Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Manuriaigö—Edisi Wamaha’ö  |  Baŵa si Felendrua 2017

Satua​—⁠Mitolo Ndraonomi Ena’ö ’Atua-Tua ba Te’orifi’

Satua​—⁠Mitolo Ndraonomi Ena’ö ’Atua-Tua ba Te’orifi’

”No ö’ila zura ni’amoni’ö andrö, i’otarai iraono ndra’ugö, sangila mangatua-tua’ö ya’ugö, ba wangalui fangorifi.”​—2 TIMOTEO 3:15.

SINUNÖ: 141, 134

1, 2. Hana wa so zatua saombö tödö na so ndraonora somasi molulu fa’auri khö Yehowa ba tebayagö idanö?

SO NGAHÖNÖ niha samaha’ö ya’ira ba Zura Ni’amoni’ö si no molulu fa’aurira khö Yehowa ba tebayagö idanö. Ato ba gotaluara zi bohou ebua si no mamaha’ö ya’ira ba zindruhu i’otarai me ide-ide ba no lafili lala wa’auri si sökhi. (Zinunö 1:1-3) Na ya’ugö niha Keriso si no tobali satua, tatu öbalo-baloi ginötö na tebayagö idanö ndraonomö.​—Fatimbaisi 3 Yohane 4.

2 Hiza’i, te so khömö wa’aombö dödö. Te no ö’ila so ösa ndra si bohou si no mubayagö idanö, hiza’i ba gafuriata aombö dödöra hadia no si sökhi khöra na la’aurifagö goi-goi Lowalangi. So ösa zi no mondröi sindruhu. Andrö wa tola manö aombö dödömö na so ndraonomö samörögö mamosumange Yehowa hiza’i ba gafuriatania taya wa’omasira ba zindruhu. Tola manö tobali ira simane niha Keriso siföföna ba  Efeso. Imane khöra Yesu, ”No öböhöli wa’omasiu ba mböröta andrö.” (Fama’ele’ö 2:4) Hewisa wanolomö ndraonomö ena’ö lö mamalö aro wa’omasinia ba ’tedou ia ba wangorifi’? (1 Fetero 2:2) Datafaha’ö ita ba duma-duma Dimoteo.

”NO Ö’ILA ZURA NI’AMONI’Ö ANDRÖ”

3. (a) Hewisa wa tola tobali niha Keriso Timoteo, ba hadia nifaluania ba zi no ifaha’ö ia? (b) Hadia zi tölu ngawalö nitandrösaigö Waulo khö Dimoteo?

3 Si oföna sibai möi zinenge sotöi Faulo ba Lisitera me döfi 47 M. Te ba ginötö da’ö göi ifaha’ö ia Timoteo, si bohou ebua sanandrösa ba wamaha’ö Yesu. Ifalua hadia zi no ifaha’ö ia, ba dua fakhe aefa da’ö ibörötaigö fao ia khö Waulo. Te ba zi 16 fakhe aefa da’ö ibe’e zura Faulo khö Dimoteo, ”Ba böi böhöli zi no örongo, awö zi no faduhu dödöu; me no ö’ila, ha khö örongo ia, awö wa no ö’ila zura ni’amoni’ö andrö [Mbuku Ni’amoni’ö Heberai’o], i’otarai iraono ndra’ugö, sangila mangatua-tua’ö ya’ugö, ba wangalui fangorifi ba mbanua furi andrö, soroi ba wamati andrö, khö Keriso Yesu.” (2 Timoteo 3:14, 15) Nehegö hadia niwa’ö Waulo khö Timoteo (1) i’ila zura ni’amoni’ö, (2) faduhu dödönia me no i’ila hadia zi no ifaha’ö ia, ba (3) atua-tua ba te’orifi me mamati khö Yesu Keriso.

Tola göi lafaha’ö ira iraono side-ide sanandrösa ba niha hegöi salua ba Zura Ni’amoni’ö

4. Hadia zi no irai ö’oguna’ö ba wamaha’ö iraonomö side-ide? (Faigi gambara ba wamobörö wamaha’ö.)

4 Na ya’ugö niha Keriso si no tobali satua, tatu omasi’ö na aboto ba dödö ndraonomö zura ni’amoni’ö, iada’a no mufarahugö ira Mbuku Ni’amoni’ö Heberai’o hegöi Mbuku Ni’amoni’ö Yunani Niha Keriso. Tola göi lafaha’ö ira iraono side-ide sanandrösa ba niha hegöi salua ba Zura Ni’amoni’ö. Oya mbuku, brosur hegöi video si no ihenaigö organisasi Yehowa, si tola la’oguna’ö ira satua ba wanolo iraonora. Hadia manö zi no tehenaigö ba li ni’oguna’ömö? Moguna aboto ba dödö ndraonomö hadia nösi Zura Ni’amoni’ö ena’ö tola la’okhögö wahuwusa saro khö Yehowa.

’FADUHU DÖDÖU ME NO Ö’ILA’

5. (a) Hadia geluahania ’faduhu dödö me no ö’ila’? (b) Hezo tola ta’ila wa faduhu dödö Timoteo sanandrösa khö Yesu me no i’ila?

5 Tenga ha asala öfaha’ö ndraonomö sanandrösa ba niha hegöi salua ba Zura Ni’amoni’ö. Törö tödömö wa Timoteo tola ’faduhu dödönia me no i’ila’. Ba li Yunani, eluaha ngawua wehede ni’oguna’ö Waulo andre ya’ia da’ö ”faduhu dödö” mazui ”aro dödö wa sindruhu da’ö”. No aboto ba dödö Timoteo Mbuku Ni’amoni’ö Heberai’o ’i’otarai me iraono ia’. Ba gafuriata, sindruhu-ndruhu faduhu dödönia wa Yesu andrö Mesia. Itugu aro wamatinia irege tebayagö ia idanö ba fao ia khö Waulo tobali utusan injil.

6. Hadia zi tola öfalua ba wanolo iraonomö ena’ö mamati ira ba Daromali Lowalangi?

6 Hewisa wanolomö iraonomö ena’ö la’okhögö wamati simane Timoteo irege tola ’faduhu dödöra me no la’ila’? Si oföna, moguna so khömö wa’ebolo dödö.  Moguna ginötö ba wangokhögö famati saro. Hewa’ae faduhu dödömö ba zi sambua ngawalö, tenga da’ö geluahania wa hasambalö göi faduhu dödö ndraonomö ba da’ö. Ero samösa iraono, moguna la’oguna’ö ’dödöra’ ena’ö mamati ira ba Zura Ni’amoni’ö. (Baso Roma 12:1.) Oya zi tola öfalua ba wanolo iraonomö ena’ö itugu aro wamatira, mendrua manö na asese so wanofura. Datafaigi hadia wamaha’ö si tola tahalö moroi ba duma-duma zi samösa ama.

7, 8. (a) Hewisa wangoroma’ö zi samösa ama wa’ebolo dödö ba ginötö ifaha’ö nononia? (b) Hawa’ara moguna so khömö wa’ebolo dödö ba ndraonomö?

7 So nono Thomas ono alawe 11 fakhe ndröfinia, itaria ilau manofu imane, ”Hadia no i’oguna’ö evolusi Yehowa ba womböwöi fa’auri ba gulidanö andre?” mazui ”Hana wa lö fao ita ba wanolo nono mbanua, duma-dumania fao ita ba pemilu ena’ö itugu sökhi zalua?” Itaria, moguna itaha dödönia Thomas ba wamatunö khö nononia hadia zinangea ifaduhusi tödö. I’ila wa tola faduhu dödö zi samösa niha ba zindruhu tenga ha me no tafatunö khönia hadia zatulö. Hiza’i, moguna tabe’e khönia dandra si tola mamaduhu’ö tödönia.

8 I’ila Thomas wa moguna so khönia wa’ebolo dödö ba wamaha’ö ononia. Sindruhunia, fefu niha Keriso moguna so khöra wa’ebolo dödö. (Kolose 3:12) Aboto göi ba dödönia wa moguna ginötö ba asese fahuhuo ia khö nononia ena’ö i’okhögö wamati saro. Moguna göi itolo nononia ena’ö i’angerönusi hadia zi no ifaha’ö ia ba Zura Ni’amoni’ö. Imane Thomas, ”Sabölö tohudenia, ya’odo hegöi fo’omogu moguna ma’ila hadia sindruhu faduhu dödö nonoma ba zi no ifaha’ö ia ba ena’ö ikhamö fangera-ngerania da’ö. Omuso dödöma na so wanofunia. Sindruhunia, so khögu wa’aombö dödö na lö manofu ia.”

Moguna so khömö wa’ebolo dödö ba wanolo iraonomö ena’ö mamati ira ba Daromali Lowalangi

9. Hewisa wanolomö iraonomö ena’ö faduhu dödöra ba Daromali Lowalangi?

9 Na so wa’ebolo dödö khö zatua ba wamaha’ö iraonora, ba gafuriatania dania tola ibörögö aboto ba dödö ndraonora ”wa’ebolo, fa’anau, fa’alawa, hegöi fa’abakha” zindruhu ba Zura Ni’amoni’ö. (Efeso 3:18) Moguna göi tafaudugö wamaha’ö nibe’eda molo’ö ndröfira hegöi si tola aboto ba dödöra. Na itugu aro wamatira ba zi no lafaha’ö ira, tola aoha khöra wanutunö hadia nifaduhusira tödö föna niha sato, simane khö ndra awöra ba zekola. (1 Fetero 3:15) Duma-dumania, hadia tola latutunö iraonomö hadia zalua ba niha si no mate molo’ö Sura Ni’amoni’ö? Hadia ikhamö fangera-ngerara hadia nitutunö Zura Ni’amoni’ö sanandrösa ba da’ö? * (Faigi nisura ba gahe zura.) Törö tödömö wa moguna so khömö wa’ebolo dödö ba wanolo iraonomö ena’ö  mamati ira ba Daromali Lowalangi. Ba hasambalö so mbuania.​—5 Moze 6:6, 7.

Duma-duma nibe’emö moguna sibai da’ö ba wanolo iraonomö ena’ö tedou wamatira

10. Hadia zabölö tohude si tola möi fanolo ba wamaha’ö iraonomö?

10 Tatu manö, duma-duma nibe’emö moguna sibai da’ö ba wanolo iraonomö ena’ö tedou wamatira. So tölu nono Stephanie ono alawe. Imane, ”I’otarai me ide-ide ndraonogu, tumbu ba dödögu wanofu, ’Hadia ufatunö khö ndraonogu hana wa faduhu dödögu wa so Yehowa, i’omasi’ö ita ba hasambalö atulö goi-goinia? Hadia la’ila iraonogu wa sindruhu-ndruhu u’omasi’ö Yehowa?’ Na so khögu wa’aombö dödö sanandrösa ba da’ö, tebai utötöna ena’ö faduhu dödö ndraonogu.”

’ATUA-TUA BA TE’ORIFI’

11, 12. Hadia wa’atua-tua andrö, ba hewisa wa tola ta’ila wa tenga molo’ö ndröfi wa tola ta’okhögö ia?

11 No tafaha’ö ita wa i’okhögö Timoteo (1) wa’aboto ba dödö sanandrösa ba Zura Ni’amoni’ö (2) aro dödönia ba nifaduhusinia tödö. Hiza’i, hadia geluaha wehede Waulo me iwa’ö wa tola möi fanolo Timoteo zura ni’amoni’ö ena’ö ’atua-tua ba te’orifi’?

12 Itutunö Pemahaman Alkitab, Jilid 1, ba Zura Ni’amoni’ö fa’atua-tua eluahania ”fa’abölö ba wangoguna’ö fa’onekhe hegöi fa’aboto ba dödö ena’ö mofozu ba wangasiwaisi gabula dödö, ba wanimbagö de’ala, ba wogamö ngawalö gohitö dödö mazui ba wame’e mene-mene ba niha ba wamalua da’ö. No faehu wa’atua-tua andre . . .  moroi ba wa’abodo”. Imane Sura Ni’amoni’ö, ”Ba dödö nono matua, ba no faböbö wa’owöhö mowa.” (Gamaedola 22:15) Fa’atua-tua andre no sambua tandra wa no atua wangera-ngera zi samösa niha ba wamati. Tola atua wangera-ngera zi samösa niha ba wamati na omasi ia i’o’ö ba i’ata’ufi Yehowa. Tenga molo’ö ndröfi wa tola alua da’ö.​—Baso Zinunö 111:10.

13. Hewisa wangoroma’ö ndraono wa la’okhögö wa’atua-tua ba te’orifi?

13 Si bohou ebua si no atua fangera-ngera ba wamati lö ’tefaheu-heu ba tefangörö-ngörö ira’ börö gisö-isö dödöra mazui börö ndra si bohou ebua tanö bö’ö. (Efeso 4:14) Hiza’i, ’tefaha’ö wangera-ngerara ba wamaehusi si sökhi hegöi si lö sökhi’. (Heberai’o 5:14) Da’ö mbörö wa tola lahalö gangetula si sökhi hewa’ae lö hadöi satuara mazui niha si no alawa döfi tanö bö’ö. (Filifi 2:12) Moguna sibai wa’atua-tua simane da’ö ena’ö tola te’orifi ira. (Baso Gamaedola 24:14.) Hewisa wanolomö iraonomö ena’ö la’okhögö wa’atua-tua? Moguna la’ila samösa hadia zabölö tohude ba wa’aurimö. Tola la’ila wa öfaudugö wa’aurimö ba goi-goi Zura Ni’amoni’ö ba wehede hegöi ba nifaluamö.​—Roma 2:21-23.

Hana wa moguna sibai wamorege nifalua zatua? (Faigi ngenoli si-14-18)

14, 15. (a) Hadia zinangea i’angeraigö si samösa si bohou ebua somasi tebayagö idanö? (b) Hewisa wanolomö iraonomö ena’ö i’angerönusi howu-howu nitemania na i’o’ö huku Lowalangi?

14 Hiza’i, ena’ö tola tedou wamati  ndraonomö, tenga ha asala öfatunö khöra hadia zi sala ba hadia zatulö. Moguna ötolo ndraonomö ena’ö la’angeraigö wanofu-nofu simane, ’Hadia dani wa lö itehegö Sura Ni’amoni’ö tafalua gofu hadia zomasi dödöda? Hana wa faduhu dödögu wa hasambalö si sökhi khögu goi-goi Zura Ni’amoni’ö?’​—Yesaya 48:17, 18.

15 Na so ndraonomö somasi tebayagö idanö, tolo ia ena’ö ihaogö i’angeraigö hadia noro dödö ni’okhögönia na no tebayagö idanö. Hewisa dödönia ba da’ö? Hadia manö gunania khönia? Hadia manö daha-tahania? Hana wa abölö oya mbua nitemania moroi ba daha-taha nitaögönia? (Mareko 10:29, 30) Moguna ihaogö i’angeraigö da’ö fatua lö tebayagö ia idanö. Tolo ia ena’ö i’angerönusi howu-howu nitemania na molo’ö ia ba hadia lua-luania na lö molo’ö göi ia. Buania, tola itugu faduhu dödönia wa lö mamalö itema mbua si sökhi na i’o’ö goi-goi Zura Ni’amoni’ö.​—5 Moze 30:19, 20.

NA IBÖRÖGÖ SO WA’AOMBÖ DÖDÖ KHÖ ZI BOHOU EBUA SI NO TEBAYAGÖ IDANÖ

16. Hadia zinangea ifalua satua na ibörötaigö awuwu wamati ndraonora?

16 Hadia zi tola öfalua na ibörötaigö aombö dödö ndraonomö sanandrösa ba  zindruhu me no aefa tebayagö ia idanö? Duma-dumania, te ibörötaigö adöni dödönia ba ngawalö zi so ba gulidanö iada’a. Mazui ibörötaigö aombö dödönia, hadia sindruhu-ndruhu no lala sökhi ba wa’aurinia na i’o’ö goi-goi Zura Ni’amoni’ö. (Zinunö 73:1-3, 12, 13) Hadia nifaluamö tola molua-lua ia ba ndraonomö, hadia iböhöli mazui lö mamalö ifosumange Yehowa. Böi fada’awa ndra’ugö khönia sanandrösa ba da’ö, hewa’ae na iraono ia nasa mazui no ebua-bua. Hiza’i, tolo ia ena’ö i’ila wa ö’omasi’ö ia hegöi omasi’ö ötolo ia.

17, 18. Na so zi bohou ebua saombö tödö, hadia zi tola lafalua ira satua ba wanolo ya’ia?

17 Si bohou ebua si no tebayagö idanö, no ilulu wa’aurinia khö Yehowa. Ifabu’u wa i’omasi’ö ba i’ofönai’ö wamosumange Yehowa moroi ba danö bö’ö. (Baso Mareko 12:30.) Tenga si famai-mai mbu’usa li ba wolulu fa’auri ba wamaigi Yehowa, moguna simanö göi ita. (Zangombakha 5:4, 5) Fasugi ba dödö ndraonomö da’ö. Hiza’i si oföna, baso ba faha’ö ndra’ugö ba ngawalö hadia ia zi no ihenaigö organisasi Yehowa khö zatua. Aefa da’ö, si fao fehede si sökhi hegöi ba ginötö si tefaudu, fatunö khönia wa tenga si famai-mai gangetula nihalönia ba wamayagö idanö hegöi ba wolulu fa’aurinia khö Yehowa, hiza’i hasambalö oya howu-howu nitemania.

18 Oya mene-mene si tefaudu khö zatua. Duma-dumania, ba mbuku Pertanyaan Kaum Muda—Jawaban yang Praktis, Jilid 1 ba apendiks ”Pertanyaan Orang Tua” iwa’ö ba da’ö, böi alio-lio so ba wangera-ngera zatua wa no itimbagö zindruhu ononia. Hiza’i, moguna la’ila hadia gabula dödönia. Tola manö la’ailasi ia ira awönia ba zekola mazui irasoi wa lö awö-awö. Te irasoi wa alio tedou ba wamati zi bohou ebua tanö bö’ö moroi khönia. Itutunö göi apendiks da’ö wa lö hadöi gamakhaitania fefu da’ö ba nifaduhusimö tödö. Sindruhunia, da’ö ngawalö wanandraigö nitaögöra same’e abua khöra ba wangoroma’ö famati. So göi mene-mene si sökhi khö zatua hewisa wanolora iraonora saombö tödö ba zindruhu.

19. Hewisa wanolo zatua ndraonora ena’ö ’atua-tua ba te’orifi’?

19 Ya’ami satua, mi’okhögö noro dödö si sökhi hegöi si tohude ba wangebua’ö iraonomi si tefaudu ba ’wotu, ba mifarou dödöra, khö Yehowa’. (Efeso 6:4) Simane si no tatutunö, eluahania da’ö moguna öfaha’ö ndraonomö ba Zura Ni’amoni’ö ba ötolo ira ena’ö faduhu dödöra ba zi no lafaha’ö ira. Na itugu aro wamatira, tola tefarou dödöra ba wolulu fa’auri khö Yehowa hegöi ba wame’e zabölö sökhi khönia. Tadöna-döna ena’ö Daromali Yehowa, ehehania ni’amoni’ö hegöi fanolo nibe’emi tola möi fanolora ena’ö ’atua-tua ba te’orifi’.

^ par. 9 Panduan belajar buku ”Apa yang Sebenarnya Alkitab Ajarkan?” moguna sibai da’ö ba wanolo iraono hegöi niha si no alawa ndröfi ena’ö aboto ba dödöra ba la’ila latutunö zindruhu ba Zura Ni’amoni’ö. Tola öfaigi da’ö ba jw.org ba ngawalö li. Faigi ba AJARAN ALKITAB > BANTUAN UNTUK BELAJAR ALKITAB.