”Miheta ami khönia, ya’ami banuagu.”—FAMA’ELE’Ö 18:4.

SINUNÖ: 10, 45

1. Hewisa tola ta’ila wa te’efa’ö nono mbanua Lowalangi moroi ba Mbabilona Sebua, ba hadia manö wanofu-nofu sinangea tabe’e wanema li?

BA WAMAHA’Ö migu silalö, tafaha’ö ita wa niha Keriso si lö faröi la’ohe ira ba Mbabilona Sebua. Hiza’i, so duria somuso dödö, lö la’ohe ira ba da’ö sagötö fa’ara. Ta’ila da’a moroi ba Zura Ni’amoni’ö. I’o’ou nono Mbanuania Lowalangi ena’ö ’laheta’ ira moroi ba gangorudua agama-agama sofaya ba zi sagörö ulidanö. (Baso Fama’ele’ö 18:4.) Da’a zangoroma’ö wa te’efa’ö niha Keriso ba Mbabilona Sebua. Omasi sibai ita ta’ila hamega alua da’ö! Hiza’i, si föföna moguna tabe’e wanema li ba wanofu-nofu andre: Hadia gohitö dödö Ono Zekola ba Zura Ni’amoni’ö sanandrösa ba Mbabilona Sebua fatua lö döfi 1914? Hawa’ebua wa’omasi ndra talifusö ba we’amöi manuriaigö sagötö Wasuwöta Gulidanö I? Hadia la’ohe nono mbanua Lowalangi ba Mbabilona me götö da’ö börö me moguna labe’e khöra wanegu?

”ADUDU MBABILONA”

2. Hadia gohitö dödö Ono Zekola ba Zura Ni’amoni’ö fatua lö alua Wasuwöta Gulidanö I?

2 Ba zi hauga fakhe fatua lö alua Wasuwöta Gulidanö I (1914-1918), Charles Taze Russell hegöi Ono Zekola ba Zura  Ni’amoni’ö tanö bö’ö, la’ila wa lö hadöi gereja samaha’ö sindruhu ba Zura Ni’amoni’ö. Andrö lö omasi ira fao ba agama sofaya andrö. Me döfi 1879, itutunö Zion’s Watch Tower wa fefu gereja lawa’ö wa ya’ira andre ni’owalu si lö faröi khö Keriso. Hiza’i, latuhini göi ndra samatörö ba sindruhunia no si fao ba Mbabilona Sebua ira. Ifotöi ira Sura Ni’amoni’ö si tobali sohorö.—Baso Fama’ele’ö 17:1, 2.

3. Hadia nifalua Ono Zekola ba Zura Ni’amoni’ö sangoroma’ö wa lö fao ira sa’ae ba agama sofaya? (Faigi gambara ba wamobörö wamaha’ö.)

3 Ira matua hegöi ira alawe si lö faröi, la’ila wa na latuhuni agama sofaya, lö ifahowu’ö ira Lowalangi. Andrö, ato moroi ba gotaluara lafa’ohe’ö zura ba gereja ba wangombakha wa laheta ira moroi ba da’ö. So ösa zombaso samösa zura andrö föna niha sato ba gereja. Na lö latehe khöra ba wombaso sura andrö, lafa’ohe’ö ia ba niha fefu si so ba gereja andrö. Laforoma’ö Ono Zekola ba Zura Ni’amoni’ö wa lö omasi ira fao sa’ae ba agama sofaya! Na lafalua da’a ba ndröfi-dröfi silalö, tola manö labunu ira. Hiza’i me döfi 1870, ato ndra samatörö si lö fa’awö sa’ae ba gereja simane si no lafalua mböröta. Andrö, lö ata’u niha fahuhuo sanandrösa ba Zura Ni’amoni’ö ba tola göi lö fao dödöra ba wamaha’ö ba gereja.

4. Sagötö Wasuwöta Gulidanö I, hadia nifalua Nono Zekola ba Zura Ni’amoni’ö sanandrösa ba Mbabilona Sebua? Tutunö.

4 Aboto ba dödö Ono Zekola ba Zura Ni’amoni’ö wa lö ibönö na ha latutunö ba nösi nomora, awöra, hegöi niha ba gereja wa lö fao ira sa’ae ba agama sofaya. Omasi ira na fefu niha ba zi sagörö ulidanö la’ila wa Babilona Sebua andrö agama sofaya si no mu’o’amaedolagö simane sohorö! Andrö, i’otarai mbaŵa si Felendrua 1917 irugi mböröta döfi 1918, ngahönö Nono Zekola ba Zura Ni’amoni’ö lafazaewe 10.000.000 risalah sanandrösa ba duho ”The Fall of Babylon” (Kejatuhan Babilon). Si fao fa’abarani, itutunö risalah andrö sanandrösa ba wamaha’ö gereja si fasala. Simane nikhalaigöda, mofönu sibai ndra sondrönia’ö ba gereja! Hiza’i, lö laböhöli Ono Zekola ba Zura Ni’amoni’ö. La’osambua’ö dödöra ena’ö lö laböhöli wanuriaigö ba la’o’ö ”Lowalangi, moroi ba wolo’öda ba niha.” (Halöwö Zinenge 5:29) Hadia niforoma’ö khöda moroi ba zalua andre? Da’a zangoroma’ö wa lö la’ohe ira matua hegöi ira alawe niha Keriso ba Mbabilona me götö Wasuwöta Gulidanö I. Hiza’i, me götö da’ö laforege ena’ö te’efa’ö ira moroi ba agama sofaya ba latolo niha bö’ö ba wamalua da’ö göi.

OWÖLÖ-ÖLÖ SAGÖTÖ WASUWÖTA GULIDANÖ I

5. Hadia mbörö wa tola tawa’ö wa owölö-ölö ndra talifusöda sagötö Wasuwöta Gulidanö I?

5 Me mböröta, ta’ila wa sagötö Wasuwöta Gulidanö I, lö omuso dödö Lowalangi ba nono mbanuania börö me lö owölö-ölö ira ba wanuriaigö. Börö da’ö,  faduhu dödöda wa itehegö Yehowa la’ohe ira ba Mbabilona Sebua ba zi hauga fakhe. Hiza’i, ira talifusöda samosumange Lowalangi si lö faröi i’otarai 1914 irugi 1918, ba gafuriata latutunö wa ya’ira si tobali sambua ngawawa, no laforege ena’ö lö laböhöli ba wanuriaigö. Na abölö oya ta’ila sanandrösa ba zalua khö Nono Zekola ba Zura Ni’amoni’ö me götö da’ö, tola abölö aboto ba dödöda hadia zalua nisura ba Zura Ni’amoni’ö.

Ira talifusöda samosumange Lowalangi si lö faröi i’otarai 1914 irugi 1918 laforege ena’ö lö laböhöli wanuriaigö

6, 7. (a) Hadia manö wanandraigö nitaögö Nono Zekola ba Zura Ni’amoni’ö sagötö Wasuwöta Gulidanö I? (b) Hadia zangoroma’ö wa owölö-ölö Nono Zekola ba Zura Ni’amoni’ö?

6 Sindruhunia, sagötö Wasuwöta Gulidanö I, owölö-ölö sibai Nono Zekola ba Zura Ni’amoni’ö we’amöi manuriaigö. Hiza’i lataögö wanandraigö. Datatutunö hadia zi dombua ngawalö andrö. Si föföna, lö la’ila Ono Zekola ba Zura Ni’amoni’ö hewisa lala wanuriaigö na ha Sura Ni’amoni’ö ni’oguna’öra. Si to’ölönia, labe’e mbuku ba niha, ba mbuku da’ö zanutunö sindruhu khöra. Andrö, ba ginötö lö itehe samatörö mbuku The Finished Mystery (Rahasia yang Tergenap) me mböröta ndröfi 1918, abua khö ndra talifusöda we’amöi manuriaigö. Si dua, me götö da’ö so wökhö flu Spanyol. Fökhö sabölö-bölö andre alio göna ba niha irege abua khö ndra talifusöda we’amöi misa hegöi manuriaigö. Hewa’ae lataögö da’ö, laforege Ono Zekola ba Zura Ni’amoni’ö ena’ö lö laböhöli wanuriaigö.

Owölö-ölö sibai Ono Zekola ba Zura Ni’amoni’ö! (Faigi ngenoli si-6, 7)

7 Me döfi 1914, Ono Zekola ba Zura Ni’amoni’ö si lö atoto andre lafuta ”Drama Foto Penciptaan”. Video andre, angorudua gambara hegöi film si so li. Da’a zi bohou me götö da’ö. Itutunö Drama andrö waö-waö niha i’otarai me tewöwöi Gadamo irugu awai Wamatörö Keriso. Me döfi 1914, me lafuta video andrö si föföna sibai so töra 9.000.000 niha samaigi. Khalaigö atö. Abölö ato ira moroi ba  wa’ato ndra Samaduhu’ö Yehowa ba zi sagörö ulidanö iada’a! Molo’ö gangombakhata tanö bö’ö, me döfi 1916 töra 809.000 sangondrasi angowuloa ba Amerika Serikat, ba me döfi 1918 monönö irugi arakhagö 950.000 niha. Sindruhu-ndruhu owölö-ölö Nono Zekola ba Zura Ni’amoni’ö!

Ira talifusö sangai halöwö laforege ba wanga’asogö lektur Zura Ni’amoni’ö hegöi ba wamarou tödö fefu Ono Zekola ba Zura Ni’amoni’ö

8. Hewisa ndra talifusöda sangai halöwö la’aro’ö dödö Nono Zekola ba Zura Ni’amoni’ö sagötö Wasuwöta Gulidanö I?

8 Sagötö Wasuwöta Gulidanö I, ira talifusö sangai halöwö laforege ba wanga’asogö lektur Zura Ni’amoni’ö hegöi ba wamarou tödö fefu Ono Zekola ba Zura Ni’amoni’ö. Fotuhini si fao fa’omasi andre zanga’aro’ö ya’ira irege lö aetu owölö-ölö ira ba wanuriaigö. Samösa sanuriaigö sowölö-ölö me götö da’ö sotöi Richard H. Barber imane, ”Mofozu halöwöma ba wama’anö lala ena’ö lö aetu la’ondrasi mbanua niha Keriso ira satua samasui hegöi ena’ö tehenaigö majalah The Watch Tower ba tola lafa’ohe’ö ba Kanada hewa’ae lö latehe ba da’ö.” Imane nasa, ”Omuso sibai dödögu wanema’ö halöwö ba wama’ohe’ö mbuku The Finished Mystery side-ide sonaha ba nono kandre khö ndra talifusö si no lahalö mbukura ira samatörö. I’andrö khöma Rutherford ba wamalua kebaktian ba mbanua-banua ba Amerika Serikat tanö ba gaekhula hegöi ba wamatenge solohe huhuo ba wamarou dödö ndra talifusöda.”

SO ÖSA ZINANGEA LATEGU

9. (a) Hadia mbörö wa moguna labe’e wanegu ba nono mbanua Lowalangi i’otarai me döfi 1914 irugi 1919? (b) Hewa’ae moguna labe’e khöra wanegu, hiza’i hadia zi tebai tawa’ö?

9 So zinangea lategu khö Nono Zekola ba Zura Ni’amoni’ö. Lö aboto sibai ba dödöra sanandrösa ba niwa’ö Yehowa ena’ö la’o’ö niwa’ö ndra samatörö. (Roma 13:1) Da’ö mbörö wa ya’ira si no tobali sambua ngawawa, ha ifataria lö fao ira ba wasuwöta. Duma-dumania, me 30 mbaŵa si Lima 1918, i’andrö presiden Amerika Serikat ba nono mbanuania ena’ö mangandrö ira sanandrösa ba wa’atulö. The Watch Tower ifarou dödö Nono Zekola ba Zura Ni’amoni’ö ena’ö fao ira ba wangandrö. So ösa ndra talifusöda zame’e dolo-tolo ba wotuhini wasuwöta, ba so moroi ba gotaluara si tobali saradadu ba fao ira ba wasuwöta. Hewa’ae moguna labe’e khöra wanegu, tenga da’ö geluahania wa da’ö dani irege la’ohe ira ba Mbabilona Sebua. Sindruhunia, no arakhagö te’efa’ö ira moroi ba gangorudua agama-agama sofaya ba zi sagörö ulidanö sagötö Wasuwöta Gulidanö I.—Baso Luka 12:47, 48.

Lö aboto sibai ba dödö Nono Zekola ba Zura Ni’amoni’ö hadia geluaha lö fa’awö ba politik. Hiza’i aboto ba dödöra wa fasala na labunu niha

10. Hewisa wangoroma’ö Ono Zekola ba Zura Ni’amoni’ö wa la’ame’egö tödö wa’auri?

10 Atulösa wa lö aboto sibai ba dödö Nono Zekola ba Zura Ni’amoni’ö hadia geluaha ba niha Keriso lö fa’awö ba politik.  Hiza’i, aboto ba dödöra wa fasala na labunu niha. Andrö, hewa’ae so ösa dalifusöda si tobali saradadu hegöi solohe wana sagötö Wasuwöta Gulidanö I, hiza’i lö omasi ira labunu nawöra niha irege so ösa moroi ba gotaluara labe’e tanö föna ba wasuwöta ena’ö mate ira.

11. Ba ginötö latimbagö Ono Zekola ba Zura Ni’amoni’ö wefao ba wasuwöta, hadia nifalua ndra samatörö?

11 Mofönu sibai Gafökha börö me lö faröi ndra talifusöda khö Lowalangi. Andrö, ifazökhi ”somböi fangabu dödö, samali’ö huku”. (Zinunö 94:20) Jenderal angkatan bersenjata Amerika Serikat sotöi James Franklin Bell, ifatunö khö Rutherford hegöi Van Amburgh wa laforege ira samatörö ba wamazökhi goroisa si bohou zanutunö wa labunu niha zanimbagö wefao ba wasuwöta. Sindruhunia, itandrösaigö wehedenia andrö khö Nono Zekola ba Zura Ni’amoni’ö. Si fao fofönu, iwa’ö jenderal andrö khö Dalifusöda Rutherford wa lö a’ozu lafazökhi goroisa andrö börö me lö fao dödö presiden Amerika Serikat. Aefa da’ö imane jenderal andrö, ”Hiza’i ma’ila hewisa lala ba wondra’u ya’ami, ba hasambalö mara’u ami!”

12, 13. (a) Hadia mbörö wa ara la’efasi ndra talifusöda si dawalu ba gurunga? (b) Me no labe’e ira ba gurunga, hadia laböhöli wolo’ö khö Yehowa? Tutunö.

12 Ba gafuriata, lasöndra lala ira samatörö ba wanguhuku Ono Zekola ba Zura Ni’amoni’ö. Lara’u dalifusöda Rutherford, Van Amburgh hegöi daönö dalifusöda tanö bö’ö zosalahini Lembaga Menara Pengawal. Molo’ö hakim zangai kasus andre, abölö lö sökhi ira moroi ba saradadu Jerman. Imane wa hasambalö abölö-bölö lahuku ira börö me no la’o’aya ndra samatörö, militer, hegöi fefu gereja. Andrö, dawalu Nono Zekola ba Zura Ni’amoni’ö no ara tebe’e ira ba  gurunga ba Atlanta, Georgia. Hiza’i, me no awai wasuwöta, la’efasi ira ba laheta wamaböbögö zi lö duhu nibe’e khöra.

13 Hewa’ae labe’e ira ba gurunga, ira matua si dawalu andre la’osambua dödöra ba wolo’ö goi-goi Lowalangi. Hewisa wa tola ta’ila da’a? Lafa’ohe’ö zura khö presiden Amerika Serikat ba wangandrö ena’ö la’efasi ira moroi ba gurunga. Ba zura andrö, lawa’ö wa no tesura ba Zura Ni’amoni’ö wa tebai labunu niha, andrö haniha manö zi no molulu fa’aurinia khö Lowalangi ba i’osiwawöi goroisania, lö omuso dödö Lowalangi khönia ba tola tehori ia dania. Latutunö wa da’ö mbörö irege tebai ba lö omasi ira labunu niha. Lö khöra fa’ata’u ba wanura zura andrö khö presiden! Lö aombö dödö ndra talifusöda andre wa hasambalö la’o’ö Yehowa.

TE’EFA’Ö NONO MBANUA LOWALANGI!

14. Tutunö hadia zalua i’otarai 1914 irugi 1919 moroi ba Daromali.

14 Itutunö ba Maleakhi 3:1-3 hadia zalua ba Nono Zekola ba Zura Ni’amoni’ö i’otarai 1914 irugi mböröta ndröfi 1919. (Baso.) Yehowa Lowalangi ”Zo’aya”, ba Yesu Keriso ”mala’ika wawu’usa li”, tohare ia ba wamareso niha nibayoini si no mu’amaedolagö simane ”nono Lewi”. Me no aefa ibe’e khöra degu-degu ba i’amoni’ö ira Yehowa, latema’ö halöwö si bohou. Me döfi 1919, ifataro ”zawuyu andrö, si lö faröi, satua-tua” Yesu ba wame’e fanuturu lala hegöi ba wamaha’ö fefu genoni Lowalangi. (Matai’o 24:45) Ba gafuriata, te’efa’ö nono mbanua Lowalangi moroi ba Mbabilona Sebua. I’otarai da’ö, monönö wa’atua-tuara sanandrösa ba gohitö dödö Lowalangi ba itugu la’omasi’ö ia. La’andrö sibai saohagölö börö howu-howu nitemara moroi khö Lowalangi! [1]—Faigi gonönöta.

15. Hewisa wangoroma’öda wa ta’andrö sibai saohagölö börö me no te’efa’ö ita moroi ba Mbabilona Sebua?

15 Ta’andrö sibai saohagölö börö me no te’efa’ö ita moroi ba Mbabilona Sebua. Tebai ihori agama sindruhu Satana. Lö mofozu ia! Hiza’i, moguna tatörö tödöda hadia mbörö wa i’efa’ö ita Yehowa. Ohitö dödönia ena’ö te’orifi fefu niha. (II Korindro 6:1) Hiza’i, no ifatörö zuta niha satulö tödö agama sofaya, ba moguna tatolo ira! Dataforege ba wolo’ö ndra talifusöda si lö faröi andre ba wanolo niha ena’ö te’efa’ö ira moroi ba Mbabilona Sebua.

^ [1] (ngenoli si-14) Oya zalua si fagölö ba niha Keriso me no ato niha si faröi hulö me la’ohe niha Yahudi ba Mbabilona. Hewa’ae simanö, tebai tawa’ö wa folohe niha Yahudi ba Mbabilona mu’amaedolagö da’ö ba zalua ba niha Keriso nibayoini. Andrö lö moguna ta’alui fefu hadia zalua me la’ohe niha Yahudi ba hadia geluaha wama’ele’ö da’ö. So ngawalö si fabö’ö. Duma-dumania, 70 fakhe wa’ara la’ohe niha Yahudi ba Mbabilona, hiza’i abölö ara la’ohe niha Keriso ba Mbabilona.