HANA WA MOGUNA DA’A

Tola alö mazui itugu abölö-bölö zalua, te’odaligö ia ba nifaluau.

HADIA NIFALUAU?

Khalaigö atö: Lö omasi möi Tomas ba zekola ma’ökhö, mahemolu, ba omasi ia ibato. Me tölu waŵa silalö, lafatou-tou ia ndra awönia. Aefa da’ö, lafatörö-törö döinia. Itaria so samösa zotimba buku ba danga Tomas ba i’osilömangilagö. Mazui, so zotuli’ö ia moroi furi, ba me ifaigi lö i’ila haniha, börö me ato ira. Itugu abölö-bölö zalua nasa menewi, ya’ia da’ö fahö’ö ira khönia ba online . . .

Na Tomas ndra’ugö, hadia nifaluau?

BATOGÖ SABATA BA ANGERAIGÖ!

Böi lulu manö ndra’ugö! Tola ölawa zamaka-makao ya’ugö tenga dali fa’udu. Hewisa lalania?

  •   HONOGÖ’Ö MANÖ. Imane Sura Ni’amoni’ö, ”Fefu wa’abao dödönia, ba ifalua baero si lö tödö; ba satua-tua, ba i’alösi ba dödö.” (Gamaedola 29:11) Na ahono manö ndra’ugö, hewa’ae na sindruhunia ata’u’ö mazui mofönu’ö, tola manö aföli ira wamakao ya’ugö.

  • BÖI SULÖNI. Imane Sura Ni’amoni’ö, ”Böi misulöni zi lö sökhi awönia si lö sökhi, ba niha; si sökhi mifatou-tou, ba niha fefu.” (Roma 12:17) Na ösulöni, tola manö itugu abölö-bölö zalua.

  • ARÖU’ÖGÖ BA WANGALA. Imane Sura Ni’amoni’ö, ”Satua-tua, ba i’ila wamakao, ba ibini’ö ia; ba sowöhö-wöhö, ba latörö manö, ba te’ala.” (Gamaedola 22:3) Na tola, aröu’ögö ba niha samaka-makao ya’ugö, ba na ö’ila so zi tobali ndrela khöra ba wamaka-makao ya’ugö, aröu’ögö ba da’ö.

  • TEMA KHÖRA SI FAO FA’IKI. Imane Sura Ni’amoni’ö, ”Fanema li nihaogö, ba i’alösi wönu.” (Gamaedola 15:1) Be’e wehede si möi fa’iki. Duma-dumania, na so zanguma’ö khöu wa esolo sibai ndra’ugö, lau a’iki ba ömane, ”Atulö wö niwa’ömö, esolo ae ndra’odo!”

  • ARÖU’ÖGÖ. Imane Nora, si no 19 fakhe, ”Na lö öfalawa-lawagö khöra, da’a zangoroma’ö wa no atua wangera-ngerau moroi khöra, ba so khöu wanaha tödö si tebai la’okhögö.”II Timoteo 2:24.

  • MOGUNA SO KHÖU WA’AFADUHU DÖDÖ. Aboto ba dödö niha samaka-makao haniha manö zi lö molawa ba ginötö mufakao hegöi si lö mangokhögö fa’abe’e dödö. Hiza’i, na abe’e dödöu ndra’ugö, lö sa’ae khöra fa’abarani ba wamaka-makao ya’ugö.

  • FATUNÖ BA NIHA BÖ’Ö. Imane samösa zi no irai tobali guru, ”Molo’ö ya’o, moguna lafatunö ba niha bö’ö na so zamaka-makao ya’ira. Da’ö zinangea lafalua, ba da’ö zi möi fanolo ba niha bö’ö göi ena’ö lö lafaka-fakao ira.”

Sindruhunia, na so khöu wa’afaduhu dödö, tola ökalaisi zamaka-makao ya’ugö