Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Sura Ni’amoni’ö—Hadia Nösinia?

 FAOSATÖ 7

I’efa’ö Lowalangi Ndraono Gizara’eli

I’efa’ö Lowalangi Ndraono Gizara’eli

Ibe’e wamakao Yehowa ba danö Miserai, Moze zondrönia’ö iraono Gizara’eli me aheta ba danö Miserai. Ibe’e Goroisa Lowalangi khö Moze ena’ö ifa’ema ba ndraono Gizara’eli

NO ARA toröi ndraono Gizara’eli ba danö Miserai, mo’okhöta ira ba monönö manö wa’atora. Hiza’i, so Wara’o sawena mamatörö si lö irai fa’ila khö Yosefo. Me i’ila razo si lö sökhi andre itugu ato ndraono Gizara’eli, so khönia wa’ata’u ba tobali i’osawuyu ndraono Gizara’eli, aefa da’ö, ibe’e goroisa ena’ö latibo’ö nono matua sawena tumbu ba Luaha Nilo. Hiza’i, so samösa ndra alawe si lö ata’u, ibini’ö nononia ono matua ba wetifeti sukhu ba ibe’e barö zukhu ba mbewe Nilo. Lasöndra nono andre ono alawe Wara’o, labe’e töinia Moze, ba la’ebua’ö ia ba gotalua nösi nomo razo Miserai.

Me no 40 fakhe Moze, göna ia abula dödö börö me no i’o’awögö ndraono Gizara’eli nibözi zaradadu ndrawa Miserai. Aefa da’ö, moloi Moze ba danö saröu ba tobali si fatewu ia ba da’ö. Me no irugi 80 fakhe ndröfi Moze, ifatenge ia Yehowa ba danö Miserai ba wamalukhaisi Fara’o, ena’ö i’efa’ö nono mbanua Lowalangi.

Ba lö itehegö Fara’o. Andrö wa ibe’e wamakao si fulu Lowalangi. Ero möi Moze ba wamalukhaisi Fara’o, tebe’e ginötö khönia ena’ö te’efa’ö ira ba wamakao andrö, tobali lö omasi Wara’o, i’osiwawöi niwa’ö Moze hegöi Yehowa. Ba gafuriata tohare wamakao si fulu, mate zia’a nono matua ba mbanua andrö—tobali lö mate niha solo’ö khö Yehowa si no mame’e do nono mbiri-biri ba högö mbawandruhö nomora. Latalu’i nomo andrö ira mala’ika solohe famakao. Andrö ero röfi lafalua Gowasa Fasa ba wanörö tödö fangorifi nibe’e Yehowa khöra.

Me no mate nono matua sia’a khö Wara’o, awena ifofanö Moze awö ndraono Gizara’eli moroi ba danö Miserai. Mofanö ndraono Gizara’eli laröi danö Miserai. Ifuli tebulö wangera-ngera Wara’o. Igohi ndraono Gizara’eli i’ohe ndra saradadunia i’oguna’ö gureta wasuwöta. Te’u’u ndraono Gizara’eli ba zinga Nasi Sukhu. Ifabali Yehowa Nasi Sukhu irege tola latörö iraono Gizara’eli hulö danö sabe’e! Me lagohi ira dawa Miserai, ilömö ira Lowalangi ifangawuli nasi ba nahiania ba ahöndrö Wara’o faoma saradadunia ba Nasi Sukhu.

Aefa da’ö, me lafazökhi nosera iraono Gizara’eli ba gahe Hili Sina’i, fawu’u li Yehowa khöra. Ifa’ema khö Moze goroisania Lowalangi ena’ö i’ombakha’ö ba ndraono Gizara’eli si tobali fanuturu lala ba wa’aurira. Na lö faröi ira ba wamatörö Lowalangi, irorogö ira Yehowa ba tobali ira soi sebua ba tefahowu’ö ira.

Alimagö sibai me ato ba gotalua ndraono Gizara’eli zi lö mamati khö Lowalangi. Andrö, ihuku ira Yehowa ba wanöröi tanö simate 40  fakhe wa’ara. Aefa da’ö, ibe’e Moze halöwö khö Yosua ba wanohugö halöwönia andrö. Ba gafuriata, iraono Gizara’eli lafa’anö ira we’amöi ba danö si no ifabu’u Yehowa khö Gaberahamo.

—Te’odane-dane ba II Moze; III Moze; IV Moze; V Moze; Zinunö 136:10-15; Halöwö Zinenge 7:17-36.