Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Manuriaigö—Edisi Wamaha’ö  |  Baŵa si Fulu 2016

Böi Bato Fahuwu khö Yehowa ba Ginötö Findra ba Nahia Sangoguna’ö Li Bö’ö

Böi Bato Fahuwu khö Yehowa ba Ginötö Findra ba Nahia Sangoguna’ö Li Bö’ö

”No u’irö’ö ba dödögu bakha niwa’ömö andrö.”—ZINUNÖ 119:11.

SINUNÖ: 142, 47

1-3. (a) Hadia zi lö tola lö’ö ta’ofönai’ö? (b) Hadia manö wanandraigö nirasoi niha samaha’ö ya’ia ba li si bohou, ba hadia zi tobali fanofu? (Faigi gambara ba wamobörö wamaha’ö.)

IADA’A, ato Zamaduhu’ö Yehowa fao ira ba wamaduhu’ö fama’ele’ö sanandrösa ba wanuriaigö ”ba ngawalö soi fefu, ba ba ngawalö niwa, ba ba ngawalö li, ba ba ngawalö mado fefu”. (Fama’ele’ö 14:6) Hadia öfaha’ö göi ndra’ugö ba li tanö bö’ö? So zangai halöwö tobali utusan injil mazui manuriaigö ba mbanua si lö ato sanuriaigö. Tanö bö’önia ibörötaigö möi ira ba mbanua niha Keriso sangoguna’ö li bö’ö ba mbanuara samösa.

2 Fefu niha samosumange Lowalangi, moguna la’ofönai’ö wahuwusara khö Yehowa hegöi fahuwusa nösi nomora khö Yehowa. (Matai’o 5:3) Hewa’ae itaria oya halöwöda irege abua khöda ba wangalui ginötö si tefaudu ba wamalua famaha’ö samösa si sökhi. Hiza’i, abölö oya wanandraigö nirasoi niha sangai halöwö ba mbanua niha Keriso sangoguna’ö li bö’ö.

 3 Niha sangai halöwö ba mbanua niha Keriso sangoguna’ö li bö’ö, moguna lafaha’ö ira ba li si bohou, moguna göi laforege wamaha’ö ya’ira ero ma’ökhö si fao fangerönusi sanandrösa khö Lowalangi. (I Korindro 2:10) Hewisa tola lafalua da’a na ambö aboto ba dödöra hadia nifaha’ö ba mbanua niha Keriso? Hadia mbörö wa ira satua si no tobali niha Keriso sangai halöwö ba mbanua niha Keriso sangoguna’ö li bö’ö, moguna la’ila hadia tofakha ba dödö ndraonora zindruhu andrö?

TOLA AWUWU WAHUWUSADA KHÖ YEHOWA

4. Hadia zi tobali fama’ala wahuwusada khö Yehowa? Be’e duma-duma.

4 Na lö aboto ba dödöda wamaha’ö Zura Ni’amoni’ö nifa’ema ba li bö’ö, tola tobali fama’ala wahuwusada khö Yehowa da’ö. Ba ginötö mangawuli Nehemia ba Yeruzalema, i’ila wa so ösa ndraono si tebai fahuhuo ba li Heberai’o. (Baso Nehemia 13:23, 24.) Börö me lö aboto ba dödö ndraono andrö Daromali Lowalangi, lua-luania ambö aro wahuwusara khö Yehowa.—Nehemia 8:2, 8.

5, 6. Hadia ni’ila ndra satua sangai halöwö ba mbanua niha Keriso sangoguna’ö li bö’ö, ba hadia mbörö?

5 So ösa satua si no tobali niha Keriso sangai halöwö ba mbanua niha Keriso sangoguna’ö li bö’ö, la’ila wa ambö aro wahuwusa ndraonora khö Yehowa. Börö me ambö aboto ba dödö ndraonora hadia nifaha’ö ba gangowuloa, lö tefarou ira ba wamalua famaha’ö andrö. Pedro hegöi ösi nomonia, si findra ba Australia moroi ba Amerika tanö ba Gaekhula imane, ”Ba ginötö tatutunö ngawalö so amakhaita ba wamati, lö tola lö’ö tafaogö dödö hegöi fangera-ngerada.” [1] (Faigi gonönöta.)—Luka 24:32.

6 Ba ginötö mombaso ita ba li bö’ö, tola manö lö tofakha ba dödöda. Fabö’ö simane na tabaso ia ba lida samösa. Börö me abua wahuhuosa ba li bö’ö, tola manö erege dödöda ba lua-luania ambö owua-wua dödöda ba wamosumange Yehowa. Hewa’ae omasi sibai ita fao ba mbanua niha Keriso sangoguna’ö li bö’ö, hiza’i moguna göi tarorogö wahuwusada khö Yehowa.—Matai’o 4:4.

LAROROGÖ WAHUWUSARA KHÖ YEHOWA

7. Hadia nifalua niha Babilona ba wamaso Danieli wolo’ö si to’ölö lafalua hegöi agamara?

7 Ba ginötö latibo’ö Danieli hegöi ira awönia ba Babilona, lafaso ira niha Babilona ba wolo’ö si to’ölö lafalua hegöi agamara. Hewisa wa tola? Lafaha’ö ira ”li Ndrawa Galedaia” ba labe’e döira molo’ö töi Babilona. (Danieli 1:3-7) Ira niha babilona labe’e döi Danieli ya’ia da’ö Belisasa, börö me mo’amakhaita da’ö ba döi lowalangi sabölö tohude ba da’ö ya’ia da’ö Bel. Omasi Razo Nebukaneza na faduhu dödö Danieli wa abölö lowalangi Babilona moroi khö Yehowa, Lowalangi Danieli.—Danieli 4:5.

Börö me lö aetu ifaha’ö ia ba “zura” ba li Heberai’o, andrö wa aro wahuwusa Danieli khö Yehowa

8. Hewisa wondrorogö Danieli ena’ö lö aetu aro wahuwusania khö Yehowa?

8 Ba Babilona, labe’e khö Danieli gö razo sami sibai. Hiza’i, no ”iŵa’ö sibai tödönia” ba wolo’ö goi-goi Lowalangi. (Danieli 1:8) Börö me lö aetu-aetu ifaha’ö ia ba “zura” ba li Heberai’o, andrö wa aro wahuwusania khö Yehowa hewa’ae toröi ia ba soi bö’ö. (Danieli  9:2) Sindruhunia, hewa’ae no 70 fakhe toröi ia ba Babilona, hiza’i la’ila ia niha ba döi Heberai’onia ya’ia da’ö Danieli.—Danieli 5:13.

9. Hadia lua-lua Daromali Lowalangi khö sanura Zinunö 119?

9 Duma-duma tanö bö’önia, alua khö sanura Zinunö 119. Anau gölönia ba wanaögö fanandraigö moroi khö ndra sohalöwö ba gödo. Isöndra wa’abölö moroi ba daromali Lowalangi, ba da’a zanolo ya’ia tola fabö’ö moroi ba danö bö’ö. (Zinunö 119:23, 61) Itehegö tofakha ba dödönia daromali Lowalangi andrö.—Baso Zinunö 119:11, 46.

BÖI BÖHÖLI ARO’Ö WAHUWUSAMÖ KHÖ YEHOWA

10, 11. (a) Hadia gohitö dödöda ba ginötö tafaha’ö ita ba Daromali Lowalangi? (b) Hewisa ena’ö tola takhamö gohitö dödöda andrö? Be’e duma-duma.

10 Hewa’ae tola manö ahori ginötöda börö wa’oya halöwö ba mbanua niha Keriso mazui ba nahia wohalöwö, fefu ita moguna tabe’e ginötöda ba wamaha’ö samösa hegöi ba wamaha’ö zi sambua omo. (Efeso 5:15, 16) Gohitö dödöda tenga hawa’oya nga’örö buku zi no tabaso mazui ba wama’anö mbua gera-erada ba gangowuloa. Moguna tatehegö idönisi dödöda Daromali Lowalangi hegöi ba wanga’aro’ö famatida.

11 Ena’ö alua gohitö dödöda andre moguna tafagölö-gölösi dödöda. Ba ginötö tafaha’ö ita, böi ha ba niha bö’ö manö tafo’amakhaita wamaha’ö andrö, hiza’i tafakhai ia göi ba wa’aurida samösa. (Filifi 1:9, 10) Moguna aboto ba dödöda ba ginötö tafa’anö ita we’amöi ba wanuriaigö, ba gangowuloa, mazui ba wama’ema huhuo, tola manö lö tafalua zi no tabaso andrö ba wa’aurida. Duma-dumania, samösa sondrino moguna irasoi nirinonia fatua lö ibe’e ba niha bö’ö. Hiza’i, tebai auri ia na ha irasoi manö gö da’ö. Na omasi ia abölö, moguna irino samösa gönia. Simanö göi na omasi ita aro wahuwusada khö Yehowa, moguna tafaha’ö ita ba Zura Ni’amoni’ö ero ma’ökhö. Na ta’abakhai’ö wamaha’ö samösa, tola tefönui mbalazoda ba wamati.

12, 13. Hadia mbörö wa ato zorasoi fanolo moroi ba wamaha’ö Zura Ni’amoni’ö ba lira samösa?

12 Ato zangai halöwö ba mbanua niha Keriso sangoguna’ö li bö’ö, larasoi wanolo moroi ba wamaha’ö Zura Ni’amoni’ö si’ero ma’ökhö ba ’li si tumbu ya’ira’. (Halöwö Zinenge 2:8) Aboto ba dödö ndra utusan injil wa ena’ö aro ira ba wamati ba mbanua si so ya’ira, lö ibönö na ha la’odaligö hadia zi no larongo ba gangowuloa.

13 Alain, si no walu fakhe ifaha’ö ia ba li Persia imane, ”Ba ginötö ufa’anö ndra’o ba gangowuloa ba li Persia, ha ngawua wehede ba li da’ö ni’angeraigögu. Andrö, lö tofakha ba dödögu  fefu zi no ubaso. Da’ö mbörö wa ube’e ginötögu ba wamaha’ö Zura Ni’amoni’ö hegöi publikasi tanö bö’ö ba ligu samösa ero ma’ökhö.”

ROROGÖ WAMATI NDRAONOMÖ

14. Hadia zinangea aboto ba dödö ndra satua, ba hadia mbörö?

14 Moguna aboto ba dödö zatua si no tobali niha Keriso hadia sindruhu-ndruhu no tofakha ba dödö hegöi ba wangera-ngera ndraonora zindruhu andrö. Duma-dumania, Serge hegöi fo’omonia Muriel, si no töra tölu fakhe mangai halöwö ba mbanua niha Keriso sangoguna’ö li bö’ö. Ibörögö la’ila wa onora, si no 17 fakhe, ambö owua-wua dödönia ba wanuriaigö hegöi ba gangowuloa. Imane Muriel, ”Lö omasi ia manuriaigö ba li bö’ö, sindruhuniasa fatua lö findra ndra’aga omasi ia manuriaigö ba linia samösa, Prancis.” Imane Serge, ”Ba ginötö aboto ba dödöma wa tola tobali daha taha da’a ba wa’atedou wamati nonoma, mahalö gangetula wa mafuliga ba mbanua niha Keriso si fao ndra’aga mböröta.”

Botogö ba dödömö hadia no tofakha ba dödö ndraonomö zindruhu andrö (Faigi ngenoli si-14, 15)

15. (a) Hadia zi tola manolo satua ba wangai angetula hadia moguna findra ira ba mbanua niha Keriso tanö bö’ö? (b) Hadia mene-mene nibe’e V Moze 6:5-7 khö ndra satua?

15 Hadia zi tola manolo ndra satua ba wangai angetula hadia moguna lafuli ira ba mbanua niha Keriso sangoguna’ö li sabölö aboto ba dödö ndraonora? Si öföna, moguna lahalö gangetula hadia sindruhu-ndruhu ibönö ginötö hegöi wa’abölöra ba wamaha’ö iraonora  wangomasi’ö Yehowa hegöi wamaha’ö ya’ira ba li si bohou, ba ginötö si fagölö. Si dua, tola manö la’ila wa lö omasi ndraonora manuriaigö, möi ba gangowuloa mazui findra ba nahia sangoguna’ö li bö’ö. Na lafatimbaisi zi dombua ngawalö andre, tola lahalö gangetula ira satua, ena’ö lafuli ira ba mbanua niha Keriso sangoguna’ö li sabölö aboto ba dödö ndraonora. Aefa da’ö, na no aro wahuwusa ndraonora khö Yehowa, tola lahalö gangetula ira satua ena’ö lafuli ira ba mbanua niha Keriso sangoguna’ö li bö’ö.—Baso V Moze 6:5-7.

16, 17. Hadia zanolo satua ba wamaha’ö iraonora sanandrösa khö Yehowa?

16 So zatua si tola mamaha’ö iraonora sanandrösa khö Yehowa ba lira samösa, ba ginötö si fagölö göi fao ira ba mbanua niha Keriso mazui ba kelompok sangoguna’ö li bö’ö. Charles, samösa ama sangokhögö tölu nono alawe, fa’alawa ndröfira 9 irugi 13 fakhe. Findra ira ba kelompok sangoguna’ö li Lingala. Imane, ”Mahalö gangetula wa ma’oguna’ö li sasese ma’oguna’ö ba wamaha’ö Zura Ni’amoni’ö hegöi wamaha’ö zi sambua omo khö ndraonoma. Hiza’i, mafalua göi famomaha hegöi games ba li Lingala irege tola lafaha’ö ira ba li andre si fao fa’owua-wua dödö.”

Forege wamaha’ö li ni’oguna’ö ba nahia si so ya’ugö hegöi wame’e mbua gera-era ba gangowuloa (Faigi ngenoli si-16, 17)

17 Kevin, samösa ama sangokhögö darua nono alawe, fa’alawa ndröfira lima ba walu fakhe. Iforege ba wamaha’ö sindruhu khöra, börö me ambö aboto ba dödö ndraononia nifa’ema ba  gangowuloa mbanua niha Keriso sangoguna’ö li bö’ö si fao ya’ira. Imane, ”Ya’o hegöi fo’omogu, mafaha’ö ndraonoma si darua ba Zura Ni’amoni’ö ba li Prancis, lira samösa. Mahalö gangetula ena’ö fao ndra’aga ba gangowuloa sangoguna’ö li Prancis sakali sara waŵa, ba na so libur fao ndra’aga ba kebaktian sangoguna’ö li sasese ma’oguna’ö.”

18. (a) Hewisa Roma 15:1, 2 tola manolo ndra’ugö ba wangai gangetula si sökhi ba wanolo ndraonomö? (b) Hadia mene-mene nibe’e ndra satua bö’ö? (Faigi gonönöta.)

18 Ira satua, moguna lahalö gangetula hadia zabölö sökhi khö ndraonora hegöi ba wahuwusara khö Yehowa. [2] (Faigi gonönöta.) (Galatia 6:5) Itutunö Muriel wa hewa’ae sindruhu-ndruhu omasi sibai ia hegöi fo’omonia ena’ö lö aetu lahalö halöwö ba mbanua niha Keriso sangoguna’ö li bö’ö, lahalö gangetula wa lafuli ira ba wanolo onora ena’ö aro wahuwusania khö Yehowa. (Baso Roma 15:1, 2.) Iada’a, i’ila Serge wa atulö gangetula nihalöra. Imane, ”Me mangawuli ndra’aga ba mbanua niha Keriso sangoguna’ö li Prancis, tedou wamati ndraonoma ba tebayagö ia idanö. Iada’a, no merintis biasa ia, ba omasi ia ifuli findra ba kelompok sangoguna’ö li bö’ö!”

TEHEGÖ TOFAKHA BA DÖDÖMÖ DAROMALI LOWALANGI

19, 20. Hewisa tola taforoma’ö wa ta’omasi’ö Daromali Lowalangi?

19 I’omasi’ö fefu niha Yehowa. No ihenaigö Zura Ni’amoni’ö ba ngaotu li ena’ö ’fefu niha’ tola lasöndra wa’atua-tua si tefaudu ba zindruhu. (I Timoteo 2:4) I’ila wa tola aro wahuwusara khönia na labaso Zura Ni’amoni’ö ba li sabölö aboto ba dödöda.

20 Fefu ita moguna taforege ena’ö lö taböhöli ta’aro’ö wahuwusada khö Yehowa. Tola tafalua da’ö na tafaha’ö ita ba Zura Ni’amoni’ö ero ma’ökhö ba li sabölö aboto ba dödöda. Tola tatolo göi nösi nomoda ena’ö aro wahuwusara khö Yehowa, ba taforoma’ö wa sindruhu-ndruhu ta’omasi’ö Daromali Lowalangi.—Zinunö 119:11.

^ [1] (ngenoli si-5) No mufabö’öni döi.

^ [2] (ngenoli si-18) Ena’ö ö’ila goi-goi Zura Ni’amoni’ö si tola manolo nösi nomomö, faigi duho ”Membesarkan Anak di Negeri Asing—Tantangan dan Berkatnya” ba Menara Pengawal 15 mbaŵa si Fulu, 2002.