Tobali si fahuwu khö Lowalangi lala fondrege zi sökhi si tola ötörö. Ifaha’ö ndraʼugö Lowalangi hewisa lala ena’ö so waʼowua-wua dödö ba faʼohahau dödö; iʼefa’ö ndraʼugö moroi ba ngawalö nifaduhusi tödö selungu ba amuata si tola möi famakiko. Ifondrondrongo wangandröu. Itolo ndraʼugö ena’ö so khöu waʼatulö dödö ba faʼaro dödö. (Zinunö 71:5; 73:28) Itolo ndraʼugö Lowalangi ba ginötö waʼatosasa. (Zinunö 18:19) Ba, iʼoro’ö mbualania khöu faʼauri si lö aetu.​—Roma 6:23.

Itugu ahatö ndraʼugö khö Lowalangi, ahatö göi ndraʼugö ba niha si fahuwu khö Lowalangi. Yaʼira göi tobali si fahuwu khöu. Yaʼira ba hulö dalifusö si sambua ama ba si sambua ina khöu. Omasi ira lafaha’ö ndraʼugö waʼaboto ba dödö Lowalangi ba latolo ba labelegö waʼaurira wanolo yaʼugö.

Lö fagölö ita khö Lowalangi. Itugu öʼodödögö wangaʼaro’ö fahuwusa khö Lowalangi, so sambua zabölö moguna aboto ba dödöu. Fahuwusa khö Lowalangi tenga simane fahuwusa ba gotalua zi darua niha. Yaʼia götö-götö waʼara, si fahöna faʼatua-tua, ba sabölö moroi khöda. Yaʼia ba Samatörö yaʼita si lö tebulö. Börö da’ö, na omasi ita tobali si fahuwu khönia, si lö tola lö’ö tafondrondrongo linia ba tafalua hadia niʼandrönia khöda. Na talau daʼa ba ebua sibai gunania khöda.​—Yesaya 48:18.