Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Sura Ni’amoni’ö—Hadia Nösinia?

 FAOSATÖ 2

Taya Waradaiso

Taya Waradaiso

Samösa mala’ika solawa idönisi Gadamo ba Khawa, ena’ö latimbagö wamatörö Lowalangi. Lua-luania, horö ba fa’amate so ba gulidanö

FATUA lö iwöwöi niha Lowalangi, no oföna iwöwöi mboto eheha si lö oroma ya’ia da’ö—ira mala’ika. Ba Gedena, so samösa mala’ika solawa, nifotöi Afökha ba Satana. Onekhe sibai ia wamaelungu Khawa ena’ö i’a mbua geu si no itegu Lowalangi.

Afökha, i’odela gulö ba wahuhuosa khö Khawa ena’ö lafaduhusi tödö wa no itaha zi sökhi Lowalangi khö Gadamo ba Khawa. Imane Mala’ika khö Khawa, mate ira na la’a mbua geu andrö. Iböbögö zi lö duhu Afökha khö Lowalangi wa no ilimo niha. Samaelungu andrö, idönisi dödö niha ena’ö faröi ira khö Lowalangi ba lasöndra wa’atua-tua, ba tola lafalua zomasi dödöra. Hiza’i, falimosa da’ö—falimosa si oföna ba gulidanö. Si ndruhunia si tobali amadöniwa ya’ia da’ö, famatörönia—hadia sinangea mamatörö Lowalangi ba hadia atulö wamatörönia, ba hadia simöi fangohahau dödö nono mbanuania.

Faduhu dödö Khawa ba walimosa Gafökha andrö. Ibörögö i’isö mbua geu andrö, ba ihalö, ba i’a. Aefa da’ö, ibe’e göi ö wo’omonia ba faoma la’a. Lua-luania, tobali ira niha si so horö. Si ndruhunia, nifaluara andrö tandra wa lalawa Lowalangi. Börö me la’odödögö wanawö oroisa Lowalangi ira Adamo ba Khawa, la’erogö wamatörönia, si no mombönökhi soguna khöra, ba same’e fa’auri so’ahonoa.

Ma’uwunia andrö ”zomama högöu dania, ihundragö ba sondrou börö sisinia ndraugö”.​—I Moze 3:15

Ihuku ira Lowalangi börö me no lalawa ia. No ifa’ele’ö Lowalangi wa tohare dania Ma’uwu mazui Sangefa’ö si no tefabu’u, samunu Afökha andrö. Börö me so khö Lowalangi wa’ahakhö dödö khö ma’uwu Gadamo ba Khawa, andrö lö i’anemai ibunu ira. So göi wanötöna ba nga’ötö Gadamo börö me Niha nifatenge Lowalangi dania zangefa’ö ya’ira moroi ba lua-lua horö Gadamo ba Khawa ba Kabu Edena. Hewisa wamalua ohitö dödö Lowalangi ba wamatenge Sangorifi—ba haniha nifatengenia—tezara-zara wamatunö ba Zura Ni’amoni’ö.

Ifofanö Gadamo ba Khawa Lowalangi moroi ba Waradaiso. Lua-luania laforege wohalöwö baero ba Kabu Edena. Manabina Khawa ba tumbu khöra nono sia’a, Ka’ino. Ba tumbu nasa khöra ndraono, ono alawe ono matua, simane Habeli ba Seti, tua Noakhi.

—Te’odane-dane ba I Moze faza 3 irugi 5; Fama’ele’ö 12:9.