Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Waö-Waö Halöwö Ba Gangowuloa Fa’auri Ba Fanuriaigö  |  Baŵa si Önö 2017

 FA’AURI NIHA KERISO

Owua-wua’ö Dödömö ba Wanuriaigö Turia Somuso Dödö

Owua-wua’ö Dödömö ba Wanuriaigö Turia Somuso Dödö

Hadia abua khöu wanuriaigö? Ato niha zi fao tödö ba da’ö. Hadia mbörö? Te börö me asese falukha ita ba niha si lö adöni tödö mazui ba niha so’uduni ya’ita. Te ata’u ita göi fahuhuo ba niha si lö ta’ila. Andrö wa tola taya wa’owua-wua dödöda. Hiza’i, Lowalangi sohahau tödö nifosumangeda, andrö wa omasi ia na tafosumange ia si fao fa’owua-wua dödö. (Zin 100:2; ITim 1:11) So tölu ngawua dani si sökhi sanga’asogö fa’owua-wua dödö na manuriaigö. Hadia da’ö?

Si oföna, turia nifa’emada mame’e dötönafö. Iada’a, itugu ato niha si lö hadöi dötönafö. Tola tafatunö khöra ’duria somuso dödö’. (Yes 52:7) Hiza’i, turia somuso dödö sanandrösa ba Mbanua Lowalangi, tola göi i’asogö wa’owua-wua dödö khöda. Fatua lö möi manuriaigö, angerönusi hadia howu-howu ni’asogö Mbanua Lowalangi ba gulidanö ba zi so miföna.

Si dua, turia somuso dödö nifa’emada, so mbuania ba niha bö’ö he ba mboto hegöi ba wamatira. Lafaha’ö ira ba wondröi fefu amuata si lö sökhi ba la’okhögö ginötö ba wanöndra fa’auri si lö aetu. (Yes 48:17, 18; Rom 1:16) Tola takhalaigö wa fao ita ba halöwö fangalui hegöi fangorifi. Hewa’ae na so niha si lö omasi latolo, lö mamalö moguna ta’alui niha somasi manema’ö turia nifa’emada.​—Mat 10:11-14.

Si tölu, ba sabölö tohudenia, halöwö fanuriaigö nifaluada möi famosumange Yehowa. Moguna sibai ba dödönia halöwö fanuriaigö andre. (Yes 43:10; Heb 6:10) Aefa da’ö, ibe’e khöda gehehania ni’amoni’ö ba wamalua halöwö da’a. Börö da’ö, andrö khö Yehowa wa’owua-wua dödö, ya’ia da’ö sambua moroi ba mbua-bua geheha. (Gal 5:22) Börö wanolo moroi khönia, tola taya wa’aombö-aombö dödö ba lö ata’u ita manuriaigö. (Hal 4:31) Andrö, gofu hewisa wanema’ö niha, tola owua-wua dödöda ba wamalua halöwö fanuriaigö.​—Hez 3:3.

Hadia mbua-bua somasi’ö ö’okhögö ba wanuriaigö? Hewisa wangoroma’ömö fa’owua-wua dödö?

FAIGI VIDEO ANGERÖNUSI BA FAHA’Ö NDRA’UGÖ ENA’Ö IFULI ADÖNI DÖDÖMÖ, BA BE’E WANEMA LI BA WANOFU-NOFU ANDRE:

  • Hana wa moguna sibai ta’ofönai’ö wemanga gö ba wamati hewa’ae na owölö-ölö ita manuriaigö ero waŵa?

  • Hadia manö zinangea ta’o’ö khö Mary?

  • Ba ginötö hadia ia öbe’e ginötömö ba wo’angerönusi Taromali Lowalangi?

  • Hadia zame’e khöu fa’owua-wua dödö ba ginötö öturiaigö duria somuso dödö?