Faigi nösi

Faigi ba gangolifa

Samaduhu’ö Yehowa

Fili li Nias

 FAMAHAʼÖ 99

Sozago Kurunga Ifahaʼö Ia ba Zindruhu

Sozago Kurunga Ifahaʼö Ia ba Zindruhu

Ba Wilifi, so zawuyu ira alawe nifakao malaʼika si lö sökhi. Börö geheha daʼö wa tola mamaʼeleʼö zawuyu andrö. Börö daʼö, oya isöndra gefe sokhö yaʼia. Me ofeta Waulo faoma Sila ba Wilifi, mato hauga hari igoʼö-goʼö ira moroi furi sawuyu andrö. Börö malaʼika si lö sökhi andrö muʼao ia, ”Enoni Lowalangi Fondrege Zalawa ndra niha daʼa.” Ba gafuriata, imane Faulo khö malaʼika si lö sökhi andrö, ’Ba döi Yesu, hetaʼögö moroi ba niha daʼa!’ Iʼanemaiʼö aheta malaʼika si lö sökhi andrö.

Mofönu sibai zokhö sawuyu andrö me lö saʼae isöndra gefe moroi khönia. Laʼohe Waulo faoma Sila föna zohalöwö ba gödo zanguhuku ba lamane, ’No lasawö goroisa ira niha daʼa ba abu dödö niha ba mbanua sebua labeʼe!’ Laböbözi Waulo faoma Sila ba iwaʼö sohalöwö ba gödo zanguhuku enaʼö labeʼe ira ba gurunga. Ibeʼe ira sozago kurunga bakha ba wondrege zogömi-gömi, aefa daʼö ikalo gahera.

Manunö Waulo faoma Sila lasuno Yehowa, ba larongo daʼö ösi gurunga tanö böʼö. Ba zi talu mbongi, lö mudöna-döna waʼatohare ndruru danö sabölö-bölö, modögö fefu gurunga. Teboka fefu mbawandruhö gurunga. Agaefa rate faoma kalo niha gurunga. Iʼanemaiʼö möi zozago kurunga ba wamaigi bawandruhö si no teboka. Börö me iwalinga no ahori moloi niha gurunga, ihalö wöda edöna ibunu ia.

Iʼanemaiʼö muʼao Waulo, ’Böi bunuʼö! Yaʼe ndraʼaga ba daʼa!’ Ituhi danö sozago kurunga andrö föna Waulo faoma Sila. Manofu ia, ”Hadia nifaluagu enaʼö teʼorifi ndraʼo?” Lamane khönia, ’Miʼamati khö Yesu, yaʼugö hegöi ösi nomou.’ Aefa daʼö, lafahaʼö ia ba daromali Yehowa ira Faulo faoma Sila ba tebayagö idanö zozago kurunga andrö awö nösi nomonia.

”Laraʼu ba lafakao ami, laʼohe ami ba nahia waʼowulo hegöi ba gurunga. Laʼohe dania ami föna ndra gubernur hegöi razo börö döigu. Daʼö ginötö khömi ba wamaduhuʼö khöra.”​—Luka 21:12, 13