1, 2. (a) Hadia wehede nitema Maria moroi khö zi samösa tome? (b) Hana wa hulö amaedola ba wabaliwa lala so Maria?

IFAIGI domenia Maria si fao fa’ahöli dödö. Tome da’ö, lö isofu nama faoma inania, hiza’i Maria nifalukhaisinia! I’ila Maria wa tenga niha Nazareta dome da’a. Börö me ide-ide mbanua da’ö, na so dome si tohare lö tobini ba niha sato. Adöni dödö niha gofu hezo möi ia. I’owai Maria faoma fehede si lö irai irongo ba wa’aurinia imane, ”Ya’ugö, si no falukha fa’ebua dödö! Yamutolo’ö So’aya!”​—Baso Luka 1:26-28.

2 Simanö wamatunö Sura Ni’amoni’ö Maria andrö, ono Heli, moroi ba mbanua Nazareta ba Galilaia. Me luo da’ö hulö ba wabaliwa lala so ia. No famatua ia khö duka geu sotöi Yosefo, tenga niha si kayo hiza’i niha samati. Börö da’ö, i’angeraigö wa’aurinia Maria ba zi so föna—fa’auri si ero ma’ökhö na no möi ia nihalö ba falulu fohalöwö khö wo’omonia Yosefo hegöi ba wangebua iraono. Hiza’i, ba zi lö mudöna-döna, falukha ia dome sama’ema halöwönia moroi khö Lowalangi, halöwö samabö’öni fa’aurinia.

3, 4. Ena’ö ta’ila haniha Maria, hadia zinangea tatimbagö ba hadia ni’osisi’öda?

3 Te ahöli dödöu börö me lö oya nitutunö Zura Ni’amoni’ö sanandrösa khö Maria andre. Ha ma’ifu ifatunö hewisa gamuata hegöi fa’aurinia ba zilalö, ba lö itötöi hewisa wa’asökhi mbawania. Hiza’i, hadia niwa’ö Zura Ni’amoni’ö sanandrösa khönia, moguna ia khöda.

4 Ena’ö aboto ba dödöda haniha Maria, böi tafaduhusi tödö niwa’ö ngawalö agama sanandrösa khönia. Datatimbagö niwa’ö-wa’ö niha simane nifazökhi ba gambara, ba gara, mazui adu. Tatimbagö göi wamaha’ö agama salangu dödöda niwa’ö niha sanandrösa khö Maria, simane ”Ina Lowalangi” ba ”Ratu Zorugo”. Hiza’i, ta’osisi’ö zindruhunia nifaha’ö Zura Ni’amoni’ö. Da’a zame’e khöda fa’aboto ba dödö sanandrösa ba wamatinia ba hewisa ena’ö ta’o’ö.

 Fa’atohare Mala’ika

5. (a) Hadia wamaha’ö khöda moroi khö Maria me muhede khönia Gaberieli? (b) Hadia wamaha’ö sabölö moguna khöda moroi ba duma-duma Maria?

5 Tome sangondrasi Maria tenga niha si to’ölö. Ya’ia andrö mala’ika Gaberieli. Me ikaoni faoma fehede ”si no falukha fa’ebua dödö”, ’tokea dödö’ Maria ba manofu-nofu ia hadia geluaha wehede da’ö. (Luk. 1:29) Haniha zi falukha ia fa’ebua dödö? Tenga fa’ebua dödö niha nidöna-döna Maria. Hiza’i, fa’ebua dödö Lowalangi Yehowa, da’ö niwa’ö mala’ika. Moguna khö Maria da’ö. Hewa’ae simanö, lö asiliawa ia hulö no itema wa’ebua dödö Lowalangi ba wanguma’önia. Na ta’odödögö wanema fa’ebua dödö Lowalangi, lö asiliawa ita wanguma’ö no tatema wa’ebua dödönia, tafaha’ö ita ba zabölö moguna salio aboto ba dödö Maria. Itimba Lowalangi zi fayawa ba i’ebua’ö dödönia ba zangide-ngide’ö ya’ia.​—Yak. 4:6.

Lö asiliawa Maria hulö no itema wa’ebua dödö Lowalangi ba wanguma’önia

6. Hadia halöwö si sökhi nifa’ema mala’ika khö Maria?

6 Moguna khö Maria wangide-ngide’ö simane da’ö börö me mala’ika zama’ema khönia halöwö si sökhi andrö si lö irai ikhalaigö. Itutunö khö Maria wa i’adonogö dania nono wondrege zalawa ba gotalua niha. Imane Gaberieli, ”Ba ibe’e khönia Lowalangi So’aya dadaoma duania Dawido, ba samatörö ma’uwu Yakobo ia, ba si lö aetu wa’asalawania andrö.” (Luk. 1:32, 33) Tatu manö aboto ba dödö Maria nifabu’u Lowalangi khö Dawido töra saribu fakhe silalö—wa samösa nga’ötönia tobali samatörö götö-götö wa’ara. (II Zam. 7:12, 13) Börö da’ö, tobali Mesia nononia andrö nidöna-döna nono mbanua Lowalangi barö zi hauga abad!

Mala’ika Gaberieli zama’ema khö Maria halöwö si sökhi si lö irai ikhalaigö

7. (a) Ba wanofu Maria, hadia zoroma sanandrösa khönia? (b) Hadia wamaha’ö khö ndra si bohou ebua moroi khö Maria?

7 Sabölö moguna nasa, i’ombakha’ö khönia mala’ika andrö wa ononia ”lafotöi Ono Wondrege Zalawa”. Hewisa wa tola i’adonogö Nono Lowalangi si samösa niha? Sindruhunia, hewisa wa tola mo’ono Maria? No famatua ia khö Yosefo ba lö sangowalu ira. Da’a wanofu Maria ba lö ibini’ö wanguma’ö, ”Hewisa lala da’ö, me lö u’ila ndra matua?” (Luk. 1:34) Faigi atö, ma’ifu na aila Maria wangombakha wa lö sangowalu ia. I’andrö saohagölö me ono alawe ia nasa. Iada’a, ato zi bohou ebua lö fakhamö la’angeraigö ba wamalua horö ba la’o’aya niha si lö mamalua  da’ö. Sindruhu wa no fabö’ö gulidanö. Hiza’i, lö si fabö’ö Yehowa. (Mal. 3:6) Simane ba götö Maria, ebua dödönia ba niha sangomasi’ö goi-goinia.​—Baso Heberai’o 13:4.

8. Hewa’ae niha si lö mo’ahonoa Maria, hewisa wa tola i’adonogö nga’ötö so’ahonoa?

8 Hewa’ae enoni Lowalangi si lö faröi Maria, ya’ia niha si lö mo’ahonoa. Hewisa wa tola i’adonogö nono so’ahonoa, ya’ia da’ö Ono Lowalangi? Ifatunö Gaberieli, ”So dania geheha ni’amoni’ö, ba ilumö’ö ndra’ugö fa’abölö Fondrege Zalawa; andrö göi labe’e töi ni’amoni’ö andrö, si tumbu dania, Nono Lowalangi.” (Luk. 1:35) Ni’amoni’ö eluahania ”lö ta’unö”, ”lö sinegu”, ”ohau-hau”. Si to’ölönia niha, itohugö wa lö mo’ahonoa ba nga’ötönia. Hiza’i ba da’a, ifalua dandra sahöli-höli dödö Yehowa. Ifawu’a wa’auri Nononia moroi ba zorugo ba dalu Maria si fao eheha ni’amoniö, mazui fa’abölönia, ba ”wolumö’ö” Maria, ilumö’ö nono andrö moroi ba ngawalö horö. Hadia faduhu dödö Maria ba nifabu’u mala’ika andrö? Hewisa gera-erania?

Fanema Li Maria khö Gaberieli

9. (a) Hana wa fasala niha si lö faduhu tödö ba waö-waö Maria? (b) Hewisa Gaberieli wanga’aro’ö famati Maria?

9 Niha si lö faduhu tödö ba so ösa ndra teolog, abua khöra wamaduhusi tödö wa tola mo’ono nono alawe si lö sangowalu. Hewa’ae alawa sekolara, lö aboto ba dödöra zindruhu. Simane niwa’ö Gaberieli, ”lö’ö sa hadia ia zi tebai ba Lowalangi”. (Luk. 1:37) Faduhu dödö Maria wa sindruhu niwa’ö Gaberieli börö me ira alawe samati ia. Hiza’i, famati da’ö tenga famati sau’a. Simane niwa’ö niha sasese mangera-ngera, moguna khö Maria dandra si tobali dane-dane wamatinia. No ihenaigö dandra bö’ö nasa Gaberieli. Ifatunö khö Maria zalua khö Gelizabe si tenga bö’önia si no atua ba no ara la’ila wa lö mo’ono. No ifalua dandra sahöli-höli dödö Lowalangi irege tola manabina ia!

10. Hana wa böi tawa’ö, halöwö nitema Maria andre lö fa’aombö dödö mazui aoha?

10 Hadia nifalua Maria? Halöwö sebua andre no so ba duduma hörönia ba so dandra khönia wa lö aratö ifalua Lowalangi niwa’ö Gaberieli. Böi tawa’ö wa lö hadöi fa’aombö dödö mazui aoha halöwö da’a. Duma-dumania, i’angeraigö Maria wa no famatua ia khö Yosefo. Hadia a’ozu mangowalu ira na i’ila Yosefo no manabina ia? Tanö bö’ö nasa, halöwö da’ö natafaigi, no sambua halöwö sabua. Hasambalö i’adonogö nono wondrege zalawa moroi ba gotalua niwöwöi Lowalangi—Ono ni’omasi’önia!  Irorogö ia Maria i’otarai me ono sawuyu, ba ilumö’ö moroi ba wa’alösökhi niha gulidanö. Sindruhu-ndruhu wa halöwö sabua!

11, 12. (a) Itaria, hewisa ndra matua sabölö ba samati ba halöwö sabua nibe’e Lowalangi khöra? (b) Hadia nifatunö Maria sanandrösa khönia me itema li Gaberieli?

11 Sura Ni’amoni’ö zangombakha wa ira matua sabölö ba samati, itaria abua khöra wanema’ö halöwö moroi khö Lowalangi. Abua khö Moze börö me ambö onekhe ia fahuo-huo tobali salahi Lowalangi. (II Moz. 4:10) Lö omasi Yeremia börö me ’iraono nasa ia’, talafo awuyu ndröfinia ba wanema’ö halöwö nibe’e Lowalangi. (Yer. 1:6) Ba moloi Yona moroi ba halöwönia! (Yo. 1:3) Hewisa göi Maria?

12 La’ila niha sato wangide-ngide’ö hegöi folo’ö Maria moroi ba wehedenia. Imane khö Gaberieli, ’Hiza, enoni Yehowa ndra’o! Ya’itörö khögu niwaʼöu.’ (Luk. 1:38) Fondrege zide-ide na so samösa zawuyu ira alawe; fefu wa’aurinia ba danga zamatörö ya’ia so. Hulö simane da’ö dödö Maria khö Yehowa, Samatörö ya’ia. Aboto ba dödönia wa ilumö’ö ia tanga Lowalangi, ba lö faröi Yehowa ba niha si lö faröi khönia, ba ifahowu’ö fefu wa’erege dödö nifaluania ba halöwö sabua andre.​—Zin. 18:25.

Aboto ba dödö Maria wa telumö’ö ia ba danga Lowalanginia Yehowa, si lö faröi

13. Na abua khöda mazui tebai tafalua niwa’ö Lowalangi, hewisa wa möi fanoloda duma-duma Maria?

13 Itaria i’andrö khöda Lowalangi wamalua sabua mazui si tebai tafalua ba wamaigida. Hiza’i, ba Daromalinia, oya zi no ihenaigö ena’ö faduhu dödöda khönia, ena’ö tatou’ö ita ba dangania, simane nifalua Maria. (Gamd. 3:5, 6) Hadia omasi ita? Na omasi, hasambalö ifahowu’ö ba ibe’e khöda zi tobali dane-dane wa’aro dödö khönia.

Ifalukhaisi Gelizabe

14, 15. (a) Hewisa Yehowa wamahowu’ö Maria me ifalukhaisi Gelizabe faoma Zakharia? (b) Hadia zoroma ba wehede Maria nisura ba Luka 1:46-55 sanandrösa khönia?

14 Fehede Gaberieli khö Gelizabe mo’eluaha ba dödö Maria. Ba gotalua ndra alawe ba zi sagörö ulidanö, haniha zabölö mangila salua khönia baero Gelizabe? Ba möi Maria ba hili, isawa mbanua Yehuda, te mato tölu mazui öfa hari ba lala. Me irugi nomo Gelizabe faoma Zakharia, ere andrö, ifahowu’ö Maria Yehowa faoma tandra ni’ila hörö ba wangaro’ö famatinia.  Me irongo Elizabe wangowai Maria, i’anemai manara nono si so ba dalunia börö wa’omuso dödö. Fahöna khönia geheha ni’amoni’ö ba humede ia khö Maria imane ’ina Zo’aya ya’o’. No ifa’ele’ö Lowalangi khö Gelizabe wa ono Maria zi tobali So’ayania, Mesia. Aefa da’ö, tebe’e khönia geheha ba wanuno Maria börö wamati awö wolo’önia imane, ”Ba ya’ahowu zi no faduhu tödö.” (Luk. 1:39-45) Atulö, fefu nifabu’u Yehowa khö Maria ahori itörö!

Fahuwusa Maria faoma Elizabe tobali howu-howu khöra ma’adarua

15 Aefa da’ö, fahuhuo Maria. No tefa’anö wehedenia ba Zura Ni’amoni’ö. (Baso Luka 1:46-55.) Da’ö ngawua wehedenia fondrege zanau ba Zura Ni’amoni’ö, ba oya itutunö sanandrösa ba  wa’aurinia. Oroma wangandrönia saohagölö me isuno Yehowa börö halöwönia si sökhi me tobali ia ina Mesia. Oroma göi wa ebua wamatinia me ifatunö sanandrösa khö Yehowa sangöhöndrögö niha sasiliawa ba samatörö hegöi sanolo niha si tosasa ba si so fangide-ngide’ö sangodödögö wamosumange ya’ia. Fehedenia göi zangoroma’ö wa oya zaboto ba dödö Maria. Molo’ö si no latahö, töra 20 kali itötöi Mbuku Ni’amoni’ö Heberai’o! *

16, 17. (a) Hewisa Maria faoma ononia wangoroma’ö amuata si sökhi sinangea ta’o’ö? (b) Hadia howu-howu zi tefasugi ba dödöda me möi Maria ba nomo Gelizabe?

16 Sindruhu wa no i’angerönusi Maria Daromali Lowalangi. Hiza’i, mangide-ngide’ö ia, abölö omasi ia na Sura Ni’amoni’ö zanutunö salua khönia moroi na ya’ia samösa. Ifalua göi gamuata simane da’ö ono ni’adonogönia, ya’ia me iwa’ö, ”Tenga khögu wamahaögu andrö, khö zamatenge ya’o.” (Yoh. 7:16) Sökhi na tasofu khöda samösa, ’Hadia u’osinangegö ba u’ame’egö tödö Daromali Lowalangi? Mazui abölö omasido mbua gera-eragu samösa hegöi famaha’ögu?’ No aboto ba dödöda gamuata Maria.

17 Kira-kira tölu waŵa toröi Maria ba nomo Gelizabe, tatu manö oya itema ba ibe’e göi wamarou dödö. (Luk. 1:56) Waö-waö Zura Ni’amoni’ö da’a zangokafui ba samasugi ba dödöda wa moguna sibai nifotöi fahuwusa. Na fariawö ita ba niha sangomasi’ö Lowalangida Yehowa soroi ba dödö, möi fondrou’ö wamatida ba ahatö ita khönia. (Gamd. 13:20) Iada’a, irugi inötö wangawuli Maria. Hadia niwa’ö Yosefo me no i’ila zalua khö Maria?

Maria Faoma Yosefo

18. Hadia nifatunö Maria khö Yosefo, ba hewisa dödö Yosefo?

18 Lö ibaloi Maria irege la’ila niha wa no manabina ia. Gofu hewisa hasambalö ifatunö khö Yosefo. Tatu manofu-nofu ia hewisa dania dödö ndra matua sangata’ufi Lowalangi andrö ba si sökhi amuata ba nifatunönia. Hewa’ae simanö, ifalukhaisi Yosefo ba ifatunö fefu hadia zalua khönia. Simane si no ökhalaigö, abu dödö Yosefo. Faduhu dödönia khö nono alawe ni’omasi’önia andre. Hiza’i ba wa’aniha, hulö no falimo Maria khö Yosefo. Lö ifatunö Sura Ni’amoni’ö hadia zi so ba dödö Yosefo. Hiza’i, itutunö wa ihalö gangetula Yosefo fabali ia khö Maria börö me luo da’ö hulö zi no mangowalu niha si no famatua. Lö omasi  ia na te’ailasi Maria föna niha sato mazui lahuku ia, andrö ihalö gangetula, ifabalisi ilau zi lö hede-hede. (Mat. 1:18, 19) Tatu abu dödö Maria me i’ila akao gera-era Yosefo. Hiza’i, lö fatahi ia börö me lö faduhu dödö Yosefo khönia.

19. Hewisa Yehowa wanolonia Yosefo ba wamalua satulö?

19 Si fao fa’asökhi dödö, Yehowa zanolo Yosefo ba wamalua satulö. Ba wangifi, ifatunö khönia mala’ika Lowalangi wa tabina Maria sindruhu tandra sahöli-höli dödö. Möi fangomuso dödönia da’ö! Awena ifalua Yosefo hadia nifalua Maria ba wamobörö—igo’ö simane niwa’ö Yehowa. Ihalö fo’omonia Maria ba ihenaigö ifa’anö ia ba wangebua Ono Yehowa.​—Mat. 1:20-24.

20, 21. Ba niha si no mangowalu ba sedöna mangowalu, hadia wamaha’ö si tola lahalö moroi khö Maria faoma Yosefo?

20 Niha si no mangowalu—ba sedöna mangowalu—sökhi na lafaha’ö ira khö ngambatö si bohou da’a sauri me 2.000 fakhe silalö. Me i’ila wo’omonia ifalua fefu halöwönia me no tobali ia ina, omuso dödö Yosefo me no itema wanuturu lala moroi khö mala’ika Yehowa. Aboto ba dödö Yosefo wa moguna mubalazigö Yehowa na muhalö gangetula si tefaudu. (Zin. 37:5; Gamd. 18:13) Lö aombö dödöda, ihaogö-haogö wangai angetula börö me ya’ia zi tobali högö ba nomo.

21 Baero da’ö, hadia zi tobali rahu-rahu me omasi Maria mangowalu khö Yosefo? Hewa’ae lö aboto ba dödö Yosefo fefu nifatunö khönia ba wamobörö, ibaloi Maria hadia gangetula Yosefo, börö me ya’ia zi tobali högö ba nomo. Da’ö zi tobali famaha’ö si sökhi khö Maria, simanö göi khö ndra alawe niha Keriso iada’a. Ba gafuriata, salua andre zi tobali famaha’ö khö Yosefo hegöi Maria wa moguna sibai wahuhuosa si sökhi ba si lö fawini tödö.​—Baso Gamaedola 15:22.

22. Hadia dane-dane wangowalu Yosefo faoma Maria, ba hadia ginötö nibeʼe khöra ba zi so föna?

22 Songambatö si bohou andre no labörögö wangowalura ba dane-dane saro. La’omasi’ö Yehowa ya’ira si darua ba la’omusoi’ö dödönia me tobali ira satua si sökhi ba la’ame’egö tödö halöwöra. Tatu manö, no ibalo-baloi ira howu-howu sebua—ba fanandraigö sebua göi. No so fönara ginötö ba wangebua Yesu, si tedou tobali niha si tehöngö si no irai auri ba gulidanö.

^ par. 15 Moroi ba wehede Maria si no tesura, hulö no ihalö ngawua wehede Khana, ira alawe samati si no manema howu-howu Yehowa ya’ia da’ö me tumbu khönia nono. Faigi kotak ”Dombua Wangandrö si Toröi-röi ba Dödö” ba Faza 6.