Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Tola Ohahau Dödömi Yomo ba Nomo

 FAOSATÖ 7

Lala ba Wamaha’ö Iraono

Lala ba Wamaha’ö Iraono

”Taromali andre, niwa’ögu khöu ma’ökhö, ba ötanö ba dödöu. Ba öfaha’ö göi ndraonou.” —V Moze 6:6, 7

Yehowa, sanga’asogö fongambatö, no ibe’e halöwö zatua ba wamaha’ö iraonora. (Kolose 3:20) Ya’ami satua, sinangea mifaha’ö nonomi ba wangomasi’ö Yehowa ba ena’ö tobali ira niha sangonorogö tödö halöwö nibe’e khöra na no ebua ira. (II Timoteo 1:5; 3:15) Mifaigi hewisa lala ena’ö mi’ila nösi dödö ndraonomi. Moguna mibe’e ami duma-duma si sökhi khöra. Tola mifaha’ö nonomi ba Daromali Yehowa, na no oföna so Daromali andrö ba dödömi.—Zinunö 40:9.

 1 BÖI TOBALI LABINI’Ö ZI SO BA DÖDÖRA IRAONO

HADIA NIWA’Ö ZURA NI’AMONI’Ö: ”Ndra mu’alio’ö wamondrongo, böi ndra mufahulö wehede.” (Yakobo 1:19) Tatu omasi ami na lafatunö khömi hadia ia iraonomi. Andrö, moguna la’ila wa omasi ami mifondro-ndrongo na fahuhuo ira. A’asogö wa’owua-wua dödö ba nomo ena’ö aoha ba ndraono wamatunö ösi dödöra. (Yakobo 3:18) Na la’ila mofönu ami ba mihuku ira, tola manö labini’ö zi so ba dödöra. Andrö, mibologö dödömi ba ndraonomi. Asese’ö foroma’ö wa si ndruhu-druhu ö’omasi’ö ira.—Matai’o 3:17; I Korindro 8:1.

SI TOLA ÖFALUA:

  • Haogö wamondro-ndrongo na fahuhuo ndraonomi

  • Mi’asese’ö fahuhuo ba ndraonomi, böi ha ba ginötö so gabula dödöra

2 BOTOKHI BA DÖDÖU HADIA GELUAHA WEHEDERA

HADIA NIWA’Ö ZURA NI’AMONI’Ö: ”Sanöngöni taromali andrö ba isöndra wa’ohahau dödö.” (Gamaedola 16:20) Itaria, na ha asala örongo wehedera, lö abönö ba wangi’ila hadia zi ndruhunia nösi dödöra. Sasesenia ndraono lawa’ö zi tenga ya’ia ba wombini’ö ösi dödöra. ”Na so zanema li, na lö nifondro-ndrongonia, ba tebe’e fa lö tödö ba fangaila khönia.” (Gamaedola 18:13) Böi alio abao dödöu.—Gamaedola 19:11.

SI TOLA ÖFALUA:

  • Gofu hadia niwa’ö ndraonomi, böi mi’etu’ö dalu huhuora mazui mifeta’u ira

  • Törö tödöu hewisa ndra’ugö me iraono, hadia zi so ba dödöu, ba hadia zabölö ö’ofönai’ö ba wa’auriu

 3 FOROMA’Ö WA FAGÖLÖ GERA-ERAMI

HADIA NIWA’Ö ZURA NI’AMONI’Ö: ”Fondro-ndrongo onogu wamangelama namau, ba böi ositengagö wamaha’ö ninau andrö.” (Gamaedola 1:8) No ibe’e Yehowa kuaso ba zatua ba wamatörö iraonora. Mifaha’ö ndraonomi ena’ö lafosumange ba la’o’ö limi. (Efeso 6:1-3) La’ila iraono na lö ’fahasara dödö’ ba zatuara. (I Korindro 1:10) Na itaria lö fahasara dödö khömi ya’ami satua, böi miforoma’ö ba ndraono, tola dania lö lafosumange ami.

SI TOLA ÖFALUA:

  • Mihaogö wamatunö hewisa wame’emi fotu ba ndraonomi

  • Na fabö’ö zinöndra dödömi fo’omou sanandrösa ba wame’e fotu ba ndraono, mitandraigö mi’angeraigö hadia zi so ba wangera-ngera ngambatömi

 4 HENAIGÖ ERA-ERA

HADIA NIWA’Ö ZURA NI’AMONI’Ö: ”Faha’ö nono matua fatua so ginötö.” (Gamaedola 22:6) Lö i’anemai’ö mowua mene-meneda ba ndraono. Moguna mu’angeraigö hewisa wamaha’ö ya’ira awö wame’e fotu khöra. (Zinunö 127:4; Gamaedola 29:17) Fame’e fotu tenga ha fao bözi-bözi, tobali labotokhi ba dödönia hana wa lafotu ia. (Gamaedola 28:7) Faha’ö ira ba wangomasi’ö Taromali Yehowa awö goi-goinia. (Zinunö 1:2) Na mufalua da’ö, tola so khöra dödö side-ide sohau-hau.—Heberai’o 5:14.

SI TOLA ÖFALUA:

  • Faigi lala ena’ö la’ila iraonou wa so Lowalangi ba ena’ö lafaduhusi tödö

  • Tolo ira ena’ö la’ila hadia manö gamuata wohorö ba ena’ö la’aröu’ö ira ba da’ö, simane si so ba internet. Faha’ö ira ena’ö la’angelamaisi na so zondrönisi ya’ira ba wamalua amuata wohorö

”Faha’ö nono matua, faigi ginötö”