Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Manuriaigö—Edisi Wamaha’ö  |  Baŵa si Felendrua 2016

Be’e Balazi Yehowa Fefu Zabu Dödöu

Be’e Balazi Yehowa Fefu Zabu Dödöu

”Mibe’e balazi ia, na so zabu dödömi, gofu hadia ia, so so sa dödönia ami.”​—I FETERO 5:7.

SINUNÖ: 38, 23

1, 2. (a) Hana wa so khöda wa’aombö-aombö dödö? (Faigi gambara ba wamobörö wamaha’ö.) (b) Hadia nidunö-dunöda ba wamaha’ö andre?

IADA’A, Satana ”itörö sa danö, hulö zingo sindröndrö-ndröndrö, i’alu-alui, haniha ni’ania”. (I Fetero 5:8; Fama’ele’ö 12:17) Lua-luania, ato zi no fawuka wangera-ngera ba so khöra wa’aombö-aombö dödö. Ono mbanua Lowalangi me götö föna hegöi iada’a larasoi göi zimane da’ö. Duma-dumania, imane Sura Ni’amoni’ö wa itaria so wa’aombö-aombö dödö khö Razo Dawido. (Zinunö 13:3) Imane göi Faulo wa ’i’abusi tödö mbanua misa, fefu’. (II Korindro 11:28) Hiza’i, hadia zi tola tafalua ba ginötö tebai sa’ae tataögö zalua andrö?

2 Amada si so ba zorugo safönu fa’omasi, itolo nono mbanuania me föna ena’ö lö khöra fa’aombö-aombö dödö sa’ae, ba omasi göi ia ifalua simane da’ö khöda iada’a. Ifarou dödöda Sura Ni’amoni’ö, ”Mibe’e balazi ia, na so zabu  dödömi, gofu hadia ia, so so sa dödönia ami.” (I Fetero 5:7) Hiza’i, hewisa wamaluada da’a? Datatutunö öfa ngawalö lala. Tola ölau (1) mangandrö, (2) öbaso ba ö’angerönusi Daromali Lowalangi, (3) tehegö itolo ndra’ugö eheha ni’amoni’ö si’otarai khö Yehowa, ba (4) fatunö ba niha nifaduhusimö tödö hadia manö nirasoimö. Ba ginötö tadunö-dunö zi öfa ngawalö lala andre, tandraigö angeraigö hadia manö zinangea öbulö’ö.

”BE’E NORO YEHOWA NOROU ANDRÖ”

3. Hewisa wa tola ’öbe’e noro Yehowa noro dödömö’?

3 Fangandrö soroi ba dödö no lala si oföna ba wotou’ö föna Yehowa fefu zabu dödöda. Ba ginötö tataögö gabula dödö, Amada safönu fa’omasi si so ba zorugo, omasi ia na tatutunö khönia fefu hadia nirasoida. Sanura zinunö sotöi Dawido, ilau mangandrö khö Yehowa, ”Be’e mbörö dalingau, ya’ugö Lowalangi, ba wangandrögu andre.” Ba ayati tanö bö’ö, imane nasa Dawido, ”Be’e noro Yehowa norou andrö, ba i’orifi’ö.” (Zinunö 55:2, 23) Na no öforege ba wanaögö abula dödö salua khömö, abölö sökhi na ötutunö khö Yehowa ba wangandrö hadia manö nirasoimö, moroi na lö aetu ö’abusi tödö zalua khömö. Hiza’i, hewisa wa möi fanoloda wangandrö ena’ö böi talafo ta’abusi tödö zalua khöda?​—Zinunö 94:18, 19.

4. Ba ginötö abu dödöda, hana wa moguna sibai wangandrö?

4 Baso Filifi 4:6, 7. Hewisa wame’e Yehowa fanema li ba wangandröda soroi ba dödö hegöi si lö mamalö-malö? Tola itolo ita ena’ö tarasoi wa’ahono dödö ba tatimbagö wangera-ngera hegöi tödö si fasala. Andrö lö moguna ata’u ba aombö dödöda, itolo ita Lowalangi ba wangokhögö fa’ohahau dödö sindruhu si lö irai tarasoi. Ato ndra talifusöda si no irai morasoi da’ö. Ba tola göi örasoi zimane da’ö. ”Fa’ohahau dödö andrö, khö Lowalangi” zanolo ya’ugö ba wanaögö gofu hadia ia gabula dödö! Tola öfaduhusi tödö hadia zi no ifabu’u Yehowa, ”Böi tokea’ö, Lowalangiu sa ndra’odo; u’abe’e’ö ndra’ugö ba utolo’ö.”​—Yesaya 41:10.

FA’OHAHAU DÖDÖ MOROI BA DAROMALI LOWALANGI

5. Hewisa wanolo Daromali Lowalangi ndra’ugö ba wanöndra fa’ohahau dödö?

5 Lala si dua ena’ö tasöndra wa’ohahau dödö ya’ia da’ö na tabaso ba ta’angerönusi ayati Zura Ni’amoni’ö. Hana wa moguna sibai da’a? Börö me Sura Ni’amoni’ö no Taromali Lowalangi. Ba oya wa’aboto ba dödö hegöi mene-mene si sökhi moroi khö Zomböi ya’ita. Ba ginötö abu dödömö, tola öhaogö ö’angeraigö hewisa wangera-ngera Lowalangi ba angerönusi hewisa ena’ö tola ö’oguna’ö mene-menenia andrö ba wanga’aro’ö ya’ugö. Da’a zanolo ya’ugö ba wanaögö, wangalösi, hegöi ba wangeheta abula dödö andrö. Iwa’ö Yehowa ba niha sombaso Taromalinia wa ’te’abölö’ö ba te’abe’e’ö’ ira’,  ba ’lö ata’u hegöi mangiwa dödöra’.​—Yosua 1:7-9.

Famati saro khö Yehowa zanolo ya’ita ena’ö faduhu dödöda wa si fao fa’omasi ibönökhi fefu zoguna khöda

6. Hewisa wa tola möi fanolomö wehede Yesu?

6 Ba Daromali Lowalangi, tabaso hewisa me fahuhuo Yesu ba niha. Omasi sibai ira wamondro-ndrongo hadia nifa’emania börö me fehedenia möi fondrara dödö ba fangokafu dödö, mendrua manö ba niha si tebai, ba si no atata era-era. (Baso Matai’o 11:28-30.) Sindruhu-ndruhu wa i’ame’egö tödö hadia nirasoi niha bö’ö Yesu. (Mareko 6:30-32) No ifabu’u Yesu wa hasambalö itolo ndra nifaha’ö si fao khönia, ba itolo göi ita iada’a. Tenga dali falukha ita khö Yesu awena tola itolo ita. Si tobali Razo ba zorugo, lö mamalö-malö iforoma’ö Yesu wa i’omasi’ö ita. Andrö, ba ginötö so khöda wa’aombö-aombö dödö, tola faduhu dödöda wa hasambalö itolo ita ba ginötö si tefaudu. Ibe’e khöda dötönafö hegöi famarou dödö Yesu, sanolo ya’ita ba wanaögö abula dödö.​—Heberai’o 2:17, 18; 4:16.

BUA-BUA NI’OKHÖGÖ BÖRÖ GEHEHA LOWALANGI

7. Hewisa wa tola tasöndra mbua moroi ba geheha ni’amoni’ö si’otarai khö Lowalangi?

7 No ifabu’u Yesu wa ibe’e khöda gehehania Amada ba ginötö ta’andrö khönia. (Luka 11:10-13) Hewisa lala si tölu andre möi fanoloda ba wanga’alösi fa’aombö-aombö dödö? Eheha ni’amoni’ö, mazui fa’abölö moroi khö Lowalangi, da’ö zi tola manolo ya’ita ba wondrou’ö mbua-bua si sökhi simane ni’okhögö Lowalangi. (Kolose 3:10) Ba Zura Ni’amoni’ö, bua-bua simane da’a lafotöi ia ”bua-bua geheha”. (Baso Galatia 5:22, 23.) Tola itugu sökhi wahuwusada ba niha bö’ö na ta’okhögö mbua-bua si sökhi andre, ba tola tatimbagö ngawalö zalua si tola mame’e fa’aombö-aombö dödö. Datatutunö hewisa mbua-bua geheha andre ba wanolonia ya’ita.

8-12. Hewisa mbua-bua geheha Lowalangi tola manolo ndra’ugö?

8 ’Fa’omasi, fa’omuso dödö, fa’ohahau dödö.’ Tola alö wa’aombö-aombö dödömö na öfosumange niha bö’ö. Hewisa wa tola? Ba ginötö öforoma’ö wa’omasi, öhaogö-haogö wehedemö, ba na öfosumange ndra talifusöda, tola te’aröu’ö ndra’ugö moroi ba wa’afatö dödö, fönu, ba fa’afawuka wangera-ngera. Tola atulö ndra’ugö ba niha bö’ö.​—Roma 12:10.

Tola itugu sökhi wahuwusada ba niha bö’ö na ta’okhögö mbua-bua si sökhi andre

9 ”Fa’ebolo dödö, fa’asökhi dödö, fa’ebua dödö.” Imane Sura Ni’amoni’ö, ”Faoma mihaogö-haogö khö nawömi, faoma mihakhösi tödö, faoma mibe’e aefa zala nawömi.” (Efeso 4:32) Ba ginötö ta’o’ö mene-mene da’a, tola sökhi wahuwusada ba niha bö’ö, ba tola aheta ita moroi ba ngawalö hadia ia zame’e fa’aombö-aombö dödö. Tola göi aoha khöda ba wanaögö abula dödö salua börö walömo’ahonoada.

10 Famati. Iada’a, asese aombö dödöda sanandrösa ba gefe hegöi harato. (Gamaedola 18:11) Hewisa ena’ö tola tatimbagö wa’aombö-aombö dödö ba da’ö? Moguna ta’o’ö mene-mene nibe’e zinenge sotöi  Faulo, ”Ya’abönö khömi zi ho so.” Famati saro khö Yehowa zanolo ya’ita ena’ö faduhu dödöda wa si fao fa’omasi ibönökhi fefu zoguna khöda. No ifabu’u khöda, ”Lö’ö manö faröido khöu, ba lö’ö manö u’ositengagö ndra’ugö.” Da’ö mbörö wa imane Faulo, ”Soaya [Yehowa] zanolo ya’o, lö ata’u ndra’o. Hadia nilau niha khögu?”​—Heberai’o 13:5, 6.

11 ”Falömofönu, ba famoni.” Angeraigö hewisa wa’amoguna ba möi fanolo khöu na ö’okhögö mbua-bua da’a. Bua-bua da’a göi zi tola manegu ya’ugö ba wamalua mazui ba wanguma’ö ngawalö hadia ia zi tola mame’e khöu fa’aombö-aombö dödö. Tola göi ötema mbua na ötimbagö ’ngawalö watötöisa, ba fa’abao dödö, ba fönu ba fagua-guasa, ba fanandrawa’.​—Efeso 4:31.

12 Moguna khöda wangide-ngide’ö ena’ö tola faduhu dödöda ba ”danga Lowalangi andrö, sabölö” ba ena’ö ’tabe’e balazi ia na so zabu dödöda’. (I Fetero 5:6, 7) Na so khöu wangide-ngide’ö, itolo ba irorogö ndra’ugö Yehowa. Na aboto ba dödömö hadia zi tola ba si tebai öfalua, ba da’ö ö’ila wa tebai ö’odaligö ndra’ugö samösa. Tola alö wa’aombö-aombö dödömö börö me ö’odaligö Lowalangi.​—Mikha 6:8.

”BÖI MI’ABUSI TÖDÖ”

13. Hadia geluaha wehede Yesu me iwa’ö, ”Böi mi’abusi tödö”?

13 Ba Matai’o 6:34 (baso), so mene-mene si sökhi nibe’e Yesu, ”Böi mi’abusi tödö.” Lö aoha ba wamalua mene-mene si sökhi andrö. Hiza’i, hadia geluaha niwa’ö Yesu? No tafaha’ö ita wa itaria so wa’aombö-aombö dödö khö Dawido hegöi Faulo. Tenga da’ö geluaha wehede Yesu wa lö irai so wa’aombö-aombö dödö ba niha samosumange Lowalangi. Hiza’i, itolo ndra nifaha’önia Yesu ena’ö aboto ba dödöra wa lö möi fangasiwai gabula dödö na labusi sibai dödöra mazui na lö hadöi zi tobali mbörö wa’abu dödöra. Oya gabula dödö nitaögöda ero ma’ökhö, andrö wa lö moguna sa’ae lanönö gabula dödöra ira niha Keriso ba wo’angera-ngeraigö gabula dödö si no irai alua mazui si lö alua nasa. Hewisa mene-mene Yesu möi fanolou ena’ö böi talafo aombö-aombö sibai dödömö?

14. Simane Dawido, hewisa ena’ö böi talafo aombö dödöda?

14 Itaria, so zaombö-aombö tödö börö zala si no irai ifalua me mböröta. Itahi-tahigö manö ia tödönia, hewa’ae na no arara ifalua zala andrö. Itaria abu sibai dödö  Razo Dawido börö zala nifaluania. Imane, ”Mangarö-ngarö ndra’o, ebua ligu.” (Zinunö 38:4, 5, 9, 19) Ba zalua andre, ihalö gangetula si fao fa’atua-tua Dawido. Fahudu dödönia wa fahöna wa’ahakhö dödö khö Yehowa ba i’efa’ö zala niha. Ba omuso dödö Dawido me i’ila wa i’efa’ö zalania Yehowa.​—Baso Zinunö 32:1-3, 5.

15. (a) Hadia nasa wamaha’ö si tola tahalö khö Dawido? (b) Hadia zi tola öfalua ba wanga’alösi fa’aombö-aombö dödö? (Faigi kotak ” Lala ba Wanga’alösi Fa’aombö-aombö Dödö”.)

15 Te aombö dödömö ba zalua khömö iada’a. Duma-dumania, ba ginötö isura Dawido Zinunö 55, ata’u sibai ia börö me so zomasi mamunu ya’ia. (Zinunö 55:3-6) Hewa’ae simanö, lö itehegö awuwu wamatinia khö Yehowa ha börö wa’aombö-aombö dödönia. I’andrö wanolo moroi khö Yehowa, hiza’i i’ila wa moguna göi so zinangea ifalua. (II Zamueli 15:30-34) Tola öhalö wamaha’ö moroi ba zalua khö Dawido. Moroi na talafo ö’abusi tödö zalua khömö, moguna öforege ba wangasiwai gabula dödö andrö, ba döna-döna wa hasambalö irorogö ndra’ugö Yehowa.

16. Hewisa wa möi fangaro wamatiu geluaha döi Lowalangi?

16 Itaria so niha Keriso, aombö dödöra ba gabula dödö salua miföna. Hiza’i, lö moguna öbusi tödö zi lö alua nasa. Hadia mbörö? Börö me sasesenia, salua andrö tenga simane nikhalaigöda. Moguna göi tatörö tödöda wa lö hadöi zalua si tebai ifatörö Lowalangi. Eluaha döinia ya’ia da’ö ”Ya’ia Mbörö Wa Alua”. (II Moze 3:14, NW) Andrö, lö moguna aombö dödöda ba zalua miföna, börö töi Lowalangi zangoroma’ö wa fefu gohitö dödönia ba niha gulidanö hasambalö alua. Tola faduhu dödöda wa hasambalö ifahowu’ö niha si lö faröi khönia Lowalangi ba itolo ira ba wanga’alösi fa’aombö-aombö dödöra sanandrösa me mböröta, iada’a, hegöi ba zi so miföna.

FATUNÖ BA NIHA NIFADUHUSIMÖ TÖDÖ

17, 18. Hadia lala si öfa si tola tafalua ba wanga’alösi fa’aombö-aombö dödö, ba hana wa moguna da’ö?

17 Lala si öfa si tola manolo ya’ugö ba ginötö örasoi wa’aombö-aombö dödö, ya’ia da’ö na ötutunö ba niha nifaduhusimö tödö hadia manö nirasoimö. Awöu ba wa’auri, si fahuwu khömö, mazui ira satua sokubaloi ba mbanua niha Keriso, tola latolo ndra’ugö ena’ö ö’okhögö wangera-ngera satulö sanandrösa ba zalua khömö. Imane Sura Ni’amoni’ö,  ”Fa’abu dödö niha, ba ihöndrögö tou dödö; ba fondrara dödö daromali nihaogö.” (Gamaedola 12:25) Imane nasa Sura Ni’amoni’ö, ”Na lö famagölö, ba tobali lö boto niwa’ö; ba na ato zi so ba huhuo, ba mofozu.”​—Gamaedola 15:22.

18 Ba mbanua niha Keriso si so ya’ita, mufalua gangowuloa si tola manolo ya’ita ba wanga’alösi fa’aombö-aombö dödö. Ba gangowuloa ero migu, oya ginötöda khö ndra talifusöda so’ame’egö tödö ya’ita ba somasi mamarou tödöda. (Heberai’o 10:24, 25) ”Famarou tödö” simane da’ö, möi fanga’aro’öu ba si tobali fanolo khöu ba wanaögö ngawalö fa’aombö-aombö dödö.​—Roma 1:12.

FAHUWUSAMÖ KHÖ LOWALANGI ZANGA’ARO’Ö YA’UGÖ

19. Hana wa faduhu dödömö wa fahuwusamö khö Yehowa tola möi fanga’aro’ömö?

19 Irasoi samösa satua sokubaloi ba Kanada wa moguna sibai tatou’ö khö Yehowa na so zabu dödöda. Halöwönia ya’ia da’ö guru ba zekola. Tobali, da’ö zame’e fawuka wangera-ngerania. Mofökhö göi ia. Fökhönia ya’ia da’ö alio sibai so khönia wa’aombö dödö. Hadia zanolo ya’ia ena’ö so khönia wa’abölö? Si oföna sibai, iforege ba wanga’aro’ö wahuwusania khö Yehowa. Ira si fahuwu khönia göi, latolo ia sagötö itaögö zalua andrö. Ba ifatunö fefu khö wo’omonia hadia nirasoinia. Baero da’ö, latolo ia göi ira satua sokubaloi hegöi satua samasui ena’ö simane famaigi Yehowa wamaiginia salua khönia andrö. Aefa da’ö, i’andrö göi wanolo moroi khö doto ba itatugöi ginötönia wolombase hegöi fa-olahraga. Ba gafuriatania, i’ila hewisa lala ba wanaögö zalua khönia hegöi nirasoinia. Na so zi tebai itaögö, i’andrö wanolo moroi khö Yehowa.

20. (a) Hewisa wa tola tatou’ö khö Yehowa fefu zabu dödöda? (b) Hadia nidunö-dunöda ba wamaha’ö ba migu fönada?

20 Ba wamaha’ö andre, tafaha’ö ita wa moguna tatou’ö khö Lowalangi fefu zabu dödöda, ba tola tafalua ia na talau mangandrö khö Yehowa, tabaso ba ta’angerönusi Daromalinia. Tafaha’ö ita göi wa moguna tatehegö itolo ita eheha ni’amoni’ö moroi khö Yehowa, tafatunö ba niha nifaduhusida tödö hadia nirasoida, ba möita ba gangowuloa niha Keriso. Ba wamaha’ö migu fönada, tafaha’ö ita hewisa wa tola möi fanoloda buala si no ifabu’u Yehowa.​—Heberai’o 11:6.