Faigi nösi

Faigi ba gangolifa

Samaduhu’ö Yehowa

Fili li Nias

 FAMAHAʼÖ 86

Isusugi Lazaro Yesu

Isusugi Lazaro Yesu

So datölu zi fahuwu khö Yesu si toröi ba Mbetania. Yaʼia daʼö Lazaro ba darua dalifusönia alawe, Maria faoma Marata. Samuza maʼökhö me so Yesu ba Mberea, lafaʼoheʼö goroisara ira Maria faoma Marata, ’Abölö-bölö sibai wökhö Lazaro. Aliokö aeʼe ba daʼa!’ Lö iʼanemaiʼö mofanö Yesu, hizaʼi ibaloi dua hari tö. Aefa daʼö, imane Yesu khö ndra nifahaʼönia, ’Miʼaine, mofanö ita ba Mbetania. No mörö Lazaro ba möido ususugi ia.’ Lamane ira sinenge, ’Na no mörö Lazaro ba alio döhö ia.’ Andrö, ifatunö khöra Yesu zindruhunia, ’No mate Lazaro.’

Me ofeta Yesu ba Mbetania, no öfa hari saʼae me no mukoʼo Lazaro. Ato niha zi möi mondrara tödö Marata faoma Maria. Me irongo Marata wa tohare Yesu, iʼaliokö wamalukhaisi Yesu. Imane, ”He Soʼaya, na so menaʼö ndraʼugö ba daʼa, ba lö mate dalifusögu.” Imane khönia Yesu, ’Ifuli auri dalifusömö. Hadia faduhu dödöu Marata?’ Imane, ’Faduhu dödögu wa ifuli auri ia na inötö wemaoso dania.’ Imane Yesu, ”Yaʼodo wemaoso ba faʼauri.”

Aefa daʼö, möi Marata wangombakha khö Maria wa no tohare Yesu. Fagohi Maria wamalukhaisi Yesu ba ato göi zoloʼö yaʼia. Ituhi danö Maria föna Yesu ba iduhugö wege-ege. Imane, ’Na so ndraʼugö menaʼö ba daʼa Soʼaya, tatu manö lö mate dalifusögu!’ Iʼila wa abu sibai dödö Maria, börö daʼö meʼe göi Yesu. Lamane niha sato me laʼila meʼe ia, ’Sindruhu wa iʼomasiʼö sibai Lazaro andrö Yesu.’ Hizaʼi, so göi zangumaʼö, ’Hana wa lö itolo nawönia?’ Hadia nifalua Yesu?

Möi Yesu ba lewatö Lazaro si no laduhö faoma kara sebua. Iwaʼö Yesu enaʼö laheta gara daʼö. Imane Marata, ’Öfa hari saʼae me no mukoʼo! Tatu manö aböu.’ Hizaʼi, laheta manö gara andrö ba mangandrö Yesu, ’He Ama, saohagölö me no öfondrondrongo niwaʼögu. Aboto ba dödögu wa hasambalö öfondrondrongo niwaʼögu. Hizaʼi, ebua ligu wahuhuosa khöu enaʼö aboto ba dödö ndra niha daʼa wa yaʼugö zamatenge yaʼo.’ Aefa daʼö, muʼao ia,  ”He Lazaro, ae baero!” Lö ara, alua zahöli-höli dödö. Möi baero moroi ba lewatö Lazaro si no labukusi faoma nukha. Imane Yesu, ”Mitotoʼö nukha andrö khönia enaʼö tola mofanö ia.”

Ato niha zangila salua andrö ba mamati ira khö Yesu. Hizaʼi, so zangombakha khö ndra Farizaiʼo. Iʼotarai daʼö, omasi ndra Farizaiʼo wamunu Lazaro faoma Yesu. Samösa moroi ba gotalua zinenge si 12 yaʼia daʼö Yuda Kariota ilau zi lö hede-hede ba möi ifalukhaisi ndra Farizaiʼo ba wanofu, ’Hauga mibeʼe khögu na utolo ami enaʼö misöndra Yesu?’ Fao dödöra wamuʼa khönia 30 ngawua firö. Ibörögö iʼalui lala Yuda hadia ginötö si tefaudu ba wosarakö Yesu khö ndra Farizaiʼo.

”Lowalangi wangorifi khöda, Lowalangi andrö, ba Yehowa, Soʼaya andrö, ba iʼila lala ba wangefa ba waʼamate.”​—Zinunö 68:21