Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Sura Ni’amoni’ö—Hadia Nösinia?

 FAOSATÖ 24

Ibe’e Zurania Faulo ba Mbanua Niha Keriso

Ibe’e Zurania Faulo ba Mbanua Niha Keriso

Tobali famarou dödö zura Waulo ba gangowuloa niha Keriso

BANUA niha Keriso sawena mufasindro, ya’ira dania zamalua ohitö dödö Yehowa. Hiza’i, göna ira folohi. Hadia lö faröi ira khö Lowalangi na göna ira fanandraigö moroi ba niha baero hegöi si’otarai zi sara lala wamati khöra? So 21 mbuku ba Gamabu’ula Li Si Bohou, ösinia mene-mene simöi famarou dödö.

So fele’öfa zura—i’otarai mbuku Roma irugi mbuku Heberai’o—Faulo samösa zanura. Fefu mbuku da’a labe’e töinia molo’ö töi nibe’e sura—he töi niha hegöi töi mbanua niha Keriso. Datafaigi hadia nidunö-dunö ba zi no isura Faulo.

Famangelama ba gamuata si lö sökhi. Niha sohorö, ba samalua horö tanö bö’ö ”tebai tefa’amöi ba mbanua Lowalangi”. (Galatia 5:19-21; I Korindro 6:9-11) Moguna so wahasara dödö ba nono mbanua Lowalangi, he no fabö’ö-bö’ö mbanuara. (Roma 2:11; Efeso 4:1-6) Owua-wua dödöra, ba la’odödögö wame’e fanolo khö ndra talifusö ba wamati si göna abula dödö. (II Korindro 9:7) Imane Faulo, ”Böi aetu-aetu wangandrömi”. Lafarou dödö zolo’ö khö Yehowa ena’ö latutunö nösi dödöra khönia ba wangandrö. (I Tesalonika 5:17; II Tesalonika 3:1; Filifi 4:6, 7) Ena’ö ifondro-ndrongo wangandröda Yehowa, moguna mamati ita.​—Heberai’o 11:6.

Hadia zanolo fongambatö ena’ö so wa’ohahau dödö? I’omasi’ö ndra alawenia ira matua simane fa’omasinia mbotonia. Ira alawe ifosumange wo’omonia ira matua. Iraono la’o’ö li zatuara, börö me da’ö zomasi Lowalangi. Moguna la’amenesi ndraonora satua, ba latuturu lala si fao fa’omasi, la’oguna’ö goi-goi Lowalangi.​—Efeso 5:22-6:4; Kolose 3:18-21.

Fa’aboto ba dödö sanandrösa ba gohitö dödö Lowalangi. Oya Goroisa Moze soguna ba wolumö’ö, ba wanuturu lala ndraono Gizara’eli irege tohare Keriso. (Galatia 3:24) Hiza’i, ba wamosumange Lowalangi, lö moguna la’o’ö Goroisa Moze niha Keriso. Ba zura Waulo ba niha Keriso si so ba mbanua Heberai’o, ya’ia da’ö niha Yehuda si no tobali niha Keriso, itolo ira Faulo ena’ö so khöra wa’aboto ba dödö hadia geluaha Goroisa Moze ba hewisa wa’alua gohitö dödö Lowalangi khö Keriso. Ifatunö khöra Faulo wa fefu goi-goi si so  ba Goroisa Moze andrö ha lumö-lumö zi so dania. Duma-dumania, urifö nibali’ö sumange eluahania fa’amate Yesu tobali sumange, sangöhöli ya’ita moroi ba horö. (Heberai’o 10:1-4) Me no mate Yesu lö moguna zumange nitunu sa’e si so ba Goroisa Moze.​—Kolose 2:13-17; Heberai’o 8:13.

Fanuturu lala ba wamöfö’ö banua niha Keriso. Talifusö ira matua somasi manga’i halöwö ba mbanua niha Keriso moguna lafalua gamuata si lö sinegu ba la’o’ö goi-goi Lowalangi. (I Timoteo 3:1-10, 12, 13; Tito 1:5-9) Samosumange Yehowa böi laböhöli we’amöi ba gangowuloa ena’ö faoma lafarou dödö nawöra. (Heberai’o 10:24, 25) Owuloa ba wamosumange Lowalangi ena’ö simöi famarou dödö ba famaha’ö.​—I Korindro 14:26, 31.

No mangawuli Waulo ba Roma me isura zurania si mendrua Faulo khö Dimoteo; no lakuru ia ba wombaloi hewisa gangetula zanguhuku. Lö ato niha si lö ata’u ba wamaigi ya’ia. I’ila Faulo wa lö aratö mate ia, andrö imane ”Fasöndrata si sökhi andrö ba no ulau ba töröwa andrö ba no u’o’ozui, lö niböhöligu famati andrö.” (II Timoteo 4:7) Lö ara aefa da’ö mate Waulo, labunu ia börö wamatinia. Hiza’i, surania tobali fanuturu lala khö ndra samosumange Lowalangi irugi ma’ökhö andre.

—Te’odane-dane ba mbuku Roma; I ba II Korindro; Galatia; Efeso; Filifi; Kolose; I ba II Tesalonika; I ba II Timoteo; Tito; Filemo; Heberai’o.