Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Manuriaigö—Edisi Wamaha’ö  |  Baŵa si Dua 2016

 WAÖ-WAÖ WA’AURI

Ifahowu’ö Ndra’o Yehowa ba Wangai Halöwönia

Ifahowu’ö Ndra’o Yehowa ba Wangai Halöwönia

Ufatunö khö zaradadu andrö wa no irai labe’edo ba gurunga börö me lö fao ndra’o fasuwö. Usofu khönia, ”Hadia öbe’edo ba gurunga nasa?” No dua kali la’o’ou ndra’o tobali saradadu Amerika Serikat.

TUMBU ndra’o me 1926 ba Crooksville, Ohio, Amerikat Serikat. Tenga niha samati sibai zatuagu. Hiza’i, lafarou ndra’aga si dawalu we’amöi ba Gosali Metodis. Ibe’e khögu mbuala fandrita me 14 fakhe ndröfigu börö me asese möido ba gosali ero Migu barö zi döfi.

Itolo ndra’o Margaret Walker (talifusö ira alawe numero dua moroi ba gabera) ena’ö aboto ba dödögu zindruhu

Me luo da’ö, so zi faola omo khöma Samaduhu’ö Yehowa. Töinia Margaret Walker. Fahuhuo ia khö mamagu sanandrösa ba Zura Ni’amoni’ö. Samuza inötö, omasido ufondro-ndrongo, hiza’i lö itehe khögu mamagu, iwalinga ufawukaisi wamaha’ö nifaluara. Börö da’ö wa ifofanö ndra’o. Hewa’ae simanö, ubini’ö ndra’o ba wamondro-ndrongo huhuora. Me no hauga kali möi Margaret, isofu khögu, ”Ö’ila haniha döi Lowalangi?” Utema linia, ”Fefu niha la’ila wa töinia Lowalangi.” Ifuli imane khögu, ”Halö Zura Ni’amoni’ömö ba baso Zinunö 83:19.” Ubaso ayati andrö ba awena u’ila wa da’ö döi Lowalangi, Yehowa. Fagohido, u’alui ndra awögu, ba ufatunö khöra, ”Na mangawuli ami dania tanö owi, mibaso Zinunö 83:19 ba mifaigi haniha döi Lowalangi.” Tola uwa’ö, no ibörögö manuriaigö ndra’o me luo da’ö.

 Ufaha’ö ndra’o ba Zura Ni’amoni’ö ba tebayagö ndra’o idanö me 1941. Aefa da’ö labe’e halöwögu ba wondrönia’ö pelajaran buku sidang. Ufarou mamagu hegöi ndra talifusögu we’amöi ba gangowuloa ba omasi ira la’ondrasi. Hiza’i, lö adöni dödö bapagu.

FANANDRAIGÖ MOROI KHÖ BAPAGU

Oya halöwö nibe’e khögu ba gangowuloa, ba oya mbuku ndra Samaduhu’ö Yehowa ni’owuloigu. Samuza inötö, ituturu mbukugu andrö Bapagu ba imane, ”No ö’ila fefu da’ö? Heta ia ba da’a ba ofanö moroi ba nomo andre.” Mofanödo ba toröi ndra’o ba Zanesville, Ohio sahatö ba mbanuagu. Hiza’i, asese mangawulido ba nomo ba wamarou tödö mamagu hegöi ndra talifusögu.

Lö omasi bapagu na möi mamagu ba gangowuloa. Itaria na no irugi dalu lala, igohi ia bapagu ba ifaso ena’ö mangawuli ba nomo. Hiza’i, itörö mbawa ndruhö tanö bö’ö mamagu irege möi ia ba gangowuloa. Umane khö mamagu, ”Böi ata’ufi, aföli ia sa dania ba ibato.” Ba gafuriatania, aföli bapagu sa’ae irege lö itaha mamagu we’amöi ba gangowuloa.

Me mubörögö Sekolah Famomaha ba Wanuriaigö me döfi 1943, ubörögö wama’ema huhuo ba sekola famomaha andrö ba gangowuloama. Mene-mene nibe’e khögu me no ufa’ema huhuo andrö, möi fanologu tobali sama’ema huhuo si sökhi.

LÖ FAODO BA WASUWÖTA

Me döfi 1944, me alua Perang Dunia II, lakaonido ena’ö fao ndra’o tobali saradadu. U’ondrasi Fort Hayes ba Columbus, Ohio, lafareso na mofökhödo na lö’ö, ba ufo’ösi ha’uga nga’örö garate. Ufatunö khöra wa lö omasi ndra’o tobali saradadu. Latehe khögu wangawuli. Hiza’i, hauga hari aefa da’ö, tohare zaradadu ba nomogu ba imane, ”He Corwin Robison, no u’ohe zura ba wondra’u ya’ugö.”

Dua migu aefa da’ö, imane khögu hakim ba pengadilan, ”Na ya’o zangetu’ö hukumau, tola manö tehuku ndra’ugö sandrohu fa’auriu. Hadia so zomasi’ö öfa’ema?” Umane, ”He Pa, sindruhunia ndra’odo si fao ba zanuriaigö Taromali Lowalangi. Ufa’ema huhuo sebua ba nomo-nomo misa ba uturiaigö duria somuso dödö sanandrösa ba Mbanua Lowalangi.” Imane hakim khö dewan juri, ”Tenga da’ö halöwömi andrö ba wotatugöi na sanuriaigö niha da’a na tenga. Halöwömi andrö ba wo’etu’ö hadia fasala ia andre börö me lö fao ia ba halöwö zaradadu.” Matonga za aefa da’ö, i’etu’ö dewan juri wa fasala ndra’o. I’etu’ö hukumagu hakim lima fakhe ba gurunga ba Ashland, Kentucky.

ILUMÖ’Ö NDRA’O YEHOWA BA GURUNGA

Dua migu lakuru ndra’o ba Columbus, Ohio. Me awena urugi gurunga, lö omasido mofanö-fanö. Mangandrödo khö Yehowa, ”Tebai u’agö da’a ba zi lima fakhe. Lö u’ila hadia zinangea ufalua.”

Mahemolunia, latehe khögu we’amöi baero sozago gurunga. U’ondrasi nawögu salawa niha si so ba gurunga sotöi Paul, ba faoma mafaigi baero moroi ba zandrela. Isofu khögu, ”He Bötö, hana wa so’ö ba da’a?” Umane khönia, ”Ya’odo andre Samaduhu’ö Yehowa.” Imane khögu, ”Aha, ba hana wa  tola so’ö ba da’a?” Umane khönia, ”Börö me lö fao ndra Samaduhu’ö Yehowa fasuwö hegöi ba wamunu niha.” Imane khögu, ”Labe’e ndra’ugö ba gurunga börö me lö öbunu niha. Lakuru niha bö’ö börö me no labunu niha. Hadia fao dödöu ba da’ö?” Umane khönia, ”Lö’ö.”

Aefa da’ö imane khögu, ”No irai lakuru ndra’o ba nahia tanö bö’ö 15 fakhe wa’ara. Ba da’ö no ubaso mbukumi.” Me urongo wehedenia andrö, mangandrödo khö Yehowa, ”He Yehowa ya’itolo ndra’o niha da’a.” I’anemai’ö muhede Paul khögu, ”Na so zi barani wogadu ya’ugö, o’ao manö khögu. Ya’o dania zolawa ya’ira.” I’otarai da’ö lö irai lagadudo, hewa’ae 50 wa’ato niha gurunga si so ba da’ö.

Ya’o hegöi ira Samaduhu’ö Yehowa tanö bö’ö nikuru börö me lö fao ndra’aga ba zamatörö ulidanö ba Ashland, Kentucky

Me lafindrakö ndra’o ba gurunga si so ba Ashland, ba da’ö falukha ndra’o ndra talifusöda si no aro ba wamati. Latolo ndra’o hegöi ndra talifusö tanö bö’ö ena’ö ahatöga khö Yehowa. Labe’e khöma halöwö ba wombaso Sura Ni’amoni’ö ero migu, ba mahenaigö wanofu hegöi fanema li ba gangowuloama si no mafotöi Bible Bees (Lebah Alkitab). Ebua naha gurunga si so ya’aga ba so warate si no mufaoli ba da’ö. So samösa dalifusöda sotatugöi hezo manuriaigö ndra’aga. Imane khögu, ”He Robison, ba farate da’a hegöi ba farate da’ö manuriaigö ndra’ugö. Gofu haniha zimorö ba da’ö, onorogö tödö khöra wanuriaigö fatua lö mofanö ira.” Simane da’ö wotatugöima halöwö fanuriaigö.

SALUA ME NO AEFA LAKURU NDRA’O

Tebato Perang Dunia II me döfi 1945, hiza’i lö manö saefa ndra’o moroi ba gurunga. So so dödögu khö ndra talifusögu hegöi khö mamagu börö me no irai iwa’ö bapagu khögu, ”Na ö’o’ö niwa’ögu, ba tanö bö’ö sa’ae la’o’ö ligu.” Me no aefa ndra’o ba gurunga, so duria somuso dödögu. Hewa’ae lö fao dödö bapagu khöma, hiza’i so dafitu moroi ba gotalua nösi nomoma sowölö-ölö we’amöi ba gangowuloa ba samösa nakhigu ono alawe si no mubayagö idanö.

Faodo manuriaigö khö Demetrius Papageorge, ya’ia andre talifusöda si no mubayoini si no mangai halöwö khö Yehowa i’otarai 1913

Me ibörögö Wasuwöta ba Korea me döfi 1950, no dua kali lakaonido tobali saradadu ba la’o’ou ndra’o ena’ö u’ondrasi Fort Hayes. Me no awai uzia ndra’o, imane khögu sohalöwö ba da’ö, ”Fotemö zabölö ebua moroi ba gotalua ndra awömö.” Umane khönia, ”Ya’ia ba? Hiza’i, lö omasido tobali saradadu.” Utötöi khönia nösi II Timoteo 2:3 ba umane, ”No tobalido saradadu Keriso.” Lö  hede-hedenia, ba aefa da’ö imane, ”Tola mofanö’ö.”

Lö ara aefa da’ö, fao ndra’o ba rafe sanandrösa ba Mbetieli ba gangowuloa sebua nifalua ba Cincinnati, Ohio. Ifatunö khöma Talidusöda Milton Henschel wa moguna ato ndra talifusöda sowölö-ölö ba wohalöwö ba Mbetieli ba wotuhini halöwö Mbanua Lowalangi. Ube’e zuragu ba Mbetieli ba latema ndra’o. Ubörögö wohalöwö ba Brooklyn i’otarai me baŵa si Walu 1954.

Oya halöwögu ba Mbetieli. Ba zi hauga fakhe fa’ara, ya’o zangehaogö ketel uap ba nahia wamazökhi mbuku hegöi gödo, mohalöwödo ba mesin ba ufazökhi göi mbua rate. Mohalöwö göi ndra’o ba Balai-Balai Kebaktian ba New York City.

Mangehaogö ketel uap ba gödo Mbetieli ba Brooklyn

Omasido sibai nifalua ba Mbetieli andrö simane, ibadat pagi, Famaha’ö mbuku Manuriaigö ni’oguna’ö ösi nomo Mbetieli. Omasido göi fao manuriaigö ba gangowuloa mbanua niha Keriso. Sindruhunia, da’a zinangea lö aetu-aetu lafalua ira Samaduhu’ö Yehowa ba zi sambu-sambua omo. Na labaso ayat harian, lafalua Mböngi Wamaha’ö ba Nomo, owölö-ölö we’amöi ba gangowuloa hegöi ba wanuriaigö, tola ahatö ira khö Yehowa.

Ato zi fahuwu khögu ba Mbetieli hegöi ba gangowuloa mbanua niha Keriso. So ösa zi no tebayoini ba so göi zi no möi ba zorugo. Tanö bö’önia göi lö mubayoini. Hiza’i, lö so’ahonoa fefu nono mbanua Yehowa, simanö göi nösi nomo Mbetieli. Na fada’awa ndra’o khö zi samösa talifusöda, u’odödögö ena’ö atulö ndra’aga. Itörö tödögu Matai’o 5:23, 24 ba hadia zinangea tafalua ena’ö tola atulö ita ba niha. Sindruhunia abua wangandrö fa’ebolo dödö ba niha. Hiza’i, da’a zi tobali fanolo khöda ena’ö atulö ita khöra.

BUANIA ME NO UHALÖ HALÖWÖ KHÖ LOWALANGI

Iada’a, me no alawa ndröfigu abua khögu we’amöi manuriaigö ba nomo-omo niha misa, hiza’i lö awuwu ndra’o. Ufaguru’ö ndra’o ba li Mandarin ba omasido manuriaigö ba niha Cina na u’ila ira ba lala. Itaria ube’e 30 mazui 40 mbuku ba niha somasi mombaso.

Preaching to the Chinese people in Brooklyn, New York

 So niha si no irai fahuhuo khögu ba Daromali, toröi ia ba Cina! Samuza ma’ökhö, ma’iki khögu samösa nono alawe sombagi-bagi garate iklan toko samawa bua. Ma’ikido khönia ba ube’e mbuku Manuriaigö ba Sadarlah! ba li Mandarin. Ihalö ba ifatunö khögu wa Katie döinia. Aefa da’ö, gofu hezo manö falukhaga fahuhuo ia khögu. Ufatunö khönia döi-töi mbua zinanö hegöi ngawalö sayu ba li Inggris, aefa da’ö ifuli itötöi. Ufatunö göi khönia ayati Zura Ni’amoni’ö ba ihalö mbuku Alkitab Ajarkan. Hiza’i, ha’uga migu aefa da’ö lö irai u’ila ia sa’ae.

Ha’uga waŵa aefa da’ö, ube’e mbuku khö nono alawe tanö bö’ö sombagi-bagi iklan, ba omasi ia ihalö. Samigu aefa da’ö, i’oro’ö khögu HP-nia ba imane, ”He Pa, ya’e telefo moroi ba Cina.” Umane khönia, ”Lö si fahuwu khögu ba Cina.” Ifaso ndra’o ba wangai HP-nia ba umane, ”Halo, ya’odo Robison.” Imane moroi ba telefo andrö, ”He Robby ya’odo Katie. No mangawulido ba Cina.” Umane khönia, ”Ba Cina?” Imane Katie, ”Ya’ia Robby, akhigu zame’e khöu HP da’ö. No öfaha’ö ndra’o ba zi sökhi. U’andrö khöu ena’ö öfaha’ö ia göi.” Umane khönia, ”He Katie, ufalua zi tola ufalua. Saohagölö me no öfatunö khögu hezo toröi ndra’ugö.” Lö ara aefa da’ö, fahuhuodo khö nakhi Katie. Hiza’i, lö irai falukhaga sa’ae. Gofu hezo toröi ndraono alawe si darua andre, utötöna ena’ö lafaha’ö ira sanandrösa khö Yehowa.

No 73 fakhe me no uhalö halöwö khö Yehowa, ba omuso sibai dödögu börö me no ibe’e khögu wanolo irege lö fa’awö ndra’o ba zamatörö ulidanö ba lö faröido sagötö me so ndra’o ba gurunga. Baero da’ö, lafatunö khögu ira talifusögu wa tola aro ira ba wamati börö me la’ila ndra’o lö irai ata’u hewa’ae so wanandraigö moroi khö bapagu. Ba gafuriatania, tebayagö idanö mamagu hegöi ira talifusögu si daönö. Alulu dödö bapagu ba no hauga kali möi ia ba gangowuloa fatua lö mate ia.

Na itehegö Lowalangi, tola ifuli tesusugi dania nösi nomogu hegöi niha si no irai fahuwu khögu ba gulidanö si bohou. Khalaigö atö hawa’omuso dödöda fao khö niha ni’omasi’öda ba wamosumange Yehowa sagötö fa’ara! *

^ par. 32 Lö si faröi Corwin Robison khö Yehowa irugi mate ia me lasura duho da’a.