangafökhöi’ö tödöda, moguna tabe’e aefa da’ö ba tatibo’ö wa’afökhö dödöda andrö, hewa’ae lö i’ila wa no i’afökhöi’ö dödöda. Tola edöna ita ba wangefa’ö sala na ta’o’ö mene-mene da’a, ”Mibologö dödömi khö nawömi,  mi’omasi’ö ia; mi’oigö dödömi, ena’ö lö tebulö wahasara dödö, ena’ö faböbö ami, famaböbö fa’atulö andrö.” (Efeso 4:2, 3) Ena’ö tola ta’efa’ö zala niha bö’ö soroi ba dödö, böi ta’angera-ngeraigö zala nifaluania khöda. Fa’omasi ”lö itanö ba dödönia zi lö sökhi”. (I Korindro 13:4, 5) Sindruhunia, na fahö’ö dödöda, tola tekiko wahuwusada khö ndra talifusöda hegöi khö Yehowa. (Matai’o 6:14, 15) Taforoma’ö wa so khöda wa’edöna ba wangefa’ö zala na mangandrö ita salahi niha sangafökhöi’ö tödöda.​—Luka 6:27, 28.

16. Hewisa wangoroma’öda fa’omasi soroi ba dödö ba ginötö tatema halöwö si tohude ba wamosumange Yehowa?

16 Tatehegö lö alua zomasi dödöda. Na tatema halöwö si tohude ba wamosumange Yehowa, tola taforoma’ö wa so khöda wa’omasi soroi ba dödö na ’lö ta’alui zoguna khöda zamösana, soguna khö nawöda ta’alui’. (I Korindro 10:24) Duma-dumania, ba kebaktian wilayah hegöi regional, no tohöna tohare petugas tata tertib fatua lö tohare niha bö’ö. Tola manö tedönisi dödöra ba wangai nahia gurusi si sökhi ba nösi nomora hegöi khöra samösa. Hiza’i, ato moroi ba gotaluara zamili mudadao ba nahia si no muhenaigö khöra. Da’a zangoroma’ö wa so khöra wa’omasi soroi ba dödö. Hewisa wolo’ömö duma-duma si sökhi moroi khöra?

17. Na so wa’omasi soroi ba dödö ba niha Keriso si no mamalua horö sebua, hadia nifaluania?

17 Böhöli ba fatunö horö si tobini si no öfalua. So ösa niha Keriso samini’ö horö sebua si no lafalua. Te aila ira mazui lö omasi ira na afatö dödö niha bö’ö. (Gamaedola 28:13) Hiza’i, tenga fa’omasi na mubini’ö horö si no irai mufalua börö me tola manö molua-lua ia khöra samösa hegöi ba niha bö’ö. Hana? Börö me tola manö lö mohalöwö geheha ni’amoni’ö ba lö hadöi fa’atulö ba mbanua niha Keriso. (Efeso 4:30) Andrö, na so niha Keriso samalua horö sebua, fa’omasi soroi ba dödö zamarou ya’ia ena’ö itutunö da’ö khö ndra satua sokubaloi ba i’andrö wanolo.​—Yakobo 5:14, 15.

18. Hana wa moguna sibai wa’omasi soroi ba dödö?

18 Fa’omasi andre no bua-bua sabölö tohude. (I Korindro 13:13) Da’a zanolo niha ena’ö la’ila haniha zindruhunia zolo’ö khö Yesu hegöi niha solo’ö khö Yehowa si no tobali Umbu wa’omasi. (Efeso 5:1, 2) Iwa’ö Faulo wa na lö i’okhögö wa’omasi, lö eluaha wa’aurinia. (I Korindro 13:2) Dataforege ba wangoroma’ö fa’omasi tenga ha ”ba lela” hiza’i ”ba nilauda khönia ta’omasi’ö ia ba sindruhu-ndruhu”.