Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Mifaha’ö Ndraonomi

 FAMAHA’Ö 4

I’omusoi’ö Dödö Namania hegöi Yehowa

I’omusoi’ö Dödö Namania hegöi Yehowa

Hadia nifabu’u Yefita khö Yehowa?

Omasi nono Yefita wanolo amania wamalua si no ifabu’u, hewa’ae afökhö

Hadia no ö’ila nono alawe ba gambara andre?​— Ya’ia andre ono Yefita. Lö nifatunö Zura Ni’amoni’ö haniha döi nono alawe andrö, hiza’i, imane ba Zura Ni’amoni’ö wa no i’omusoi’ö dödö namania hegöi Yehowa. Databaso waö-waöra andre.

Yefita andre ira matua si sökhi bua-bua. Asese ifaha’ö nononia alawe sanandrösa khö Yehowa. Ya’ia andre göi ira matua sabölö ba sondrönia’ö si sökhi. Andrö wa lafili ia iraono Gizara’eli tobali sondrönia’ö ya’ira ba wasuwöta.

Samuza inötö, mangandrö Yefita khö Lowalangi fatua lö möi ia fasuwö. Ifabu’u Yefita, na möna ia, niha si’oföna möi baero ba wamaondragö ya’ia,  ibe’e khö Yehowa tobali sumange. Toröi ia ba gosali Lowalangi sagötö fa’aurinia. Osali andrö nahia wamosumange Lowalangi ba ndraono Gizara’eli. Duhu sa, möna Yefita! Haniha zi’oföna möi mamaondragö Yefita me mangawuli ia ba nomo?​—

Atulö, ononia alawe! Ono si ha sambua khö Yefita, iada’a itehe mofanö ia Amania. Abu sibai dödö Yefita. Hiza’i, no ifabu’u Yefita khö Yehowa. Imane ononia alawe khö Yefita, ’He Ama, na no öfabu’u khö Yehowa, ba hasambalö öfalua khögu zimane da’ö.’

Ero röfi, möi nono alawe tanö bö’ö wamaigi ono Yefita

Abu sibai göi dödö nono Yefita. Ba gosali, tebai möi ia nihalö ba mo’ono. Hiza’i, itolo namania ba wamalua si no ifabu’u ba i’omusoi’ö dödö Yehowa. Iröi nomora, möi ia ba gosali ba wanga’i halöwö Yehowa sagötö fa’aurinia, me da’ö halöwö sabölö sökhi molo’ö ya’ia moroi na möi ia nihalö ba mo’ono.

Molo’ö ya’ugö, hadia omuso dödö namania hegöi Yehowa ba nifaluania?​— Tatu manö! Tola göi öfalua zimane da’ö. Tola ö’omusoi’ö dödö zatuamö hegöi Yehowa na ö’omasi’ö ba ö’o’ö li Yehowa.

BASO BA ZURA NI’AMONI’Ö

  • V Moze 6:4-6

  • Zanguhuku 11:30-40

  • I Korindro 7:37, 38