Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Sura Ni’amoni’ö—Hadia Nösinia?

 FAOSATÖ 5

Lowalangi, Ifahowu’ö Gaberahamo ba Soroi Yomonia

Lowalangi, Ifahowu’ö Gaberahamo ba Soroi Yomonia

Mo’okhöta nga’ötö Gaberahamo. Ilumö’ö Yosefo ba danö Miserai Lowalangi

ABOTO ba dödö Yehowa wa samuza ma’ökhö dania itörö famakao ba fa’amate Nono ni’omasi’önia. Fama’ele’ö si no tesura ba I Moze 3:15 zangoroma’ö khöda salua andrö. Hadia tola ifaedogö ba dödö niha Lowalangi ha wa’afökhö khönia wa’amate nononia andrö? No ibe’e sambua duma-duma ba Zura Ni’amoni’ö. I’andrö Lowalangi khö Gaberahamo ena’ö ibe’e sumange nono ni’omasi’önia ya’ia da’ö Iza’aki.

Mamati Gaberahamo. Törö tödöu, wa no ifabu’u Lowalangi khönia wa moroi ba nga’ötönia Iza’aki tumbu dania Zangefa’ö andrö. Börö me faduhu dödö Gaberahamo wa tola isusugi Giza’aki Lowalangi na moguna khönia, andrö wa itehegö sumange nononia. Hiza’i, so mala’ika Lowalangi zotegu Aberahamo. Omuso dödö Lowalangi khö Gaberahamo börö me itehegö nononia si ha sambua tobali sumange. Ifuli itörö li Lowalangi khö Gaberahamo hadia zi no ifabu’u.

Ba gafuriata, so dombua nono matua khö Giza’aki, ya’ia da’ö Gezau ba Yakobo. Yakobo, i’osinangegö wamati irege itema howu-howu moroi khö Lowalangi tenga simane Gezau. Ifalalini döi Yakobo Lowalangi tobali Gizara’eli, ba ononia si 12 tobali högö ba soi ndraono Gizara’eli. Hewisa wa tola tobali ira soi sebua?

Samuza ma’ökhö ibörötaigö so wa’afökhö dödö ba ndraono Yakobo khö nakhira Yosefo. Lafamawa ia ba la’ohe ba danö Miserai tobali sawuyu. Hewa’ae simanö, tefahowu’ö Yosefo börö me lö faröi ia khö Lowalangi ba lö khönia fa’ata’u. Hewa’ae no itörö wamakao, ba gafuriata ituyu Yosefo Fara’o tobali samatörö ba danö Miserai. Tefaudu ba ginötö da’ö, alua lofo ba danö si toröi Yakobo, irege ifatenge ndraononia we’amöi mowöli balazo ba danö Miserai—meluo da’ö, Yosefo zangowuloi ba sombagi ngawalö gö ba danö Miserai! Me no falukha Yosefo khö ndra talifusönia si no mamalalini era-era, i’efa’ö fefu zala si no lafalua khönia. Aefa da’ö, iwa’ö khöra ena’ö lasawa danö Miserai. Ba labe’e khöra danö si sökhi, irege monönö wa’atora ba mo’okhöta ira. Aboto ba dödö Yosefo wa no ifalua Lowalangi hadia zi no ifabu’u.

Ba danö Miserai atua Yakobo, ba da’ö tefasui ia nga’ötönia sato. Fatua lö mate Yakobo, ifa’ele’ö wa so dania samösa Zangefa’ö ba si tobali Razo moroi ba nga’ötö Yehuda. Ba zi hauga fakhe aefa da’ö fatua lö mate Yosefo, ifa’ele’ö wa samuza inötö dania, iheta Lowalangi nga’ötö Yakobo moroi ba danö Miserai.

—Te’odane-dane ba I Moze faza 20 irugi 50; Heberai’o 11:17-22.