1. Hewisa mböröta wa’auri Yesu?

Hadia manö gamuata Yesu wa tola ahatö khönia niha?MATAI’O 11:29; MAREKO 10:13-16.

Ya’ia zia’a nifazökhi Lowalangi. Tenga simane niha gulidanö, ba zorugo auri Yesu fatua lö möi ia ba gulidanö. (Yohane 8:23) Tenga ira’alawe zo’adonogö ya’ia ba zorugo. Lowalangi Yehowa zamazökhi ya’ia. Tobali, lafotöi Yesu ono Lowalangi. Lafotöi ia göi ”Taromali” börö me ya’ia ngoni-ngoni Lowalangi. (Yohane 1:14) Fao Yesu ba wamazökhi tanö bö’ö.Baso Gamaedola 8:22, 23, 30; Kolose 1:15, 16.

2. Hana wa möi Yesu ba gulidanö?

Ifatenge nononia Lowalangi ba gulidanö ya’ia me ifawu’a wa’auri Yesu ba dalu Maria ono alawe niha Yehuda. Börö zimanö, lö hadöi ama Yesu niha gulidanö. (Luka 1:30-35) Wa möi Yesu ba gulidanö (1) ba wamaha’ö sindruhu sanandrösa khö Lowalangi, (2) ibe’e duma-duma ba wamalua somasi Lowalangi hewa’ae afökhö, ba (3) ba wame’e fa’aurinia tobali ”höli” zato.Baso Matai’o 20:28.

3. Hana wa moguna khöda höli?

Fangöhöli andrö zamu’a ba sangefa’ö niha moroi ba wa’amate. (II Moze 21:29, 30) Me’iwöwöi niha Lowalangi, lö irai omasi ia na atua ba mate ira. Hadia dandra khöda? Imane Lowalangi ba niha si föföna, Adamo, na ifalua ”horö” niwa’ö Zura Ni’amoni’ö, lö fulitö mate ia. Tobali, na lö fasala Gadamo, lö’irai itörö wa’amate. (I Moze 2:16, 17; 5:5) Molo’ö Sura Ni’amoni’ö, wa ”itörö” fa’amate niha gulidanö börö Gadamo. Nga’ötönia, latörö wanguhuku ya’ia da’ö fa’amate. Moguna khöda wangöhöli ba fangefa’ö moroi ba huku fa’amate horö ondröita Gadamo.Baso Roma 5:12; 6:23.

Haniha  zi tola mangefa’ö ya’ita moroi ba wa’amate? Na mate ita, tabu’a horö nifaluada. Niha si lö mo’ahonoa, tebai ibu’a horö nawönia niha.Baso Zinunö 49:8-10.

4. Hana wa itörö wa’amate Yesu?

Tenga simane ya’ita, Yesu mo’ahonoa. Andrö fa’atumbunia sahöli-höli dödö. Lö irai ifalua horö. Ba hiza, mate ia tenga börö horönia samösa, börö horö niha gulidanö. Lowalangi zamatenge ya’ia börö me omasi ia niha gulidanö. I’oroma’ö wa’omasinia khöda Yesu me ifalua zomasi namania ba ibe’e nosonia salahida.Baso Yohane 3:16; Roma 5:18, 19.

5. Hadia nifalua Yesu iada’a?

Me so ia ba gulidanö, ifadöhö zofökhö, isusugi niha si no mate, ba itolo niha si tosasa. Börö zimanö, i’ombakha’ö hadia nifaluania ba zi so föna ba niha solo’ö khönia. (Matai’o 15:30, 31; Yohane 5:28) Me no aefa mate Yesu, isusugi ia Lowalangi tobali boto eheha. (I Fetero 3:18) Aefa da’ö, mudadao Yesu ba gambölö namania ibaloi ginötö nitehegö khönia ba wamatörö tobali Razo ba gulidanö. (Heberai’o 10:12, 13) Iada’a, no tobali Razo Yesu ba zorugo, ba laturiaigö duria somuso dödö ira nifaha’önia ba zi sagörö ulidanö.Baso Danieli 7:13, 14; Matai’o 24:14.

Lö aratö, i’oguna’ö wa’abölönia Yesu ba wangeheta fa’atosasa awö niha samobörö famakao. Fefu niha samati khö Yesu lasöndra wa’auri si lö aetu ba gulidanö faradaiso na la’o’ö zomasi ia.Baso Zinunö 37:9-11.