Faigi nösi

Faigi ba gangolifa

Samaduhu’ö Yehowa

Fili li Nias

 FAMAHA’Ö 11

Hadia Guna Goi-Goi Zura Ni’amoni’ö ba Wa’aurida?

Hadia Guna Goi-Goi Zura Ni’amoni’ö ba Wa’aurida?

1. Hana wa moguna wanuturu lala ba niha?

Hewisa goi-goi Zura Ni’amoni’ö wango’ounia ena’ö mangelama ita faböi te’ala?ZINUNÖ 36:10.

Atua-tua zomböi ya’ita moroi khöda. Simane ama sebua fa’omasi, i’osinangegö ba omasi ia na ohahau dödöda. Baero da’ö, tebai auri ita na lö sanuturu lalada. (Yeremia 10:23) Simane iraono moguna khöra wanuturu lala moroi khö zatua, simanö göi ita moguna ituturu lalada Lowalangi. (Yesaya 48:17, 18) Goi-goi Zura Ni’amoni’ö da’ö zi tobali fanuturu lala ni’amualagö Lowalangi khöda.Baso II Timoteo 3:16.

Na tafalua goi-goi Yehowa, tola tasöndra wa’auri si sökhi iada’a ba howu-howu si lö tebulö ba zi so föna. Börö me Lowalangi zomböi ya’ita, no sinangea moroi ba dödöda wolo’ö fanuturu lala si otarai ia.Baso Zinunö 19:8, 12; Fama’ele’ö 4:11.

2. Hadia geluaha goi-goi Zura Ni’amoni’ö?

Goi-goi Zura Ni’amoni’ö ya’ia da’ö, dane-dane wamaha’ö sindruhu. Na Oroisa moguna ba zi sambua inötö. (V Moze 22:8) Moguna ta’angeraigö ena’ö ta’ila hezo gamaudu tafalua goi-goinia. (Gamaedola 2:10-12) Duma-dumania, ifaha’ö ita Sura Ni’amoni’ö wa fa’aurida andre moroi khö Lowalangi. Goi-goi moroi ba Zura Ni’amoni’ö andrö zo’amenesi ya’ita ba nahia wohalöwöda, ba nomo, ba balala wofanö. Na itörö tödöda goi-goi andrö, ta’angelamaisi ena’ö böi te’ala ita.Baso Halöwö Zinenge 17:28.

3. Hadia zi dombua goi-goi sabölö moguna?

I’ombakah’ö khöda Yesu dombua goi-goi sabölö moguna. Si oföna, mo’amakhaita ba lua-lua wa’auri niha, ya’ia da’ö ena’ö aboto ba dödöra Lowalangi, la’omasi’ö ia, ba lö faröi ira we’amöi enoninia. Goi-goi si oföna andre moguna ta törö tödöda na tahalö ngawalö gangetula. (Gamaedola 3:6)  Dozi samalua goi-goi da’e, tobali ira sifahuwu khö Lowalangi, ba lasöndra wa’ohahau dödö, ba fa’auri si lö aetu.Baso Matai’o 22:36-38.

Si dua, ituturu khöda lala ena’ö tola fahuwu ita khö nawöda. (I Korindro 13:4-7) Ba wamalua goi-goi si dua andre, tago’ö duma-duma nibe’e Lowalangi hadia zi no ifalua ba niha.Baso Matai’o 7:12; 22:39, 40.

4. Hadia guna goi-goi Zura Ni’amoni’ö ba wa’aurida?

Na mufalua goi-goi Zura Ni’amoni’ö, so wahasara dödö yomo ba nomo börö me faoma la’omasi’ö nawöra. (Kolose 3:12-14) Terorogö zi sambua omo na la’o’ö goi-goi tanö bö’ö si so ba Zura Ni’amoni’ö. Sura Ni’amoni’ö zanguma’ö wa si no mangowalu tefaböbö ira irugi zi lö aetu.Baso I Moze 2:24.

Na mufalua goi-goi Zura Ni’amoni’ö, so khöda wa’ohahau dödö ba tebönökhi zoguna khöda bongi ma’ökhö. Duma-dumania, omasi niha na so zohalöwö khönia si lö falimo ba owölö-ölö, börö me ifalua goi-goi Zura Ni’amoni’ö. (Gamaedola 10:4, 26; Heberai’o 13:18) Taromali Lowalangi zamaha’ö ya’ita ena’ö ahono dödöda ba zi no so khöda, ba mu’ofönai’ö wahuwusa khö Lowalangi moroi ba wangalui ana’a.Baso Matai’o 6:24, 25, 33; I Timoteo 6:8-10.

Terorogö mbotoda na tafalua goi-goi Zura Ni’amoni’ö. (Gamaedola 14:30; 22:24, 25) Duma-dumania, na ta’o’ö goroisa Lowalangi sotegu ya’ita ena’ö böi mabu-mabu, tola aefa ita moroi ba wangala ba fökhö solohe ba wa’amate. (Gamaedola 23:20) Itehe khöda Yehowa wamadu tuo asala böi mabu. (Zinunö 104:15; I Korindro 6:10) Moguna khöda goi-goi nibe’e Lowalangi. Moroi ba da’ö wa tefaha’ö ita ba telumö’ö moroi ba gamuata ba fangera-ngera si lö sökhi. (Zinunö 119:97-100) Wa la’o’ö goi-goi Zura Ni’amoni’ö ira niha Keriso sindruhu tenga ha ena’ö ohahau dödöra, tobali, lafalua ia ena’ö tefolakhömi Lowalangi.Baso Matai’o 5:14-16.