Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Turia Somuso Dödö moroi khö Lowalangi!

 FAMAHA’Ö 6

Hadia Wanötöna ba Niha si No Mate?

Hadia Wanötöna ba Niha si No Mate?

1. Hadia duria somuso dödö sanandrösa ba niha si no mate?

Me so Yesu ba gulidanö, mate zi fahuwu khönia sotöi Lazaro. No öfa bongi Lazaro ba lewatö awena so Yesu. Möi Yesu ba lewatö Lazaro fao ndra Maria ba Marata talifusö Lazaro. Lö ara aefa da’ö, tohare niha sato. Khalaigö hewisa wa’omuso dödö Maria ba Marata me isusugi dalifusöra andrö Yesu.Baso Yohane 11:21-24, 38-44.

No aboto ba dödö Marata duria somuso dödö sanandrösa ba niha si no mate. Isusugi Yehowa niha si no mate ba ifuli auri ira ba gulidanö.Baso Yobi 14:14, 15.

2. Hewisa niha si no mate?

Imane Lowalangi khö Gadamo, ”Tanö sa’atö ndra’ugö ba si tobali tanö zui dania.”I MOZE 3:19.

Tewöwöi niha moroi ba dambu. (I Moze 2:7; 3:19) Tenga boto eheha nibe’e khöra. Ya’ita boto tanö andrö wa lö hadöi noso sauri na mate ita. Tebato göi wangere-ngera, andrö wa lö itörö tödö fefu zi no numalö. Da’ö wa löhadöi nidunö-dunö Lazaro meno maoso ia moroi ba ngai zimate, börö me niha si no mate lö hadia ia la’ila.Baso Zinunö 146:4; Zangombakha 9:5, 6, 10.

Hadia ifakao Lowalangi niha si no mate ba galitö narako? Sura Ni’amoni’ö zangombakha wa niha si no mate lö hadia ia la’ila. Börö da’ö, alitö narako famaha’ö sofaya, tenga moroi khö Lowalangi. Ogoro Yehowa wamakao niha ba galitö ba lö irai tumbu ba dödönia.Baso Yeremia 7:31.

 3. Hadia tola fahuhuo khöda niha si no mate?

Niha si no mate lö larongo hadia ia ba lö la’ila fahuhuo. (Zinunö 115:17) Hiza’i, so ndra mala’ika si lö sökhi. Fahuo-huo ira ba niha labali’ö ira niha si no mate. (II Fetero 2:4) Itegu ita Yehowa ena’ö böi fahuhuo ita ba niha si no mate.Baso V Moze 18:10, 11.

4. Haniha nisusugi dania?

Ato niha si no mate ifuli auri ira ba gulidanö. Niha samalua si lö sökhi börö wa lö’aboto ba dödöra Lowalangi ifuli tesusugi ira dania.Baso Luka 23:43; Halöwö Zinenge 24:15.

Niha si no tesusugi tebe’e khöra ginötö ba wamaha’ö ya’ira ba zi ndruhu sanandrösa khö Lowalangi ena’ö mamati ira khö Yesu ba la’o’ö linia. (Fama’ele’ö 20:11-13) Niha si no tesusugi ba samalua satulö la söndra wa’auri si lö aetu ba gulidanö sagötö fa’ara.Baso Yohane 5:28, 29.

5. Hadia zi tobali famaha’ö khöda ba wanusugi nifalua Yehowa?

So wanötöna ba niha si no mate wa ifuli tesusugi ira dania, börö me no mate Yesu Keriso salahida. Tobali, börö me so wanusugi, ta’ila wa’omasi Yehowa ba fa’ahakhö dödönia ita. Na tesusugi niha si no mate, haniha zi oföna öfalukhaisi?Baso Yohane 3:16; Roma 6:23.