Iböbögö zi lö duhu Afökha khö Yobi föna Lowalangi, hiza’i, lö faröi Yobi khö Yehowa

HADIA so niha gulidanö si lö faröi khö Lowalangi na göna khönia wanandraigö sabölö-bölö, awö wa lö monönö gokhötania me no i’o’ö li Lowalangi? Da’ö nisofu-sofu niha—ba so wanema linia—ba zalua khö Yobi.

Me ba danö Miserai so nasa ndraono Gizara’eli, so samösa zi fahatö khö Gaberahamo sotöi Yobi, toröi ia ba mbanua sotöi Arab. Me luo da’ö, owulo ndra mala’ika föna Lowalangi, ba so göi Gafökha ba gotaluara. Ba wa’owulora ba zorugo andrö, ifatunö Yehowa wa’afaduhu dödönia khö genoninia si lö faröi Yobi. Imane Yehowa wa lö hadöi niha samati ba si lö faröi simane Yobi. Tobali, imane Afökha wa ifosumange Lowalangi Yobi börö me no tefahowu’ö ba me no telumö’ö ia. Molo’ö Afökha, na teheta gokhöta Yobi ba na tefakao ia, hasambalö i’elifi Lowalangi.

Itehegö Yehowa khö Gafökha ba wanandraigö Yobi. Si oföna, tehori fefu gokhötania, aefa da’ö mate nononia, ba gafuriata ibe’e wökhö bou auri khö Yobi. Börö me lö i’ila Yobi wa fanandraigö da’ö moroi khö Gafökha, manofu-nofu dödönia hana wa itehegö Lowalangi göna khönia wanandraigö andrö. Hewa’ae simanö, lö faröi ia khö Lowalangi.

Datölu zi fahuwu si lö sökhi zangondrasi Yobi. Ba wahuhuosara khönia si no tesura ba zura Yobi, lafaduhu’ö khö Yobi wa famakaonia andrö hukuma moroi khö Lowalangi, börö horö nifaluania si no tobini. Lamane wanguma’ö, lö omasi Lowalangi wamaigi ono mbanuania ba lö faduhu dödönia khöra. Itimbagö Yobi wangera-ngerara si lö atulö andrö. Imane Yobi khö ndra awönia andrö, lö faröi ndra’o khö Lowalangi ofeta ba wa’amategu!

Hiza’i, fasala Yobi börö me abölö i’angeraigö hewisa wangoroma’ö fa’atulö dödönia. Itema lira Elihu ono matua sawuyu boto nasa si no mamondrongo fefu huhuora. Itegu Yobi börö me lö aboto ba dödönia wa famaduhu’ö fa’atulö Yehowa abölö sökhi moroi ba wamaduhu’ö fa’atulö dödö niha gulidanö. Itegu göi Elihu zi fahuwu khö Yobi.

Muhede Yehowa khö Yobi ba wamareso fangera-ngerania. I’andrö Yehowa khö Yobi ba wamaigi fefu sahöli-höli dödö niwöwöi dangania, itolo Yobi ba wo’angerönusi wa lö eluaha lakhömi niha moroi ba lakhömi Yehowa. Itema degu-degu Lowalangi Yobi fao fangide-ngide’ö. Me no ’sahakhö tödö Yehowa ba sebua fa’omasi’, ifadöhö wökhö Yobi, ifuli fefu gokhöta Yobi dua winaeta, ba ifuli tumbu khönia ndraono dafulu. (Yakobo 5:11) Börö me lö faröi Yobi khö Yehowa me göna ia fanandraigö, tola ibu’a wehede Gafökha ba niha wa samösa lö hadöi niha si lö faröi khö Lowalangi na göna fanandraigö.

​—Te’odane-dane ba mbuku Yobi.