”Si sökhi wanunö andrö khö Lowalangida.”​—ZINUNÖ 147:1.

SINUNÖ: 10, 2 *

1. Hadia mbua nitemada na talau manunö?

IMANE samösa sanura zinunö si tehöngö, ”Fehede tofakha ia ba wangera-ngeramö. Musik tofakha ia ba dödömö. Hiza’i, sambua zinunö tofakha ia ba wangera-ngera hegöi ba nirasoimö.” Fefu zinunöda möi fangoroma’ö wa tasuno ba ta’omasi’ö Namada si so ba zorugo, Yehowa. Tola itugu ahatö ita khönia. Ba da’a ta’ila wa moguna sibai wanunö ba wamosumange satulö, he na ha ya’ita mazui na fao ita khö ndra talifusöda ba wo’anunöisi ya’ia.

2, 3. (a) Hewisa wamaigi niha sanandrösa ba wangebua’ö li na manunö ba mbanua niha Keriso? (b) Hadia wanofu-nofu nitutunöda ba wamaha’ö da’a?

2 Hiza’i, hadia ö’ebua’ö limö wanunö ba mbanua niha Keriso? Hadia aila’ö wamalua ya’ia? Ba zi hauga banua, lö to’ölö manunö ndra matua föna niha bö’ö. Tola molua-lua da’a ba mbanua niha Keriso, mendrua manö na so zatua sokubaloi si lö omasi manunö mazui na lafalua halöwö bö’ö sagötö manunö.​—Zinunö 30:13.

3 Fanunö no sambua faosatö ba wamosumangeda Yehowa. Andrö, lö omasi ita talalöi faosatö da’a ba gangowuloa.  Hiza’i, moguna tasofu khöda samösa, ’Hewisa wamaigigu faosatö wanunö ba gangowuloa? Hadia zinangea ufalua na lö to’ölö manunödo föna niha bö’ö? Ba hewisa ena’ö tola ulau manunö soroi ba dödö?’

FANUNÖ NO SAMBUA FAOSATÖ SI TOHUDE BA WAMOSUMANGE SATULÖ

4, 5. Hewisa wangoguna’ö musik hegöi sinunö ba götö ndraono Gizara’eli ba wamosumange Yehowa?

4 I’otarai me föna irugi iada’a, niha samosumange Yehowa la’oguna’ö musik ba wanuno ya’ia. Me lö faröi ndraono Gizara’eli khö Yehowa, fanunö no sambua faosatö si tohude ba wamosumangera. Duma-dumania, me ifa’anö Dawido wangehaogö osali, i’oguna’ö 4.000 ndraono Lewi ba wangoguna’ö musik ba wanuno Yehowa. Ba gotaluara, so 288 niha sonekhe ba si no to’ölö ”nifataro ba wanunö andrö khö Yehowa”.​—1 Nga’ötö 23:5; 25:7.

5 Musik hegöi sinunö no faosatö si tohude ba wangamoni’ö osali. Imane khöda Sura Ni’amoni’ö, ”Ba hulö zi ha sara lira zolau torofe zanunö, wanuno Yehowa, awö wangandrö saohagölö khönia. Ba me labörögö wolau torofe ba famözi faritia, ba folau hadia ia [mbö’önia] nifoli, ba fanuno Yehowa andrö . . .  me no anönö gosali Lowalangi lakhömi Yehowa andrö.” Khalaigö nirasoi ndraono Gizara’eli ba götö da’ö. Tatu itugu aro wamatira!​—2 Nga’ötö 5:13, 14; 7:6.

6. Hadia zi no ifakhoi Yeremia sanandrösa ba musik hegöi sinunö me tobali ia gubernur ba Yeruzalema?

6 Nehemia zondrönia’ö ndraono Gizara’eli ba wangehaogö mangawuli göli Yeruzalema. Idönia’ö göi ndraono Lewi ba wanunö hegöi ba wangoguna’ö musik. Me mu’amoni’ö göli itugu owua-wua dödö niha si so ba da’ö börö musik nifaehagö niha Lewi andrö. Ifili Nehemia dombua ngawawa paduan suara ”zangandrö saohagölö”. Mowaö-waö ira yawa ba dete göli. Ngawawa si oföna numalö ira ba gambölö ba ngawawa si dua numalö ira ba gambera irege tola falukha ira ba ngai göli sahatö ba gosali. Ebua sibai lira irege terongo ba nahia saröu. (Nehemia 12:27, 28, 31, 38, 40, 43) Faduhu dödöda wa omuso dödö Yehowa me irongo manunö zamosumange ya’ia si fao fa’owua-wua dödö ba wanuno ya’ia.

7. Hewisa wangoroma’ö Yesu wa fanunö no faosatö si tohude ba wamosumange nifalua niha Keriso?

7 Ba götö Yesu, musik lö mamalö tobali faosatö si tohude ba wamosumange satulö. Angeraigö hadia zalua ba mbongi sabölö tohude sagötö waö-waö wa’auri niha. Me no aefa ifalua Yesu hegöi ira nifaha’önia Bongi Watomesa Zo’aya, lalau manunö ba wanuno Yehowa.​—Baso Matai’o 26:30.

8. Hewisa wame’e niha Keriso siföföna duma-duma ba wanuno Lowalangi si fao fanunö?

8 Niha Keriso siföföna no labe’e khöda duma-duma si sökhi ba wanuno Lowalangi si fao sinunö. Tenga simane ndraono Gizara’eli samosumange Yehowa ba gosali, lafalua gangowuloa ba nomo-omo. Hewa’ae nomo ni’oguna’öra tenga simane fa’asökhi ba fa’ebua gosali, hiza’i hasambalö lalau manunö soroi ba dödö. Imane sinenge sotöi Faulo khö ndra talifusönia andrö, ”Ya’a’oi so wa’atua-tuami, ba wamahaö awömi ba ba wamarou tödöra, sinunö ba umanö ba lailö  dödö, yafao wangandrö saohagölö, misuno Lowalangi ba dödömi.” (Kolose 3:16) Sinunö si so ba mbuku zinunöda, moguna ’ta’anunöisi ia si fao fangandrö saohagölö’. Da’a sambua faosatö ’gö na inötö wemanga’ nibe’e ’zawuyu si lö faröi ba satua-tua’ khöda.​—Matai’o 24:45.

BÖI SO KHÖU WA’AILA BA GINÖTÖ ÖLAU MANUNÖ

9. (a) Hana wa so niha saila manunö si fao fa’owua-wua dödö ba gangowuloada hegöi ba kebaktian? (b) Hewisa zinangeania wanunoda Yehowa si fao fanunö ba haniha zi tobali duma-duma? (Faigi gambara ba wamobörö wamaha’ö.)

9 Hadia mbörö wa aila’ö manunö? Te lö to’ölö da’ö ba nösi nomomö mazui ba zasese mifalua. Mazui te öfagölö-gölöisi limö khö ndra sanunö satua-tua si so ba radio mazui ba TV irege aila mazui afatö dödömö börö me lö baga-baga limö. Hiza’i, fefu ita ta’okhögö noro dödö ba wamosumange Yehowa si fao fanunö. Börö da’ö, fazawa mbuku zinunömö, faöga högömö ba anunö si fao fa’amohi’a dödö! (Gesera 3:11; baso Zinunö 147:1.) Iada’a, oya Balai Mbanua Lowalangi sangokhögö layar sangoroma’ö sinunö ni’anunöisida irege lö daha-tahada ba wanunö. Sadöni dödöda iada’a, fo’anunöisi zinunö Mbanua Lowalangi no tobali faosatö ba Sekolah Pelayanan Kerajaan khö ndra satua sokubaloi. Ba da’a aboto ba dödöda wa ira satua sokubaloi moguna tobali ira duma-duma ba wanunö ba gangowuloa mbanua niha Keriso.

10. Hadia zinangea tatörö tödöda na ata’u ita wangebua’ö lida na manunö?

10 Ato niha si lö omasi mangebua’ö lira na manunö börö me ata’u ira ma talafo ebua mazui lö baga-baga lira. Hiza’i angeraigö da’a. ”Asese sa sala ita, dozi ita” na fahuhuo, hiza’i tenga  da’ö geluahania wa tabato sa’ae fahuhuo. (Yakobo 3:2) Börö da’ö, hewa’ae lö baga-baga lida, böi tatehegö da’ö tobali daha-tahada ba wanuno Yehowa.

11, 12. Hewisa ena’ö tola itugu sökhi na manunö ita?

11 Tola manö ata’u ita manunö börö me lö ta’ila manunö. Hiza’i, so wanuturu lala si tola tafalua ena’ö itugu sökhi lida na manunö. *—Faigi nisura ba gahe zura.

12 Tola ebua limö wanunö na öfaha’ö ndra’ugö hewisa lala wangai hanu-hanu si sökhi. Duma-dumania, tola mohola wandru börö me so listrik, simanö göi tola ebua lida na fahuhuo mazui na manunö ita na sökhi lala wohanu-hanuda. Moguna öfagölösi wa’ebua limö na fahuhuo’ö ba ginötö ölau manunö mazui ö’ebua’ö nasa limö. (Faigi wanuturu lala ba mbuku Memperoleh Manfaat dari Pendidikan Sekolah Pelayanan Teokratis, nga’örö 181 irugi 184, tuhonia ”Mengatur Persediaan Udara Saudara dengan Baik”.) Ifatunö göi Sura Ni’amoni’ö khö ndra samosumange Yehowa ena’ö ’la’owua-wua’ö dödöra’ ba ginötö la’anunöisi zinunö fanuno.​—Zinunö 33:1-3.

13. Tutunö hewisa ena’ö lö aila ita manunö.

13 Ba wamaha’ö zi sambua omo mazui ba wamaha’ö samösa, tandraigö falua da’a: Fili sambua zinunö sabölö omasi’ö si so ba mbuku zinunöda. Ebua’ö limö wombaso liriknia. Aefa da’ö, si fao fa’ebua li si fagölö, tötöi sambua kalimat ero sakali famahasu ba anunöisi ia simane fa’ebua li da’ö. (Yesaya 24:14) Na öfalua da’ö, tola itugu ebua ba sökhi limö. Böi ata’u mazui aila’ö wamalua ya’ia!

14. (a) Hadia zi tola tafalua ena’ö tola ebua lida na talau manunö? ( Faigi kotak ”Ena’ö Itugu Sökhi Limö Na Manunö”.) (b) Hadia wanuturu lala si tefaudu khömö?

14 Ena’ö tola ebua limö, moguna ö’ebua’ö mbeka-beka mbawamö. Börö da’ö, ero ölau manunö moguna ö’ebua’ö mbeka-beka mbawamö moroi ba zi to’ölö öfalua na fahuhuo’ö. Hiza’i, hadia nifaluamö na ö’ila wa no ide-ide limö mazui ozira-zira? Tola ösöndra wanuturu lala ba kotak ”Mengatasi Problem-Problem Spesifik” ba mbuku Memperoleh Manfaat dari Pendidikan Sekolah Pelayanan Teokratis, nga’örö 184.

 

 ANUNÖ SOROI BA DÖDÖ

15. (a) Hadia gangombakhata ba gangowuloa ero röfi me döfi 2016? (b) Hadia manö dani wa mubohouni mbuku zinunö?

15 Fefu niha sangondrasi gangowuloa ero röfi me döfi 2016, omuso dödöra me i’ombakha’ö talifusöda Stephen Lett moroi ba Mboto Solohe wa so mbuku zinunö si bohou tuhonia Mi’anunö si Fao Fa’owua-wua Dödö khö Yehowa. Simane nitutunö dalifusöda Lett, sambua dani wa moguna so khöda mbuku zinunö si bohou ya’ia da’ö börö me no mubohouni Kitab Suci Terjemahan Dunia Baru. Börö me so ngawua wehede si lö mu’oguna’ö ba Terjemahan Dunia Baru andrö wa mufabö’öni göi ngawua wehede si so ba zinunöda. Aefa da’ö, no munönö zinunö si bohou sanandrösa ba halöwö fanuriaigö hegöi ba höli. Börö me fanunö andre no sambua faosatö si tohude ba wamosumangeda, da’ö mbörö wa omasi Mboto Solohe ba wangehaogö mbuku zinunö sabölö sökhi. Ulinia simane uli Terjemahan Dunia Baru.

16, 17. Hadia manö zi no mufabö’öni ba mbuku zinunö si bohou?

16 Ena’ö aoha wangoguna’ö mbuku zinunö, no mu’orudugö ia molo’ö duhonia. Duma-dumania, 12 zinunö si oföna itutunö sanandrösa khö Yehowa, 8 zinunö aefa da’ö itutunö sanandrösa khö Yesu hegöi höli, ba tanö bö’önia. Tola ö’ila fefu da’ö ba indeks subjek  si so ba mbuku zinunö andrö. Möi fanolo da’a, simane na ifili zinunö ni’oguna’önia satua sokubaloi ba huhuo sebua nifa’emania.

17 Ena’ö fefu ita tola ta’anunöisi ia soroi ba dödö, so ösa ngawua wehede si no mufabö’öni ena’ö aboto ba dödöda hadia zindruhunia duria nifa’ema ba zinunö da’ö. Mufabö’öni ngawua wehede si lö asese mu’oguna’ö. Duho zinunö ”Lakhömi Yehowa Oroma ba Nifazökhinia” no mufabö’öni tobali ”Lasuno Lowalangi Niwöwöinia” ba mufabö’öni göi ngawua wehedenia. Mufabö’öni göi duho zinunö ”Rorogö Dödöu”, si hulö fareta tobali famaduhu’ö ya’ia da’ö ”Marorogö Dödöma”. Hadia mbörö? Ba zilalö, na i’anunöisi zinunö da’a si samösa niha, hulö ifatunö ba niha bö’ö hadia zinangea ifalua niha da’ö. Lua-luania, niha sawena mubayagö idanö, sadöni tödö, si bohou ebua hegöi ira talifusöda ira alawe sangondrasi gangowuloa, kebaktian wilayah hegöi regional tola aiwö ira wo’anunöisi ya’ia. Andrö wa mufabö’öni duho hegöi ngawua wehedenia.

Faha’ö ndra’ugö manunö na inötö wamaha’ö zi sambua omo (Faigi ngenoli si-18)

18. Hana wa moguna tafaha’ö ita ba zinunö si so ba mbuku zinunöda si bohou? (Faigi nisura ba gahe zura.)

18 Oya zinunö nifa’anö ba mbuku Mi’anunö si Fao Fa’owua-wua Dödö khö Yehowa hulö simane fangandrö. Sinunö da’a zanolo ya’ugö ba wamaehagö khö Yehowa hadia nirasoimö. So zinunö tanö bö’ö sanolo ba wamarou tödöda ”ba wa’omasi andrö, ba ba mbua-bua si sökhi”. (Heberai’o 10:24) Andrö, omasi ita ta’ila hewisa note, irama hegöi ngawua wehede si so ba zinunöda. Sambua lala si tola tafalua ya’ia da’ö tafondro-ndrongo rekaman zinunö ndra talifusöda si so ba jw.org. Na öfalua da’a ba nomo, tola öfaha’ö ndra’ugö wo’anunöisi ya’ia soroi ba dödö ba si fao fa’abarani. *—Faigi nisura ba gahe zura.

19. Hadia zi tola lafalua fefu niha si so ba mbanua niha Keriso ba wamosumange Yehowa?

19 Törö tödömö wa sinunö no sambua faosatö si tohude ba wamosumangeda. Da’a lala si tefaudu ba wangoroma’ö khö Yehowa wa ta’omasi’ö ia ba ta’andrö saohagölö ba zi no ifalua khöda. (Baso Yesaya 12:5.) Na ölau manunö soroi ba dödö, no öfarou niha bö’ö ba wamalua simane da’ö. Fefu niha ba mbanua niha Keriso, he si bohou ebua, si no alawa döfi mazui niha sawena fao ba zindruhu, tola la’oguna’ö lala da’a ba wamosumange Yehowa. Andrö, böi aila ndra’ugö ba wanunö soroi ba dödö. O’ö zanura sinunö sanguma’ö, ”Mi’anunö khö Yehowa!” Datalau manunö soroi ba dödö!​—Zinunö 96:1.

^ par. 3 I’otarai wamaha’ö da’a, mu’oguna’ö mbuku zinunö Mi’anunö si Fao Fa’owua-wua Dödö khö Yehowa.

^ par. 18 Ba kebaktian wilayah hegöi regional, mubörögö acara ero sihulö wongi hegöi ba zi laluo faoma famaehagö musik, fulu menit wa’ara. Da’a zanolo ya’ita ena’ö abölö mohi’a dödöda ba wanunö hegöi ba wamondro-ndrongo huhuo aefa da’ö. Andrö, moguna no so ita ba nahiada wodadao ba no tahonogö dödöda ba wamondro-ndrongo ya’ia.