Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Mi’ohia’ö Wamatira

 FAZA FELELIMA

I’o’awögö Nono Mbanua Lowalangi

I’o’awögö Nono Mbanua Lowalangi

1-3. (a) Hana wa hulö zata’u-ta’u Gesitera me edöna ifalukhaisi wo’omonia? (b) Hadia wanofu nitutunöda sanandrösa khö Gesitera?

IHONOGÖ dödönia Esitera me ahatö irugi newali razo ba Zusa. Lö aoha wamalua da’a. Lafazökhi gödo razo andrö hegöi fa’amolakhöminia fefu ena’ö ahöli-höli dödö niha—adu nifoe simane sawi so’afi, samana, hegöi singo ba dowa batu bata sola’a-la’a si no takile; no tefa’oli döla-döla domosa hegöi gambara nadu segebua; inönö nasa tefaudu ba danö salo’o sebolo ahatö ba Hili Zagros sosalju hegöi ba Nidanö Khoaspes sohahau. Fefu da’a möi famasugi ba dödö zangondrasi wa ebua kuaso ndra matua sedöna ifalukhaisi Esitera andrö, samotöi ya’ia ”razo fondrege zalawa”. Fo’omonia ndra matua da’ö.

2 Fo’omo ira matua! Fabö’ö sibai Ahasiwero moroi ba wo’omo ira matua nidöna-döna nono alawe Yahudi si lö faröi! * Lö i’o’ö duma-duma gofu haniha manö, simane Aberahamo, ira matua solo’ö fanuturu lala moroi khö Lowalangi si fao fangide-ngide’ö ba wamondro-ndrongo niwa’ö wo’omonia Sara. (I Moz. 21:12) Lö aboto ba dödö razo haniha Yehowa, Lowalangi nifosumange Gesitera, mazui Oroisania. Hiza’i, aboto ba dödö Ahasiwero huku Persia, hegöi huku si lö manehegö nifalua Gesitera dania. Hadia da’ö? Molo’ö huku Persia, tola labunu niha sangondrasi razo na lö nikaoni razo ia. Lö mukaoni Gesitera, hiza’i hasambalö ifalukhaisi razo. Me ahatö irugi golayama tanö bakha, i’ila ia razo moroi ba dadaomania, ba worasoi Gesitera hulö möi ia ba wamaondragö fa’amatenia.​—Baso Gesitera 4:11; 5:1.

3 Hana wa ifalua zi möi famununia? Hadia wamaha’ö khöda ba wamati ndra alawe sahöli-höli dödöda andre? Si oföna, datafaigi hewisa wa isöndra dadaoma si lö to’ölö lasöndra niha bö’ö, ya’ia da’ö tobali ratu Persia.

 Fa’auri Gesitera ba Wamobörö

4. Hewisa wa’auri Gesitera ba wamobörö, ba hana wa tola toröi ia khö zi fasambua ama khönia sotöi Morodokhai?

4 Esitera andrö iraono si lö ama si lö ina. Lö hadöi angombakhata sanandrösa khö zatuania samotöi ya’ia Hadasa, na ba li Heberai’o ”mirtel”, sa’a-sa’a mao sobowo mbunga safusi si baga-baga. Me mate zatua Gesitera, so samösa dalifusönia si sökhi tödö sotöi Morodokhai, ahakhö dödönia nono da’ö. Morodokhai andrö si fasambua ama khönia, hiza’i alawa ndröfinia moroi khö Gesitera. Ihalö Gesitera, isou tobali ononia.​—Gesi. 2:5-7, 15.

Sinangea na omuso dödö Morodokhai khö nono nisounia

5, 6. (a) Hewisa Morodokhai wangebua’ö Esitera? (b) Hewisa wa’auri Morodokhai hegöi Esitera ba Zusa?

5 Toröi Morodokhai hegöi Esitera ba ibu kota Persia tobali niha Yahudi nitibo’ö. Te asese la’o’aya ira ba da’ö börö agama hegöi Huku ni’o’öra. Tatu manö lö aefa Gesitera khö Morodokhai samaha’ö ya’ia sanandrösa khö Yehowa, Lowalangi si so fa’ahakhö dödö sasese mangorifi ono mbanuania moroi ba de’ala ba zilalö—ba simane da’ö zui ifalua dania. (III Moz. 26:44, 45) Börö da’ö, aro wa’omasi hegöi fa’alöfaröi ba gotalua Gesitera ba Morodokhai.

6 Te mohalöwö Morodokhai tobali pejabat ba gödo razo ba Zusa, ba mudadao ia ba zinga mbawandruhö razo fao khö ndra enoni tanö bö’ö. (Gesi. 2:19, 21; 3:3) Lö ta’ila sibai hewisa me awuyu-wuyu Gesitera. Hiza’i, ya’ia zondrorogö si fasambua ama khönia andrö sabölö atua moroi khönia ba ibabaya halöwö ba nomo. Toröi ira ba mbanua side-ide ba zi tambai nungo nidanö hegöi gödo razo. Te omasi möi ia ba fasa ba Zusa wamaigi-maigi gama-gama nifamawa tuka gana’a, firö, hegöi sogale tanö bö’ö. Lö irai itötöna Esitera wa ifasui ia dania gama-gama sebua böli simane da’ö; lö i’ila hewisa wa’aurinia dania.

 ”Si Sökhi Sibai Bawa”

7. Hana wa laheta Wasi moroi ba dadaoma wa’aratu, ba hadia nifalua razo aefa da’ö?

7 Samuza ma’ökhö, kaliru niha Zusa börö me lafatou-tou wa’afawuka ba nomo razo. Ba gowasa sebua nifalua Ahasiwero, ibe’e gö sami hegöi agu khö ndra awönia salawa, ikaoni ratunia si baga-baga sotöi Wasi samalua owasa göi khö ndra awönia ira alawe. Hiza’i, lö omasi möi Wasi. Aila sibai razo ba mofönu ia, börö da’ö isofu khö ndra sanuturu lala hadia hukuma sinangea mube’e khö Wasi. Lua-luania? Laheta khönia dadaoma wa’aratu. Labörögö wangalui ira enoni razo nono alawe sawuyu-wuyu si sökhi bawa ba zi sagörö soi andrö ba hezo nifili razo da’ö zi tobali ratu si bohou.​—Gesi. 1:1–2:4.

8. (a) Hana wa aombö dödö Morodokhai me itugu ebua-bua Gesitera? (b) Molo’ö ya’ugö, hewisa zi bagania na tafaigi wa’asökhi mbawa? (Faigi göi Gamaedola 31:30.)

8 Tola takhalaigö Morodokhai na itaria ifaigi Gesitera hulö wa’omasi nama khö nononia si fao fa’omuso dödö ba fa’aombö-aombö dödö; si fasambua ama khönia andre no tobali ono alawe si baga-baga. Databaso, ”Ba no si sökhi sibai boto nono alawe andrö, ba si sökhi sibai bawa.” (Gesi. 2:7) Lö talafo isuno Sura Ni’amoni’ö wa’abaga-baga mbawa—sindruhu omuso dödöda na tafaigi, hiza’i sökhi na itete fa’atua-tua hegöi fangide-ngide’ö. Na lö’ö, tola manö fayawa, mangosebua hegöi amuata tanö bö’önia. (Baso Gamaedola 11:22.) Hadia da’ö göi nifaigimö? Hewisa Gesitera—hadia fa’abaga-bagania andrö mbörö wa tobali ia niha si sökhi mazui si lö sökhi? Datafaigi.

9. (a) Hadia zalua me la’ila Gesitera ira sohalöwö khö razo, ba hana wa’afökhö wabalisania khö Morodokhai? (b) Hana wa itehegö Morodokhai na mangowalu Gesitera ba niha baero si tenga si sara lala wamati khöra? (Faigi göi kotak.)

9 La’ila ira enoni razo wa’abaga-baga Gesitera. Lahalö ia moroi khö Morodokhai, lafaogö ba ndra alawe tanö bö’ö, ba la’ohe ba gödo razo sebua ba zi tambai nidanö. (Gesi. 2:8) Tatu afökhö wabalisara ya’ira si darua, si no amaedola nama khö nono. Tatu lö omasi Morodokhai na mangowalu nono nisounia andre ba niha si tenga si sara lala wamati hewa’ae razo ia; hiza’i lö hadöi si tola ifalua. * Ihaogö ifondro-ndrongo mene-mene Morodokhai Esitera fatua lö lafawu’a ia! Ba lala numalö ba gödo Zusa, manofu-nofu Gesitera. Hewisa lua-lua wa’aurinia dania?

 ’La’omasi’ö Ia Dozi Sangila Ya’ia’

10, 11. (a) Hadia lua-luania khö Gesitera me awena toröi ia ba nahia si bohou? (b) Hewisa wangoroma’ö Morodokhai wa so so dödönia Gesitera?

10 Izumaigö so Gesitera ba nahia si bohou si lö irai möi ia. So ia ba gotalua ’nono alawe’ si no la’owuloi moroi ba zi sagörö Öri Persia. Tatu fabö’ö-bö’ö zi to’ölö lafalua, li hegöi amuatara. Samösa nifataro ba wamaigi-maigi iraono alawe sagawuyu andre sotöi Hega’i ba latörö wangehao wa’abaga-baga barö zi döfi ba labe’e wanikha fangomösi somuhua. (Gesi. 2:8, 12) Börö me no larugi nahia si sökhi, tola manö ha fa’abaga-baga ni’era-erara börö me simane da’ö wa’auri si to’ölö mufalua ba da’ö irege asiliawa ira ba fahindri. Hewisa Gesitera?

11 Tatu manö so so dödö Morodokhai Gesitera. Tabaso, ero  ma’ökhö manörö-nörö ia ahatö ba nomo ndra alawe andrö ba wamaigi-maigi na lö hadia ia khö Gesitera. (Gesi. 2:11) Te moroi khö ndra alawe si sökhi tödö irongo duria sanandrösa khö Gesitera, irege omuso dödönia. Hadia mbörö?

12, 13. (a) Hadia zi toröi-röi ba dödö niha khö Gesitera? (b) Hana wa omuso dödö Morodokhai me lö ifatunö Esitera wa niha Yahudi ia?

12 Toröi-röi ba dödö Hega’i lagu Gesitera irege iforoma’ö wa’asökhi dödö, ibe’e dafitu ndra alawe si tobali ngoni-ngoninia hegöi nahia si sökhi ba nomo ndra alawe andrö. Imane ba waö-waönia, ”Ba la’omasi’ö Gesitera dozi sangila ya’ia.” (Gesi. 2:9, 15) Hadia ha börö wa’abaga-baga wa adöni dödö niha khönia? Tenga, tenga ha baga-baga Gesitera.

Aboto ba dödö Gesitera wa abölö moguna wangide-ngide’ö hegöi fa’atua-tua moroi ba wa’abaga-baga mbawa

13 Duma-dumania, tabaso, ”Ba lö ni’ombakha’ö Gesitera ha  mado ia ba ha niha niwara; noa sa iwa’ö khönia Morodokhai, böi yamu’ombakha’ö.” (Gesi. 2:10) No iwa’ö Morodokhai khö Gesitera ena’ö böi ifatunö wa niha Yahudi ia; no i’ila wa lö sökhi gera-era ndra salawa Persia ba soira. Omuso dödönia me atua-tua Gesitera ba molo’ö, hewa’ae tenga ba ngainia so ia!

14. Hewisa ndraono si bohou ebua ba ginötö andre tola la’o’ö duma-duma Gesitera?

14 Iraono si bohou ebua ba ginötö andre tola la’omusoi’ö dödö zatuara hegöi sangebua’ö ya’ira. Na aröu ira moroi ba ngai zatua, tola latimbagö zondrönisi ya’ira ba zi lö sökhi ba la’osambua’ö dödöra ba zindruhu si no lafaduhusi tödö hewa’ae so ira ba gotalua niha si lö sökhi era-era ba samalua horö. Na lafalua da’ö, no la’omusoi’ö dödö Namara ba zorugo simane nifalua Gesitera.​—Baso Gamaedola 27:11.

15, 16. (a) Hana wa Esitera nifili razo? (b) Hana wa abua khö Gesitera me no fabö’ö wa’aurinia?

15 Me irugi inötö wolohe Esitera föna razo, latehegö khönia hadia manö zomasi ia ifili, te ba wonönö fangehao wa’asökhinia. Hiza’i, si fao fangide-ngide’ö, lö i’andrö zi töra moroi ba zi no itötöi Hega’i. (Gesi. 2:15) Aboto ba dödönia wa tenga fa’abaga-baga mbawa zadöni dödö razo; hiza’i amuata si sökhi ba fangide-ngide’ö si lö tesöndra ba gödo razo. Hadia sindruhu da’ö?

16 Imane waö-waönia, ”Ba omasi razo Gesitera, moroi ba wa’omasinia ndra alawe bö’ö fefu, ba ebua dödönia khönia, moroi ba wa’ebua dödönia ba nono alawe bö’ö fefu. Ba ibe’e ba högönia mbala högö wo’omo razo ba ibali’ö fo’omo razo, fangali Wasi.” (Gesi. 2:17) Tatu abua ba nono alawe niha Yahudi sangide-ngide’ö andre wamaogö ya’ia me no fabö’ö wa’aurinia—iada’a no tobali ia ratu si bohou, fo’omo razo sebua kuaso ba zi sagörö ulidanö me luo da’ö! Hadia fayawa ia börö dadaomania si bohou? Lö’ö!

17. (a) Hadia manö nifalua Gesitera ba wolo’ö niwa’ö namania sanou ya’ia? (b) Hana wa moguna khöda duma-duma Gesitera iada’a?

17 I’o’ö Esitera niwa’ö Morodokhai. Ibini’ö gamakhaitania ba niha Yahudi. Baero da’ö me irongo Morodokhai no mamagölö niha ba wamunu Ahasiwero, i’o’ö Esitera niwa’ö Morodokhai ba wamangelama razo irege lö a’ozu gera-era si lö sökhi andrö. (Gesi. 2:20-23) Lö tebulö mamati Gesitera khö Lowalangi si fao fangide-ngide’ö hegöi folo’ö. Moguna khöda duma-dumania börö me labali’ö tandra wa’akala na molo’ö niha ba  ginötö andre, ba fao dödöra na lö folo’ö hegöi famadaö! Hiza’i, niha sindruhu-ndruhu mamati la’ame’egö tödö wolo’ö, simane nifalua Gesitera.

Tetandraigö Wamati Gesitera

18. (a) Hana wa lö omasi ituhi danö Morodokhai föna Hamano? (Faigi nisura ba gahe zura.) (b) Hewisa ndra matua hegöi ira alawe samati iada’a la’o’ö duma-duma Morodokhai?

18 Samösa ndra matua sotöi Hamano tebe’e khönia dadaoma salawa ba gödo Ahasiwero. Ituyu ia razo tobali perdana menteri irege ya’ia zi oföna mame’e fanuturu lala ba numero dua ia ba nöri da’ö. No itatugöi razo wa hasambalö latuhi danö na falukha ira khö pejabat andre. (Gesi. 3:1-4) Abua khö Morodokhai wolo’ö huku da’a. Aboto ba dödönia wa moguna i’o’ö niwa’ö razo, hiza’i abölö ifosumange Lowalangi. Hamano andre niha Agagi. Eluahania, ya’ia nga’ötö Agagi, razo Gamaleki nihuku Zamu’eli sama’ele’ö khö Lowalangi. (I Zam. 15:33) Lö sökhi gamuata niha Gamaleki irege tobali ira udu Yehowa hegöi iraono Gizara’eli. No i’elifi ira Lowalangi. * (V Moz. 25:19) Hewisa wa ituhi danö föna zalawa Gamaleki niha Yahudi si lö faröi andrö? Tebai ifalua da’ö Morodokhai. No aro dödönia. Ofeta ma’ökhö, ira matua hegöi ira alawe samati latehegö nosora ba wolo’ö goi-goi da’a, ”Ni’o’ö khö Lowalangi, moroi ba wolo’öda ba niha.”​—Hal. 5:29.

19. Hadia zomasi Hamano ba hewisa wamoregenia ena’ö faduhu dödö razo? 

19 Mofönu sibai Hamano. Hiza’i, lö ibönö khönia na ha asala i’alui lala wamunu Morodokhai. Omasi ia na tehori Morodokhai hegöi soinia! Iforege Hamano wango’aya niha Yahudi ena’ö faduhu dödö razo. Lö itötöi döi soi da’ö hulö tenga soi sinangea mu’ame’egö tödö ira ”si no muzaewe ba niha bö’ö, ba danö fefu”. Inönö nasa wa’alösökhinia, iwa’ö wa ya’ira andrö lö la’o’ö huku razo; tobali ira samadaö sinangea mu’angelamaisi. Omasi ia wame’e kefe sebua khö razo ba wotuhini soguna ba wangohori niha Yahudi moroi ba nöri da’ö. * Ibe’e Ahasiwero laedurunia si so tandro khö Hamano tandra wa fao dödönia ba da’ö.​—Gesi. 3:5-10.

20, 21. (a) Hadia lua-lua gangombakhata Hamano ba niha Yahudi ba zi sagörö Öri Persia hegöi khö Morodokhai? (b) Hadia ni’andrö Morodokhai khö Gesitera ena’ö ifalua?

 20 Gösö möi ngoni-ngoni si fakudo ba zi sagörö nöri sebolo andrö, la’ombakha’ö hukuma fa’amate ba niha Yahudi. Khalaigö atö lua-luania me terongo gangombakhata andrö ba zi sagörö Yeruzalema, nahia niha Yahudi sangawuli moroi ba Mbabilona sangodödögö mamazökhi banua andrö si lö hadöi öli. Me irongo duria si lö sökhi andre, te itörö tödö Morodokhai ira hegöi si fahuwu khönia ba talifusönia ba Zusa. Ba wa’abu dödönia andrö, isika nukhania, i’onukha goni ba ilau nawu ba högönia, mu’ao-ao ia si fao fe’e ba newali. No mudao-dao Hamano fao ia khö razo wamadu-madu, ma’ifu lö abu dödönia zalua khö ndra niha Yahudi hegöi awö-awöra ba Zusa.​—Baso Gesitera 3:12–4:1.

21 Aboto ba dödö Morodokhai wa so zinangea ifalua. Hiza’i, hewisa wamaluania? Irongo Esitera wa abu dödö Morodokhai ba ifa’ohe’ö nukha, hiza’i lö omasi ia na larara dödönia. Te no ara manofu-nofu Morodokhai hana wa itehegö Lowalanginia Yehowa lahalö Gesitera tobali ratu, fo’omo zamatörö niha  baero. Iada’a itugu i’ila hadia mbörö. Ifa’ema goroisania khö Ratu Esitera ena’ö i’andrö wa’ahakhö dödö razo ba wango’awögö ”iwara”.​—Gesi. 4:4-8.

22. Hana wa’ata’u Gesitera ba wangondrasi razo, fo’omonia? (Faigi nisura ba gahe zura.)

22 Te abu dödö Gesitera me irongo da’ö. Da’a wanandraigö sabölö-bölö ba wamatinia. Ata’u ia, ba lö ibini’ö wangombakha me itema li moroi khö Morodokhai. Ifasugi ba dödö Morodokhai sanandrösa ba huku razo. Tola labunu niha sangondrasi razo na lö mukaoni. Tola te’orifi niha andrö na i’oro’ö zi’onia ana’a razo. Ba hadia so dani Gesitera ba wanötöna fa’ahakhö dödö razo mendrua manö me itörö tödönia zalua khö Wasi me lö i’ondrasi razo? Ifatunö khö Morodokhai wa no 30 hari lö nikaoni razo ia! Andrö manofu-nofu ia hadia no tebulö dödö razo khönia. *Gesi. 4:9-11.

23. (a) Hadia niwa’ö Morodokhai ba wangabe’e’ö famati Gesitera? (b) Hana wa sinangea ta’o’ö duma-duma Morodokhai?

23 Ibe’e wanema li si tefaudu Morodokhai ba wanga’aro’ö famati Gesitera. I’abe’e dödönia Morodokhai, na lö hadöi nifaluania, fangorifi niha Yahudi so moroi ba danö bö’ö. Hiza’i, hewisa wa itötöna auri ia Esitera me ibörögö alua wamakao? Ba da’a iforoma’ö wamatinia Morodokhai khö Yehowa, si lö irai manehegö tehori nono mbanuania mazui lö alua zi no ifabu’u. (Yos. 23:14) Aefa da’ö, manofu Morodokhai khö Gesitera, ”Ha zangila, na tenga börö götö da’e, wa no tobali fo’omo razo ndra’ugö!” (Gesi. 4:12-14) Hadia tenga sinangea ta’o’ö Morodokhai? Faduhu sibai dödönia khö Lowalanginia, Yehowa. Hadia simanö göi ita?​—Gamd. 3:5, 6.

 Famati Sabölö Aro moroi ba Wa’ata’u ba Wa’amate

24. Hewisa Gesitera wangoroma’ö famati ba fa’abarani?

24 Moguna ihalö gangetula ba wa’alio Esitera. I’andrö khö Morodokhai ena’ö fao ira fuasö, fefu nono mbanuania ba zi tölu hari, ba irahugö goroisania faoma fehede si fao famati ba fa’abarani si tehöngö ofeta ma’ökhö, ”Na matedo, ba hana na matedo.” (Gesi. 4:15-17) Ba zi tölu hari andrö, i’osindruhugö wangandrö tenga simane si to’ölö. Ba gafuriata, irugi inötö si no mutatugöi. Ifake nukha wa’aratu hegöi gama-gama sebua böli, ihaogö ia fondrege wa’abaga-baga ena’ö adöni dödö razo. Aefa da’ö ilau mofanö.

Itehegö nosonia Esitera ba wolumö’ö ono mbanua Lowalangi

25. Tutunö zalua me i’ondrasi wo’omonia Esitera.

25 Simane nitutunö ba wamobörö faza da’a, mofanö Gesitera ba wamalukhaisi razo. Tola takhalaigö hewisa we’ugu-ugu dödönia ba iforege wangandrö. Möi ia ba golayama tanö bakha, ba i’ila no mudadao Ahasiwero ba dadaomania. Te itandraigö ba wanahö tödö razo moroi ba zikhala—sikhala nifoadu faoma bu si gariti si handro bu’u galisi, si no muhaogö wanaba hegöi bu gambi nitaba ni’o’öfa sagi. Na ibalo-baloi manö, hulö ngaotu fakhe wa’ara. Ba gafuriata i’ila ia fo’omonia. Tatu tokea dödö razo, hiza’i no ohau-hau mbawania. I’oro’ö zi’onia ana’a!​—Gesi. 5:1, 2.

26. Hana wa moguna wa’abarani ba niha Keriso sindruhu simane Esitera, ba hadia mbörö wa awena famobörö da’a?

26 Omasi razo wanema’ö Esitera ba ifondro-ndrongo niwa’önia. No ihalö gangetula Esitera ba wango’awögö Lowalanginia hegöi soinia, si tobali duma-duma ba nono mbanua Lowalangi sagötö fa’ara. Iada’a, lö olifu niha Keriso sindruhu duma-duma da’a. Simane niwa’ö Yesu, so wa’omasi si no aoha gölö ba zolo’ö khönia si lö faröi. (Baso Yohane 13:34, 35.) Ba wangoroma’ö fa’omasi da’a, moguna wa’abarani simane nifalua Gesitera. Hiza’i, hewa’ae no i’o’awögö nono mbanua Lowalangi Esitera, ha famobörö da’a. Hewisa ena’ö faduhu dödö razo wa so zi lö sökhi ni’era-era zanuturu lala sabe’e dödönia sotöi Hamano? Hewisa ena’ö tola i’orifi soinia? Tatutunö aefa faza da’a.

^ par. 2 Si to’ölönia, lafotöi Ahasiwero andre Xerxes I, si so kuaso ba Nöri Persia me böröta abad si lima SM.

^ par. 9 Faigi kotak ”Fanofu Sanandrösa khö Gesitera”, ba Faza 16.

^ par. 18 Te samösa Hamano andre zauri ba gotalua niha Gamaleki si lö mubunu, satonia no ahori tebunu me götö Razo Hisikia.​—I Nga. 4:43.

^ par. 19 Ibe’e Hamano 10.000 talenta wirö, na iada’a ngaotu zuta dolar AS. Na Ahasiwero andrö Xerxes I, tola manö adöni dödönia ba gefe niwa’ö Hamano. Ebua ahori gefe Xerxes me fasuwö ia ba wolawa Yunani si no ara i’anga-anga, hiza’i kala ia.

^ par. 22 Tehöngö Xerxes I wa niha sabe’e tandro ba mo’inö-inötö. Sejarawan Yunani sotöi Herodotus, isura duma-duma wasuwöta Xerxes ba wolawa Yunani. Ifaretakö razo ena’ö lafazökhi zoroso solangi, lafa’oli göfa gamaudu Selat Helespontus. Me tekiko zoroso andrö ba mbade, ifaretakö Xerxes ena’ö la’ewa mbagi zamazökhi soroso andrö, ba ”ifahuku’ö” Helespontus laböbözi nidanönia fao fe’ira-ira falelesa. Me luo da’ö, samösa ndra matua si kayo, i’andrö ena’ö la’efasi nononia ba halöwö zaradadu. Hiza’i, ifaretakö Xerxes ena’ö lasila dalu nono matua andrö, ba lafa’ele’ö ba niha sato si tobali famangelama.