Faigi nösi

Faigi ba gangolifa

Samaduhu’ö Yehowa

Fili li Nias

 FANOFU 10

Hewisa Zura Ni’amoni’ö Wanolonia Ya’o?

Hewisa Zura Ni’amoni’ö Wanolonia Ya’o?

HANA WA MOGUNA DA’A

Imane Sura Ni’amoni’ö wa ”fefu nösi Zura andrö, ba eheha Lowalangi zame’e ba dödö niha”. (II Timoteo 3:16) Na atulö da’a, tola ibe’e khöu wanuturu lala Sura Ni’amoni’ö sinangea moguna ba wa’aurimö.

HADIA NIFALUAU?

Khalaigö atö: I’ohe moto David ba mbanua si lö irai möi ia. Lö i’ila lala hegöi nahia si so ba da’ö, irege elungu ia. Tatu manö, no fasala lala nitörönia mege.

Na David ndra’ugö, hadia nifaluau?

BATOGÖ SABATA BA ANGERAIGÖ!

Oya zinangea öfili:

  1. Sofu ba niha.

  2. Faigi peta mazui oguna’ö GPS.

  3. Tohugö wofanö ba döna-döna wa hasambalö ösöndra lala satulö.

Sindruhu-ndruhu wa fasala C.

Abölö baga B moroi ba A börö me tola ö’oguna’ö peta mazui GPS ba ginötö mofanö-fanö ndra’ugö si möi fanolou ba wanöndra lala satulö.

Simanö göi Zura Ni’amoni’ö!

Buku si tohude andre tola

  • itolo’ö ba wanaögö abula dödö salua khöu

  • itolo’ö ena’ö aboto ba dödöu ndra’ugö, ba tobali’ö niha si sökhi amuata

  • ibe’e khöu wanuturu lala ba wanöndra fa’ohahau dödö ba wa’auri

 FANEMALI BA WANOFU SABÖLÖ MOGUNA BA WA’AURI

I’otarai me ta’ila fahuhuo, manofu-nofu manö ita.

  • Hana wa obalau dalu mbanua?

  • Hezo moroi ndröfi?

Ba me no alawa ndröfida, manofu zui ita sanandrösa zalua ba zi fasuida.

  • Hana wa alua zi lö sökhi?

  • Hana wa mate niha?

Hewisa na sindruhu-ndruhu so wanema linia ba Zura Ni’amoni’ö?

Ato zanguma’ö wa nösi Zura Ni’amoni’ö andrö ha hikaya ba manö-manö, lö sa’ae moguna ba ginötö andre, mazui lö aboto ba dödöda ia. Hadia atulö mazui ha molo’ö niha da’ö? Hadia fasala nirongo-rongora andrö?

Duma-dumania, ato zanguma’ö wa molo’ö Sura Ni’amoni’ö, Lowalangi zamatörö ulidanö andre. Hadia atulö da’ö? No fawuka gulidanö! Afönu wamakao ba fa’abu dödö, fökhö ba fa’amate, fa’anumana hegöi bencana alam. Na so khö Lowalangi wa’omasi, hana wa ifalua fefu da’a?

Hadia omasi ö’ila wanema linia? Te ahöli-höli dödöu na itutunö Zura Ni’amoni’ö haniha zindruhunia zamatörö ulidanö andre!

Na öhaogö öfaigi fefu mene-mene nifa’anö ba brosur andre, te’odane-dane ia ba Zura Ni’amoni’ö. Faduhu dödö ndra Samaduhu’ö Yehowa wa fefu mene-mene si sökhi, te’odane-dane ia ba Zura Ni’amoni’ö. Börö me ”eheha Lowalangi zame’e ba dödö niha, ba moguna ia, ba wamaha’ö, ba ba wangotu’ö ba ba wanga’azökhi”. (II Timoteo 3:16, 17) Moguna öfaha’ö ndra’ugö ba mbuku si no arara andre, hiza’i moguna manö ia irugi mane ma’ökhö!