Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Fahaʼö Ndra’ugö ba Cerita-Cerita Zura Niʼamoniʼö

 FAMAHAʼÖ 42

Lö Ataʼu ba Lö Faröi Yonata

Lö Ataʼu ba Lö Faröi Yonata

Ono siaʼa khö Razo Saulo töinia Yonata, sanuwö si lö faʼataʼu. Iwaʼö Dawido wa Yonata andrö abölö alio ia moroi ba moyo ba abölö moroi ba zingo. Samuza maʼökhö, iʼila Yonata zaradadu Wilisiti yawa ba hili. Imane khö zolohe födania, ’Na ibeʼe dandra Yehowa awena tasuwö ira. Na lawaʼö khöda ira niha Wilisiti, ”Miʼaine!” Daʼö ginötönia tasuwö ira.’ Lö ara muʼao zaradadu Wilisiti lamane, ’Miʼaine ba daʼa, milawa ndraʼaga!’ Möi ira yawa ba hili andrö ba lakalaisi 20 zaradadu.

Börö me siaʼa nono Yonata andrö khö Zaulo, yaʼia sindruhunia zi tobali razo aefa daʼö. Hizaʼi, aboto ba dödö Yonata wa Dawido nifili Yehowa si tobali razo Gizaraʼeli. Hewaʼae simanö, lö afökhö dödö Yonata. Fahuwu sibai Yonata khö Dawido. Fazazi ira wa  faoma latolo ba larorogö nawöra. Si tobali buala ba wahuwusara, ibeʼe Yonata nukhania sanau khö Dawido, föda, fana, ba böbö löwi.

Me moloi Dawido börö me igohi ia Saulo, ifalukhaisi ia Yonata imane, ’Böi ataʼufi. No ifili ndraʼugö Yehowa tobali razo. Aboto ba dödö bapagu daʼö.’ Hadia omasi ndraʼugö so zi fahuwu khöu simane Yonata?

No hauga kali itolo nawönia Yonata hewaʼae mosikho. Iʼila wa edöna ibunu Dawido Razo Saulo. Börö daʼö, imane khö bapania, ’Lö hadöi sala nifalua Dawido. Fasala ndraʼugö na öbunu ia.’ Börö daʼö, mofönu sibai Zaulo khö Yonata.

Hauga fakhe aefa daʼö, mate ba wasuwöta Zaulo faoma Yonata. Me no mate Yonata, iʼalui Dawido nono Yonata sotöi Meribaʼali. Me falukha ira imane Dawido, ’Yaʼo zondrorogö yaʼugö sandrohu faʼaurimö börö me si fahuwu khögu bapamö. Ba nomogu toröi ndraʼugö ba fao ita wemanga.’ Lö irai olifu Dawido zi fahuwu khönia sotöi Yonata.

”Miʼomasiʼö nawömi simane fangomasiʼögu yaʼami. Lö hadöi sangokhögö faʼomasi sabölö ebua moroi ba waʼomasi niha sanehegö nosonia salahi zi fahuwu khönia.”​—Yohane 15:12, 13