Faigi nösi

Faigi ba gangolifa

Samaduhu’ö Yehowa

Fili li Nias

 FAMAHAʼÖ 56

Omasi Yosia Goroisa Lowalangi

Omasi Yosia Goroisa Lowalangi

Me walu fakhe ndröfi Yosia, tobali ia razo Yehuda. Me luo daʼö, omasi sibai niha mbanua wakelemusa ba fanömba adu. Me 16 fakhe ndröfi Yosia, iʼalui hewisa wamosumange si tefaudu ba somasi Yehowa. Me 20 fakhe ndröfinia, ibörögö Yosia wanudugö adu awö naha wameʼe sumange ba wamatörö andrö. Ba me 26 fakhe ndröfinia, iʼalui lala enaʼö lafuli lahaogö gosali Yehowa.

Ba gosali, isöndra ere sebua sotöi Hilikia ngaʼölu zura si so Oroisa Yehowa, te nisura Moze daʼö. Aefa daʼö, sekretaris razo sotöi Safano, iʼohe ngaʼölu zura andrö khö Yosia ba iʼebuakö linia wombaso Oroisa daʼö. Me irongo daʼö Yosia, aboto ba dödönia wa no hauga fakhe lö laʼoʼö niwaʼö Yehowa ira niha Yehuda. Imane Razo Yosia khö Hilikia, ’Mofönu sibai khöda Yehowa. Aeʼe fahuhuo khönia. Hasambalö ifatunö khöda hadia zinangea tafalua.’ Itema wangandrönia Yehowa ifaʼema khö Huleda, ira alawe samaʼeleʼö, ’No laʼerogö ndraʼo ira niha Yehuda. Göna ira fanguhuku, hizaʼi tenga ba götö wamatörö Yosia tobali razo, börö me no iʼide-ideʼö ia Yosia’, eluahania omasi ia ifaböʼöni moloʼö Oroisa andrö.

Me irongo wehede daʼö Razo Yosia, möi ia ba gosali ba iʼandrö enaʼö owulo fefu niha Yehuda. Aefa daʼö, ibaso Goroisa Yehowa fönara. Fazazi Yosia hegöi niha mbanua fefu wa hasambalö laʼoʼö niwaʼö Yehowa soroi ba dödö.

 No hauga fakhe lö lafalua gowasa Fasa ira niha Yehuda. Hizaʼi, me ibaso ba Goroisa andrö Yosia wa moguna lafalua gowasa andrö ero röfi, imane ba nono mbanuania, ’Tafalua Wasa khö Yehowa.’ Oya gurifö nihenaigö Yosia si tobali sumange ba ifataro enaʼö so zanunö ba gosali. Lö ara, lafalua Wasa ira niha Yehuda aefa daʼö Owasa Roti si Lö Mufaruka Ragi fitu hari waʼara. Iʼotarai ba götö Zamueli, lö irai lafalua Wasa simane daʼö. Omasi sibai Yosia Goroisa Lowalangi. Hadia omasiʼö göi öfahaʼö ndraʼugö sanandrösa khö Yehowa?

”Fandru föna gahegu daromalimö andrö, ba haga ba lalagu.”​—Zinunö 119:105