Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Mi’ohia’ö Wamatira

 FAZA SARA

”Mohede Ia Na, Hewa’ae No Mate Ia”

”Mohede Ia Na, Hewa’ae No Mate Ia”

1. Hadia mbörö wa tebai möi nösi nomo Gadamo hegöi Khawa ba Kabu Edena, ba hadia nidöna-döna Habeli?

NO ITÖNGÖ manö Habeli mbiri-birinia sahono wemanga du’u ba gahe hili. Aefa da’ö, te ifakhölö ia moroi ba zaröu wamaigi si sambua nahia ba oroma khönia haga si takile. Aboto ba dödönia wa so ba da’ö wöda alitö nifaligo-ligoi si lö tebato ba womba’a lala saekhu ba Kabu Edena. Ba da’ö toröi zatuania mböröta, iada’a tebai möi ira ba da’ö hegöi iraononia. Khalaigö hewisa me itörini mbunia angi ba zi tanö owi me ifaöga ia wamaigi talu mbanua ba wo’angeraigö Somböi ya’ia. Hadia tola ifuli sökhi wahuwusa niha khö Lowalangi? Da’ö nidöna-döna Habeli.

2-4. Hewisa wahuhuosa Habeli khöda iada’a?

2 Iada’a, fahuhuo khöu Habeli. Hadia tola öfondro-ndrongo ia? Te tebai. No ara mate nono Gadamo numero dua andre. No ara taya mbotonia tobali gawu-gawu arakhagö 60 abad. Sanandrösa ba niha si no mate, imane Sura Ni’amoni’ö, ”Ba lö hadia ia la’ila.” (Zango. 9:5, 10) Lö irai itötöi Habeli zambua fehede zi no tesura ba Zura Ni’amoni’ö. Na simanö, hewisa wa tola fahuhuo ia khöda?

3 Tebe’e geheha khö Waulo ba wanutunö sanandrösa khö Habeli, ”Moroi ba da’ö göi, wa muhede ia na, hewa’ae no mate ia.” (Baso Heberai’o 11:4.) Hewisa lala Habeli wahuhuosa? Ya’ia da’ö ba wamati. Habeli niha si oföna mangokhögö amuata si sökhi andrö. Aro sibai wamatinia irege lö olifu niha, ba tola ta’o’ö iada’a. Na tafaha’ö ita ba ta’odödögö wangohia’ö famatinia, ba da’ö ta’ila wa no fahuhuo khöda waö-waö Habeli.  

4 Hadia wamaha’ö khöda moroi ba wamati Habeli hewa’ae na lö oya zi tesura ba Zura Ni’amoni’ö sanandrösa khönia? Datafaigi.

 Tedou Me ”I’otarai Mböröta Danö”

5. Hadia geluaha wehede Yesu me iwa’ö no auri Habeli ”i’otarai mböröta danö”? (Faigi nisura ba gahe zura.)

5 Tumbu Habeli ba wamobörö sejarah niha gulidanö. Furi da’ö, ifatunö Yesu wa tumbu Habeli andrö ”i’otarai mböröta danö”. (Baso Luka 11:50, 51.) Ulidanö niwa’ö Yesu ya’ia da’ö fefu niha si tola muhöli moroi ba horö. Hewa’ae Habeli andre numero öfa niha ba gulidanö, hiza’i hulö ya’ia niha si oföna si tola muhöli ba wamaigi Lowalangi. * Atulö, tenga ba gotalua niha si sökhi amuata te’ebua’ö Habeli.

6. Hewisa zindruhunia zatua Habeli andrö?

6 Hewa’ae bohou muwöwöi gulidanö me luo da’ö, ngambatö niha no ihawui ira fa’ogömi-gömi. Satua Habeli sotöi Adamo ba Khawa, no siga-siga ba abölö. Hiza’i, so zi tebai lakhamö ba wa’aurira me no aekhu ira ba horö ba la’ila da’ö. Mo’ahonoa ira mböröta, ba latema wa’auri si lö aetu. Aefa da’ö, lalawa Lowalangi Yehowa, ba ifofanö ira moroi ba nomora Faradaiso ba Kabu Edena. Börö me lafalua zomasi dödöra ba lö la’angeraigö zoguna ba nga’ötöra, taya khöra wa’auri si lö aetu ba lö mo’ahonoa ira.​—I Moz. 2:15–3:24.

7, 8. Hadia niwa’ö Khawa me tumbu Ga’ino, ba hadia zi tumbu ba wangera-ngerania?

7 Me no lafofanö ira moroi ba Kabu Edena, latörö riri ira Adamo ba Khawa. Hiza’i, me tumbu khöra nono sia’a, labe’e  töi Ka’ino mazui ”Si No Musöndra”, imane Khawa, ”No usöndra niha, itolo Lowalangi.” Ba wehede Khawa andrö, te itörö tödönia nifabu’u Yehowa ba Kabu Edena, me ifa’ele’ö wa tumbu dania ”ma’uwu”, mazui nga’ötö moroi ba ndra alawe, ba da’ö dania zamakiko si lö sökhi, samaelungu Adamo ba Khawa. (I Moz. 3:15; 4:1) Hadia imane tödönia Khawa, ya’ia ndra alawe ba wama’ele’ö da’ö ba Ka’ino ”ma’uwu” nifabu’u?

8 Fasala sibai na da’ö zi so ba dödö Khawa. Mendrua manö na lafaha’ö Ga’ino ira satuania wa ya’ia ma’uwu andrö, fa’asiliawa niha si lö mo’ahonoa ba wa’auri Ga’ino itugu monönö. Aefa da’ö, ifuli zui tumbu nono matua khö Khawa, hiza’i lö hadöi fehede fa’omasi simane khö Ga’ino. Lafotöi ia Habeli, eluahania ”Hanu-Hanu”, mazui ”Zaya-Zaya Gölö”. (I Moz. 4:2) Hadia famotöi andrö da’ö geluahania khö Gadamo ba Khawa wa abölö pade nasa Ga’ino moroi khö Habeli? Tola manö, hiza’i lö aboto sibai ba dödöda.

9. Hadia wamaha’ö si tola lahalö ira satua iada’a moroi khö zatua siföföna?

9 Ira satua iada’a, oya wamaha’ö khöra moroi khö zatua siföföna andrö. Ba wehede hegöi ba nifaluami, hadia mifaha’ö nonomi ena’ö so khöra wa’asiliawa, lafalua zomasi dödöra, ba fakhögusa? Mazui, hadia mifaha’ö ira wangomasi’ö Lowalangi Yehowa ba fahuwu khönia? Alimagö sibai, satua siföföna lö sa’ozu labu’a zi tobali fo’ömöra. Hewa’ae simanö, so wanötöna ba nga’ötöra.

Hewisa Habeli Wondrou’ö Famatinia?

10, 11. Hadia halöwö Ga’ino faoma Habeli, ba hadia gamuata nidou’ö Habeli?

10 Me itugu ebua-bua ndraono si darua andrö, te ifamaha ira Adamo ba wohalöwö ena’ö lasöndra zoguna ba nösi nomora. Sohalöwö ba danö Ga’ino, ba tobali kubalo Habeli.

11 Hiza’i, so nifalua Habeli sabölö moguna. Ba zi hauga fakhe, idou’ö wamatinia—amuata si sökhi nisura Waulo ba gafuriata. Tandraigö angerönusi! Lö hadöi niha si tobali duma-duma khö Habeli me luo da’ö. Tobali, hewisa wa tola idou’ö wamatinia khö Lowalangi Yehowa? Angeraigö zi tölu dane-dane saro sangabe’e’ö famatinia.

12, 13. Hewisa Habeli wondrou’ö famatinia me ifaigi-faigi niwöwöi Yehowa?

12 Niwöwöi Yehowa. Atulö, no i’elifi danö Yehowa irege tumbu zinanö sodoi sanaha fa’amowua danö. Hewa’ae simanö, lö tebulö danö wanga’asogö balazo irege lasöndra göra ira Habeli hegöi ösi nomonia. Ba lö hadöi fangelifi si göna gurifö, simane  fofo, i’a; mazui hili, mbombo, idanö ba asi; mazui lawuo, talu mbanua, luo, baŵa, ba döfi. Gofu hezo ifakhölö ia Habeli, i’ila dandra wa’omasi, fa’atua-tua, ba fa’asökhi dödö Lowalangi Yehowa, samazökhi fefu hadia ia. (Baso Roma 1:20.) Tatu manö, möi fangaro wamati Habeli na i’angerönusi fefu da’ö si fao fangandrö saohagölö.

Moroi ba niwöwöi, ba da’ö isöndra dane-dane wamati saro Habeli khö Zomböi sebua fa’omasi

13 Ibe’e ginötönia Habeli ba wo’angerönusi ngawalö wamati. Khalaigö atö hewisa wokubaloinia mbiri-biri. Samösa gubalo hasambalö oya itörö tanö. Fefu gurifö si mauwu andre idönisi wanörö ahe hili, latörö mbawa danö, la’ötö nidanö ba wangalui du’u satabö, umbu nidanö si sökhi, ba nahia wolombase sahono. Moroi ba ngawalö nifazökhi Lowalangi fefu, ha biri-biri wondrege zi tebai, hulö da’ö wa tewöwöi ena’ö larorogö ba lakubaloi ira niha. Hadia simanö göi Habeli, moguna khönia wanuturu lala, folumö’ö, ba fo’ame’egö tödö moroi khö Lowalangi fondrege zatua-tua si töra moroi ba niha? Tatu manö i’ohe fefu da’ö ba wangandrö irege aro wamatinia.

14, 15. Hewisa zi no ifabu’u Yehowa tobali dane-dane khö Habeli ba wamalua fo’angerönusi?

14 Nifabu’u Yehowa. Tatu manö ladunö-dunö ira Adamo ba Khawa khö ndraonora zalua ba Kabu Edena ba hana wa lafofanö ira moroi ba da’ö. Andrö, oya zinangea i’angerönusi Habeli.

15 No iwa’ö Yehowa wa te’elifi mbenua. I’ila samösa Habeli zinanö sodoi tandra wa itörö zi no tefa’ele’ö andrö. No göi ifa’ele’ö Yehowa wa afökhö ba marase Khawa wanabina hegöi ba wo’ono. Me tumbu ndra akhinia, tatu manö i’ila Habeli wa itörö wehede da’ö. Ifa’ele’ö Yehowa wa ebua wangisö ba fa’omasi Khawa khö wo’omonia, ba ifatörö ia Adamo. Ahori i’ila Habeli fefu wangabu dödö da’a. Gofu hezo manö, aboto ba dödönia wa fefu niwa’ö Yehowa tola mufaduhusi tödö. Tobali, so dane-dane saro ba wamati Habeli ba zi no ifabu’u Lowalangi sanandrösa ba ”ma’uwu”, mazui nga’ötö, sanga’azökhi fefu ngawalö zala i’otarai Kabu Edena.​—I Moz. 3:15-19.

16, 17. Hadia zi tola ifaha’ö ia Habeli moroi khö ndra kerubi Yehowa?

 16 Enoni Yehowa. Tenga ba niha isöndra duma-duma si sökhi Habeli, hiza’i tenga göi ha niha wondrege zatua-tua ba gulidanö me luo da’ö. Me lafofanö Gadamo ba Khawa moroi ba Kabu Edena, no itatugöi Yehowa ena’ö lö lafuli ira ba Waradaiso andrö hegöi nga’ötöra. Ba wozago bawandruhö, ifataro ndra kerubi Yehowa—mala’ika si so dadaoma salawa ba föda so’alitö nifaligo-ligoi.​—Baso I Moze 3:24.

17 Khalaigö dödö Habeli me ide-ide ia, ba i’ila-ila ndra kerubi andrö. Ba mboto wa’aniha, oroma wa ya’ira niha sagabölö. Ba ahöli-höli dödönia ba ’wöda’ andrö, si hola-hola si lö tebato wamaligoi. Me itugu tedou wa’ebua Habeli, hadia no irai i’ila aföli ndra kerubi andrö ba laröi nahia nizagora? Lö’ö. Bongi ma’ökhö, döfi numalö zi döfi, irugi ngahönö fakhe, lö laröi nahia wohalöwöra ira mala’ika sagatua-tua ba sagabölö andrö. Ba da’ö aboto ba dödö Habeli wa so genoni Lowalangi Yehowa si lö faröi. Börö ndra kerubi andrö aboto ba dödönia hewisa wa’alöfaröi ba folo’ö niwa’ö Yehowa si lö tesöndra ba nösi nomonia. Duma-duma ndra mala’ika andrö zi tobali fangaro wamatinia.

Sandrohu fa’auri Habeli, i’ila hewisa wolo’ö ba falöfaröi kerubi khö Yehowa

18. Hadia zi tobali dane-dane khöda iada’a ba wangokhögö famati saro?

18 Me no i’angerönusi fefu ngawalö nifa’ele’ö Yehowa ba niwöwöi dangania, nifabu’u Lowalangi, hegöi duma-duma ndra mala’ika, tatu manö itugu aro wamati Habeli. Hadia tenga no fahuhuo khöda duma-duma Habeli? Yafaduhu dödö ndra si  bohou ebua wa tola ladou’ö wamatira khö Lowalangi Yehowa soroi ba dödö, hewa’ae na lö omasi nösi nomora. Börö me so niwöwöi Lowalangi ba zi fasuida, Sura Ni’amoni’ö, hegöi duma-duma zamati, da’a zi tobali dane-dane saro ba wangokhögö famati iada’a.

Hana Wa Tohude Zumange Nibe’e Habeli?

19. Hadia zindruhu saboto ba dödö Habeli ba gafuriata?

19 Me itugu monönö wamati Habeli khö Yehowa, i’alui lala ena’ö iforoma’ö ba mbua-bua. Hiza’i, hadia zi tola tabe’e khö Zomböi banua si yawa awö danö? Tatu manö, lö moguna khö Lowalangi game’ela mazui fanolo moroi ba niha. Ba gafuriata, aboto ba dödö Habeli zindruhu andre: Na soroi ba dödö ibe’e zabölö sökhi khö Yehowa, omuso dödö Nama sebua fa’omasi.

Ibe’e zumange Habeli moroi ba wamati; Ka’ino lö’ö

20, 21. Hadia manö zumange nibe’e Ga’ino faoma Habeli, ba hadia niwa’ö Yehowa?

20 Ifa’anö Habeli zumange nibe’enia moroi ba mbiri-biri nikubaloinia. Ifili mbiri-biri fondrege zi sökhi, ya’ia da’ö sia’a, ba ngawalö zabölö sökhi. Ba ginötö da’ö göi, omasi Ga’ino wanema howu-howu Lowalangi ya’ia me ibe’e sumange mbua nowinia. Hiza’i, fabö’ö gohitö dödö Ga’ino moroi khö Habeli. Ba da’ö oroma gamaehutania me inötö labe’e zumange.

21 Ono Gadamo si darua andre te la’oguna’ö galitö hegöi meza ba wame’e sumange, ba te oroma khö ndra kerubi si tobali salahi Yehowa ba gulidanö me luo da’ö. Ifondro-ndrongo Yehowa! Tabaso, ”Ba omasi Yehowa Habeli ba sumange khönia.” (I Moz. 4:4) Lö nifatunö Zura Ni’amoni’ö hewisa Lowalangi wangoroma’ö fa’omasinia.

22, 23. Hana wa itema Yehowa zumange nibe’e Habeli?

22 Hana wa itema Lowalangi zumange Habeli? Hadia börö zumange nibe’enia? Atulö wa no ibe’e zumange sauri Habeli, iduwagö ndro sebua böli. Hadia i’ila Habeli wa’ebua mböli zumange nibe’enia? Hauga wulu fakhe me no aefa götö Habeli, i’oguna’ö Lowalangi nono mbiri-biri si sökhi si no amaedola höli Nononia so’ahonoa, ”Ono Mbiri-biri khö Lowalangi”, niduwagö do. (Yoh. 1:29; II Moz. 12:5-7) Hiza’i, tatu manö ambö aboto ba dödö Habeli da’ö fefu.

23 Saboto ba dödöda ya’ia da’ö: Ibe’e zumange sabölö sökhi Habeli moroi ba gokhötania. Somasi Yehowa, tenga ha sumangenia, hiza’i nihania. Fa’omasi ba famati soroi ba dödö, da’ö zango’ou Habeli ba wame’e sumange khö Yehowa.

24. (a) Hana wa lö sala zumange nibe’e Ga’ino? (b) Hadia zi fakhili-khili nifalua niha iada’a simane Ka’ino?

 24 Fabö’ö nibe’e Ga’ino. Ba ”sumange andrö khönia, ba lö omasi” Yehowa. (I Moz. 4:5) Lö fasala zumangenia; ba gafuriata, itehegö Huku Lowalangi na mube’e mbua zinanö tobali sumange. (III Moz. 6:14, 15) Hiza’i, sanandrösa khö Ga’ino imane Sura Ni’amoni’ö wa ”lö sökhi mbua-buania”. (Baso I Yohane 3:12.) Simane niha sato iada’a, te imane Ka’ino wa obönö na ha asala muforoma’ö wolulu fa’auri khö Lowalangi. I’anemai oroma ba nifaluania wa ambö famati ba fa’omasinia sindruhu khö Yehowa.

25, 26. Hadia wamangelama nibe’e Yehowa khö Ga’ino, ba hadia nifaluania?

25 Me i’ila Ka’ino wa lö omasi Yehowa zumange nibe’enia, hadia ifomaha ia moroi ba duma-duma Habeli? Lö’ö. Hiza’i, abao sibai dödönia ba mofönu ia khö nakhinia. I’ila Yehowa nösi dödö Ga’ino ba fahuhuo ia si fao fa’ebolo dödö. Ifangelama ia Yehowa wa tola tobali horö sebua nifaluania, ba imane khö Ga’ino wa tola la’alawa’ö ia na ifalalini gera-erania.​—I Moz. 4:6, 7.

26 Lö ibe’e dödönia Ka’ino wamangelama moroi khö Lowalangi. Idönisi nakhinia we’amöi ba mbenua. Ba me no larugi ba da’ö ibunu Habeli. (I Moz. 4:8) Tola tawa’ö Habeli ziföföna manörö famakao börö wangata’ufi Lowalangi, si oföna manörö fa’amate. No mate ia, ba lö saetu waö-waöinia irugi da’ö.

27. (a) Hana faduhu dödöda wa tesusugi Habeli? (b) Hewisa lala ena’ö falukha ita khö Habeli dania?

27 Amaedola zauri, mu’ao ndro Habeli khö Lowalangi Yehowa ba wanulöni mazui mangandrö fa’atulö. Ifalua wa’atulö Lowalangi, ya’ia me ihuku Ga’ino börö wa’alösökhinia. (I Moz. 4:9-12) Sabölö moguna, fahuhuo khöda iada’a waö-waö wamati Habeli. Fa’aurinia kira-kira otu fakhe, adogo-dogo ndröfinia moroi ba niha sato me luo da’ö, hiza’i sindruhu-ndruhu i’oguna’ö ba wamalua si sökhi. Hewa’ae mate ia, aboto ba dödönia wa i’omasi’ö ia Amania Yehowa si so ba zorugo. (Heb. 11:4) Andrö faduhu dödöda wa lö olifu Yehowa zotöi Habeli, ibaloi wanusugi ba waradaiso. (Yoh. 5:28, 29) Hadia omasi’ö falukha khönia dania? Tola falukha ndra’ugö na öhalö gangetula ba wamondro-ndrongo niwa’ö Habeli ba ö’o’ö duma-duma wamatinia.

^ par. 5 Ngawua wehede ”i’otarai mböröta danö” eluahania fananö tanömö zinanö, mazui monga’ötö, börö da’ö mo’amakhaita ia ba nga’ötö niha siföföna. Hiza’i, hana wa Habeli nitötöi Yesu me ”i’otarai mböröta danö”, tenga Ka’ino, ono sia’a? Börö gamuata ba angetulania, i’odödögö Ka’ino wolawa Lowalangi Yehowa. Simane satuania, lö tesusugi mazui muhöli ia.