Faigi nösi

Faigi ba gangolifa

Samaduhu’ö Yehowa

Fili li Nias

 FA’AURI NIHA KERISO

O’ö Goi-Goi Yehowa Sanandrösa ba Mbua-bua

O’ö Goi-Goi Yehowa Sanandrösa ba Mbua-bua

No itatugöi Lowalangi Yehowa goi-goi sanandrösa ba mbua-bua ba niha gulidanö. Duma-dumania, no itatugöi wa tebai lafabali wongambatö, he ira matua hegöi ira alawe. (Mat 19:4-6, 9) I’elifi fefu gamuata so’amakhaita ba wohorö. (IKor 6:9, 10) Ibe’e goi-goi sanandrösa ba lagu wonukha hegöi fangehao mboto si tola mamaehusi ono mbanuania.​—VMoz 22:5; ITim 2:9, 10.

Ba gulidanö iada’a, ato niha zotimbagö goi-goi Yehowa. (Rom 1:18-32) La’o’ö lala wangera-ngera niha sato sanandrösa ba lagu wonukha, fangehao mboto hegöi mbua-buara. Ato zomuso tödö ba gamuata si lö sökhi nifaluara ba fatuwu ira ba niha si lö mamalua simane nifaluara.​—IFet 4:3, 4.

Ya’ita Samaduhu’ö Yehowa, böi ata’u ita ba wolo’ö goi-goi Lowalangi sanandrösa ba mbua-bua. (Rom 12:9) Hewisa wamaluada da’ö? Moguna tafatunö ba niha si fao fa’atua-tua hadia zomasi Lowalangi. Hiza’i, moguna tarorogö goi-goi sanandrösa ba mbua-bua ba wa’aurida. Duma-dumania, ba ginötö tafili mode nukha hegöi fangehaogö mbotoda, tola tasofu khöda samösa, ’Hadia tefaudu nifiligu andre ba goi-goi Yehowa mazui ba goi-goi gulidanö? Hadia oroma ba lagu wonukhagu hegöi ba wangehao mbotogu wa ya’odo andre niha Keriso samosumange Lowalangi?’ Mazui ba ginötö tafili film somasi ita tafaigi, tola tasofu khöda samösa, ’Hadia omasi Yehowa nifaigigu andre? Goi-goi haniha niforoma’ö ba da’ö? Hadia hiburan nifiligu möi fangawuwu wa’aro dödögu ba goi-goi sanandrösa ba mbua-bua? (Zin 101:3) Hadia möi fangawuwu nösi nomogu mazui niha bö’ö da’ö?’​—IKor 10:31-33.

Hana wa moguna sibai ta’o’ö goi-goi Yehowa sanandrösa ba mbua-bua? Lö aratö ihori fefu soi hegöi si lö sökhi Yesu Keriso. (Hez 9:4-7) Ha niha samalua somasi Lowalangi ni’orifi. (IYoh 2:15-17) Andrö, datatuhini goi-goi Yehowa sanandrösa ba mbua-bua ena’ö fefu mbua-buada si sökhi ni’ila niha möi famolakhömi Lowalangi.​—IFet 2:11, 12.

Hadia zoroma moroi ba lagu wonukha hegöi fangehao mbotogu sanandrösa ba goi-goi mbua-bua ni’okhögögu?

FAIGI VIDEO TOBALI SI FAHUWU KHÖ YEHOWA—SAMÖSA NDRA MATUA, SAMÖSA NDRA ALAWE, BA TUTUNÖ WANOFU-NOFU ANDRE:

  • Hana wa sökhi na ta’o’ö goi-goi Yehowa?

  • Hana wa moguna lafaha’ö ndranora ira satua ba goi-goi Yehowa sanandrösa ba mbua-bua i’otarai ba wa’ide-ide?

  • Hewisa niha satua hegöi sawuyu-wuyu boto, latolo niha bö’ö ba wanöndra mbua moroi ba wa’ebua dödö Lowalangi?