Faigi nösi

Faigi ba menu sekunder

Samaduhu’ö Yehowa

Nias

Hadia Omasi Aboto ba Dödöu Ziduhu?

Hadia Omasi Aboto ba Dödöu Ziduhu?

SIDUHU hezo da’ö? Sanandrösa ba wa’auri sabölö moguna sasese lasofu niha. Te no irai tumbu ba wangra-ngerau ngawalö ganofula simane da’e:

  • Hadia sindruhu-ndruhu so ba dödö Lowalangi ita?

  • Hadia tebato dania wasuwöta ba famakao?

  • Hewisa ita ba ginötö wa’amate?

  • Hadia so dötönafö ba niha si no mate?

  • Hewisa ena’ö ifondro-ndrongo wangandrögu Lowalangi?

  • Hewisa ena’ö usöndra wa’owua-wua dödö?

Hezo ösöndra wanema li ba ngawalö ganofula simanö? Ba naha wangirö’ö buku nibaso-baso zato ba ma banaha wamawa buku, tola ösöndra ngahönö mbuku sanguma’ö so khönia wanema li ba da’ö. Ba hiza’i asese manö wa ösi mbuku si sambua lö faoma zinöndrara nösi mbuku bö’önia. So göi ngawalö mbuku wa ba zi samuza inötö sökhi tawa’ö, ba lö ara aefa da’ö ba lö moguna, ba ma la’atulö’ö nösinia ba mazui lagati.

Hiza i so sambua mbuku same’e fanema li si tola tafaduhusi tödö. Buku da’e ösinia siduhu. Yesu Keriso zanguma’ö ba wangandrönia khö Lowalangi, ”Taromali ziduhu.” (Yohane 17:17) Iada’e, aboto ba dödöda wa Taromali andrö ya’ia Zura Ni’amoni’ö. Ba mbuku da’e, tola tasöndra wanema li Zura Ni’amoni’ö si fahatö ba dödöda, satulö ba ngawalö ganofula moroi yawa.

 Hadia Sindruhu-ndruhu So ba Dödö Lowalangi Ita?

HANA WA SO GANOFULA SIMANÖ: Ulidanö si so ita iada’e no si fahöna fa’alösökhi ba falö’atulö. Oya agama samaha’ö wa famakao si göna ita no somasi Lowalangi.

HADIA NIFAHA’Ö ZURA NI’AMONI’Ö: Tenga Lowalangi zamobörö fa’a­lösökhi. ”Böi manö tawa’ö, ilau zi lö sökhi Lowalangi ba ifatörö zi lö atulö si lö ambö Fa’abölö!” niwa’ö Yobi 34:10. So gohitö dödö Lowalangi sifahöna fa’omasi ba niha. Andrö ifaha’ö ita Yesu ba wangandrö, ”He Ama khöma si so ba zorugo, ya . . . tobali banuau fefu niha. Ya itörö zomasi ndra’ugö hulö ba zorugo ya simanö göi ba guli danö.” (Matai’o 6:9, 10) I’angeragö tödö sibai ita Lowalangi, irege ifalua wa’ate’ala sebua ena’ö alua gohitö dödönia.​—Yohane 3:​16.

Faigi göi I Moze 1:​26-​28; Yakobo 1:13; ba I Fetero 5:​6, 7.

Hadia Tebato Dania Wasuwöta ba Famakao?

HANA WA SO GANOFULA SIMANÖ: Tebai mu’erai ha wa’ato niha si no mate börö wasuwöta. Fefu ita no tarasoi ngawalö wamakao.

HADIA NIFAHA’Ö ZURA NI’AMONI’Ö: Ifa’ele’ö Lowalangi wa ifalua dania wa’atulö ba zi sagörö ulidanö. Barö wamatörönia, ya’ia da’ö famatörö moroi ba zorugo, fefu niha ”lö sa’ae lafaha’ö ira wasuwöta”. Ya’ira ba ”labali’ö faku zi’ölira”. (Yesaya 2:4) Ihori dania Lowalangi fefu ngawalö zi lö atulö ba famakao. Sura Ni’amoni’ö zamabu’u, ”Ba i’osi dania lo atulö dawa hörö fefu, ba höröra, ba lö fa’amate sa’ae, ba lö fa’abu dödö, ba lö fege’ege, ba lö fa’afökhö sa’ae, me no numalö zi föföna andrö.”​—Fama’ele’ö 21:3, 4.

Faigi göi Zinunö 37:10, 11; 46:10; ba Mikha 4:​1-4.

Hewisa Ita ba Ginötö Wa’amate?

HANA WA SO GANOFULA SIMANÖ: Oya agama ba gulidanö samaha’ö wa hewa’ae mate mboto ba lö mate noso. So zi faduhu tödö wa si no mate andrö tola ifosikho niha sauri ba ma ihuku niha si lö sökhi Lowalangi, ifakao ira ba galitö narako si hola-hola irugi zi lö aetu.

HADIA NIFAHA’Ö ZURA NI’AMONI’Ö: Ba ginötö wa’amate, niha andrö lö ya’ira sa’ae. ”Ba si no mate, ba lö hadia ia la’ila,” niwa’ö Zangombakha 9:5. Lö fa’aboto ba dödö ba niha si no mate, lö larasoi hadia ia, börö da’ö lö lafosikho​—ba ma latolo​—niha sauri.​—⁠Zinunö 146:​3, 4.

Faigi göi I Moze 3:​19 ba Zangombakha 9:​6, 10.

 Hadia So Dötönafö ba Niha si No Mate?

HANA WA SO GANOFULA SIMANÖ: Omasi auri ita. Omasi na auri ita faoma niha ni’omasi’öda. No sinangea na awakhö sibai dödöda ena’ö falukha ita niha si no mate ni’omasi’öda.

HADIA NIFAHA’Ö ZURA NI’AMONI’Ö: Ato niha si no mate ba tesusugi. No ifabu’u Yesu wa ”ba . . . dozi si so ba lewatö ba möi ira yawa”. (Yohane 5:28, 29) Simane ohitö dödö Lowalangi ba mböröta, dozi niha nisusugi moroi ba lewatö latema dania wa’auri ba waradaiso andrö. (Luka 23:43) Ba nifabu’u andrö ba zi so fönada, niha si lö faröi andrö so khöra wa’a­bölö mboto ba fa’auri si lö aetu. Sura Ni’amoni’ö zanguma’ö, ”Satulö tödö zokhö tanö dania, ya’ira zowanua ba danö, si lö mamalö-malö.”​—⁠Zinunö 37:29.

Faigi göi Yobi 14:14, 15; Luka 7:​11-​17; ba Halöwö Zinenge 24:15.

Hewisa Ena’ö Ifondrondrongo Wangandrögu Lowalangi?

HANA WA SO GANOFULA SIMANÖ: Arakhagö fefu niha si so agama no to’ölö mangandrö. Ba hiza’i ato zanguma’ö wa fangandröra lö ifondro-ndrongo Lowalangi.

HADIA NIFAHA’Ö ZURA NI’AMONI’Ö: Ifaha’ö ita Yesu ena’ö böi tafuli-fuli furi wehede ba wangandrö. ”Na mangandrö ami” iwa’ö ”ba böi mi’oya’ö li”. (Matai’o 6:7) Na omasi ita ifondro-ndrongo wangandröda Lowalangi, ena’ö mangandrö ita ba zi faudu ba zomasi Ia. Börö da’ö moguna sibai ta’alui hadia zomasi Lowalangi, ba ta faudugö wangandröda ba zomasi Ia andrö. Sara Yohane 5:14 ibe’e wamotokhi ba dödö, ”Na so ni’andröda hadia ia, si faudu ba zomasi Ia, ba ifondro-ndrongo khöda.”

Faigi göi Zinunö 65:3; Yohane 14:​6, 14; ba I Yohane 3:​22.

Hewisa Ena’ö Usöndra wa’owua-wua dödö?

HANA WA SO GANOFULA SIMANÖ: Ato zi faduhu tödö wa fo’ana’a, fa’ateturia, ma fa’asökhi mboto zi tola manga’asogö fa’owua-wua dödö khöra. Börö da’ö wa lagohi sibai ia. Hewa’ae simanö ba ta’ila’i wa lö lasöndra wa’owua-wua dödö.

HADIA NIFAHA’Ö ZURA NI’AMONI’Ö: I’ombakha’ö Yesu lala wanöndra fa’owua-wua dödö, ”Ya’ahowu zi numana tödö” ma ”sangodödögö wangalui fa’auri nosonia”. (Matai’o 5:​3, Kitab Suci Terjemahan Dunia Baru) Fa’owuawua dödö si lö aetu, awena tola tasöndra ia na tatörö lala ba wangalui soguna khöda fondrege zebua​—fa’olofo ba ziduhu andrö sanandrösa khö Lowalangi ba ohitö dödönia ba khöda. Siduhu andrö tesöndra ba Zura Ni’amoni’ö. Fa’aboto ba dödö ziduhu andrö, tola itolo ita ba wangila hadia zabölö moguna​—ba si lö moguna. Na ta’odane-dane ziduhu andrö ba wangai angetula ba ma ba nifaluada, ba mofozu wa’aurida.​—Luka 11:28.

Faigi göi Gamaedola 3:​5, 6, 13-​18 ba I Timoteo 6:​9, 10.

 Famotokhi ba dödö si no tesura moroi yawa, ha famotokhi sadogo-dogo moroi ba Zura Ni’amoni’ö ba zi önö ganofula moroi yawa. Hadia omasi nasa ndra’ugö ösöndra wa’aboto ba dödö? Na ya’ugö samösa ”sangodödögö wangalui fangorifi noso”, lö zi lö edöna ndra’ugö. Te no irai öbe’e wanofu ­simane da’e: ’Na sindruhu so ba dödö Lowalangi ita, hana wa itehegö manö tola alua ngawalö zi lö sökhi ba ma famakao ba zi hauga nga’ötö ­fa’auri niha? He’uwisa ena’ö si tedou sökhi lala wa’auri nösi nomogu?’ Sura Ni’amoni’ö ibe’e wanema li safönu ba si tola itema tödöda moroi ba ganofula simanö, ba ba ganofula tanö bö’önia göi.

Ba hiza, ato niha iada’e manufa dödöra wamareso Sura Ni’amoni’ö. Tetaö ba dödöra me awe’e-­we’e ia, mendrua manö me oya zi lö aboto ba dödöra nösinia. Hadia edöna ndra’ugö latolo ba wanöndra ngawalö wanema-nema li ba Zura ­Ni’amoni’ö? Ira Samaduhu’ö Yehowa la’oroma’ö khöu dua lala ba wanolo ya’ugö.

Si föföna, buku Hadia Nifaha’ö Zura Ni’amoni’ö Khöda? mufa’anö ba wanolo niha si lö inötö ba wamareso fanema li moroi ba Zura Ni’amoni’ö ba ngawalö ganofula sabölö moguna. Lala si sambua, ba ya’ia da’ö famaha’ö ni’amualagö moroi ba Zura Ni’amoni’ö nifalua ba nomo. Lö la’andrö game’ela, Samaduhu’ö Yehowa samösa niha si sökhi tödö ba satua-tua ba wamaha’ö Taromali Lowalangi möi ia sakali samigu ba nomou ba ma ba naha tanö bö’ö si faudu ba dödöu ba wamatunö ösi Zura Ni’amoni’ö. Ato niha ba zi sagörö ulidanö, zi no manöndra bua moroi ba wamaha’ö simane da’e. Ato ba go­taluara no lahalö gangetula fondrege zi sökhi, ­”No usöndra ziduhu!”

Da’e ia gokhöta fondrege zebua böli nisöndrau. Siduhu moroi ba Zura Ni’amoni’ö no i’efa’ö ita moroi ba halöwö Gafökha, ba wa lö era-era, ba fa’ata’u, ba ibe’e göi khöda wanötöna, ohitö dödö, ba ­fa’omuso dödö. Imane Yesu, ”Aboto ba dödömi ­ziduhu, ba i’efa’ö ami siduhu andrö.”​—Yohane 8:​32.