Imane Yehowa khö Zamueli, ’Aeʼe ba nomo Gizaʼi. Samösa moroi ba gotalua nononia zi tobali razo si bohou ba Gizaraʼeli.’ Börö daʼö mofanö Zamueli möi ia ba nomo Gizaʼi. Me iʼila nono matua siaʼa khö Gizaʼi, iwalinga ono daʼö zi tobali razo. Hizaʼi imane khönia Yehowa wa tenga ono daʼö nifilinia. Imane Yehowa, ’Tödönia nifaigigu, tenga botonia.’

Iʼohe nononia si daönö tanö böʼö Izaʼi khö Zamueli. Hizaʼi imane Samueli, ’Tenga yaʼira nifili Yehowa. Hadia so nasa?’ Imane Izaʼi, ’So samösa tö, siakhi sibai. Töinia Dawido. No möi ia manaro biri-biri.’ Me tohare Dawido, imane Yehowa khö Zamueli, ’Yaʼia nifiligu!’ Ifataro ia Samueli tobali razo si bohou ba Gizaraʼeli, aefa daʼö ifaduwa wanikha ba högö Dawido.

Lö ara, fasuwö ndraono Gizaraʼeli lalawa niha Wilisiti. So zaradadu niha Wilisiti sebua niha, töinia Goliato. Ero maʼökhö iʼoʼaya-aya ndraono Gizaraʼeli Goliato. Muʼao ia imane, ’Mifili samösa zolawa yaʼo. Na möna niha daʼö, tobali ndraʼaga sawuyumi. Hizaʼi na möna ndraʼo, tobali ami sawuyuma.’

Tohare Dawido möi ia ba nose zaradadu Gizaraʼeli ba wolohe balazo ndra gaʼania si tobali saradadu. Irongo-rongo wehede Goliato andrö ba omasi ia wolawa Goliato. Imane khönia Razo Saulo, ’No ide-ide nasa ndraʼugö.’ Imane Dawido, ’Yehowa zanolo yaʼo.’

 Ibeʼe khö Dawido mbaru wasuwötania Saulo, hizaʼi imane Dawido, ’Lö toʼölö ndraʼo wamake daʼa.’ Andrö iʼohe katafelenia Dawido yaʼia daʼö fakake ba wamazaumba kara ba möi ia ba nungo nidanö. Ifili lima ngawua nono gara salösö ba nidanö andrö ibeʼe ba kandre-kandrenia. Aefa daʼö, ifahatö ia Dawido khö Goliato. Muʼao niha sebua andrö imane, ’Ae ba daʼa ono. Akha ubeʼe nagolemö ö wofo faoma ö gutu ndruʼu.’ Hizaʼi, lö ataʼu Dawido ba muʼao ia, ’Ölawa ndraʼo faoma föda ba toho, hizaʼi ulawa ndraʼugö ba döi Yehowa. Nilawamö Lowalangi, tenga yaʼaga. Fefu zi so ba daʼa, hasambalö laʼila wa abölö Yehowa moroi ba wöda mazui toho. Ibeʼe ami ba dangama.’

Ibeʼe gara andrö Dawido ba katafelenia, ifaligoi sahori dölania. Börö me Yehowa zanolo Dawido, göna gara andrö ba gangango Goliato. Asoʼa niha sebua andrö ba mate. Moloi fefu niha Wilisiti. Hadia faduhu dödöu khö Yehowa simane Dawido?

”Na ba niha tebai, na ba khö Lowalangi, tenga simane daʼö. Börö me lö si tebai khö Lowalangi.”​—Mareko 10:27