Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Tola Tobali Ndraʼugö si Fahuwu khö Lowalangi!

 FAMAHAʼÖ 10

Lala Wanöndra Agama Sindruhu

Lala Wanöndra Agama Sindruhu

Na omasi ndraʼugö tobali si fahuwu khö Lowalangi, lö tola löʼö öfaudugö hadia nilaumö ba agama si faudu ba dödö Lowalangi. Yesu zangumaʼö wa ”sangalulu sindruhu andrö” mangalulu ira khö Lowalangi si faudu ba ”zindruhu” andrö. (Yohane 4:23, 24) Ha sambua lala sindruhu ba wangalulu khö Lowalangi. (Efeso 4:4-6) Agama sindruhu iʼohe ba waʼauri si lö aetu, ba agama selungu aekhu ba wamakiko.​—Mataiʼo 7:13, 14.

Tola aboto ba dödöu agama sindruhu andrö na önehegö dozi niha samalua yaʼia. Me Yehowa andrö sökhi, niha satulö sangalulu khönia göi oi niha si sökhi. Hulö simane töla ndrima si sökhi, ba sökhi göi mbuania. Agama sindruhu andrö ba iʼowua niha si sökhi.​—Mataiʼo 7:15-20.

Dozi si fahuwu khö Yehowa laʼataʼufi ba laʼonorogö tödö sibai Zura Niʼamoniʼö andrö. Aboto ba dödöra wa Sura Niʼamoniʼö andrö moroi khö Lowalangi. Labaliʼö ia sanuturu lala ba waʼaurira, samokai lala na so noro dödöra, ba sanolo yaʼira famahaʼö faʼaboto ba dödö Lowalangi. (2 Timoteo 3:16) Laʼodödögö wamalua hadia ia niʼombakhaʼöra.

 Dozi si fahuwu khö Yehowa faoma laʼomasiʼö nawöra. Yesu iʼoromaʼö waʼomasinia ba niha yaʼia daʼö ifahaʼö ira waʼaboto ba dödö Lowalangi, ba ifadöhö zofökhö. Fefu niha si so ba agama sindruhu andrö laʼoromaʼö waʼomasira ba niha böʼö göi. Simane Yesu, lö laʼoʼaya niha si numana ba ma niha soroi ba mado tanö böʼö. Yesu zangumaʼö wa fefu niha aboto ba dödöra nifahaʼönia börö me faoma laʼomasiʼö nawöra.​—Yohane 13:35.

Dozi si fahuwu khö Lowalangi lafosumange döi Lowalangi, Yehowa. Na so samösa niha lö omasi ia iʼogunaʼö döimö, tola maö niha simanö tobali si fahuwu khöu? Löʼö! Na so zi fahuwu khöda, ba takaoni döinia ba tatutunö ba niha böʼö hadia manö zi sökhi nifaluania. Simanö göi, haniha manö zomasi möi si fahuwu khö Lowalangi lö tola löʼö iʼogunaʼö döinia ba itutunö waʼaboto ba dödö Lowalangi ba niha böʼö. Omasi Yehowa na talau zimanö.​—Mataiʼo 6:9; Roma 10:13, 14.

Simane Yesu, dozi si fahuwu khö Lowalangi lafahaʼö ngawalö niha faʼaboto ba dödö Famatörö Lowalangi. Famatörö Lowalangi yaʼia daʼö famatörö moroi ba zorugo sangazökhi ulidanö andre tobali faradaiso. Dozi si fahuwu khö Lowalangi laʼombakhaʼö duria si sökhi andre faʼaboto ba dödö Famatörö Lowalangi ba niha böʼö.​—Mataiʼo 24:14.

Samaduhuʼö Yehowa laʼodödögö sibai enaʼö tobali ira si fahuwu khö Lowalangi. Laʼonorogö tödö sibai nösi Zura Niʼamoniʼö ba faoma laʼomasiʼö nawöra. Laʼogunaʼö ba lafosumange döi Lowalangi ba lafahaʼö niha böʼö faʼaboto ba dödö Wamatörö Lowalangi. Samaduhu’ö Yehowa lafalua agama sindruhu ba gulidanö andre iadaʼa.