Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Mi’ohia’ö Wamatira

 FAZA FELEDÖLU

Ifaha’ö Ia moroi ba Zala Nifaluania

Ifaha’ö Ia moroi ba Zala Nifaluania

1, 2. (a) Börö zala nifalua Yona, hadia zalua khönia hegöi ba niha si so yawa ba göfa? (b) Hana wa möi fanoloda waö-waö zalua khö Yona?

IDÖNA-DÖNA Yona ena’ö tola ibatogö li sata’u ia. Tenga ha goso-goso nangi sabölö-bölö nirongonia, so’ira-ira me i’oloi’ö zinali göfa; tenga göi dulu sebua, si göna ba zinga göfa irege fakiki döla-döla göfa andrö. Hiza’i, sabölö ata’u Yona ya’ia da’ö fe’ao-ao niha yawa ba göfa, kafite hegöi ono buania, samorege ena’ö lö ahöndrö göfa da’ö. Faduhu dödö Yona wa hasambalö mate ndra niha da’ö fefu—börö-börö ia wa alua da’a!

2 Hana wa so Yona ba nahia si möi fama’ala andrö? No ifalua zala sebua föna Lowalanginia, Yehowa. Hadia zi no ifalua? Hadia tebai sa’ae mu’adölö’ö? Oya wamaha’ö khöda moroi ba wanema linia. Duma-dumania, ba waö-waö zalua khö Yona ta’ila wa niha si so famati manö lafalua zala—ba hewisa wamöhölira.

Sama’ele’ö moroi ba Galilaia

3-5. (a) Sasesenia, hadia nifatou-tou niha sanandrösa khö Yona? (b) Hadia zinangea ta’ila sanandrösa ba waö-waö wa’auri Yona? (Faigi nisura ba gahe zura.) (c) Hana wa abua halöwö Yona me tobali ia sama’ele’ö?

3 Na itörö tödö niha zotöi Yona, asese lafatou-tou gamuatania si lö baga, duma-dumania lö molo’ö ba sabe’e tandro. Sindruhunia, oya danö bö’ö zinangea aboto ba dödöda sanandrösa khönia. Törö tödöu wa no mufili Yona tobali sama’ele’ö khö Lowalangi Yehowa. Lö ibe’e khönia noro sebua Yehowa na ya’ia andrö faröi mazui si lö atulö tödö.

Oya danö bö’ö zinangea aboto ba dödöda sanandrösa khö Yona moroi ba gamuatania si lö baga

4 Lö oya nidunö-dunö Zura Ni’amoni’ö sanandrösa ba  waö-waö wa’auri Yona ba zilalö. (Baso II Razo 14:25.) Moroi ba Gata-heferi ia, fa’aröunia öfa kilometer moroi ba Nazareta, banua Yesu Keriso me la’ebua’ö ia te mato walu abad aefa da’ö. * No tobali sama’ele’ö Yona me mamatörö Razo Yerobeamo II moroi ba zi fulu öri ndraono Gizara’eli. No ara numalö götö Gelia; fogatinia, Elisa, no mate me mamatörö nama Yerobeamo. Hewa’ae no i’oguna’ö ndra matua andrö Yehowa ba wangohori famosumange Ba’ali, hiza’i lafuli la’odödögö wamalua sala iraono Gizara’eli. Iada’a so ira barö wamatörö razo samalua ”si fatuwu khö Yehowa”. (II Raz. 14:24) Tatu manö lö aoha khö Yona ba wamalua halöwö andrö. Hiza’i, lö si faröi ia.

5 Samuza inötö, fabö’ö wa’auri Yona. Itema halöwö moroi khö Yehowa, sabua sibai molo’ö ya’ia. Hadia halöwö nibe’e Yehowa khönia?

”Faoso, Ae ba Niniwe”

6. Hadia halöwö nibe’e Yehowa khö Yona, ba hana wa ata’u ia?

6 Imane Yehowa khö Yona, ”Faoso, ae ba Niniwe, banua sebua andrö, ba angombakha khöra; noa sa irugi ndra’o, ba da’e si yaŵa horöra andrö!” (Yo. 1:2) Aoha khöda wangi’ila hadia mbörö wa ata’u Yona ba halöwö da’ö. So mato 800 kilometer tanö ba gatumbukha mbanua Niniwe. Tola manö sara waŵa na mutörö tanö. Hiza’i, so zabölö afökhö moroi ba wanörö tanö. Ba Niniwe, lö zi lö tola lö’ö i’ombakha’ö Yona duria wanguhuku moroi khö Yehowa ba niha Asiria si lö sökhi ba safaito. Na ono mbanua Lowalangi manö lö larongo duria nifa’ema Yona, mendrua manö niha baero andrö. Hewisa wa tola te’orifi nono mbanua Yehowa si ha samösa ba Niniwe, banua sebolo nifotöi ”sange’e-nge’e andrö”?​—Nakh. 3:1, 7

7, 8. (a) Hawa’abe’e dödö Yona woloi moroi ba halöwö nibe’e Yehowa khönia? (b) Hana wa lö tahuku Yona tabali’ö niha sata’u?

7 Tola manö so ba gera-era Yona zimane da’ö. Lö aboto sibai ba dödöda. Ni’ilada ya’ia da’ö moloi ia. Ifaretakö ia Yehowa we’amöi ba gatumbukha; hiza’i, ilau ia ba gaekhula tanö ba wondrege zaröu. Itörö ngai nasi, irugi ba pelabuhan Yafo,  isöndra göfa si numalö ba Darisi. Ato pakar zanguma’ö wa ba Spanyol so Darisi. Na simanö, mofanö Yona te 3.500 kilometer moroi ba Niniwe. Fanörö köfa i’otarai mbalö Nasi Sebolo—töinia me luo da’ö Asi Mediterania—te döfi ginötö ba lala! Sindruhu-ndruhu wa no ihalö gangetula Yona moloi ia ba halöwö nibe’e Yehowa khönia!​—Baso Yona 1:3.

8 Hadia da’ö geluahania lö fa’abarani khö Yona? Böi alio-lio manö tahuku ia. Simane ni’ilada dania, iforoma’ö wa’abaraninia sahöli-höli dödöda. Hiza’i, simane ya’ita, Yona niha si lö mo’ahonoa ba oya zala nifaluania. (Zin. 51:7) Haniha moroi ba gotaluada zi lö irai ata’u?

9. Itaria, hewisa dödöda ba halöwö nibe’e Yehowa, ba hadia ngawua wehede sinangea tatörö tödöda na alua zimanö?

9 Itaria, i’andrö khöda Yehowa wamalua halöwö si tebai tafalua molo’ö ya’ita. Te abua khöda wama’ema turia somuso dödö sanandrösa ba Mbanua Lowalangi, si lö tola lö tafalua ya’ita niha Keriso. (Mat. 24:14) Aoha manö khöda wangolifugö sindruhu niwa’ö Yesu, ”Fefu hadia ia sa, ba molala ba Lowalangi.” (Mrk. 10:27) Na fataria olifu ita ngawua wehede sindruhu andrö, te göi aboto ba dödöda zalua khö Yona. Tobali, hadia lua-luania me ilau moloi Yona?

Ifotu Yehowa Zama’ele’ö Khönia si Lö Molo’ö

10, 11. (a) Hadia nitötöna Yona me no mofanö göfa andrö moroi ba pelabuhan? (b) Hadia de’ala salua ba göfa andrö hegöi ba nono bua göfa?

10 Tola takhalaigö me mangalui naha si sökhi Yona yawa ba göfa solohe bara numalö ba Fenisia. Ifaigi-faigi kafite hegöi ono bua göfa ba wamofanö köfa moroi ba pelabuhan. Te imane Yona wa no aefa ia moroi ba wama’ala hegöi ba wa’ata’u börö me lö oroma zinga nasi sa’ae. Hiza’i, fabö’ö zalua, ibörögö mobade.

11 Börö nangi sabölö-bölö andrö wa mobade nasi irege köfa segebua manö iada’a hulö no ide-idetö. Hawa’anau gölö göfa eu si no ide-ide ba satua andrö wolaya-laya ba dalu nasi sebolo ba sobade? Hadia i’ila Yona wa ’Yehowa zame’e angi sabölö-bölö ba nasi’—simane nisurania ba gafuriata? Lö ta’ila. Hiza’i, i’ila me mu’ao-ao zohalöwö ba göfa andre khö lowalangira, ba aboto göi ba dödönia wa tebai itolo ira lowalangi faya andrö. (III Moz. 19:4) Itutunö ba waö-waönia, ”Hatö ma’ifutö, ba aboto nowo.” (Yo. 1:4) Aefa da’ö, börö me soloi Yona, hewisa wa tola mangandrö ia khö Lowalangi?

12. (a) Hana wa böi alio-lio manö tahuku Yona si mörö me alua mbade? (Faigi nisura ba gahe zura.) (b) Hewisa Yehowa wangoroma’ö haniha mbörö wa tola alua gabula dödö?

 12 Börö me lö i’ila hadia zinangea ifalua Yona, no ifadölö ia tanö si tou ba ndrasa göfa. Abölö sibai wemörönia. * I’ila ia kafite göfa ba isusugi, iforege ena’ö mangandrö ia khö lowalanginia simane nifalua niha bö’ö. Börö me faduhu dödöra wa so wa’abölö si lö oroma ba mbade da’ö, andrö wa fadahö-dahö ira ba göfa wangalui haniha mbörö wa tola alua gabula dödö. Tatu manö mo’ugu-ugu dödö Yona me i’ila lö manö niha si göna dahö-dahö andrö. Lö ara oroma zindruhu. Yehowa zotatugöi ena’ö aolo ba zi samösa niha mbade andrö ba aekhu dahö-dahö khö Yona!​—Baso Yona 1:5-7.

13. (a) Hadia ni’akui Yona ba niha göfa? (b) Hadia wamangaösö ni’andrö Yona ba nono bua göfa ena’ö lafalua ba hadia mbörö?

13 Itutunö Yona khö nono bua göfa hadia ia zalua. Ya’ia enoni Lowalangi Fondrege Zabölö sotöi Yehowa. Ilau moloi ba i’afökhöi’ö dödö Lowalangi irege göna ira fefu abula dödö. Agata’u ndra matua si so ba göfa; i’ila Yona wa ata’u ba nono höröra. Manofu ira hadia zinangea lafalua ena’ö te’orifi ira ba lö ahöndrö göfa. Hadia zinangea iwa’ö? Manizi-nizi dödö Yona me ikhalaigö na ahöndrö ia ba dalu nasi sobade ba sokafu. Hiza’i, hewisa wa börö ia wa mate ndra niha da’ö fefu na sindruhu tola itolo ira? Iforege khöra wanguma’ö, ”Mituyu ndra’o ba mitibo’ödo ba nasi, ba ahono khömi nasi. Noa sa aboto ba dödögu, wa no ya’odo mbörö, wa göna ami bade sabölö-bölö andre!”​—Yo. 1:12.

14, 15. (a) Hewisa wolo’öda famati Yona? (b) Hewisa nono bua göfa ba wanema’ö ni’andrö Yona?

14 Tatu manö lö iwa’ö wehede da’ö na niha sata’u ia andrö lö? Omuso dödö Yehowa ba wa’abarani Yona hegöi fa’aoha gölönia ba wamalua da’ö ba ginötö safönu fa’ata’u andrö. Ba da’a ta’ila wa aro wamati Yona. Tola göi ta’o’ö zimane da’ö, ta’ofönai’ö wa’ohahau dödö niha bö’ö moroi khöda samösa. (Yoh. 13:34, 35) Na so niha sedöna mutolo, he soguna ba mboto, famarou dödö, mazui ba wamati, hadia aoha gölöda wame’e fanolo? Hawa’omuso dödö Yehowa na tafalua da’ö!

15 Tumbu wa’ahakhö dödö ba nono bua göfa, börö me lö  omasi ira na Yona nifazaumba si tou ba nasi! Laforege ena’ö lö ahöndrö göfa, hiza’i zaya-zaya gölöra. Itugu abölö-bölö mbade. Ba gafuriata, lö hadöi sa’ae si tola lafalua. Lafazawa ba lafazaumba Yona ba nasi ba la’angaröfili döi Yehowa, Lowalangi Yona, ena’ö ihakhösi tödö ira.​—Yo. 1:13-15.

Börö me iforege Yona khö ndraono bua göfa, andrö lafazawa ia ba lafazaumba ba nasi

Itema Wa’ahakhö Dödö Yona ba Fangorifi

16, 17. Tutunö hadia zalua khö Yona me lafazaumba ia moroi ba göfa. (Faigi göi gambara.)

16 Mo’ambau Yona ba nasi. Te ikhawi-khawisi tangania, iforege wolangi ena’ö lö ahöndrö ia, ba i’ila ba gotalua gotu-otu nasi hegöi dulu wa no aröu sa’ae göfa andrö. Aefa da’ö, i’oloi’ö ia bade irege ahöndrö. Itugu ahöndrö ia ba dalu nasi sabakha ba imane tödönia, awai khönia sa’ae wa’aurigu.

17 Ba gafuriata, itutunö Yona hewisa dödönia me luo da’ö. I’angeraigö wa’aurinia. Abu dödönia me ikhalaigö lö i’ila sa’ae gosali Yehowa ba Yeruzalema. Irasoi wa no numalö ia si tou ba nasi fondrege zabakha, ahatö ba daya-daya hili, ba iböbö ia du’u nasi. Na tafaigi, hulö da’a lewatönia.​—Baso Yona 2:3-7.

18, 19. Hadia zalua khö Yona ba dalu nasi sabakha, hadia gurifö si so me luo da’ö, ba haniha mbörö wa alua da’a fefu? (Faigi nisura ba gahe zura.)

 18 Hiza’i, sabata ua! So zolangi-langi sahatö ba da’ö—ebua sibai ba ogömi, saliwa-liwa ba nasi. Aefa daʼö, ifahatö ia khö Yona. Ebua sibai meka-meka mbawania, ira’u, aefa da’ö itölö!

Yehowa ’zamatenge i’a sebua ba wanölö Yona’

19 Iwa’ö Yona, awai khönia sa’ae wa’aurigu. Hiza’i, so zahöli-höli dödö nirasoi Yona. Lö si mate ia! Lö safufu, mazui ohama, mazui mate ba wa’oleda. Lö’ö, mohanu-hanu ia nasa, hewa’ae na hulö ba lewatönia so ia. Arara manö, ahöli-höli dödö Yona. Tatu manö Lowalanginia sotöi Yehowa, ’zamatenge i’a sebua ba wanölö Yona’. *Yo. 2:1.

20. Hadia wamaha’ö si tola tahalö khö Yona me mangandrö ia ba dalu gi’a sebua?

20 Itugu ara itugu numalö ginötö. Ba dalu nasi sogömi-gömi andrö, mangera-ngera Yona ba mangandrö ia khö Lowalangi Yehowa. Fefu wangandrönia nisura ba Yona faza dua ibe’e khöda wa’aboto ba dödö. Ba da’ö oroma wa ebua wa’aboto ba dödönia Daromali Lowalangi, börö me asese itötöi Zinunö Dawido. Ba oroma göi gamuata samarou tödöda: fangandrö saohagölö. Ihalö rahu-rahu Yona, ”Ba ya’odo, ba u’ebua’ö ligu wangandrö saohagölö khöu, ufosumange ndra’ugö; hadia nifabu’ugu, ba ubu’a: khö Yehowa i’otarai fangorifi!”​—Yo. 2:10.

21. Hadia wamaha’ö nihalö Yona sanandrösa ba wangorifi, ba hadia wamaha’ö si tebai ta’olifugö?

21 Ba ”dalu gi’a” ifaha’ö ia Yona wa tola i’orifi gofu haniha manö Yehowa, gofu hezo so, ba gofu haniha manö. Isöndra Yehowa nono mbanuania si göna abula dödö hewa’ae tobini ba i’orifi. (Yo. 2:1) Ha Yehowa zi tola mangorifi niha si no tölu ngaluo ba dalu gi’a sebua ba lö hadia ia khönia. Iada’a moguna tatörö tödöda wa Yehowa ”Lowalangi andrö, si so ba danga nosou”. (Dan. 5:23) Mo’ömö ita  khönia ero tafahasu ita hegöi fe’asoda fönania. Hadia ta’andrö saohagölö? Hadia lö mo’ömö ita khö Yehowa ba wolo’ö niwa’önia?

22, 23. (a) Hewisa wanandraigö fangandrö saohagölö Yona ba zi lö arara? (b) Hadia wamaha’ö si tola tahalö khö Yona sanandrösa ba zala si no tafalua?

22 Hewisa göi Yona? Hadia ifaha’ö ia wolo’ö niwa’ö Yehowa tandra wangandrönia saohagölö? Atulö. Me no tölu ngaluo tölu mbongi, i’ohe ia i’a andrö ba mbewe nasi ba ”i’uta’ö baene Yona” ba danö sabe’e. (Yo. 2:11) Khalaigö—me no alua fefu da’ö, lö marase Yona wolangi numalö ba gawu! Tatu manö, mowaö-waö ia sa’ae hewa’ae na lö ta’ila hezo gamaudu zinga nasi da’ö. Hiza’i lö ara aefa da’ö, tetandraigö wangandrönia saohagölö. Iwa’ö ba Yona 3:1, 2, ”Ba ifuli humede Yehowa khö Yona, imane: Faoso, ae ba Niniwe, banua sebua andrö, ba turiaigö khöra niwa’ögu khöu.” Hadia nifalua Yona?

23 Lö mendrua mangera Yona. Tabaso, ”Ba maoso Yona, möi ia ba Niniwe, i’o’ö niwa’ö Yehowa khönia.” (Yo. 3:3) Atulö, i’o’ö. Ifaha’ö ia moroi ba zala nifaluania. Moguna göi ta’o’ö wamati Yona. Fefu ita no tafalua horö; fefu ita no tafalua zala. (Rom. 3:23) Hewa’ae simanö, hadia moguna awuwu ita, mazui tafaha’ö ita ba zala nifaluada ba tafuli ta’o’ö ba wamosumange Lowalangi?

24, 25. (a) Hadia howu-owu nitema Yona fatua lö mate ia? (b) Hadia howu-howu sombalo-baloi Yona ba zi so föna?

24 Hadia ifahowu’ö Yona andre Yehowa me molo’ö ia? Tatu manö. Sambua moroi ba gotaluania, te i’ila Yona ba gafuriata wa no te’orifi nono bua göfa sato. I’anemai tebato mbade andrö börö me itehegö wa’aurinia Yona, irege ”ata’u sibai niha andrö Yehowa” ba labe’e zumange nitaba moroi na lafosumange lowalangira faya.​—Yo. 1:15, 16.

25 No ibalo-baloi Yona howu-howu sebua ba zi so föna. Fa’ara Yona ba dalu gi’a sebua, i’oguna’ö Yesu tobali fama’ele’ö ba wo’amaedolagö fa’arania ba lewatö mazui Syeol. (Baso Matai’o 12:38-40.) Hawa’omuso dödö Yona wamaigi howu-howu andrö na tesusugi ia dania ba gulidanö! (Yoh. 5:28, 29) Omasi Yehowa wamahowu’ö ya’ugö. Simane Yona, hadia öfaha’ö ndra’ugö ba zala nifaluamö, ö’o’ö ba ötehegö wa’auriu?

^ par. 4 Moguna ta’ila wa ba Galilaia i’otarai Yona börö me fahuhuo ndra Farizai’o sebua fa’asiliawa sanandrösa khö Yesu, lamane, ”Alui ba faigi, lö sama’ele’ö si otarai Galilaia.” (Yoh. 7:52) Ato ndra samo’eluaha hegöi ira peneliti sanguma’ö wa ira Farizai’o no lafagölösi manö wa lö irai so zama’ele’ö moroi ba Galilaia, banua si lö tehöngö. Na simanö, ira niha da’ö lö labe dödöra sejarah hegöi fama’ele’ö.​—Yes. 9:1, 2.

^ par. 12 I’abakhai’ö wanguma’ö Septuaginta wa abölö-bölö sibai wemörö Yona irege mohago-hago ia. Hiza’i, moroi na tafaigi lö ba dödö Yona zalua andre, te itörö tödöda wa itaria abölö wemörö niha side-ide tödö. Me alua wamakao khö Yesu ba Kabu Gezemane, Fetero, Yakobo, ba Yohane ”no mörö ira, börö wa’abu dödö”.​—Luk. 22:45.

^ par. 19 Me lafo’eluaha ba li Yunani ngawua wehede ’i’a’ ba li Heberai’o ya’ia da’ö ”urifö sebua sibai”, mazui ”i’a sebua”. Hewa’ae lö ta’ila tatatugöi hadia zaliwa-liwa ba nasi andrö, molo’ö si no lafareso, so hiu-hiu ba Nasi Mediterania ba tola latölö auri niha. Ba nahia bö’ö, so hiu-hiu sabölö esolo; hiu paus tola manö ikhamö 15 meter wa’anaunia—itaria töra!