Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Fahaʼö Ndra’ugö ba Cerita-Cerita Zura Niʼamoniʼö

 FAMAHAʼÖ 94

Latema Geheha Niʼamoniʼö Ira Nifahaʼö

Latema Geheha Niʼamoniʼö Ira Nifahaʼö

Fulu hari me no mangawuli Yesu ba zorugo, latema geheha niʼamoniʼö ira nifahaʼönia. Me luo daʼö döfi 33 M, ba ato niha zi möi ba Yeruzalema ba gowasa Fendrakose. So mato 120 ndra nifahaʼö Yesu sowulo ba mbateʼe tanö yawa. Ba zi lö mudöna-döna, so zalua sahöli-höli dödö. So li si hulö nangi sabölö-bölö ba zi sambua omo andrö. Aefa daʼö, alua zi hulö galitö ba högö ndra nifahaʼö ba ibörögö tola fahuhuo ira ba li tanö böʼö.

Niha si tohare moroi ba soi böʼö si möi ba Yeruzalema, larongo li daʼö. Iʼanemaiʼö möi ira ba nomo andrö ba wamaigi hadia zalua. Tokea ira me larongo fahuhuo ndra nifahaʼö ba li niʼilara. Lamane, ’Moroi ba Galilaia ndra niha daʼa. Hana wa tola laʼila lida?’

Aefa daʼö mosindro Wetero hegöi ira sinenge föna niha sato. Ifatunö khöra Fetero wa no labunu Yesu ba no ifuli isusugi ia Yehowa. Imane Fetero, ’Ba zorugo so Yesu iadaʼa ba gambölö Lowalangi. No ibeʼe Yesu geheha niʼamoniʼö si no izazi. Daʼö mbörö  wa miʼila ba mirongo zahöli-höli dödö salua maʼökhö.’

Tefaudu ba dödö niha samondrongo wehede Wetero, ba manofu ira, ”Hadia zinangea mafalua?” Imane khöra, ’Mifalalini gera-erami moroi ba horömi, ba mibayagö ami idanö ba döi Yesu. Mitema göi geheha niʼamoniʼö.’ Me luo daʼö, so mato 3.000 niha nibayagö idanö. Iʼotarai daʼö, alio sibai monönö waʼato nifahaʼö Yesu ba Yeruzalema. Börö wanolo geheha niʼamoniʼö, andrö wa oya lafasindro mbanua niha Keriso ira sinenge, enaʼö tola lafahaʼö fefu ndra nifahaʼö sanandrösa ba zi no iʼoroisi Yesu khöra.

”Na bewemi zamaduhuʼö ba niha wa Yesu andrö Soʼaya, ba sindruhu-ndruhu mamati ami wa no isusugi ia Lowalangi moroi ba gotalua zi mate, hasambalö teʼorifi ami.”​—Roma 10:9