Faigi nösi

Faigi ba gangolifa

Samaduhu’ö Yehowa

Fili li Nias

”Misuno Yehowa!”​—Hadia Mbörö?

”Misuno Yehowa!”​—Hadia Mbörö?

”Haleluya! Misuno Yehowa . . . Me omasiö; sinangea wanunö andrö.”​—ZINUNÖ 147:1.

SINUNÖ: 9, 152

1-3. (a) Hamega lasura Zinunö 147? (b) Hadia wamaha’ö si tola tahalö moroi ba Zinunö 147?

ASESE tasuno zi samösa niha na so zadöni dödöda ba niwa’önia mazui nifaluania. Sindruhu-ndruhu tefarou dödöda ba wanuno Lowalangi Yehowa! Tasuno ia börö wa’abölönia sebua, ta’ila da’ö moroi ba nifazökhi dangania sahöli-höli dödö. Tasuno göi ia börö me i’omasi’ö sibai ita, ta’ila da’ö me ibe’e Nononia tobali höli.

2 Ba ginötö tabaso Zinunö 147, ba da’ö ta’ila wa sindruhu-ndruhu omasi zanura zinunö ba wanuno Yehowa. Ifarou göi niha bö’ö ena’ö lasuno Lowalangi simane nifaluania.​—Baso Zinunö 147:1, 7, 12.

3 Lö ta’ila haniha zanura Zinunö 147. Hiza’i, tola manö auri ia sagötö mangawuli ndraono Gizara’eli ba Yeruzalema me no aefa i’efa’ö ira Yehowa moroi ba Mbabilona. (Zinunö 147:2) Ifosumange Yehowa sanura zinunö börö me tola ifuli lafosumange Yehowa iraono Gizara’eli ba danöra samösa. Aefa da’ö, oya nasa dani nibe’enia ba wanuno Yehowa. Hadia manö da’ö? Ba hadia dani ni’okhögömö wa tola  öwa’ö ”Haleluya!” mazui ”Misuno Yehowa”?​—Zinunö 147:1

IFADÖHÖ ZARASA TÖDÖ YEHOWA

4. Hewisa dödö ndraono Gizara’eli me i’efa’ö ira Razo Kiro, ba hadia mbörö?

4 Khalaigö hewisa dödö ndraono Gizara’eli me so ira ba wanibo’ö ba Mbabilona. Niha si so ba da’ö, la’o’aya ira ba lamane, ”Milau khöma wanunö Ziona andrö.” Hiza’i, lö lafalua da’ö ira niha Yahudi. No adudu Yeruzalema si tobali dani sebua wa’omuso dödöra. (Zinunö 137:1-3, 6) Afatö dödöra ba da’ö, ba moguna khöra wondrara dödö. Hiza’i, simane si no ifa’ele’ö Taromali Lowalangi, itolo nono mbanuania Yehowa. Hewisa lalania? Razo Persia sotöi Kiro idudugö Mbabilona ba imane sanandrösa khö Yehowa, ”Ya’ia zanguma’ö khögu wolau osali khönia ba Yeruzalema.” Imane göi Kiro ba ndraono Gizara’eli, ”Ba haniha ami mbanuania, ba yamutolo ia Lowalanginia, ba yamöi misi yawa.” (II Nga’ötö 36:23) No fondrara dödö sebua ba ndraono Gizara’eli da’a me so ira ba Mbabilona!

5. Hadia niwa’ö zanura zinunö sanandrösa ba wa’abölö Yehowa ba wamadöhö ya’ita?

5 Ibe’e wondrara dödö Yehowa ba ndraono Gizara’eli fefu, hiza’i ibe’e göi wondrara dödö ero samösa-mösana ira. Ifalua göi khöda zimane da’ö Yehowa. Isura sanura zinunö wa Lowalangi ’zangabe’e’ö si no arasa tödö andrö, sodalu-daluni safökhö khöra’. (Zinunö 147:3) Ba ginötö mofökhö ita mazui atata wangera-ngerada, tola faduhu dödöda wa irorogö ita Yehowa. Omasi sibai Yehowa ba wondrara tödöda hegöi ba wamadöhö zokho si so ba dödöda. (Zinunö 34:19; Yesaya 57:15) Ibe’e khöda wa’atua-tua hegöi fa’abölö irege tola tataögö gofu hadia gabula dödö si göna ita.​—Yakobo 1:5.

Omasi sibai Yehowa ba wondrara tödöda hegöi ba wanolo ya’ita ena’ö itugu sökhi dödöda

6. Hewisa wa tola tatema mbua moroi ba ngawua wehede zanura zinunö ba Zinunö 147:4? (Faigi gambara ba wamobörö wamaha’ö.)

6 Aefa da’ö, ifaigi dalu mbanua sanura zinunö ba imane wa Yehowa andrö ”sangerai ha wa’oya ndröfi” ba ”sanötöi töira fefu”. (Zinunö 147:4) Tola i’ila ndröfi sanura zinunö, hiza’i lö i’ila hawa’oya zindruhunia da’ö. Iada’a, la’ila ira ilmuwan wa so miliaran ndröfi ba galaksida. Ba tola manö so triliun galaksi ba mbanua siawa! Lö hadöi niha gulidanö si tola mangerai hawa’oya fefu ndröfi, hiza’i tola ifalua da’ö Somböi. Sindruhunia, aboto ba dödönia ero sambua ndröfi irege ibe’e döira zamösana. (I Korindro 15:41) Aboto ba dödö Lowalangi ero sambua ndröfi, tatu aboto göi ba dödönia ndra’ugö. Hasambalö i’ila hezoso so ndra’ugö, hadia nirasoimö ba hadia zoguna khömö!

7, 8. (a) Hadia zaboto ba dödö Yehowa sanandrösa khöda? (b) Be’e duma-duma sangoroma’ö fa’omasi Yehowa?

7 Aboto ba dödö Yehowa hadia nitaögömö ba i’okhögö wa’abölö ba wanolo ya’ugö ba gabula dödö nitaögömö. (Baso Zinunö 147:5.) Te abua zalua khömö andrö ba worasoimö ba tebai  ötaögö ia. Aboto ba dödö Lowalangi hezo ndrege wa’abölöda, ”itörö tödönia wa no gawu-gawu ita”. (Zinunö 103:14) Lö mo’ahonoa ita, andrö wa tola manö asese tafalua zala si fagölö, ba tola manö tarasoi wa’afatö dödö. Tatu so khöda waniasa ba zi no irai tawa’ö, isö-isö dödö si fasala mazui fa’afökhö dödö si no irai ta’okhögö! Lö hadöi zala nifalua Yehowa, hiza’i sindruhu-ndruhu aboto ba dödönia hadia nirasoida.​—Yesaya 40:28.

8 Hadia no irai örasoi samösa wa’abölö danga Yehowa ba wanolo ya’ugö ba wangasiwaisi wanandraigö nitaögömö? (Yesaya 41:10, 13) Da’a zalua khö zi samösa perintis ira alawe sotöi Kyoko. Me no aefa findra ia ba halöwönia si bohou, afatö sibai dödönia. Hiza’i, hewisa wa tola i’ila Kyoko wa aboto ba dödö Yehowa hadia gabula dödönia? Ba mbanua niha Keriso sawena fao ia, ato ndra talifusöda sorasoi hadia nirasoinia. Irasoi wa imane khönia Yehowa ”U’omasi’ö ndra’ugö tenga ha börö me no tobali perintis ndra’ugö, hiza’i börö me onogu alawe ndra’ugö ba me no ölulu wa’aurimö khögu. Omasido na örasoi wa’owua-wua dödö ba wa’aurimö tobali Samaduhu’ö töigu!” Hewisa wangoroma’ö Yehowa khömö wa ”no si lö fondrege wa’aboto ba dödönia andrö”?

I’ASOGÖ YEHOWA ZOGUNA KHÖDA

9, 10. Hadia lala sabölö tohude nifalua Yehowa ba wanolo ya’ita? Be’e duma-duma.

9 Fefu ita moguna khöda gö, nukha hegöi nahiada. Te aombö dödömö börö me mo’amböta gö ni’ami. Hiza’i, ifazökhi gulidanö Yehowa ba wanga’asogö fefu ngawalö gö, duma-dumania manö ”ba nono gaga andrö, si’ao khönia”. (Baso Zinunö 147:8, 9.) Na ibe’e gö gaga Yehowa, tola faduhu dödöda wa hasambalö ihenaigö ngawalö zoguna khöda.​—Zinunö 37:25.

10 Sabölö tohudenia, i’asogö ngawalö zoguna khöda Yehowa ena’ö aro wamatida, ba ibe’e khöda ’wa’ohahau dödö andrö, khö Lowalangi, sabölö moroi ba gera-era niha fefu’. (Filifi 4:6, 7) Samösa dalifusöda sotöi Mutsuo hegöi fo’omonia, no larasoi wanolo moroi khö Yehowa. Me alua tsunami ba Jepang me 2011, arakhagö mate ira na lö manöi ira yawa ba mbumbu nomora. Ba ginötö da’ö, arakhagö taya fefu gama-gamara. Ba zi bongi, la’agö lantai dua nomora sogömi-gömi ba sokafu. Ba zi hulö wonginia, la’alui zi möi famarou dödöra. So sambua nisöndrara ya’ia da’ö Buku Kegiatan Saksi-Saksi Yehuwa 2006. Ba ginötö ibokai nga’örönia Mutsuo, i’ila duho ”Tsunami Terdahsyat yang Pernah Dicatat”. Ba faosatö da’ö, itutunö sanandrösa ba ndruru danö salua ba Sumatra me döfi 2004, sanga’asogö tsunami sabölö mamakiko si no irai musura. Me’e Mutsuo hegöi fo’omonia me labaso waö-waö salua khö ndra talifusöda. Larasoi wa ibe’e khöra Yehowa wamarou dödö si tefaudu ba zoguna khöra. Irorogö göi ira Yehowa ba lala tanö bö’ö. Ira talifusöda si so ba nahia tanö bö’ö ba Jepang, la’asogö gö hegöi nukha. Hiza’i, abölö te’aro’ö ira me möi ndra talifusöda nifatenge organisasi Lowalangi ba mbanua niha Keriso. Imane Mutsuo, ”Urasoi wa so Yehowa ba zingada zamösana, ba irorogö ita. Sindruhu-ndruhu möi fondrara dödö da’a!” Lowalangi zi oföna manga’asogö hadia ni’oguna’öda ena’ö lö mamalö aro wamatida, ba hasambalö ibe’e zoguna khöda.

BUA MOROI BA WANOLO LOWALANGI

11. Hadia zinangea tafalua ena’ö tola tatema mbua moroi ba wanolo Lowalangi?

11 ”I’abe’e’ö nifakao andrö Yehowa.” I’omasi’ö ba hasambalö itolo ita. (Zinunö 147:6a) Hewisa ena’ö tola tatema mbua moroi ba wanolonia? Moguna ta’okhögö wahuwusa si sökhi khönia. Ba wangokhögö da’ö, moguna so khöda wa’ebolo dödö. (Zefania 2:3) Niha sebolo tödö, la’odaligö Yehowa ba wangatulö’ö fefu ngawalö zi lö atulö hegöi ba wanga’asiwaisi wanandraigö nitaögöra. I’omasi’ö ira Yehowa.

12, 13. (a) Ena’ö tola tatema mbua moroi ba wanolo Lowalangi, hadia zinangea tatimbagö? (b) Ha’ökhö omasi Yehowa?

12 Baero da’ö, ”ihöndrögö zebua horö, irugi danö tou” Lowalangi. (Zinunö 147:6b) Lö omasi ita na alua khöda da’ö! Omasi ita na iforoma’ö khöda Lowalangi  wa’omasinia si lö faröi. Andrö, moguna ta’ogorofi hadia ni’ogorofinia. (Zinunö 97:10) Duma-dumania, ta’aröu’ö ita moroi ba gamuata fohorö. Eluahania, tatimbagö gofu hadia ia zondrönisi tödöda ba wamalua ya’ia, simane pornografi. (Zinunö 119:37; Matai’o 5:28) Tola manö moguna taforege ba wamalua da’ö. Hiza’i, tenga zaya-zaya gölö wamalua da’ö börö me hasambalö tatema howu-howu moroi khö Yehowa.

13 Tebai ta’odaligö ita samösa ba wamalua fasuwöta andre. Moguna ta’odaligö Yehowa. Hadia omuso dödönia na ta’odaligö ngawalö ni’odaligö niha bö’ö ba wanolo ya’ita? Lö’ö. ’Tenga fa’abölö kudo zomasi’ Yehowa. Hadia tola ta’odaligö wa’abölöda samösa mazui niha bö’ö? ’Lö ba dödö Yehowa wa’esolo waha niha.’ (Zinunö 147:10) Hiza’i, moguna böi mamalö-malö mangandrö ita khö Yehowa ba wangandrö fanolo ba ta’andrö khönia ba wangefa’ö ya’ita moroi ba zalada. Lö irai atage Yehowa ba wamondro-ndrongo fangandröda. ”Somasi Yehowa, ba sangata’ufi ya’ia, sanötöna fa’ebua dödönia andrö.” (Zinunö 147:11) Börö me lö faröi ia ba me i’omasi’ö ita, ta’ila wa hasambalö itolo ita ba wolawa gisö-isö dödöda si fasala.

14. Hadia nifaduhusi tödö sanura zinunö?

14 I’aro’ö dödöda Yehowa wa hasambalö itolo ita ba ginötö so gabula dödöda. Ba ginötö mangawuli ndraono Gizara’eli ba Yeruzalema, i’angeraigö sanura zinunö hewisa wanolo Yehowa ya’ira. Manunö ia imane, ”Ya’ia zangaro lazi andrö ba mbawa göli khöu, ba samahowu’ö iraono baewali khömö. Lö ifa’amöi ba danöu zanuwö.” (Zinunö 147:13, 14) Me i’aro’ö mbawa göli andrö Yehowa, lö sa’ae fa’ata’u khönia. Da’a zanga’aro’ö tödönia wa ilumö’ö nono mbanuania Yehowa.

Hewisa wa tola itolo ita Taromali Lowalangi ba ginötö tarasoi wa’aombö-aombö dödö börö wanandraigö nitaögöda? (Faigi ngenoli si-15-17)

15-17. (a) Hadia manö nirasoida ba wanandraigö nitaögöda, hiza’i hewisa wangoguna’ö Yehowa Taromalinia ba wanolo ya’ita? (b) Be’e duma-duma zangoroma’ö wa ”fagohi” daromali Lowalangi ba wanolo ya’ita.

15 Tola manö örasoi wa’aombö-aombö dödö börö gabula dödömö. Hiza’i, ibe’e wa’atua-tua khömö Yehowa ba wanaögö ya’ia. Imane sanura zinunö wa ”ifa’ema ba danö goroisania [Lowalangi]; si fagohi daromalinia andrö”. Aefa da’ö, itutunö  sanandrösa ba salju, namo si baku, hegöi teu esi. Isofu, ”Haniha zanaha fa’o’afu andrö khönia?” Iwa’ö wa ’ilau linia Yehowa, ba mangulu ibe’e’. (Zinunö 147:15-18) Lowalangida si tola mangila hegöi mamalua gofu hadia ia, samatörö teu esi hegöi salju, tola itolo ndra’ugö ba wangasiwaisi gofu hadia ia gabula dödömö.

Hadia no irai örasoi samösa hewisa wa’alio Yehowa ba wame’e fanuturu lala khömö?

16 Iada’a, i’oguna’ö Daromalinia Yehowa ya’ia da’ö Sura Ni’amoni’ö ba wame’e fanuturu lala. Imane sanura zinunö wa ”fagohi” daromali Yehowa ba wanolo ya’ita. Ibe’e khöda wanuturu lala Lowalangi ba lala hegöi ba ginötö si tefaudu. Angeraigö lala nifaluamö ba wanema mbua moroi ba Zura Ni’amoni’ö, publikasi ni’asogö ndra ’sawuyu si lö faröi ba satua-tua’, JW Broadcasting, jw.org, ira satua sokubaloi hegöi ira talifusöda. (Matai’o 24:45) Hadia no irai örasoi samösa hewisa wa’alio Yehowa ba wame’e fanuturu lala khömö?

17 No irasoi talifusöda ira alawe sotöi Simone hewisa wanolo Daromali Lowalangi ya’ia. Ba wamaiginia, lö eluaha wa’aurinia ba lö omuso dödö Yehowa khönia. Hiza’i, ba ginötö ide-ide dödönia, ilau mangandrö khö Yehowa ba wanolo ya’ia. Itohugö göi wamaha’ö ya’ia ba Zura Ni’amoni’ö. Imane Simone, ”Ba zalua khögu, lö irai urasoi wa lö ibe’e wanuturu lala hegöi fa’abölönia khögu Yehowa.” Da’a zanolo ya’ia ba wangokhögö gamuata si sökhi.

18. Hana wa tola örasoi wa ahatö Yehowa khömö, ba hadia dani ni’okhögömö ba ’Wanuno Yehowa’?

18 I’ila sanura zinunö wa no ifili Yehowa ndraono Gizara’eli siföföna tobali ono mbanuania ba gotalua fefu soi ba gulidanö. Ha ya’ira zanema’ö ’taromali’ Lowalangi hegöi ”gamakhoitania”. (Baso Zinunö 147:19, 20.) Iada’a, ta’okhögö mbuala si sökhi börö me tefotöi ita ba döi Lowalangi. Ta’andrö sibai saohagölö börö me no ta’okhögö wa’aboto ba dödö sanandrösa khönia, ta’okhögö Daromalinia ba wame’e fanuturu lala khöda ba tola ta’okhögö wahuwusa si sökhi khönia. Simane sanura Zinunö 147, oya dani ni’okhögömö ba ’Wanuno Yehowa’, ba öfarou göi niha bö’ö ba wamalua da’ö.