Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Fanema Li moroi ba zi 10 Wanofu zi Bohou Ebua

 FANOFU 1

Haniha Ndra’odo?

Haniha Ndra’odo?

HANA WA MOGUNA DA’A

Na aboto ba dödöu haniha ndra’ugö ba so göi khöu wa’aro dödö, tola öhalö gangetula si tefaudu ba ginötö so wanandraigö.

HADIA NIFALUAU?

Khalaigö atö: Möi Karen ba pesta nifalua ndra awönia, lö ikhamö fulu menit irongo zohede furinia.

”Hana wa ha mosindro-sindro manö ndra’ugö ba da’ö?”

Ifaigi furi Karen ba i’ila nawönia Jessica so ba dangania dombua boto-boto sawena ibokai. I’ila wa ösinia andrö alkohol. Ibe’e Jessica boto-boto zi sambua si so ba gambölönia khö Karen ba imane, ”Tenga iraono sa’e ndra’ugö, tola öfalua zomasi dödöu ma’ifu.”

Sindruhunia lö omasi Karen, hiza’i Jessica andre si fahuwu khönia. Ba lö omasi Karen na so ba wangera-ngera nawönia andrö ba wamöhöli wahuwusa khönia. Aefa da’ö, Jessica andre ira alawe si sökhi. Ba na ibadu da’ö, tenga si lö sökhi nifaluania. Imane tödönia Karen, ’Da’a ha nibadu, tenga narkoba sa’atö.’

Na alua khöu zimane khö Karen, hadia nifalua?

BATOGÖ SABATA BA ANGERAIGÖ!

Ena’ö tola öhalö gangetula si sökhi na alua zimane da’a, moguna ö’okhögö jati diri. Eluaha jati diri ya’ia da’ö tödöu side-ide zanguma’ö haniha ndra’ugö ba hadia zaro dödöu. Na so khöu wa’aboto ba dödö, tenga niha bö’ö zamatörö fa’aurimö, hiza’i ya’ugö samösa.I Korindro 9:26, 27.

Hewisa ena’ö so khöu wa’aro dödö? No böröta si sökhi na öbe’e wanema li ba wanofu-nofu nifa’anö andre.

 1 HADIA ZI TOHUDE KHÖGU?

Moguna aboto ba dödöu hadia manö zi tola öfalua hegöi bua-bua si sökhi ni’okhögöu, da’ö zame’e khöu fa’aro dödö.

DUMA-DUMA ZURA NI’AMONI’Ö: Isura Faulo, ”Ba he no sambö tödö ndra’odo ba huhuo, ba tenga sa ba wa’aboto ba dödö.” (II Korindro 11:6) Börö me no aboto ba dödö Waulo Zura Ni’amoni’ö, andrö wa lö mangiwa dödönia hewa’ae göna ia folohi moroi ba niha bö’ö. So khönia wa’aro dödö hewa’ae la’o’aya ia.II Korindro 10:10; 11:5.

FARESO NDRA’UGÖ SAMÖSA: Sura ba da’a tou hadia manö zi tola öfalua mazui fa’atua-tua si so khöu.

Iada’a, tutunö gamuatamö si sökhi. (Duma-dumania, hadia ö’ame’egö tödö niha? oböwö’ö? tola mu’odaligö ndra’ugö? lö ahou-hou ndra’ugö ba ginötö?)

2 HADIA ZO’AMBÖTA KHÖGU?

Hulö simane rate, awena aro ia na sökhi wamakhainia. Simanö göi jati dirimö, tola manö alio tebulö na ötehegö zo’amböta ndra’ugö zamatörö fa’auriu.

DUMA-DUMA ZURA NI’AMONI’Ö: I’ila Faulo hadia zo’amböta ia. Imane, ”Omasido sa goroisa Lowalangi, na balazi dödögu bakha, ba u’ila goroisa bö’ö ba ndroto-ndrotogu, si fasöndra ba goroisa andrö, si so ba dödögu, ba samöbö ya’o, sawuyu goroisa horö andrö.”Roma 7:22, 23.

FARESO NDRA’UGÖ SAMÖSA: Hadia zo’amböta ndra’ugö sinangea öbulö’ö?

 3 HADIA GOHITÖ DÖDÖGU?

Hadia omasi’ö ötörö taksi ba öwa’ö khö zolohe taksi ena’ö ifasui-sui lala irugi ahori wanikhania? Bodo sibai da’ö ba ebua sibai okosinia!

Hadia wamaha’önia? Na so gohitö dödöu ba wa’auri, ö’ila hadia zinangea öfalua. No ö’era-era ba ö’ila hadia nifaluau ena’ö tola a’ozu.

DUMA-DUMA ZURA NI’AMONI’Ö: Isura Faulo, ”Ba ya’o, ba si fagohi, tenga simane ba zi lö ta’ila.” (I Korindro 9:26) Moroi na itehegö mangoloi gera-erania Faulo, itatugöi gohitö dödönia ba ifalua ba wa’aurinia.Filifi 3:12-14.

FARESO NDRA’UGÖ SAMÖSA: Sura ba da’a tou tölu gohitö dödö zi tola ökhamö ba ndröfi si so miföna.

4 HADIA ZI FADUHU DÖDÖGU?

Hulö simane eu sowa’a saro lö aso’a na ilau angi sabölö-bölö, simanö göi ndra’ugö na ö’okhögö jati diri

Na lö khöu fa’afaduhu dödö, lua-luania tobali ndra’ugö niha saombö tödö. Hulö simane loa si tebulö-bulö la’a-la’a, simanö göi ndra’ugö alio tebulö na öfagölösi ndra’ugö khö nawöu. Da’ö dandra wa lö hadöi khöu jati diri.

Na öfalua gofu hadia ia si fao fa’afaduhu dödö, no örorogö jati dirimö, böi o’ö nilau-lau niha bö’ö.

DUMA-DUMA ZURA NI’AMONI’Ö: Me ono matua Danieli ”iwa’ö sibai tödönia” wa i’o’ö fefu goroisa Lowalangi hewa’ae lafabali ia ba zoroi yomonia. (Danieli 1:8) Börö me ifalua da’ö, oroma wa lö tebulö wa’aro dödönia. Da’ö nifalua Danieli ba wa’aurinia.

FARESO NDRA’UGÖ SAMÖSA: Hadia zi faduhu dödöu? Duma-dumania: Hadia faduhu dödöu khö Lowalangi? Na ya’ia, hadia mbörö? Hadia dandra wa faduhu dödöu wa so Lowalangi?

Hadia faduhu dödöu wa goi-goi Lowalangi sanandrösa ba gamuata saekhu ba zi sökhi? Na ya’ia, hadia mbörö?

Safuriania, hezo zomasi’ö, simane bulu geu satoru ni’olo-oloi’ö nangi misa mazui eu si lö aso’a hewa’ae so nangi sabölö-bölö? Aro’ö jati dirimö, ba hulö simane eu da’ö ndra’ugö. Da’ö zanolo ya’u’gö wanema li, Haniha ndra’odo?