Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Turia Somuso Dödö moroi khö Lowalangi!

 FAMAHA’Ö 10

Hezo Lala Sofeta Khö Zomböi Ya’ita?

Hezo Lala Sofeta Khö Zomböi Ya’ita?

1. Hadia ha sara lala saekhu khö Lowalangi?

”Mi’angelamaisi zama’ele’ö sofaya andrö.”MATAI’O 7:15.

Ifaha’ö Yesu niha sangomasi’ö Lowalangi, wa hasara lala ba hasambua agama si ndruhu. Ifo’amaedola simane lala ba wogamö fa’auri si lö aetu. Imane Yesu ’lö ato zi tola manöndra’ ya’ia. (Matai’o 7:14) Awai zomasi Lowalangi ha samosumange ya’ia si tefaudu molo’ö Taromalinia. Dozi niha sanörö lala si ndruhu ba wamosumange Lowalangi lafalua zomasi ia.Baso Yohane 4:23, 24; 14:6; Efeso 4:4, 5.

2. Hadia niwa’ö Yesu ba niha Keriso faya?

”Lawa’ö föna zato wa no’aboto ba dödöra Lowalangi, ba bambua-buara la’osilö’ögö ia.”DITO 1:16.

Ifangelama ira Yesu wa so zama’ele’ö sofaya sota’unöisi niha keriso si ndruhu. Moroi baero, ba wamaigida hulö solo’ö khö Lowalangi. Ato niha lawa’ö wa ya’ira niha Keriso si ndruhu. Hadia atulö niwa’öra andrö? Hezo ta’ila niha Keriso si ndruhu? Oroma ba gamuata ba bambua-buara si sökhi.Baso Matai’o 7:13-23.

3. Hewisa wa ta’ila niha Keriso si ndruhu?

So lima ngawalö dandra ni’ilada:

  • Niha Keriso si ndruhu la’o’ö niwa’ö Zura Ni’amoni’ö, börö me Sura Ni’amoni’ö andrö Taromali Lowalangi. La’odödögö wamalua ba wa’aurira goi-goi Daromalinia. Tobali, agama si ndruhu tenga simane agama ni’odane-dane ba wangera-ngera niha. (Matai’o 15:7-9) Niha keriso si ndruhu lafalua ba wa’aurira hadia nifaha’öra ba niha.Baso Yohane 17:17; II Timoteo 3:16, 17.

  • Niha Keriso si ndruhu lafosumange döi Lowalangi, Yehowa. Ira  sama’ele’ö meföna simane Moze ba Dawido la’ila ba la’oguna’ö döi Lowalangi. (II Moze 3:15; Zinunö 8:2) Ifosumange göi döi Lowalangi Yesu, ya’ia me i’ombakha’ö ba niha tanö bö’ö. Itolo niha ena’ö aboto ba dödöra Lowalangi ifaha’ö ira ba wangandrö ena’ö te’amoni’ö döi Lowalangi. (Matai’o 6:9) Ba zi tefasui ya’ugö, haniha zangombakha töi Lowalangi ba niha bö’ö?Baso Yohane 17:26; Roma 10:13, 14.

  • Ira nifaha’ö Yesu laturiaigö Mbanua Lowalangi. Lowalangi zamatenge Yesu ba wangombakha turia somuso dödö sanadrösa ba Mbanua Lowalangi. Ha Famatörö Lowalangi zame’e fanötöna ba niha. Andrö wa idunö-dunö da’ö Yesu irugi wa’amatenia. (Luka 4:43; 8:1; 23:42, 43) No iwa’ö Yesu wa ira nifaha’önia zanuriaigö turia Mbanua Lowalangi andrö. Na so niha sangondrasi ya’ugö ba itutunö khöu Mbanua Lowalangi andrö, hadia agama niha da’ö?—Basa Matai’o 24:14.

  • Ira nifaha’ö Yesu lö fao ira ba niha gulidanö si lö sökhi. Aoha khöu wangila ya’ira börö me lö fao ira ba gangowuloa si lö fa’awö khö Lowalangi mazui ba wa’aniha. (Yohane 17:16; 18:36) Baero da’ö lö lago’ö gamuata ma bua-bua niha si lö sökhi ba gulidanö andre.—Baso Yakobo 4:4.

  • Ira nifaha’ö Yesu la’omasi’ö nawöra. Ifaha’ö ira Taromali Lowalangi ena’ö lafosumange fefu niha moroi ba ngawalö soi. Agama sofaya asese fao ira ba wasuwöta. Hewa’ae simanö niha keriso si ndruhu lö lafaogö ira wamalua da’ö. (Mikha 4:1-3) Hiza’i, ira solo’ö khö Yesu lö awöli-wöli ira ba wangoguna’ö inötö, fa’abölö, ba wanolo ba bawondrara tödö niha bö’ö.—Baso Yohane 13:34, 35; I Yohane 4:20.

4. Hadia aboto ba dödöu agama si ndruhu?

Molo’ö ya’ugö, hezo agama si’odane-dane Zura Ni’amoni’ö, samosumange töi Lowalangi, ba sanuriaigö turia Mbanua Lowalangi si tobali tötönafö ba niha gulidanö? Angowuloa haniha zangoroma’ö fa’omasi ba si lö fao ba wasuwöta?Baso I Yohane 3:10-12.