Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Fahaʼö Ndra’ugö ba Cerita-Cerita Zura Niʼamoniʼö

 FAMAHAʼÖ 85

Ifadöhö Niha Yesu ba Luo Sabato

Ifadöhö Niha Yesu ba Luo Sabato

Fatuwu ndra Farizaiʼo khö Yesu ba laʼalui lala wamunu yaʼia. Lawaʼö wa tebai ifadöhö niha ba ngaluo Sabato, börö me luo wolombase daʼö. Me samuza luo Sabato, iʼila Yesu niha sauʼa iʼotarai me tumbu mangandrö-ngandrö kefe ba zinga lala. Imane khö ndra nifahaʼönia, ’Mifaigi hewisa waʼabölö Lowalangi ba wanolo ira matua daʼa.’ Ifaruka ba dambu gilonia Yesu aefa daʼö ifagule ba hörö ndra matua daʼö. Imane Yesu, ’Ae sasai hörömö ba mbaʼa Ziloa.’ Möi isasai hörönia, ba daʼö zi oföna sibai awena iʼila hadia ia.

Tokea fefu niha lamane, ’Hadia daʼa ndra matua sangandrö-ngandrö kefe mböröta, mazui si fakhili-khili khönia?’ Imane ira matua andrö, ’Yaʼia, yaʼodo!’ Manofu ira, ’Hewisa wa tola öʼila niha?’ Me ifatunö khöra hadia zalua, laʼohe ia khö ndra Farizaiʼo.

Imane ira matua daʼö khö ndra Farizaiʼo, ’So nifagule Yesu ba hörögu, aefa daʼö ifatenge ndraʼo enaʼö usasai hörögu. Me no ufalua daʼö, tola uʼila niha.’ Lamane ira Farizaiʼo, ’Na ifadöhö Yesu niha ba ngaluo Sabato, tatu tenga moroi khö Lowalangi waʼabölönia.’ Hizaʼi lamane tanö böʼö, ’Na tenga moroi khö Lowalangi waʼabölönia, tebai ifadöhö niha.’

Lakaoni zatua ndra matua daʼö ira Farizaiʼo ba manofu ira, ’Hana wa tola iʼila niha onomi  andre?’ Ataʼu zatua niha daʼö börö me lawaʼö ira Farizaiʼo na so zi faduhu tödö khö Yesu ba lafofanö ia moroi ba nahia waʼowulo. Börö daʼö lamane, ’Lö maʼila, misofu manö khönia.’ Manofu ndra Farizaiʼo khö ndra matua daʼö irege imane, ’No ufatunö khömi fefu, hana wa misofu-sofu nasa?’ Mofönu sibai ndra Farizaiʼo ba lafofanö ndra matua daʼö.

Ifalukhaisi ndra matua daʼö Yesu ba manofu ia, ’Hadia mamati ndraʼugö khö Mesia?’ Imane ira matua andrö, ’Na uʼila haniha ia, ba mamati ndraʼo khönia.’ Imane Yesu, ’Yaʼodo Mesia.’ Sökhi sibai gamuata Yesu lö? Tenga ha ifadöhö ndra matua daʼö, hizaʼi itolo göi enaʼö mamati ia khö Mesia.

”Fasala sibai ami, börö me lö aboto ba dödömi Mbuku Niʼamoniʼö hegöi faʼabölö Lowalangi.”​—Mataiʼo 22:29